Lɛɛ gbɔwɔ ɓa 11 - Yálá laawoo hɛɓɛ (dc)Mɛ̨nį nwąnąą bow nąn 1 Yai-Laa yɛ Moisə ɓa: «Gáá pai mɛ̨nį nwąnąą gbəli laai Eziptə tɔɔmun ma da nwɔ nuą kəlee. Yili pulu, gaa pai ɓoi kaa, ka kulɔ di wɔ lɔi hu. Di kaa pai ka kpɛi kpɔ tɛ̨ɛ̨tɛ̨ɛ̨, ka kulɔ di wɔ lɔi hu. 2 'Li, ə́ mo Israɛlə lonnii kəlee diɛ, ɉinąą mąn nɛ̨ąą mąn, nu kəlee ə wali hɛnɲaŋą da hɛni hɛnɲaŋą hvɛli ɉeeyɔwɔ ɓa.» 3 Yai-Laa ə Israɛlə lonnii wɛli too Eziptə nuą diɛ. Yii ɓaa Moisə nwɛi, mąąwiai kɛ Eziptə nɔi nuą kəlee ɲɛ̨i ɓa, ə mą kɛ tɔɔmun nwɔ nu kpɛa-kpɛai da nɔi lonnii kəlee. 4 Moisə yɛ mą: «Yai-Laa woo ka, yɛ diɛ: ‹Kwiihɛ̨ą, gaa pai tɛɛi Eziptə lɔi hu nąą kəlee. 5 Lon dɔlɔɔɠaai kpɔ Eziptə lɔi hu, gəlee kaa pai haai; ə mą kɛ ə́ lon dɔlɔɔ kɛi pa heei a tɔɔmun, nuwɔ nɛ̨ąą lon dɔlɔɔɠaa, da daatɛlɛɛɠaa kəlee lon dɔlɔɔɠaa. 6 Wɔlɔ woo kaa pai kɛi Eziptə nąą kəlee, ɲɔ̨nwɔ̨mą hvo ta kɛ li, ɛlɛɛ, da hvo nwɔ̨nɔ̨ pai kɛi. 7 Israɛlə lonnii pɔɔli pələ nwɛi, yilɛ hva kpəɠi laa nu ɓa, ə mą kɛ, taatɛlɛɛ ɓa. Yili pɔ pələ ɓə ka gɔlɔn na kaa Yai-Laa aa Eziptə nuą da Israɛlə nuą di lɔwai tɔɔ. 8 Nąąlɔwai, ə́ wɔ nu kpɛa-kpɛa kəlee kaa pai pɛlɛi gɔ́wɔ́ mu di kwɛli hvilɛn mą́ą́, diɛ kɛ mą́ą́: «Yɛ́ ká ə́ wɔ nuąi, ka kulɔ ku wɔ lɔi hu», a kɛ lɔ tii ŋą́ą́ mą li.›» Moisə ə kulɔ tɔɔmun bɔɔli a líiholi kɛnɛ̨. 9 Yai-Laa yɛ Moisə ɓa: «Tɔɔmun hvo bɔ hvo nwəli tɔɔ ka woo ɓa, bələi mąn ŋą́ą́ kpalo mɛ̨nį tamąą kɛ la Eziptə lɔi hu.» 10 Moisə da Aarɔn di gbalo mɛ̨nįɠaai ti kəlee kɛ Eziptə tɔɔmun nííla, kɛlaa, Yai-Laa, ə tɔɔmun gili walawala, hvo ɓo Israɛlə lonnii diɛ, di hvo kulɔ nwɔ lɔi hu. |