Dutɛrɔnome 4 - Yálá laawoo hɛɓɛ (dc)

Tɔ́n dɛɛ mɛ̨nį

¹ Yii hu kɛa, Israɛlə nuą, ka ka wəli tɔɔ dɔ́nŋąą da yɛnɛ̨ɛ̨ yíi ɓo pələi gáá dɛɛi ka pɔ mą. Mɛ̨nįɠaa tii pɔ pələ ɓə ka pɛli lamui la yɛnɛ̨ɛ̨; ɛlɛɛ, nɔi tii Yai-Laa ka nąnni di wɔ Yálá kaa dɛɛ ka pɔ, ka ɉɔlɔɓo a ka wɔ.

² Dɔnŋąą ŋɛ̨i gáá dɛɛi ka pɔ, mąą hvo nɛ̨ɛ̨li ka hvo da kulɔ mą, ka hvo da pɛlɛ mą. Ka Yai-Laa ka wɔ Yálái nwɔ tɔ́nŋąą hon yai gáá dɛɛi ka pɔ.

³ Mɛ̨nįi Yai-Laa ka wɔ Yálái ə gɛ Baalə-Peɔrə, kaa kpinįi ka nąą kaa a ka ɲɛ̨ikɔw; nuąi kpɔ hvilɛn Baalə pulu Peɔrə, Yai-Laa ka wɔ Yálái ə gəlee paa ka lɔwai.

⁴ Ɛlɛɛ, kaa ŋɛ̨i a Yai-Laa nwɔ nuą ka káá ni yɛnɛ̨ɛ̨ háákələi.

⁵ Ka ka wəli tɔɔ, gáá tɔ́nŋąą da yɛnɛ̨ɛ̨ hon bələɠaa lɛi kaa, yɛ bələi Yai-Laa nwɔ́ Yálá ə di lɛ la mą́ą́, nɔi tii ka káá lii ɉu, kaa hee laa, kaa pɛli bɔ yíi ɓoi ɉu.

⁶ Mąąnɛ̨ɛ̨ ka ka yee kɛ diɛ, ka di pɔ mɛ̨nį kɛ. Yili ɓə a ka kɛ a kilimąą nuą da mɛ̨nį hukpɛ nuą, nuąi pai dɔ́nŋąą tii mɛ̨n ɉii di ɲɛ̨i ɓa, diɛ kɛ diɛ: «Nu kpulu kɛnɛ̨i ŋɛ̨i kaa a nu huwu kilimąą, diɛ ɓo a mɛ̨nį hukpɛ nuą.»

⁷ Yaan, lɔi lə kɛɛ ɓə laa, gɛnɛ̨, yii nwɔ haliɠaa da pɛli lɛɠɛi diɛ ɓɛlɔwai da di təli la, diɛ lɛɠɛ diɛ yɛ bələi Yai-Laa guɔ Yálái a gɛ la?

⁸ Lɔi lə kɛɛ ɓə laa, gɛnɛ̨, tɔ́nŋąą da yɛnɛ̨ɛ̨ hon bələ yɛ ɓo ɲəi, di haŋąą yɛ bələi dɔ́nŋąą ŋɛ̨i gáá dɛɛi ka pɔ di kaa la?

⁹ Ka ka kpɔwɔ hon a nɛlɛɛ, mɛ̨nįɠaa kpɔ ka gaa a ka ɲɛ̨ikɔw, nąą kili hvo kpɛɛ ka ŋą ka yíi hvóló kəlee hu; ka hvo lɛ̨ą mą, ka mɛ̨nįɠaa tii hukulɔ ka lonnii diɛ da ka mąnįn bulu mąnįnŋąą kəlee.

Yálá ə gbɔwɔ lɛ Horɛbə Yee nwuɔ̨

¹⁰ Ɓɛlɔwai ka kɛ la tɔɔni Yai-Laa ka wɔ Yálái lííla Horɛbə kɔ́wɔ mu, Yai-Laa ə mo mą́ą́, yɛ mą́ą́: «Nuą ɲąąkpɔn gwɛ́lɛ, ŋį́ wooɠaa ɓo diɛ; ə gɛ, diɛ pɛli mą́ą́wiɛi di yíi hvóló kəlee hu lɔi mɛ̨i. Ɛlɛɛ, diɛ di lonnii mąąkwɛli a mą́ą́wiɛ pələ.»

¹¹ Mąą yələi tii, ka ka mąą lɛɠɛ, ka tɔɔ ɲee kɔ́wɔ mu. Nwɔ̨n ɉeɛ kɛ ɲee hu, nən yɛ həli kpɔ yələkɔlɔn ma, kpinį kɛnɛ̨ hu, tulɔ kpinįn ɉu wia hu.

