Dutɛrɔnome 9 - Yálá laawoo hɛɓɛ (dc)Israɛlə hva pɛli nwun dɛi 1 Israɛlə lonnii, ka ka wəli tɔɔ! Ka káá pai Ɉurdɛn yá teen ɉii háákələi. Nu huwuɠaa ŋɛ̨i di kpɛa kpɛaa di tɛɛ kaa, di hvaŋą kɛnɛ̨ dɛɛ kaa, ka káá lii di wɔ lɔi kulɔi di yəi da di wɔ taaɠaai, taa kpɛa kpɛaɠaa di mąątinɛnŋąą a hįį muhəɠɛɛ ləɠə ləɠə. 2 Di kaa a Anakə nuą, di kaa a nu huwu kɛnɛ̨ di yee muhəɠɛɛ. Gbaɠala kaa kaa, kaa ta mɛ̨n, diɛ mo ŋɛ̨i Anakə nuą laa mɛ̨i, diɛ kɛ diɛ: «Gbɛɛ ɓə a pɛli tɔɔi Anakə nuą tɔwɔ?» 3 Ka káá pai gili kɔ́lɔn ɉii kaa diɛ, Yai-Laa ka wɔ Yálái ɓə pai tɔɔi ka ɲɛ̨i tɔwɔ yɛ Ɉurdɛn teen a kaa, yɛ nwɔ̨n gbəɠiɛ; yaa tii ɓə pai Anakə nuą huwu pui, yɛ di tɛɛ ka pɔ, ka káá pai nɔi kulɔi di yəi, ka di kpɛɛ yɛnɛ̨ɛ̨ ɲąąɓa, yɛ bələi Yai-Laa ə di laakwɛlanmo la kaa. 4 Yai-Laa a pa nuą tii kpɛi ka tɔwɔi, ka tɔɔ kaa kɛ diɛ: «Ku túwɔ́ pələ lɛlɛɛ moɔ ya ɓə gɛ, Yai-Laa yɛ ku lɔ la nɔi ŋɛ̨i hu, kuɔ hee laa.» Nu huwui tii hɔn mə gɛ, yɛ nɔi kulɔ la di yəi, yɛ dɛɛ ka pɔ. 5 Ka tələnmo mɛ̨nį hvəi, ka kwəi kili lɛlɛ mɛ̨nį hvəi, ka káá pai nɔi tii hɔlɔɓoi la a ka kwɛlin. Tɛ̨ąi gaa mą, ya ɓaa: nu huwui tii di hɔn ɲɔ̨n bələ ɓə gɛ Yai-Laa ka wɔ Yálá yɛ di wɔ lɔi kulɔ la di yəi, yɛ dɛɛ ka pɔ. Ə yili kɛ tii nwɔ̨nɔ̨, mąąhɔlɔɓo, aa wɔlɔ kɛ gwɛla ka nąnni a: Abrahamə, Isaakə, da Ɉakɔbə ni diɛ, yili ɓə gɛ yɛ bɔ mɛ̨nį kɛ la. 6 Mąąnɛ̨ɛ̨ ka gɔlɔn kaa kɛ, ka haŋą bələ hvəi gɛ Yai-Laa ka wɔ Yálái yɛ nɔi lɛlɛɛ ŋɛ̨i tɛɛ la ka pɔ. Ka káá a nu huwu nwun ɉu walawalaa. Israɛlə ə ɉɔn gɛ 7 Ka kili ə kɛ ɉu kaa diɛ, ka Yai-Laa ka wɔ Yálái liiholi nɔi pun ɉu, ka hvo lɛ̨ą mɛ̨nįi tii ɓa. Ə həɠə ka kulɔ yələ ɓa Eziptə lɔi hu, ə lɛɛ ɉu ka həli la ɓɛ, ka kɛi lɔ tɔɔ Yai-Laa la. 8 Ká Yai-Laa liiholi mɛ̨nį kɛ Horɛbə yee ɓa. Yai-Laa lii ə holi ka pɔ, yɛ kɛ ə ka hukala. 