Dutɛrɔnome 33 - Yálá laawoo hɛɓɛ (dc)Moisə ə lúwɔ́ too Israɛlə huwu heei pow kɔ́w hveelɛi ɓa 1 Lúwɔ́ yii Yálá nwɔ nu Moisə ə doo Israɛlə lonnii diɛ hvo tɛɠa kɛ pai haai, ya ka: 2 «Yai-Laa ə kulɔ Sinai yee ɓa pələ yɛ pa. Yɛ bələi hvóló a ɓɛla la, ə həɠə Seirə pələ, ə ɓɛla nwɔ nuą mɛ̨i, yɛ həɠə Paran yeeɠaa lɔwai ə pa nwɔ nuąi pɔ, nwɔ malakaɠaa di ɓo bɔ; nwɔ tɔ́n yɛ ɓo ɲəi yɛ kpalan nən. 3 Israɛlə lonnii wɛli kaa Yai-Laa ɓa; a nwɔ nuą mɛ̨i kaa, diɛi da di ɲąą kpɔn gɔwɔ mu, diɛ di wəli tɔɔ nwɔ liɛwoo ɓa. 4 Dɔ́n ŋɛ̨i Moisə ə dɛɛ ku pɔ, gaa a hɛn gɔw mąą mɛ̨nį nwąnąą Ɉakɔbə lonnii diɛ! 5 Yesurun aa tɔɔmun ɉɔlɔɓo, Ɓɛlɔwai nwun nąmįną di di ɲąąkpɔn na, da Israɛlə nuą kəlee. 6 Rubɛn ə kɛ lɔ yɛnɛ̨ɛ̨ hvo haa! Kɛi a mo tii, Yálá ə kɛ! Ɉuwu logolo ə lamun yɛnɛ̨ɛ̨, Yálá ə kɛ!» 7 Yii ɓa Ɉuda nwɛi, yii ə mo naa mɛ̨i ya ka: «Yai-Laa! Ə́ wəli tɔɔ Ɉuda woo ɓa! Pənə ə́ paa la nwɔ nuą pɔ. Ə gbɔwɔ mąąkɔ̨nwɔ̨ a gbɔwɔ yee. 'Kɛ a dɔɔ bulu, da gɔyɔwɔ di lɔwai.» 8 Yɛ Levi nwɛi ɓa: «Yai-Laa aa nwɔ kpɛɛn dɛɛ nwɔ tínuą ɓɛlɛɛɠaa pɔ, diɛi ɓaa Levi huwu. Diɛi ə di mąąkpɛɛ Masa. Ə di hutɔɔ Meriba ya mɛ̨nį hu. 9 Diɛ ɓə ə́ wɛlila kɛ kpɔ ə tɛɛ di kaa nuą diɛ, da di kaayɔwɔɠaa, ə mą kɛ di lonnii diɛ, ɓɛlɔwai di ə́ woo hon na, diɛ ə́ wɔ mįnɛ̨i mąąwiɛ. 10 Diɛi tii ɓə da ə́ wɔ yɛnɛ̨ɛ̨ yíi ɓo pələ lɛ Ɉakɔbə ɓa, diɛ Israɛlə nuą kalan a ə́ wɔ tɔ́nŋąąi hon bələ; diɛ ɓə da lansan kələn ə́ lííla; diɛ ɓə da haláá kulɔ yɛ́, yii da gəlee kələn. 11 Yai-Laa lúwɔ́ too di wɔ hvaŋąlɔlaa ɓa. Ə́ di kɛ kóló hu nɛ̨ɛ̨. Ə́ di kɔ́yɔwɔɠaa hɛ̨ą yali. Nuąi da wɛlikpɛɛmąąlaa kulɔ a diɛ, di hvo pɛli di muhəɠəi.» 12 Yɛ Bɛnɉamɛn nwɛi ɓa: «Yai-Laa liiɓa lon! Ə́ hvii tɔɔ Yai-Laa hvaŋąn mu a ə́ wəli pulu laɠiɛ; yai, a ə́ mɛ̨i kaa a yələ kəlee. Ɛlɛɛ, ə́ huwu lɔwai ɓə Yai-Laa a vįitɔɔ laa.» 13 Yɛ Ɉosɛfə nwɛi ɓa: «Yai-Laa aa lúwɔ́ tɔɔ di hee lɔi ɓa, a tulɔ yii a pu mą, da yáɠaai da kulɔ lɔi liiɓa. 14 Hvóló a hɔɔ nwɔ hihɛnŋąą diɛ, di ɓɔn. Ɲąnin nɔpee gəlee yee mu, yɛ hihɛnŋąą má nįnɛ̨ kulɔ, 15 yɛ tɔwɔ-tɔwɔ hɛnŋąą nɛlɛɛɠaa hɔlɔɓo ɲeeɠaa da ɲee kpu kpuɠaa diɛ. Nwɔ lɔi a kɛ lɔ yələ kəlee a lɔi lɛlɛɛ. 16 Ɉɛnŋąą kpɔ nɔi laahvɛɛ, a nɛlɛ-lɛlɛɛ a ɉɔlɔɓo. Nui ŋɛ̨i gbɔwɔ lɛ gala nwun ma nwɔ̨n nən ɉu, ə ɲɛ̨i lɛlɛɛ hee yɛ́, ə pa ə hee Ɉosɛfə nwun na, yaai kɛ a niɛni nwun nąmui. 