Dutɛrɔnome 8 - Yálá laawoo hɛɓɛ (dc)

Yai-Laa ə Israɛlə hiɛ pələ lɛ mą nɔi pun ɉu

¹ Díɓoɠaa kpɔ ŋą ka tí a gɛɛ háákələi, ka tɔɔ a ka nwąnąi ka ɉon, əgɛ, ka lɛɛ yɛnɛ̨ɛ̨, ka huwu ə ɓɛlɛ, ka tamą; nɔi Yai-Laa ə gwɛla, ə naakwɛlanmo ka nąnni diɛ, ka lɔ nɔi tii hu, ka hee laa.

² Bələ kwɛaai Yai-Laa ka wɔ Yálá ə ka hvilɛn mɛ̨i kwɛlan bow nąąn ɲee mu, nɔi pun ɉu, yɛ mɔ̨nɔ̨ lɔ ka pɔ, ka gəlee nąą kili too ka ŋą. Ka hukɔɔn ga tii ə kɛi mo, yɛ ka kwəi kɔ́lɔn; akɛ ka káá pai nwɔ tíɓoɠaa kɛi, a wala kɛ tii, akɛ ka káá pai ɓoi diɛ ka di too.

³ Ə ka kɛ a yeehowolo nuą, ə pulu too kaa, ɛlɛɛ, ə manə tɛɛ ka pɔ a ka kɔ̨nɔ̨n. Kaa-o, ka nąnni man-wo, ka hvo kɛ gɔlɔn a bɔlɔ. Ə kɛi nɛ tii kaa, yɛ kɛ kaa: nu hva nwɔ yɛnɛ̨ɛ̨ kɛ lɔ a laa mįi hɛn, kɛlaa, nu nwɔ yɛnɛ̨ɛ̨ kɛ hɛn mąą a: Yai-Laa hvaa woo.

⁴ Ka mąą həɠəɠaa di hvo haɠa li ka kwaną, ka kɔ́wɔ hvo hvɛɛ gwɛlan bow nąąn tii yee mu.

⁵ Mąąnɛ̨ɛ̨ ka ka kiliŋąhiɛ, ka gbaɠala kaa, kaa diɛ Yai-Laa ka wɔ Yálái kaa ka mąą kwɛlii yɛ bələi lon gaamun a non mąą kwɛli la.

⁶ Ka Yai-Laa ka wɔ Yálái nwɔ tɔ́nŋąą hon ka lɛɛ nwɔ pələi mɛ̨i, ka ɲɔw mą.

Ɉɛnŋąą pai Israɛlə lonnii ɲąąhɛn ɉii nɔi laakwɛlanmoɔ hu

⁷ Yai-Laa ka wɔ Yálá kaa ka lɔi, lɔi lɛlɛɛ hu ɓɛi gaa a tɛɛyáɠaa, da yátonŋąą kulɔ lɔi. Ɲáɠaa tii di nwun a kulɔ yeeɠaa ɓa da nɛ̨ŋɛ̨ɠaa hu.

⁸ Lɔi ta li, ɓɛi mɔ̨nun da kpai, viɲə, ɓɔɔlaa wuluɠaa da grenadə wuluɠaa da lɛlɛ laa; ə mą kɛ olivə wulɔ, da kwɛin nwulɔ di kaa laa;

⁹ Ka káá pai kɛi kɔ̨nɔ̨n ɉɔlɔɓoi nɔi tii hu a ka liiɓa, ka hvo pai hvɛɠɛi laa a hɛn da. Kwɛli kaa nɔi tii hu kwɛniɠaa hu, ɲeeɠaa di ɓo a ɓala kwɛli.

¹⁰ Ka káá pai kɛi kɔ̨nɔ̨n mįi, kaa pilɛ ɉu; kaa mąąwiɛ tɛɛ Yai-Laa ka wɔ Yálái pɔ nɔi lɛlɛɛ tii ə dɛɛ ka pɔ mąą mɛ̨nį ɓa.

¹¹ Ka gɛ a nɛlɛɛ, ka hvo lɛ̨ą Yai-Laa ka wɔ Yálái ɓa, ka hvo nwɔ tɔ́n da nwɔ lɔi hu yíi ɓo pələɠaa lɛɛ; diɛi gáá di tɛɛi ka pɔ háákələi.

¹² Ka kɛi kɔ̨nɔ̨n mįi kaa pilɛ ɉu, ka kɛi pa pɛlɛ́ lɛlɛɛɠaa tɔɔi kaa lɔ mu,

¹³ taatɛlɛɛ kpulu kɛnɛ̨ɛɠaa da pai kɛi ka yəi, ə kɛ a nįŋɛ̨ a wala kɛ tii ɓɛlaa, wali da hɛni, hɛn gɔw huwui lɔpee a pa kɛnɛ̨i ka yəi,

¹⁴ ka hvo kɛ ka káá ka kpɔwɔ ɲąą kɛnɛ̨i, kaa lɛ̨ą Yai-Laa ka wɔ Yálái ɓa. Yaa tii ɓə ka kulɔ Eziptə lɔi hu, nuwɔ laa pɛ́lɛ́i tii mu.

¹⁵ Ya ɓə gɛ, kaa ɉiɛ kulɔ nɔi pun mąą ɲɔwuɔ kɛnɛ̨ɛ̨ hu, ɓɛi kaalə ɲɔ̨nwɔ̨ɔ̨ɠaa di kɛ laa, da ɲɔ̨ngaaləɠaa; ɓɛi kpələ wɛli a nu paa laa, yaa tii ɓə yá kulɔ kwɛni kpuwulu hu, yɛ tɛɛ a gboloon gɛnɛ̨.

¹⁶ Nɔi pun dɔ̨nɔ̨i tii hu ɓə, ə manə tɛɛ laa ka pɔ, kaa mįi; a hɛn yii ka nąnni di hvo kɛ gɔlɔn. Ə yili kɛ tii, ə gɛ, ka yee ŋą kpɛɛ, ɛlɛɛ, da ka hukɔɔn mɛ̨nį ɓa; əgɛ, ka wɔ yɛnɛ̨ɛ̨ dɔwɔ pələ ɲąą ə nɛɛ.

¹⁷ Ka hvə tɔɔ kaa kɛ diɛ: «Ku wɔ huwalawalalaa ɓə gɛ kuɔ ɉɛn gɔw ŋɛ̨i hɔlɔɓo.»

¹⁸ Kɛlaa, mąąnɛ̨ɛ̨ ka kili ə kɛ ɉu kaa diɛ; Yai-Laa ka wɔ Yálái ɓə hvaŋą tɛɛ ka pɔ kaa hɛn ɉɔlɔɓo la. Nwoo tii ə gwɛlɛ ka nąnni diɛ, yɛ bɔ mɛ̨nį kɛ la, yɛ bələi gaa gɛi la háákələi.

¹⁹ Kɛlaa, Ka lɛ̨ą Yai-Laa ka wɔ Yálái ɓa, kaa hvilɛn haliɠaa pulu, kaa tí diɛ, kaa pɛlɛ di lííla; gáá moi kaa, gɛ́ gwɛla ɉu! Ka nwun na a pili kpɔ tɛ̨ɛ̨tɛ̨ɛ̨.

²⁰ Ka wala ka wəli tɔɔ Yai-Laa ka wɔ Yálái woo ɓa, bələi kpɔlɔɔ ə nuą ŋɛ̨i nwun na pili la ka ɲɛ̨i tɔwɔ, bələ lɔ ɓə a ka nwun na pili la.