Dutɛrɔnome 5 - Yálá laawoo hɛɓɛ (dc)

Yálá nwɔ tɔ́n bowi gili too ŋą

¹ Moisə ə Israɛlə lonnii kəlee təli, yɛ diɛ: «Israɛlə lonnii! Ka ka wəli tɔɔ dɔ́n nwooɠaa da nɔi hu yíi ɓo pələɠaa ɓa, yii gáá dɛɛi ka pɔ háákələi! 'Ka di mąąkwɛli, 'ka bɔ mɛ̨nį kɛ.

² «Yai-Laa gu wɔ Yálái, ə mįnɛ̨ laa gwa diɛni gu lɔwai Horɛbə yee ɓa.

³ Yai-Laa da gu nąnni lɔ hvəi mįnɛ̨i tii həɠə; kɛlaa, gwa diɛni kəlee ɓə; guɔi ŋɛ̨i ɓɛ yiihu gu hvulú kɔ́lɔi.

⁴ Yai-Laa ə pələ ɓo kaa ɲee tonna, nwɔ̨n ɉąąi, ka ɲɛ̨i heɛ ka kee ni diɛ.

⁵ Ɛlɛɛ ɲą́ą́n, ŋį́ ɓo tɔɔni ka Yai-Laa ni ka lɔwai. Gɛ́ Yai-Laa lawoo laa həli kaa. Mąąhɔlɔɓo, ka kɛi ɲɔw nwɔ̨n ma, yili ɓə gɛ ka tɛ ɲee ɓa. «Ə mo yɛ diɛ:

⁶ «Ɲą́ą́ ɓə gáá a Yai-Laa ka wɔ Yálá, Ɲą́ą́ ɓə ka kulɔ Eziptə lɔi hu, nuwɔ pɛlɛ́i tii mu.

⁷ «Hali ta hvo kɛ Ɲą́ą́ gwa kaani gu lɔwai.

⁸ «'Ka hvo hɛn da kpɛli mąą nįnįn bɛli, a hɛn ɲii da kwɛli hvilɛn mą, a hɛn lɔpee ta, yii gulaa yələkɔlɔn ɉu hɛn da ɓa, ə mą kɛ a lɔi mɛ̨i hɛn da, a wala kɛ tii yái hɛn da.

⁹ «Ka hvo kwɛli hvilɛn ɉɛnŋąąi tii ta ɓa, ka hvo tí diɛ; mąąhɔlɔɓo Ɲą́ą́ Yai-Laa ka wɔ Yálái, gáá a Yálá tolɔɔ, nuąi da kɛ wɛli kpɛɛ mąą laa kulɔi a ɲą́ą́, ŋą́ di wɔ nɛ̨ŋɛ̨nŋąą pɔɔ kulɔ di lonnii diɛ, ə mą kɛ mąnįn bulu mąnįnɠaa diɛ.

¹⁰ Kɛlaa, nuąi da nwɛ́lilakɛ, diɛ di yee kanąn nwɔ́ tíɓoɠaai diɛ, Ŋą́ di wɛlilakɛ, ə həli la di wɔ mąnįn bulu mąnįn waa tamąą ɓa.

¹¹ «'Ka hvo Yai-Laa ka wɔ Yálái laa ɓo kpɛli-kpɛli mɛ̨nį hu; mąąhɔlɔɓo, nui a Yai-Laa laa ɓo kpɛli-kpɛli mɛ̨nį hu, Yai-Laa hva nɛɛ lɔ tii, yii hvo ɉutɔɔ li.

¹² «'Ka túwɔ́ yələ mąąwiɛ, ka gɛ a hvóló mąąhəɠɛɛ, yɛ bələi Yai-Laa ka wɔ Yálái ə ka tí la.

¹³ 'Ka ka mąą kóló kəlee kɛ hvóló mɛ̨ida yee mu.

¹⁴ Kɛlaa voló mɛ̨ihveelɛ yələ, Yai-Laa ka wɔ Yálái nwɔ túwɔ́ yələ li, nwɔ hvįįtɔɔ yələ li. Ka hvo kóló walawala lɔpee ta kɛ a volói tii, kaa-oo, ka lon ɉinąą-oo, ka lon nɛ̨ąą-oo; ə mą kɛ ka wɔ luwɔ hinąą da luwɔ nɛ̨ąą; ə mą kɛ ka wɔ nįŋɛ̨i ɓə, ka wɔ hoohvaalən gbɛli, da ka wɔ taatɛlɛɛ lɔpee. Ə mą kɛ nwɛ̨ąi di kaa heeni ka wɔ taaɠaai hu. A kɛ tii ka wɔ kóló kɛ nuą, ɉinąą da nɛ̨ąą di pɛli di hviitɔɔi yɛ kaa.

¹⁵ Mąąnɛ̨ɛ̨ ka kili ə pu ɉu kaa, ka kɛ a luwɔɠaa Eziptə lɔi hu. Ɛlɛɛ, Yai-Laa ka wɔ Yálái ə ka kulɔ laa a vaŋą kɛnɛ̨, a nwɔ huwalawalai ɲəi, hɛn da hva tɔɔ na. Yili mąą mɛ̨nį ɓə Yai-Laa ka wɔ Yálái ə ka tí la, yɛ ka túwɔ́ yələ mąą həɠə.

¹⁶ «Ə́ lee da ə́ nąn di mąąwiɛ, yɛ bələi Yai-Laa ka wɔ Yálái ə ka tí la, ə gɛ, ə́ yíi ə kwɛa, ə́ nwun na ə nɛ̨ɛ̨, nɔi ŋɛ̨i Yai-Laa ka wɔ Yálái ə dɛɛ ka pɔ ɉu.