17 Ɓáá ə lɔ Ɉosɛfə ɓa, ya ɓə gaa a nįŋɛ̨ hilɛ lon dɔlɔɔ tɔlɔɔ. Mįnɛ̨ɠaa kaa yɛ lán mįnɛ̨, ya ɓə gaa pai kɛi nuą tuwɔi la, yɛ nuą kpala kpɛ yɛ li a diɛ lɔi kpɛlai. Mįnɛ̨ tɔ̨nɔ̨ kaa a Ɛfraimə nwɔ kɔlaɠa waa nwun damaa, dɔ̨nɔ̨ yɛ ɓo a Manase nwɔ nu kpulu.» 18 Yɛ Zabulɔn da Isakarə di nwɛi ɓa: «Zabulɔn, yá li kɔ́ tooi, gɔ́ ə nɛ̨ɛ̨ yɛ́! Yɛ́i ɓaa Isakarə, yáá kpɛli mąn, ə́ kwəinɛ̨ɛ̨, ə́ wɔ həɠə pɛlɛ́ɠaai mu. 19 Di kaa pai di kaayɔwɔɠaa təlii ɲee ɓa, diɛ haláá kulɔ laa yɛ bələi mąą nɛɛi la. Mąąhɔlɔɓo, da gboloyá ŋą hɛn gɔwɠaa hɔlɔɓo, di gboloyá mu hɛn gɔwɠaa hɔlɔɓo.» 20 Yɛ Gadə nwɛi ɓa: «Mąąwiɛ ə kɛ Yai-Laa ɓa! Yaai lɔi kɛnɛ̨ tɛɛ Gadə pɔ. Gadə aa pɛlɛ yɛ yala hilɛ. Ɲą́ą́ tɛɛ kpɔ gɔ̨nɔ̨n ɉon mɛ̨nį ɓa, ə mɛla ɉu, ə həɠə gɔwɔ ɓa, ə həli la nwun ma. 21 Gadə aa nɔi nɛlɛɛ həɠə, yii a kulaa tɔɔi, ya ɓə ə ɉəɠə. Aa too nɔi nwun nąmįną pɔ, Aa Yai-Laa nwɔ tələnmolaa pɔ túwɔ́ ɓo, da mɛ̨nįɠaa Yai-Laa ə naa gwə́i Israɛlə ɓalo mɛ̨nį ɓa.» 22 Yɛ Dan nwɛi ɓa: «Dan kaa yɛ yala hilɛ gbɔn, yii gaa kwəi-kwəi kulɔi Basan lɔi hu.» 23 Yɛ Nɛftali nwɛi ɓa: «Nɛftali aa pilɛ mɛ̨inɛ̨ɛ̨ hu, Yai-Laa aa lúwɔ́ too mą kpɔ kɛnɛ̨; Ya ka tii a nwɔ lɔi hu kɛnɛ̨ voló tooi pələ da ɉɛɠɛɛ pələ.» 24 Yɛ Asɛrə nwɛi ɓa: «Lúwɔ́ ə kɛ Asɛrə ɓa Ɉakɔbə lonnii lɔwai; nwɛli ə kɛ nąn nonnii kəlee diɛ. Gɔɔ ə hvilɛn gbonwoi, nwun ə laa yee ɓa. 25 Gaa kpɔnŋąą pulu gwɛli yɛ ɓo a kwəli kpəlee da ɓala kwɛli. Gɛ́ nwɔ huwalawala hu ə kwɛa lɔ yɛ bələi ɲíi hvóló kaa la!» 26 Moisə yɛ nwɔ̨nɔ̨ diɛ: «Yesurun, hɛn da hvo laa da, ə́ mąąkpɔmąą ɓo Yálá di pɛliɛ, yaai mąąwia, yɛ hiɛ tulɔ kpinįnŋąą lɔwai a vaŋą yələkɔlɔn ɉu. 27 Yálái gaa a tɔwɔ-tɔwɔ Yálá, ya ɓə gaa a ə́ mąąkilɛi, ya ɓə ə́ yowoɠaa kpɛ ə́ tɔwɔ, yɛ kɛ yɛ́: di hu kala. 28 Ə́ hvįįtɔɔ a ə́ wəli pulu laɠiɛ, Ɉakɔbə nwɔ yá nwun gulɔi kaa laai a dee; yɛ li ɓɛi mɔ̨nun da lɔɔ nįnɛ̨ di kaa laa nɔi; yələkɔlɔn yɛ tulɔ pu mą. 29 Israɛlə! Ə́ nwun na nɛ̨ɛ̨i! Gbɛɛ ɓə ka yaa ka kulaa tii ka kee ɓai? Yɛ́i ə tɔɔ bulu ɓaa Yai-Laa! Yaa ɓə gaa a ə́ mąąkpɔmąą ɓo hə́mə́! Yaa lɔ ɓə gaa a ə́ wɔ huwalawala ɓɔwa kwɛa! Ə́ yowoɠaa di hvo kolokpɛli di lii pɔ wɔlɔi ə́ pɔ, ya di wɔ lɔi too ə́ kɔ́wɔ mu, yɛ́ hiɛ ɉu.» |