Egaa 2 - Yálá laawoo hɛɓɛ (dc)Yálá hee pɛlɛ́ nįnɛ̨ nwɔ mąąwiɛ 1 Dariusə nwɔ tɔɔlaa gwɛlan veelɛ lɔwai, ɲąnin mɛ̨ihveelɛ nwɔ hvóló pow hveelɛ kɔ́w tɔ̨nɔ̨ yələ, Yai-Laa ə pənə ə wɛlɛɛ ɓo gwəi mɛ̨nį hukulɔ mun Aze ɓa, yɛ mą naa həli. 2 Mo Saltiɛlə lon ɉulɔnu Zorobabɛlə ɓa, yii gaa a gbahalanąmą Ɉuda lɔi hu, da Yehosadakə lon ɉulɔnu Ɉosue, yii gaa a haláá laa həli mun gɛnɛ̨, ɛlɛɛ, da nuąi kpɔ həɠə luwɔlaa hu diɛ pa, yɛ diɛ: 3 «Akɛtii, nu ta kaa ka lɔwai, yii wɔlɔ Yálá hee pɛlɛ́ tɔlɔ tii nwɔ mąąwiɛ kaa? Akɛtii, ka káá gaai ləi háákələi? Ka hvo mɔ̨ɔ̨ gaai kaa kɛ diɛ: bɛlɛ́ tɔlɔɔ tii nwɔ mąąwiɛ aa lɛɛ a kpɛli-kpɛli? 4 Yili ɓə gaa mą, ɲą́ą́ Yai-Laa, gɛ́ kɛ yɛ́: Zorobabɛlə ə́ hvaŋąlɔ! Yehosadakə lon Ɉosue, yɛ́i ə́ kaa a haláá laa həli mun gɛnɛ̨, ə́ hvaŋąlɔ! Nwɔ nuą kəlee, ka ka hvaŋąlɔ! Ɲą́ą́ Yai-Laa, nwóó li: 'Ka ka yee pɛlɛ gólo ɓa, gáá pai kɛi ka pɔ, Yai-Laa Mɛ̨nį Kəlee ŋą Hééɓomun woo li. 5 Ɓɛlɔwai ka kɛi kulɔ la Eziptə lɔi hu, ŋą́ nwóó kwɛlɛ káá, gɛ́ káá: Gáá ka pɔ, ka hvo ɲɔw. 6 A tɛ̨ą, Yai-Laa Mɛ̨nį Kəlee ŋą Hééɓomun kaa moi kaa, yɛ kaa: ɉu hvo kwɛa li, gáá pai yələkɔlɔn da lɔi, ə mą kɛ gboloyá di kpɛlin ɉi. 7 Yai-Laa Mɛ̨nį Kəlee ŋą Hééɓomun yɛ nwɔ̨nɔ̨ diɛ: Gáá pai hį́i kəlee tumoi, di yəi hɛnŋąą walawalaɠaa da di yəi hɛn gɔwɠaa kəlee kaa pai ɓɛ, ɉéé pɛlɛ́i ŋɛ̨i nwɔ mąąwiɛ kaa pai kɛnɛ̨i. 8 Yai-Laa Mɛ̨nį Kəlee ŋą Hééɓomun yɛ nwɔ̨nɔ̨ diɛ: A tɛ̨ą, hɛni da walii gaa lɔi mɛ̨i, gəlee kaa kpɔ a nwɔ́ɔ́. 9 Ɲą́ą́ Yai-Laa Mɛ̨nį Kəlee ŋą Hééɓomun ɉéé pɛlɛ́ nįnɛ̨i ŋɛ̨i, nwɔ mąąwiɛ kaa pai kɛnɛ̨i ə tɛɛ la dɔlɔɔ ɓa. Ɲą́ą́ Yai-Laa Mɛ̨nį Kəlee ŋą Hééɓomun, ɲą́ą́ ɓə mįnɛ̨ həɠə kaa, gɛ́ kaa: Gɛɛnąą ŋɛ̨i ɓa ɓə, ka káá pai liilaa hɔlɔɓoi laa.» Akɛ woo hon naa hvəi, hɛn gəlee kɔ́hɔɓoɔi 10 Dariusə nwɔ tɔɔlaa gwɛlan veelɛ lɔwai, ɲąnin mɛ̨inąąn nwɔ hvoló pow hveelɛ kɔ́w nąąn ɲələ, Yai-Laa ə mɛ̨nį ɓo gwəi mɛ̨nį hukulɔ mun Aze laaləi nwɔ̨nɔ̨, yɛ diɛ: 11 «Aze, mąąnikɛi ŋɛ̨i kɛ ɉaláá laa həli nuą diɛ, yɛ diɛ: Yai-Laa Mɛ̨nį Kəlee ŋą Hééɓomun yɛ: 12 Akɛ gbəli hu, da haláá laa həli, ɉuwɔ kpuwɔ ta a lɛɛ ɉaláá laa həli mun da yəi ɉəɠə won ɉu, akɛ ɉəɠə won ŋɛ̨i ɉuwɔ kaa ɉu, a hee lopɛ̨in ɓa ɲąmą ə kɔ́ mą, a wala kɛ tii ə hee nɔw ta