¹² Ɛlɛɛ, Yai-Laa yɛ pələ ɓo kaa nwɔ̨n nən ɉu, woo ta yɛ tɔɔ kaa mɛ̨n, kɛlaa, ka hvo kɛi nu kaa, nwoo lɔ ɓə kɛi tɔɔ.

¹³ Ə nwɔ mįnɛ̨i hukulɔ kaa, a tɔ́n bow, yɛ kɛ ka bɔ yíi ɓo; ə di pɛ̨ɛ̨ kpəlin mɛla hveelɛ mɛ̨i.

¹⁴ Ɛlɛɛ, Yai-Laa ə mo mą́ą́ nąąlɔwai, yɛ ŋį́ ka mąąkwɛli dɔ́nŋąą da díɓoɠaa diɛ, nɔi tii ka káá lii heei ɉu, kaa pɛli di hon ɉii laa.

Ka gɛ a nɛlɛɛ hali mɛ̨nį ɓa

¹⁵ Ka ka kpɔwɔ hon a nɛlɛɛ, ka gɔlɔn kaa diɛ, ɲələi Yai-Laa ə kɛi mɛ̨nį ɓo la kaa nwɔ̨n nən ɉu Horɛbə yee nwuɔ̨, ka hvo hɛn nɔpee ta mąą nįnįn gaa nwɔ̨n nən tii hu.

¹⁶ Yili ɓa, ka hvo tɔɔ, kaa ka kpɔwɔ ɓowo a hɛn da mąą nįnįn bɛliɛ, kaa kɛ Yálá mąą nįnįn ni; ə kɛ a hɛn ɉilɛ, a wala kɛ tii, ɉaa;

¹⁷ ə kɛ a lɔi mɛ̨i huwɔ ta mąą nįnįn, ə kɛ a nwɛ̨ni ta mąą nįnįn yii a koon yələ kwəi,

¹⁸ ə mą kɛ a tala hɛn da mąą nįnįn, a wala kɛ tii, hɔ̨nwɔ̨lee ta mąą nįnįn diɛi da di wɔ yɛnɛ̨ɛ̨ kɛ yái.

¹⁹ Hvó ə́ ɲɛ̨i tɛ yələi, yá, hvóló, ɲąnin da pɛmɛ̨lɛ̨n-gɔw, ə mą kɛ yələ kwəi hɛnŋąą kaa, hvó pa nəi nɛɛ laa di hvo ə́ ɓowo, yɛ́ kwɛli hvilɛn diɛ. Yai-Laa ka wɔ Yálái ɓə ɉɛnŋąą tii pɛli lɔi mɛ̨i hee ɓo nuą kəlee mąą mɛ̨nį ɓa.

²⁰ Yai-Laa ə ka hon, ə ka kulɔ Eziptə lɔi hu ɓɛi nąą kpɔluɔ kɛ yɛ huluun ɉu. Ə ka kɛ a nwɔ nu huwu, a gwɛlin. Yili ka ŋɛ̨i háákələi ka káá la.

²¹ Ka mąą mɛ̨nį ɓa, Yai-Laa ə níiholi bɔ́, ə gwɛla, yɛ və́ pai Ɉurdɛn teen ɉii, ɛlɛɛ, nɔi lɛlɛɛ tii Yai-Laa ka wɔ Yálái kaa dɛɛi ka pɔ a ka wɔɔ, və́ pai lɔi ɉu.

²² Gáá pai haai nɔi ŋɛ̨i hu, vá Ɉurdɛn teen, kɛlaa, ka wɛi, ka káá pai deen ɉii; ka lɔ nɔi lɛlɛɛ tii hu.

²³ Mįnɛ̨i Yai-Laa ə naa ka lɔwai ka diɛni, ka gɛ a nɛlɛɛ, ka hvo lɛ̨ą mą. Ɉɛnŋąą kpɔ tii Yai-Laa ə tɔ́n dɔɔ kaa mąą mɛ̨nį hu, yɛ kɛ ka hvo da mąą nįnįn ɉəɠə, ka hvo kɛ ka káá da pɛlii.

²⁴ Mąąhɔlɔɓo, Yai-Laa ka wɔ Yálái kaa a nwɔ̨n yɛ kɛɛ kələn, gaa a Yálá tolɔɔ.

