Lɛɛ gbɔwɔ ɓa 10 - Yálá laawoo hɛɓɛ (dc)Mɛ̨nį nwąnąą mɛ̨ihaaɓa nąą: Peeləɠaa 1 Yai-Laa yɛ Moisə ɓa: «'Li ə́ həli Eziptə tɔɔmun ma, mąąhɔlɔɓo, ɲą́ą́ ɓə gili walawala, da nwɔ ɲɛ̨itɔwɔ nuąi, ə gɛ, ŋį́ gbɔ́wɔ́ lɛ diɛ kwɛlɛɛn mɛ̨nįɠaa hu. 2 Ŋą́ yili kɛ tii, ə gɛ, bələi ŋį́ mɛ̨nįɠaa kɛ la Eziptə lɔi hu, ka gɔ́lɔn a Yai-Laa. Ə́ pa kɛ ɉukulɔi ə́ lonnii diɛ da di wɔɔ lonnii.» 3 Moisə da Aarɔn di li Eziptə tɔɔmun bɔɔli, diɛ mą: «Hebreuɠaa di wɔ Yálái a Yai-Laa, nwoo ka, yɛ diɛ: Ə́ wɔ kili walawalai ŋɛ̨i ə́ kaa ɉui, lə yələ ɓə yá kpɛla la mą, ə́ ə́ kpɔwɔ mąąyɛɛ? 'Ɓo nwɔ́ nu huwui ɓa di li di kwɛli hvilɛn mą́ą́. 4 Yá lənə nwɔ̨nɔ̨ mą, gáá tinąą pai ɓoi peeləɠaa diɛ, di pɛlɛ ə́ wɔ lɔi nąą kəlee. 5 Di kaa pai pɛlɛi nɔi mɛ̨i nąą kəlee, nu hva kpɛli nɔi ɓa kaa. Ɉihɛn yiiɠaai ɉanwon dulɔ ə nɛɛ, di kaa pai gəlee mįi, wulu ta laa hva lɛɛ mą, hɛn da hva lɛɛ ɲɛɛ kɔ́wɔɠaa hu. 6 Di kaa pai ə́ yəi bɛlɛ́n vɛɛi, di ə́ wɔ nu kpɛa-kpɛai yəi bɛlɛ́n vɛɛ, ə mą kɛ nɔi hu nuą kəlee. Gaa pai kɛi a mɛ̨nįi da hvo ta laa li ka wɔ lɔi ɓa, ə həɠə ka kalani di wɔ kalani diɛ, ə həli la yiihu ɓa.» Moisə ə kulɔ tɔɔmun ɲəi bɛlɛ́n, ə li. 7 Eziptə lɔi ɲɛ̨itɔwɔ nuą diɛ tɔɔmun ma: «Nui ŋɛ̨i kaa pai lɛɛi mɛ̨nį nwąnąą laai guɔ, ə lɛɛ ɉu hąą mįnɛ̨ lɔwai? 'Ɓo diɛ di li, di kwɛli hvilɛn di wɔ Yálái Yai-Laa ɓa. Hvó gɔlɔn yɛ́ kɛ Eziptə lɔi yee ka tii lɛɛi ɉu?» 8 Di pənə di Moisə da Aarɔn təli tɔɔmun nííla, yili yɛ diɛ: «Ka pɛli ka li ka kwɛli hvilɛn Yai-Laa ka wɔ Yálái ɓa; kɛlaa, gbɛɛ nuą ɓə pai lii?» 9 Moisə yɛ mą: «Ku lonnii, ku wɔ nu pɔlɔ-pɔlɔɠaa, ku yəi taatɛlɛɛɠaai kəlee, kwa diɛni ɓə lii. Mąąhɔlɔɓo, ku kaa lii Yai-Laa mąąwiɛ hɛli pui.» 10 Tɔɔmun yɛ diɛ: «Akɛ ŋą́ ka lɛɛ laa ka li ka ka lonnii, Yai-Laa ə lɛɛ ka pɔ! Kɛlaa, bələi ka wɔ kiliŋąhiɛ ɲɔ̨nwɔ̨ɔ̨ la, kaa kpinįi kaa gaa! 11 Yili hvo pai pɛlii; kaai a ɉinąą 'ka li ka kwɛli hvilɛn Yai-Laa ɓa. Hvo gaai yili lɔ ɓə ka káá ɉu hvɛli.» Ə kɛ lɔ tii, diɛ Moisə da Aarɔn di kpɛ tɔɔmun nííla. 12 Yai-Laa yɛ Moisə ɓa: «'Ə́ yee haŋą Eziptə lɔi mɛ̨i, ə́ peeləɠaa təli di pɛlɛ nɔi mɛ̨i nąą kəlee, yii woloi ɉanwon ə nɛɛ, di gəlee mį́i.» 13 Moisə ə nwɔ tunwɔ̨n haŋą Eziptə lɔi mɛ̨i, Yai-Laa ə ɓo hvaŋą kɛnɛ̨ ta ɓa, yɛ həɠə hvóló kulɔi pələ. Vaŋą ə hvóló tɔ̨nɔ̨ da kpinį tɔ̨nɔ̨ kɛ yɛ tɛɛ; yələwala pɔ, vóló kulɔi pələ hvaŋą ə pa a peeləɠaa. 