Dutɛrɔnome 6 - Yálá laawoo hɛɓɛ (dc)

Ə́ Nąmu Yálá wɛlilakɛ

¹ Díɓo da dɔ́n nwooɠaa, da yɛnɛ̨ɛ̨ hon bələɠaai Yai-Laa ka wɔ Yálái ə ka tí la, yɛ ka di mąąkwɛli, diɛ ka tii. Ka li ka di pɔ yíi ɓo, ɓɛi ka káá lii heei laa.

² 'Ka ɲɔw Yai-Laa ka wɔ Yálái ɓa; kaa-oo, ka lonnii-oo, ka mąninni-oo da ka mąnin bulu mąninŋąą kəlee, 'ka nwɔ́ tíɓoɠaa da nwɔ tɔ́n nwooɠaai kəlee pɔ mɛ̨nį kɛ, ka wɔ yɛnɛ̨ɛ̨ kəlee hu, ka yíi a kwɛa.

³ Israɛlə ə́ wəli tɔɔ, 'ka tɔɔ a ka nwąnąi, ka di pɔ mɛ̨nį kɛ, ka gɛ tii, ka kɛ nwun nąnɛ̨ɛ̨ hu, ka huwu yɛ ɓɛlɛ yɛ bələi Yai-Laa ka nąnni di wɔ Yálái ə naakwɛlanmo la kaa; a lɔi lɛlɛɛ ɓɛi hɛn gəlee a lɛlɛ laa.

⁴ Israɛlə! Ə́ wəli tɔɔ! Yai-Laa gu wɔ Yálái woo ɓa, Yai-Laa kaa tanɔ̨n.

⁵ Ka Yai-Laa ka wɔ Yálái wɛlilakɛ a ka kwəi tɔ̨nɔ̨, a ka kpinįi kəlee, da ka wɔ huwalawala kəlee.

⁶ Díɓoɠaai ŋɛ̨i gáá ɉu woo ɓoi kaa háákələi, mąąnɛ̨ɛ̨ ka di kanąn ka kili pɔ.

⁷ Kaa pa kɛi ɉukulɔi ka lonnii diɛ; ka kɛ moi diɛ, ka kɛ ka yəi bɛlɛ́n, ə mą kɛ hiɛ pələ pɔ, ka kɛ laani, ka mą kɛ tɔɔni.

⁸ Ka di kpulɔn ka yee kwaną, a di kili too pələ ka ŋą; ka di yili ka tɔwɔla.

⁹ Ka di pɛ̨ɛ̨ ka wɔ kponŋąą diɛ, da ka hee taaɠaa bələ nwun na.

Israɛlə hvo Lɛa Yálá ɓa

¹⁰ Yai-Laa ka wɔ́ Yálái a pa ka lɔi nɔi tii hu, yai Ə naakwɛlanmo ka nąn Abrahamə, Isaakə da Ɉakɔbə diɛ, yɛ gaa pai dɛɛi di pɔ, a lɔi ɉu taaɠaa kpɛa kpɛa, di lɛlɛɛ, yai kaa hvəi di tɔɔ li,

¹¹ a pɛlɛ́ɠaai di laahvɛɛ a hɛn gɔw lɛlɛɛ huwu lɔpee, kaa hvəi di pu li laa, yálɔwaɠaai naahvɛɛ a yələ kəlee, yii ka hvəi di tee li, viɲə da olivə wuluɠaai ka hvə di hin ni. Nąąlɔwai, ka kɔ̨nɔ̨n mį́i kɛa kaa pilɛ ɉu.

¹² Ka gɛ a nɛlɛɛ, ka hvo lɛ̨ą Yai-Laa ɓa, yai ka kulɔ Eziptə lɔi hu, nuwɔ pɛlɛ́i tii mu.