ɓa, yili hvo mą, ə too nɔɔ hu, a wala kɛ tii nwulɔ hu, akɛti, da gɔ̨nɔ̨n tii laakwɛlanmo kɛa Yálá ɓa?» Mąąnikɛi tii Aze ə gɛ, ɉaláá laa həli nuą di nwoo ŋąą pənə diɛ mą: «Kpaa-o!» 13 Aze ə pənə nwɔ̨nɔ̨ ə di mąąnikɛ, yɛ diɛ: «Akɛ kɛa nu ta a ɲee pɛlɛ powa ɓa, mąą nu ə kɔ́hɔɓo, a li a ɲee pɛlɛ kɔ̨nɔ̨n da ɓa, gɔ̨nɔ̨n tii a kɔ́hɔɓo?» Ɉaláá laa həli nuą diɛ mą: «Ee!» 14 Aze ə mo kɛa diɛ nąąlɔwai; yɛ diɛ: «Yili ɓa, Yai-Laa yɛ diɛ: Bələ kpɔlɔ ɓə nuą ŋɛ̨i kaa la, pələ kpɔlɔ ɓə nu huwui ŋɛ̨i kaa la, pələ kpɔlɔ ɓə di kɛ kólo kaa la ɲɛ̨i ɓa. Hɛn kpɔ da gulɔ mą́ą́ a haláá, ɉaláá kulɔi gəlee kɔ́hɔɓoɔi.» 15 Ə həɠə háákələi ɓa, ka ka kiliŋąhiɛ mɛ̨nį pai kɛi mą. Gɛɛ di hvo Yai-Laa hee pɛlɛ́ gwɛni laa gee mɛ̨i. 16 Akɛtii, nu a kɛi tɛ kələ hu, mɔ̨nun gəgən ɉu pow hveelɛ həɠə mɛ̨nį ɓa, a li ə pow gbən gaa gələ́ hu, lə ɓə a kɛ a mąą nu? Ɓɛi ŋɛ̨i da nɔɔ ya kulɔ laa, nu a kɛi li liitɛlɛ pow lɔɔli həɠəi, a li ə pow hveelɛ kaa, lə ɓə a kɛ a mąą nu? 17 Ŋą́ą́ ka kɛ kóloɠaa kəlee hu kala, ka wɔ hihɛnŋaai kəlee daa kpala, ŋą́ą́ hawon dulɔ pu, ka hvo gɛ li, ka hvo pənə, ka hvo pa ɲą́ą́ ŋɛ̨i bɔ́, Yai-Laa woo li. 18 Mɛ̨nįɠaai pai kɛi, ə həɠə háákələi ɓa, ka mąąkpɛɛ kpɔ a nɛlɛɛ; voló ŋɛ̨i di Yai-Laa hee pɛlɛ́ gwɛni laa la, gaa a ɲąnin mɛ̨inąąn nwɔ hvóló pow hveelɛ kɔ́w nąąn ɲələ, nąą kili ə lɛɛ ka ŋą. 19 Kɛlɛi mɔ̨nun gɔ́w tɔ̨nɔ̨ kpɛli hvo kɛa ka yəi gələ́ɠaa hui ee? Viɲəɠaa, ɓolaa wuluɠaa, nwului ŋɛ̨i da kɛ mą grenadə da olivə wuluɠaa, di hvo ɓá. Ə həɠə háákələi ɓa, gáá pai lúwɔ́ tooi kaa. Yai-Laa ə nwoo kwɛlɛ nwɔ nu həɠɛɛ ɉu Zorobabɛlə ɓa 20 Ɲąnin mɛ̨inąąn tii nwɔ hvóló pow hveelɛ kɔ́w nąąn ɲələ tɔ̨nɔ̨i tii hu, Yai-Laa ə wɛlɛɛ ɓo nwɔ̨nɔ̨ Aze ɓa, yɛ mą: 21 «'Mo Zorobabɛlə ɓa, yai gaa a gbahalanąmą Ɉuda lɔi hu, yɛ mą: Gáá pai yələkɔlɔn da lɔi di kpɛlin ɉii. 22 Ŋą́ tɔɔɓɛlaa di wɔ huwalawala too, wotoloɠaa da mɛ̨i hee ɓo nuą da too, hoo da mɛ̨i hee ɓo nuą di laa nɔi ɓa, diɛ di kee paa. 23 Yai-Laa Mɛ̨nį Kəlee ŋą Hééɓomun yɛ diɛ: Voló tii hu, gáá pai tiɓo ta tɛɛ ə pɔ, Zorobabɛlə, Saltiɛlə lon ɉulɔnu, yɛ́i ə́ kaa a nwɔ́ tímun. Ə́ kaa pai kɛi a ə́ hviɛlaɓoɔ ɲɛ̨́i ɓa, mąąhɔlɔɓo, ɲą́ą́ ɓə ə́ həɠə ɉu. Yai-Laa Mɛ̨nį Kəlee ŋą Hééɓomun woo li.» |