Dutɛrɔnome 31 - Yálá laawoo hɛɓɛ (dc)Moisə hvɛli woo Israɛlə ɓa 31—34 Ɉosue ɓə lɛɛ a Moisə mąąhvalin 1 Yili pulu, Moisə ə nwooɠaa ŋɛ̨i ɓo Israɛlə nuą kəlee diɛ, yɛ diɛ: 2 «Háákələi, gáá kwɛlan aa kɛ a kwɛlan nwun dɔ̨nɔ̨ ɲee hveelɛ; vá kɛa pɛli lɛɛi ɲąąwooɓo laa hu, ə lɛɛ, Yai-Laa aa mo mą́ą́ yɛ mą: ‹Ɉurdɛn yái ŋɛ̨i ə́ kaa gaai, hvó pai deen ɉii.› 3 «Yai-Laa ka wɔ Yálái yaa kpinįi ɓə pai tɔɔi ka ɲɛ̨i tɔwɔ, yaa kpinį ə nu huwuɠaa tii kpɛ ka ɲɛ̨itɔwɔ ɲa pulu ɓɛli pələ, yɛ nɔi kulɔ di yəi yɛ dɛɛ ka pɔ. Ɉosue ɓə pai tɔɔi ka ɲɛ̨i tɔwɔ, yɛ bələi Yai-Laa ə mo la kaa. 4 Bələi Yai-Laa ə Amɔrə tɔɔɓɛlaa hveelɛi kɛ a Sihɔn da Ogə di hon na, yɛ di huwu pu da di wɔ lɔi hu nuą kəlee, bələ ɓə gaa pai nɔi tii hon ɉii la. 5 Yai-Laa kaa pai di lɔi ka yee ŋą; ka di hon yɛ bələi ŋį́ ka tí la. 6 Ka ka liikpələ, ka tɔɔ a ka nwąnąi, ka hvo ɲɔw, ka mąą hvo kpɛlin di lííla. Mąąhɔlɔɓo, Yai-Laa ka wɔ Yálá hvilɛn ŋąąi ka ɲɛ̨itɔwɔ, hva ka lɛɛ laa, hva gili kulɔ ka hu tɔ̨nɔ̨ kpɛli.» 7 Yili pulu, Moisə ə Ɉosue təli Israɛlə nuą kəlee ɲɛ̨i ɓa, yɛ mą: «Ə́ liikpələ, ə́ tɔɔ a ə́ nwąnąi, nɔi ŋɛ̨i Yai-Laa ə gwɛla nuą ŋɛ̨i di kalaɓɔlɔni diɛ, yɛ kɛ gaa dɛɛi di pɔ, yɛ́ ɓə tɔɔi nuą ŋɛ̨i ɲɛ̨itɔwɔ, ə́ di lɔ nɔi tii hu, di gɛ a di kwɛlin, di hee laa. 8 Yai-Laa ɓə pai tɔɔi ə́ ɲɛ̨itɔwɔ kaa li, gaa pai kɛi ə́ pɔ, hvo pai ə́ lɛɛi laa, hva gili kulɔ ə́ hu, hvó ɲɔw, ə́ mąą hvo kpɛlin.» Mąąnɛ̨ɛ̨ diɛ dɔ́n ɉɛɓɛ́ ɓo kwɛlan mɛ̨ihveelɛ tɛɛ pələ tɛitɛi pulu 9 Levi lonnii ŋɛ̨i kɛ a ɉaláá kulɔ nuą, diɛi kɛi mįnɛ̨ kon ɉəɠə, yii gwɛni ɓɛla hveelɛi ə kɛ laani ɉu, Moisə ə dɔ́n nwooɠaa tii pɛ̨ɛ̨ ə dɛɛ di pɔ, da Israɛlə kalanɉonŋąą kəlee. 10 Moisə ə mo diɛ, yɛ diɛ: «Kwɛlan mɛ̨ihveelɛ tɛɛ pələ tɛitɛi kəlee, kwələɠaa lɛɛ mɛ̨nį a mɛ̨inɛ̨ɛ̨ a ɉəli, da gwɛlan ŋɛ̨i da ɉəɠə pɛlɛ́ mąą hɛli pu la, 11 ɓɛlɔwai Israɛlə nuą kəlee kaa pai di ɲąąkpɔn ɉii la Yai-Laa ka wɔ Yálái lííla, ɓɛi ŋɛ̨i ə ɲeekpiɛ lɛ nąąi, nąąlɔwai, ka dɔ́n ŋɛ̨i ɓo Israɛlə lonnii kəlee ɲɛ̨i ɓa, ə too di wəlii. 