¹³ Yai-Laa ka wɔ Yálái ɓə mąąnɛ̨ɛ̨ ka ɲɔw mą. Ya ɓə mąąnɛ̨ɛ̨ ka tí mą. Naa hu ɓə mąąnɛ̨ɛ̨ ka ka kwɛla la.

¹⁴ Ka hvo hvilɛn haliɠaa pulu, ə mą kɛ ka kwɛlɛ lɔiɠaa ŋɛ̨i di wɔ hali ta lɔpee;

¹⁵ Mąąhɔlɔɓo, Yai-Laa ka wɔ Yálái ŋɛ̨i heeni ka hamąi, gaa a Yálá tolɔɔ. Ka gɛ a nɛlɛɛ, Yai-Laa ka wɔ Yálá nwɔ líiholi hvo pa yɛɛ ka mɛ̨i, yɛ ka kpɛɛ lɔi mɛ̨i.

¹⁶ Ka hvə kɛa tɔɔ Yai-Laa ka wɔ Yálái la, yɛ bələi ka gɛ la Masa.

¹⁷ Mąąnɛ̨ɛ̨ ka Yai-Laa ka wɔ Yálái nwɔ tíɓoɠaa kɛ, da nwɔ tɔ́n nwooɠaa, da nwɔ lɔi hu yíi ɓo pələɠaa, yaai Ə naa ka nwuɔ̨.

¹⁸ Mɛ̨nįi ɉaŋąą, nɛlɛɛ Yai-Laa ɲɛ̨i ɓa, ya ɓə mąąnɛ̨ɛ̨ ka gɛ, ka gɛ, ka kɛ nąąlɔwai nwun nąnɛ̨ɛ̨ hu. Nɔi lɛlɛɛi tii Yai-Laa ə naakwɛlanmo ka nąnni diɛ yɛ gwɛla ɉu, ka pɛli heei ɉu.

¹⁹ Gaa pai ka yowoɠaa kəlee kpɛi ka tɔwɔ, yɛ di mąą kwɛa kaa. Bələ ɓə ə naakwɛlanmo la.

²⁰ Tinąą, ka lonnii da ka mąąni kɛ diɛ kaa: «Díɓoɠaa, dɔ́nŋąą da ɲɛnɛ̨ɛ̨ hon bələɠaa ŋɛ̨i Yai-Laa gu wɔ Yálá ə naa ka nwuɔ̨i, nwun mąą lə?»

²¹ Ka kɛ ka lonnii diɛ: «Ku kɛ a Eziptə tɔɔmun nwɔ luwɔɠaa Eziptə lɔi hu; kɛlaa, Yai-Laa ə ku kulɔ Eziptə lɔi hu a vaŋą kɛnɛ̨.

²² Yai-Laa ə kwəi pili mąą mɛ̨nį kpɛa kpɛa da kpalo mɛ̨nį kpɛa kpɛa kɛ ku ɲɛ̨i ɓa; Eziptə lɔi da dɔɔmun nwɔ pɛ́lɛ́i nwun yɛ lɛɛ ɉu.

²³ Ku wɛi, ə ku kulɔ gɛɛnąąi tii ɓa, nɔi ə naakwɛlanmo ku nąnni diɛ yɛ gwɛla kpɔ ɉu, ə ku lɔ ɉu, ə dɛɛ ku pɔ.

²⁴ Yai-Laa ə ku tí yɛ ku nwɔ tíɓoɠaai kəlee kɛ, yɛ ku Yai-Laa ku wɔ Yálái mąąwiɛ, kwa pɛli kɛi nwun nąnɛ̨ɛ̨ hu a yələ kəlee. Yɛ ku laa hon mo yɛnɛ̨ɛ̨, yɛ bələi gu kaa la háákələi.

²⁵ Bələi gwa kɛ la a tələnmo nuą, bələ ka tii; Ya ɓaa gu nwɔ tíɓoɠaai tii kəlee kɛ Yai-Laa gu wɔ Yálái ɲɛ̨i ɓa, yɛ bələi ə gu tí la.»