¹⁷ «'Hvó nu paa.

¹⁸ «'Hvó wɛli kɛ.

¹⁹ «'Hvó nwuɔ̨ kɛ.

²⁰ «'Hvó lɛɛ kɛla hvaa ɓo a ə́ ɓɛlan gaalon naa.

²¹ «'Hvó ə́ ɲɛ̨i kulɔ ə́ ɓɛlan gaalon nɛ̨ą pɔ, hvó ə́ ɲɛ̨i kulɔ nwɔ pɛ́lɛ́i pɔ, da nwɔ tíiɠaai, nwɔ luwɔ hinąą, da nwɔ luwɔ nɛ̨ąą, da nwɔ nįŋɛ̨ɠaa, a wala kɛ tii nwɔ hoohvaalənŋąą, da ɲəi hɛn lɔpee ta.»

²² Yai-Laa ə mɛ̨nįɠaai ŋɛ̨i ɓo ka kəlee kaa, ka ɲąąkpɔnŋąą, ə kɛ ɲee nwuɔ̨ nwɔ̨n ɉąą nwɔ̨n nulu da tulɔ kpinįn ɉuwia hu, a nwoo kɛnɛ̨, ɛlɛɛ, hvo mɛ̨nį ta pɛlɛ mą. Ə di pɛ̨ɛ̨ kwɛni ɓɛla hveelɛ mɛ̨i, ə gwɛni ɓɛlaɠaai tii tɛɛ bɔ́.

Moisə ə kɛ a Yálá lawoo tɛɛ mun

²³ Ɓɛlɔwai ka nwooi tii mɛ̨n na, yɛ kulɔ kɛɛnąą kpinɛ̨ɛ̨ ɓa, nwɔ̨n aa ɲee hon, ka ɲɛ̨itɔwɔ nuą, da ka wɔ kalanɉonŋąą di lɛɠɛ mą́ą́,

²⁴ di mo mą́ą́ ka laa hu, diɛ mą́ą́: «Yai-Laa ku wɔ Yálái aa nwɔ mąąwiɛ lɛ kuɔ da nwɔ kɛnɛ̨laa, kwaa nwoo mɛ̨n nwɔ̨n ɉąąi. Kwaa gbaɠala kaa háákələi kuɔ Yai-Laa a pɛli mɛ̨nį ɓoi nu ɓa, ɛlɛɛ mąą nu yɛ lɛɛ a vulú.

²⁵ A kɛ tii nwɔ̨n gɛnɛ̨i ŋɛ̨i kaa pai ku hukalai kuɔ haa lə mɛ̨nį ɓa, mąąhɔlɔɓo, kwa lɛɛ Yai-Laa ku wɔ Yálái woo mɛ̨n ɉii, ku kaa pai haai.

²⁶ Nu ta aa ta mɔ̨ɔ̨ Yálá hvulú woo mɛ̨n yɛ mɛ̨nį ɓo mą nwɔ̨n ɉąąi, yɛ bələi ə gɛ la a kuɔ, ɛlɛɛ mąą nu yɛ lɛɛ a vulú?

²⁷ A kɛ tii, lɛɠɛ laa, yɛ́ Yai-Laa gu wɔ Yálái woo kəlee mɛ̨n, mɛ̨nįi lɔpee Yai-Laa gu wɔ Yálái a mo yɛ́, ə́ pənə yɛ́ mo kuɔ, a kɛ tii, ku kaa pai ku wəli tɔɔi mą, kuɔ bɔ mɛ̨nį kɛ.»

²⁸ Mɛ̨nįɠaai kpɔ tii ka kɛi mo mą́ą́, Yai-Laa ə gəlee mɛ̨n, Yai-Laa yɛ mą́ą́: «Mɛ̨niɠaai kpɔ nuą di mo yɛ́, ŋą́ą́ gəlee mɛ̨n, di gɛ a nɛlɛɛ di mɛ̨nįɠaai tii kəlee ɓo.

²⁹ Ə li kɛmun da naa kɛ di kwəi, diɛ ɲɔw Mą́ą́, diɛ nwɔ́ tíɓoɠaai kəlee kɛ a yələ kəlee, yili ə li kɛ a di wɔ nwun na nɛ̨ɛ̨, da di lonnii, kpɛɛ hvo li kɛ mą.

³⁰ 'Li yɛ́ diɛ, di pənə di li di yəi bɛlɛ́n.

³¹ Ə́ wɛi, gwa yɛ́ gu lɛɛ ɓɛ, gáá díɓo kəlee lɛi yɛ́, dɔ́n nwooɠaa da nɔi hu yíi ɓo pələɠaa. Yá pənə yá li, yɛ́ nɛ diɛ; diɛ pɛli bɔ túwɔ́ ɓoi nɔi gáá dɛɛi di pɔ ɉu. Yai di kaa lii heei ɉu.»

³² Ka tɔɔ a ka nwąnąi, kaa túwɔ́ yɛ́ bələi Yai-Laa ka wɔ Yálái ə ka tí la. Ka hvo həɠə bələ mɛ̨i, ka hvo tɔɔ takpa-takpa.

³³ Mąąnɛ̨ɛ̨ ka hiɛ yɛ bələi Yai-Laa ə nɛ la kaa, a yələ kəlee, kaa pɛli lɛɛi yɛnɛ̨ɛ̨, kaa ɓo la nwun na nɛ̨ɛ̨ hu, ɛlɛɛ, nɔi ka káá lii heei ɉui, ka yíi ə kwɛa ɉu.