12 Ka nuą kəlee ɲąąkpɔn, hulɔnu mąn, nɛ̨ɛ̨nu mąn, lokolo mąn, ə mą kɛ, nwɛ̨ąi di kaa ka kɔ́wɔ mɛ̨i ka wɔ taaɠaa hu, ə gɛ, di mɛ̨nį ta mąąkwɛli bɔ, diɛ ɲɔw la Yai-Laa ka wɔ Yálái ɓa; di dɔ́n nwooɠaa ŋɛ̨i kəlee pɔ mɛ̨nį kɛ. 13 Ɛlɛɛ, di lonnii tii gbaɠala hvo diɛ, di kaa pai bələ mɛ̨n ɉii, di Yai-Laa ka wɔ Yálá mąąwiɛ pələ mąąkwɛli, ka yíi hvóló kəlee hu, nɔi ŋɛ̨i ka káá lii heei ɉu Ɉurdɛn ya pulu.» Israɛlə kaa pai kulɔ nwoo mu laa kɛi Yálá ɓa 14 Yai-Laa yɛ Moisə ɓa: «Moisə! Ə́ pɔlɔ hiɛ ka ɉu hvo kwɛa li, Ɉosue təli ka yaa ka pa gee kaa kələ laaləi, nąą ɓə gáá nwɔ́ tíɓoi tɛɛi laa bɔ.» Moisə da Ɉosue di nɛɛ mą də li gee kaa kələ laaləi. 15 Yai-Laa ə gbɔwɔ lɛ diɛ gee kaa kələ laaləi tulɔ kpinįn gwɛa hu. 16 Yai-Laa yɛ tɔlɔɔ Moisə ɓa: «Ə́ laa hiɛ ka ə́ nąnni kwɛlɛ. Ə́ haa pulu, Israɛlə nuą kaa pai tɔɔi diɛ kwɛli hvilɛn haliɠaa diɛ nɔi tii di kaa lii ɉu. Di kaa pai nɛ́ɛ́i laa, mįnɛ̨i ŋɛ̨i kwa diɛni ku ɉəɠə, di həɠə bulu, di mąą kala. 17 Yili mąą mɛ̨nį ɓa, gáá pai níí ɲąnwąnąąi diɛ, ɲą́ą́n, ŋą́ pai həɠəi di pulu, ŋą́ di lɛɛ laa; di kaa pai lɛɛi a hį́i takpɛliɠaa di wɔ luwɔ. Ɲɛ̨ikɔw kpɔlu da mɔ̨nɔ̨ɠaa di kaa pai laai diɛ. Nąąlɔwai di kaa pai gɔlɔn ɉii mɛ̨nįɠaa tii pɔ pələ, diɛ kɛ, ɲą́ą́ ŋɛ̨i a di wɔ Yálá və́ di lɔwai. 18 Mąą yələi tii, ɲą́ą́n gáá lɔ pai ɲɛ̨́i lɛlɛɛ həɠəi di mɛ̨i, dúwɔ́ pələ ɲɔ̨n tii di gulɔ a ɲą́ą́, a di hvilɛn mɛ̨nį haliɠaa pulu. 19 Yili ɓa tii, nwələi ŋɛ̨i pɛ̨ɛ̨ ka mąą mɛ̨nį ɓa, ə́ Israɛlə lonnii mąąkwɛli mą, ə kɛ di la a kɛla kwa diɛni ku lɔwai. 