²⁵ Ɓɛlɔwai ka káá pai lon ɉɔlɔɓoi la da mąnįn mɛlaa, ka pa kɛi a nu mąą pɔlɔɔɠaa nɔi tii hu, ɲələi ka lan na kaa hali pɛli, a hɛn da mąą nįnįn, mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa kaa gɛ, kaa nwąną lɔ,

²⁶ háákələi ŋɛ̨i, yələkɔlɔn da lɔi di kaa a gɛla, ka kpɛɛ hiɛ kpɔlɔɔ li nąąlɔwai nɔi tii mɛ̨i, ɓɛi ka káá pai Ɉurdɛn teen ɉii kaa li laa. Ka yíi hva kwɛa, ka kpɛɛ kpɔ tɛ̨ɛ̨tɛ̨ɛ̨.

²⁷ Yai-Laa a ka taɠa taɠa lɔi mɛ̨i nuą lɔwai; ka huwu ta wolo tiikpə lɔ ɓə a lɛɛ lɔiɠaa lɔwai, ɓɛɠaai Yai-Laa kaa pai lii laa a kaa.

²⁸ Ka kɛ laa haliɠaa yee mu yii nuą di bɛli a di yee, di ɓo a wulu, a kwɛni; di hva pɛli kɛɛ kaai, di hva pɛli mɛ̨nį mɛ̨n ɉii, di hva pɛli kɔ̨nɔ̨n mįi, di hva pɛli hɛn gun mɛ̨n ɉii.

²⁹ Nąąlɔwai, ka káá pai Yai-Laa ka wɔ Yálái kwɛlii nɔiɠaa tii hu, akɛ, ka gwɛli a ka lii kəlee, a kwəi tɔ̨nɔ̨ laa, ka gaa.

³⁰ Ɓɛlɔwai ka káá pai kɛi la mɔ̨nɔ̨ hu, mɛ̨nįɠaa ŋɛ̨i diɛ laa kaa ka wɔ yɛnɛ̨ɛ̨ tɔwɔ pələ, ka káá pai pənəi ka pa Yai-Laa ka wɔ Yálái pɔ, kaa ka wəli tɔɔ nwoo ɓa.

³¹ Mąąhɔlɔɓo, Yai-Laa ka wɔ Yálái kaa a liinɛ̨ɛ̨ gwəi Yálá, hva gili kulɔ ka hu, hva ka huwu pu, ɛlɛɛ, mįnɛ̨i da ka nąnni di ɉəɠə, yɛ gwɛla ɉu, hva ɉəɠə mą.

Yálá a nu həɠə ɉu, nwun na nɛ̨ɛ̨li

³² Ka ka kiliŋąhiɛ tɔwɔ-tɔwɔ hvólóɠaa tii hu, mɛ̨nįɠaa kɛ, kaa yiiɠaa ŋɛ̨i ka hvo ni kɛ laa, ə həɠə kpɔ ɓɛlɔwai Yálá ə nu kanŋaa kulɔ la lɔi mɛ̨i! Ka yɛnɛ̨ɛ̨ kəlee mąąnikɛ! Mɛ̨nį ɲɛ̨i kɛnɛ̨ɛ̨ ta aa ta mɔ̨ɔ̨ kɛ yɛ yii ŋɛ̨i? Daa ta mɛ̨nį taaləi ŋɛ̨i bələ mɛ̨n?

³³ Nu huwu ta, aa ta yálá ta woo mɛ̨n, yɛ hvaa nwɔ̨n nən ɉu, ɛlɛɛ, mąą nu huwui yɛ lɛɛ a vulú yɛ bələi ə kɛ la a kaa?

³⁴ Awala kɛ tii, yálá ta, aa ta pa lɔi mɛ̨i, yɛ nu huwu ta kulɔ nu huwu takpɛli lɔwai a kwɛlɛɛn mɛ̨nįɠaa da kpalo mɛ̨nį ɛlɛɛ, a kwəi pili mąą mɛ̨nįɠaa, a kɔ́ɠaa, a nwɔ huwalawala laa, ɲee yɛ lɛɛ di mɛ̨i a mąą ɲɔwɔ, yɛ bələi ŋɛ̨i Yai-Laa ka wɔ Yálái ə gɛ la a kaa, yɛ ka kulɔ Eziptə lɔi hu kaa kpinįi ka nąą kaa?

³⁵ Ka wɛi, ka mąąnɛ̨ɛ̨ ka gɔlɔn kaa diɛ: Yai-Laa ɓə gaa a Yálá, yálá takpɛli hvo tɛɛ li yaa tii mą.

³⁶ Ə lɛɛ yələkɔlɔn ɉu, yɛ ka mąąkwɛli a nwoo, ka lɛɛ lɔi mɛ̨i, ə nwɔ nwɔ̨n gɛnɛ̨i lɛ kaa, ɛlɛɛ, ka nwooɠaa mɛ̨n nwɔ̨n nən ɉu.