14 Beeləɠaa di pɛlɛ Eziptə lɔi nąą kəlee. Gbulu kɛnɛ̨ɛ̨ kɛ dɛɛ gɛi ɓa, ɲɔ̨nwɔ̨mąn hvo ta kɛ li, da hvo nwɔ̨nɔ̨ pai kɛi. 15 Beeləɠaai ti di pɛlɛ nɔi ɓa nąą kəlee, di nɔi ɓa kpinį. Di galaɠaa kəlee mį́i, di nwuluɠaa kəlee ɓá mį́i, hɛn kpɔ ɉanwon ə nɛɛ, di gəlee mįi. Wulu lɔpee ta laa hvo lɛɛ mą, ə mą kɛ ɲɛɛ kɔ́wɔɠaa hu. 16 Tɔɔmun ə Moisə da Aarɔn di təli kpɔ a mąąhulaa, yɛ diɛ: «Ŋą́ą́ nɛ̨ŋɛ̨n ɉəɠə Yai-Laa ka wɔ Yálái ɓa, ŋą́ą́ mɛ̨nį ɲɔ̨n gɛ a kaa. 17 Yii nwɛi, 'ka mą́ą́hvaalɛɛ nwɔ̨nɔ̨. Ka ka woo tɛ Yai-Laa ka wɔ Yálái ɓa, Ə ɉaa ŋɛ̨i həɠə búlú.» 18 Moisə ə həɠə tɔɔmun bɔɔli, ə li ə nwoo tɛ Yai-Laa ɓa. 19 Yai-Laa ə vaŋą ɲɛ̨i tinɛ̨n, hvaŋą kɛnɛ̨ ta ə həɠə hvóló tooi pələ, ə beeləɠaai ti kəlee həɠə, ə li ə di pu veegbɔnɔ̨ gboloyá hu. Beeləi tii dɔ̨nɔ̨ kpɛli hvo lɛɛ Eziptə lɔi hu. 20 Bələi mąn ə kɛ la ti, Yai-Laa ə tɔɔmun gili walawala, hvo gɛ hvo ɓo Israɛlə lonnii diɛ. Mɛ̨nį nwąnwąą mɛ̨inąąn nąą: Kpini 21 Yai-Laa yɛ Moisə ɓa: «'Ə́ yee tɛ ɲələi! Kpini ə pɛlɛ Eziptə lɔi mɛ̨i, nuą diɛ di yee pɛlɛ ɓɛ-ɓɛ.» 22 Moisə ə ɲee tɛ ɲələi, kpinį ə pɛlɛ Eziptə lɔi nąą kəlee, ə kɛ a hvóló haaɓa. 23 Voló haaɓai tii yee mu, nu ta hvo pɛli mɛlan gaai, nu ta hvo pɛli həɠəi ɉeei, kɛlaa, Israɛlə lonnii pɔɔli pələ, kɛɛ pɔ̨nɔ̨ ə kɛ laa. 24 Tɔɔmun ə Moisə təli, yɛ mą: «'Ka li, ka kwɛli hvilɛn Yai-Laa ɓa, ka ka yəi bɛlɛ́n nuą; ka wɔ taatɛlɛɛɠaai dɔ̨nɔ̨ kpɛli hvo lɛɛ ka pɔ, ka gəlee lɛɛ ɓɛ.» 25 Moisə yɛ mą: «Yɛ́ ɓə pai ɉaláá hɛnŋąą kɛi, yii kwa gulɔ da yii mąn kwa gəlee kələn, a Yai-Laa ku wɔ Yálái mąąwiɛ hɛn? 26 Ku kaa lii a ku wɔ taatɛlɛɛɠaai kəlee, dɔ̨nɔ̨ kpɛli hva lɛɛ ɓɛ. Mąąhɔlɔɓo, daatɛlɛɛɠaai ti lɔwai ɓə ku kaa lii da həɠəi laa, kuɔ gɛ a haláá, Yai-Laa ku wɔ Yálái ɓa. Kɛlaa, yii ku ɉəɠəi ɉu, ku hvo gɔlɔn, hvo kɛli kwa həli ɓɛi ku kaa lii laa.» 27 Yai-Laa ə Eziptə tɔɔmun gili walawala, hvo gɛ hvo ɓo Israɛlə lonnii diɛ, di hvo li. 28 Tɔɔmun yɛ Moisə ɓa: «'Həɠə ɓɛ ŋɛ̨i tɔɔni! Hvo kɛa pənə, hvo pa ɓɛ. Ɲələi kɛa yá paa la ɓɛ, yá haa.» 29 Moisə yɛ mą: «Bələi ti ə́ mo la, və́ pai kɛa pai ɓɛ, ə́ pɔɔli.» |