20 Yaan, a tɛ̨ą, nɔi ŋɛ̨i ɲįnįyá da kwɛin nwulɔ da di kpoloon naa ɉu yɛ yá lon, gáá nąą tɛɛi di pɔ a di wɔɔ, yɛ bələi ŋą́ naakwɛlanmo la tii di kalaɓɔlɔni diɛ, gɛ́ gwɛ́la ɉu. Di kaa lii kɔ̨nɔ̨n ɉɔlɔɓoi laa a di liiɓa pələ, diɛ mįi; di kɔ́lɔ lɛlɛɛ yɛ laa diɛ. Yili pulu, di kaa pai di pulu tɔɔi mą́ą́, diɛ hvilɛn haliɠaa pulu, diɛ tí ɉaliɠaa tii diɛ; di kaa pai vííɓoi, di nwɔ́ mįnɛ̨i hu kala. 21 Yili a kɛ tii, ɓɛlɔwai mɔ̨nɔ̨ kpɛa kpɛa da mɛ̨nį nwąnąą kpɛa kpɛa da pa laai la diɛ, nwələi ŋɛ̨i lɔ ɓə a di kilaa pɔ̨nɔ̨ di hɔn mąą mɛ̨nį hu. Nwələi ŋɛ̨i ɓə gaa a kɛla kwa diɛni ku lɔwai. Mąąhɔlɔɓo, di huwu hvo pai kpɛlai nwələi ŋɛ̨i toɔ ɓa. Və́ kpɛli nii di lɔ li nɔi tii hu, mɛ̨nįi di kwəi, ŋą́ą́ mąn gɔlɔn.» 22 Mąą yələi tii lɔ ɓə Moisə ə nwələ woo pɛ̨ɛ̨ la, ə Israɛlə lonnii mąąkwɛli ma. 23 Yai-Laa ə mɛ̨nįɠaa ŋɛ̨i ɓo kpɔ Nun lon Ɉosue ɓa a nwąnąąi, yɛ mą: «Ə́ liikpələ, ə́ tɔɔ a ə́ nwąnąąi, mąąhɔlɔɓo, nɔi ŋį́ nwóó kwɛlɛ la Israɛlə lonnii diɛ, ŋį́ naakwɛlanmo diɛ, gɛ́ gáá dɛɛi di pɔ, yɛ́ ɓə pai di lɔi ɉu. Ɲą́ą́n, gáá pai kɛi ə́ pɔ.» 24 Kpɛɛi Moisə ə mo a dɔ́n nwooɠaa pɛ̨ɛ̨ ɉɛɓɛ́ hu, 25 Levi lonnii ŋɛ̨i da kɛ Yai-Laa nwɔ mįnɛ̨ kon həɠəi, Moisə ə mo diɛ, yɛ diɛ: 26 «Gəhi lon tii Yai-Laa ka wɔ Yálá nwɔ mįnɛ̨ kwɛni ɓɛlaɠaa kaa laani ɉui, ka dɔ́n ɉɛɓɛ́ həɠə ka naa gwɛlɛ. Yili ɓə pai kɛi a kɛla. 27 Mąąhɔlɔɓo, ka kwɛli teɛi, ɛlɛɛ, ka nwun ɉu walawalaa mɛ̨nį nwɛi, yili kpaɠala ka mą́ą́ nii háákələi ka lɔwai. Vúlú kɔ́wɔ ŋą ɓə ka tɔɔlaa Yai-Laa la, gu hvo mun kɛ ɉáá pulu! 28 Yii hu kɛa, galanɉonŋąą kəlee, nɔi nwun nąmįnąą kəlee, ka di ɲąąkpɔn gwɛ́lɛ, ŋį́ nwooɠaa ŋɛ̨i ɓo, ə too di wəlii, yələkɔlɔn da lɔi di kɛ a nwɛ́i gɛla. 29 Mąąhɔlɔɓo, gíli kaa ɉu, gɛ́ diɛ, ɉáá pulu, ka káá pai ka yee lɔi nɛ̨ŋɛ̨n mɛ̨nįɠaa hu, ɛlɛɛ, bələi ŋį́ nɛ kaa, kaa həɠə mɛ̨i. Ka wɔ yɛnɛ̨ɛ̨ dɔwɔ pələ, mɔ̨nɔ̨ɠaa kaa pai lɔi ka pɔ; mąąhɔlɔɓo, mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ka káá pai ka yee lɔi gɛɛ hu, kaa niikələn gwəi a ka túwɔ́ pələ ɲɔ̨nŋąą.» 30 Moisə ə nwələi ŋɛ̨i too Israɛlə lonnii kəlee ɲɛ̨i ɓa; ə too di kəlee di wəlii. Nwələ kpɔ ka: |