³⁷ Ka nąnni wɛli kɛɛ mɔ̨ɔ̨ kɛ mą, ya ɓə gɛ, yɛ di huwu həɠə a nwɔ nuą. Ɛlɛɛ, di haa pulu, ə ka kulɔ Eziptə lɔ hu a nwɔ huwalawala kɛnɛ̨i.

³⁸ Nu huwu kpɛa kpɛaɠaa, di hvaŋą kɛnɛ̨ɛ, di tɛɛ kaa, ə di wɔ lɔi kulɔ di yəi, yɛ dɛɛ ka pɔ, kaa hee ɉu a ka wɔɔ, yɛ bələi gaa la háákələi.

³⁹ Kaa kpinįi ka mɛ̨nįɠaa tii hukpɛ kɛa háákələi ka kwəi, ka gbaɠala kaa, kaa diɛ: Yai-Laa ɓə gaa a Yálá yələkɔlɔn ɉu, ə mą kɛ lɔi mɛ̨i, yɛnɛ̨ɛ̨ ɓɛ, dakpɛli hvo laa Yaa bulu.

⁴⁰ Yai-Laa nwɔ tɔ́nŋąąi da nwɔ tíɓoɠaa ŋɛ̨i gáá dɛɛi ka pɔ háákələi, ka di kɛ, yili a ka nwun na nɛ̨ɛ̨, kaa mąn, ka lonnii mąn, ka haa pulu, diɛ pɛli lamui yɛnɛ̨ɛ̨ nɔi ŋɛ̨i mɛ̨i yai háákələi Yai-La ka wɔ Yálái ə dɛɛ ka pɔ, a yələ kəlee mɛ̨ni.

Nuą mąąkilɛ taaɠaa

⁴¹ Nąąlɔwai ɓə Moisə ə taa haaɓa həɠə la ɉu Ɉurdɛn ɲɛ̨i tɔwɔ pələ, voló həɠəi pələ,

⁴² Daaɠaa tii diɛ pɛli kɛi a nu mąąkilɛ taa. Akɛ nu ta a nu paa dɛɠii, yii yowo laa hvo kɛ li da mąą nui di lɔwai a bɔlɔ, nu paamun tii a pɛli pui ə li daaɠaa tii ta hu; akɛ tii, a pɛli lɛɛi yɛnɛ̨ɛ̨.

⁴³ Daaɠaa tii ɓaa: Bɛsɛrə yii gaa nɔi pun ɉu, ɲee kpohvɛɛ lɔi hu. Rubɛn huwu nwɛi li. Gadə huwu nwɛi ɓaa: Ramotə yii gaa Galaadə lɔi hu, ɛlɛɛ, Golan taa, yii gaa Basan lɔi hu, ə ɓo a Manase huwu nwɛi.

Moisə nwɔ woo hu kulɔ veelɛnąą 4—11

⁴⁴ Bələ ɓə Moisə ə dɔ́n dɛɛ la Israɛlə lonnii pɔ.

⁴⁵ Israɛlə lonnii kulaa Eziptə lɔi hu, dɔ́nŋąą, da díɓoɠaai Moisə ə di hukulɔ diɛ, yaa li.

⁴⁶ Di dɔ́nŋąą da díɓoɠaa tii hukulɔ Israɛlə lonnii diɛ, di hvo ni kɛ Ɉurdɛn teen ni, di kɛ Bɛtə-Peɔrə. Di kɛ Amɔrə tɔɔmun Sihɔn nwɔ lɔi hu, yai kɛ heeni Hɛsbɔn. Moisə da Israɛlə lonnii di dɔɔmun tii paa ɓɛlɔwai di kulɔ la Eziptə lɔi hu.

⁴⁷ Ɛlɛɛ, daa kɛ Basan tɔɔmun Ogə nwɔ lɔi hon. Amɔrə nuą di wɔ tɔɔɓɛlaa hveelɛi li kɛ, diɛi kɛ vóló kulɔi pələ Ɉurdɛn ɲələi pələ.

⁴⁸ Ə həɠə Aroɛrə ɓa, yaa tii gaa Arnɔn kwɛlɛ, ə həli la Siɔn yee ɓa, yaa lɔ ka tii da kɛ mą: Hɛrmɔn,

⁴⁹ bɛlɛɛ Ɉurdɛn ɲá-ɓoloon bɔ kəlee ɓa voló kulɔi pələ, Ɉurdɛn ɲələi pələ, ə lɛɛ ɉu, ə həli la Ɉurdɛn ɲá-ɓoloon bɔ gboloyá ɓa, Pisga yee kɔ́wɔ mu.