Dutɛrɔnome 34 - Yálá laawoo hɛɓɛ (dc)Moisə haa mɛ̨nį 1 Moisə ə həɠə Moabə kpomó hu, yɛ tɛ Nebo yee ɓa Pisga yee tonna, yii gaa Ɉeriko taa tənən ma. Naa ɓə Yai-Laa ə Kanaan lɔi kəlee hu lɛ laa mą; ə həɠə Galaadə nwɔ lɔi hu yɛ li Dan nwɔ lɔi hu, 2 Nɛftali nwɔ lɔi hu, Ɛfraimə nwɛi, da Manase; Ɉuda nwɔ lɔi ə həli la voló tooi pələ gboloyá ɓa. 3 Negɛvə lɔi, da Ɉeriko ɲá-ɓoloon bɔ lɔi, yii gaa tow lɔi ə həli la Soarə. 4 Nąąlɔwai, Yai-Laa yɛ mą: «Ə́ ɲɛ̨i hee. Nɔi ŋį́ gwɛ́la, ŋį́ naakwɛlanmo Abrahamə, Isaakə da Ɉakɔbə ni diɛ, gɛ́ kɛ diɛ: ‹Gáá dɛɛi di huwuhu nuą pɔ!› Mąą lɔi ka. Ɲį́ nąą lɛ ŋɛ̨i yɛ́, ə́ gaa a ə́ kpɔɔ ɲɛ̨i kwəleen, kɛlaa, hvó pai lii laa.» 5 Ɲee tii ɓa ɓə Yai-Laa nwɔ tímun Moisə ə haa laa, Moabə lɔi hu; yɛ bələi Yai-Laa ə gbɛa mo la mą. 6 Ə Moisə powa loo laa Moabə lɔi moloon ɉu, Bɛtə-Peɔrə tənən ma. Nu ta hvo gámą kɛi kɔ́lɔn háá ɓa háá. 7 Moisə kaa kwɛlan ə kɛ a: kwɛlan nwun dɔ̨nɔ̨ ɲee hveelɛ ɓɛlɔwai ə haa la. Ɲɛi kɔ́w ə lɛɛ kpɔ a nɛlɛɛ, yɛ pɛli yee lɔi haliɛn nwoloi, ɉu ə lɛɛ a nwalawalaa, yɛ haa. 8 Israɛlə lonnii di Moisə haa wɔlɔ ɓo a hvóló pow haaɓa Moabə ɲɛɛ kɔ́wɔ hu; yili pulu di kpəla mą. 9 Yálá ə mɛ̨nį kɔ́lɔn gili tɛɛ Nun lon Ɉosue pɔ kpɔ kɛnɛ̨; mąąhɔlɔɓo, Moisə ə ɉuɓo Ɉosue hu a ɲee pɛlɛɛ nwuɔ̨. Ə həɠə kɛa ɲələ ɓa, yaa tii ɓə Israɛlə lonnii di kɛ nwoo ŋą, dɔ́n ŋɛ̨i Yai-Laa ə dɛɛ Moisə pɔ, di hvilɛn ŋąą bulu. 10 Gulaa Moisə pulu, Yálá kwəi mɛ̨nį ɓomun da hvo kɛa hɔlɔɓo Israɛlə lɔi hu, yii da Yai-Laa di kɛi mɛ̨nį ɓo di kee ɓa laaləi da laaləi. 11 Moisə ɓə Yai-Laa ə dɔɔ Eziptə lɔi hu, yɛ nwɔ kpalo mɛ̨nįɠaa da kwəi pili mąą mɛ̨nį kɛ ɲee hu, yɛ naa Eziptə tɔɔmun Faraɔn ɓa, da nwɔ nwun nąmįną, ə mą kɛ, nɔi nuą. 12 Moisə tii ɓə mɛ̨nįɠaa kɛ a yee walawala laa, yɛ ɲɔw kɛnɛ̨ lɔ nuą hu, Israɛlə lonnii ɲɛ̨i ɓa. |