9 Ɓɛlɔwai ŋą tɛ la gwɛni ɓɛlaɠaa həɠəi ɲee nwuɔ̨, a gwɛni ɓɛlaɠaa tii mįnɛ̨i Yai-Laa ə naa gwa diɛni gu lɔwai, ɉu wooɠaa pɛ̨ɛ̨ kɛ mɛ̨i. Ŋą́ hvóló pow nąąn kpinį pow nąąn gɛ ɲee nwuɔ̨, və́ kɔ̨nɔ̨n mįi, və́ yá kpələ. 10 Yai-Laa ə gwɛni ɓɛla hveelɛi tɛɛ bɔ́ yii ə bɛ̨ɛ̨ a ɲeekpiɛ. Nwooɠaa kpɔ Yai-Laa ə di ɓo, a ka mąą mɛ̨nį, ɲee nwuɔ̨ nwɔ̨n ɉąąi, a ɲąą kpɔn ɲələ, gəlee pɛ̨ɛ̨i kɛ di mɛ̨i. 11 Hvóló pow nąąn da kpinį pow nąąn gulaa ɉu ɓə, Yai-Laa ə gwɛni ɓɛlaɠaa tɛɛ la bɔ́, a mįnɛ̨ kwɛni ɓɛlaɠaa. 12 Nąąlɔwai Yai-Laa yɛ mą́ą́: «Ə́ muhəɠə, ə́ kɛhu ə yɛɛ! Mąąhɔlɔɓo, yɛ́ nuąi daa túwɔ́ pələ ɲɔ̨n gulɔ. Ə́ wɔ nuą ŋɛ̨i ə́ di kulɔ Eziptə lɔi hu, ɉu hvo nii kpɛli kwɛa li; bələi ŋį́ nɛ diɛ, daa həɠə mɛ̨i, daa kwɛli həɠeen daa bɛli a hɛn da mąąnįnįn.» 13 Ɛlɛɛ Yai-Laa yɛ mą́ą́: «Ŋą́ą́ nuą tii kaa, nu huwu nwun ɉuwalawalaa ɓaa diɛ! 14 Nɛ́ɛ́ laa ŋį́ di nwun na pili, gáá di laa kpɛɛi yələkɔlɔn mu; kɛlaa, gáá ə́ kɛi a nu huwu hvaŋą kɛnɛ̨ɛ dɛɛ diɛ.» 15 Ŋą́ pənə ŋį́ ɲee yɛɛ, ɲee tii kɛ yɛ nwɔ̨n ɉu; mįnɛ̨ kwɛni ɓɛla hveelɛi di ɓo ɲéé ŋą. 16 Ŋą́ gaa kpɔ tii, kaa kɛ nɛ̨ŋɛ̨n ɉəɠə Yai-Laa ka wɔ Yálái ɓa; a gɛ mɛ̨nį ka kwɛli həɠeen, kaa nįŋɛ̨ lon bɛli la; ɛlɛɛ, ɉu hvo mą kɛ kwɛa li, bələi Yai-Laa ə nɛ kaa, kaa mąn həɠə mɛ̨i. 17 Nąąlɔwai, ŋį́ gwɛni ɓɛla hveelɛi hon a ɲéé kəlee, ŋį́ bili, ŋį́ di huyali yali ka ɲɛ̨i ɓa. Moisə ə nuą mąą nɛ̨ɛ̨mąą hvə 18 Ŋą́ too nɔi ɓa Yai-Laa líila, yɛ bələi tɔlɔɔ tɔlɔɔ ŋį́ gɛ la; hvóló pow nąąn kpinį pow nąąn ɲee mu. Və́ kɔ̨nɔ̨n da mįi, və́ gbələ, ka wɔ nɛ̨ŋɛ̨nŋąą mąą mɛ̨nį ɓa. Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ka kɛi gɛ, kaa nwąną lɔ la. 19 Níí hɛlɛnŋąąi kɛ Yai-Laa nwɔ liiholi da nwɔ liikələn gwəi mɛ̨nį tii ɓa. Hvo gaai, niiholiɛ kɛ ka pɔ, yɛ kɛ ə ka nwun napili. Kɛlaa Yai-Laa ə nwəli tɔɔ nwɔ̨nɔ̨ nwóó ɓa mɛ̨nį tii hu. 20 Aarɔn yaa kpɛli mąn, Yai-Laa ə níiholi bɔ kpɔ kɛnɛ̨, yɛ kɛ kpɔ ə nwun na pili, ŋį́ Aarɔn mąąnɛ̨ɛ̨ mąą hvə nwɔ̨nɔ̨ Yai-Laa ɓa. 21 Ɛlɛɛ, ɉɛn ŋɛ̨i ka bɛli a nįŋɛ̨ lon, ŋį́ ɉəɠə, ŋį́ ɉuyaləyalə, ŋą gələn; ŋį́ vunwɔ, ɲái tii kɛi həɠə ɲee ɓa pələ, ŋį́ vunwɔ pu ɉu. 22 Ɓɛlɔwai gu kɛ la Taveera da Masa, da Kivrotə-Taawa, ka Yai-Laa liiholi gɛɛnąąɠaa tii. 23 Ɛlɛɛ gu kɛɛ Kadɛsə-Barnea, ɓɛlɔwai Yai-Laa ə ka tɔɔ la yɛ kɛ kaa: «Ka li, nɔi gáá dɛɛi ka pɔ, ka hee ɉu», ka ka pulu tɔɔ mą, ka hvo ka wəli tɔɔ nwoo ɓa. 24 Ə həɠə kpɔ ɲələi ŋį́ ka kɔ́lɔn na ma, ə həli la yiihu ɓa, ka kɛi lɔ ka kwɛli tee Yai-Laa ɓa. 25 Ɓɛlɔwai ŋį́ too la Yai-Laa lííla nɔi ɓa, ŋį́ lɛɛ pɛlɛ́ni nɔi ɓa, ŋį́ hvóló pow nąąn da kpinį pow nąąn gɛ pɛlɛ́ni nɔi ɓa. Mąąhɔlɔɓo, Yai-Laa aa kɛ mo, yɛ gaa ka kpɛɛi yɛnɛ̨ɛ̨. 26 Ŋą́ Yai-Laa hvɛli, gɛ́ kɛ mą: «Yai-Laa hɛn gəlee Nąmu, hvó kɛ ə́ kaa ə́ wɔ nu huwui pui; ə́ kwɛlin maa a diɛ, yɛ́ ɓə di nwun mąąɓo a ə wɔ yee walawala laa, ə́ gulɔ Eziptə lɔi hu a ə́ wɔ hvaŋą kɛnɛ̨i. 27 Ə́ kiliŋąhiɛ kani ə́ vilɛn ə́ wɔ tínuąi a: Abrahamə, Isaakə da Ɉakɔbə diɛ. Hvó ə́ kili lɛɛ nu huwui ŋɛ̨i nwɔ wəlii kpɔlɔ ɓa, da di wɔ túwɔ́ pələ ɲɔ̨n, ə mą kɛ di wɔ nɛ̨ŋɛ̨n; 28 Mąą hvo nɛ̨ɛ̨li nɔi tii ə́ ku kulɔ ɉu, ɉu nuą di hvo pa mo diɛ kɛ diɛ: ‹Yai-Laa yee hva pɛli kɛ di lɔi, nɔi ə́ naakwɛlanmo diɛ ɉu; aa hvɛɠɛ di mu; di wɛli kpɛɛi kɛ mą, yili ɓə ə di kulɔ la yɛ li di nwun na pilii nɔi pun ɉu.› 29 Ɛlɛɛ yaan, ə́ wɔ nu huwu li, ə́ kwɛlin maa a diɛ; ə di kulɔ Eziptə lɔi hu a ə́ wɔ hvaŋą kɛnɛ̨, da ə́ wɔ yee walawala laa.» |