Dutɛrɔnome 30 - Yálá laawoo hɛɓɛ (dc)

Israɛlə kaa pai pənəi yɛ pa Yálá pɔ

¹ «Lúwɔ́ da nɛ̨ŋɛ̨n naai ŋɛ̨i ŋą́ą́ naa ka lííla, ɓɛlɔwai gəlee kaa pai laai la kaa, ka káá pai ka kiliŋąhiɛi ma, kaa ɉu kpɛ, nɔiɠaa kpɔ tii Yai-Laa ka wɔ Yálái kaa pai lii a kaa ɉu,

² nąąlɔwai, ka káá pai pənəi ka pa, Yai-Laa ka wɔ Yálái pɔ, kaa, ə mą kɛ ka lonnii, kaa ka wəli tɔɔ nwoo ɓa, a ka kwəi kwɛlɛɛ, da ka wɔ yɛnɛ̨ɛ̨ kɛ pələ kəlee. Mɛ̨nįɠaa kpɔ gáá ka tíi la háákələi, kaa gəlee kɛ.

³ Nąąlɔwai, Yai-Laa ka wɔ Yálá a ka wɔ yɛnɛ̨ɛ̨ ɲɛ̨ilaa mąąhvalin, ə nwɔ liinɛɛ gwəi laa lɛ kaa. Nɔiɠaa kpɔ tii ə ka taɠa taɠa ɉu, a pənə ə ka kulɔ laaɠaa, ə ka ɲąą kpɔn nwɔ̨nɔ̨.

⁴ Ə mą kɛ daa li a kaa lɔi kpon ɉeei, a ka ɲąą kpɔn naa, yɛ li ka həɠəi nąą.

⁵ Nɔi ŋɛ̨i wɔlɔ kɛ a ka kalaɓɔlɔ ni di wɔ lɔi, Yai-Laa kaa pai pənəi ə pa a kaa ɉu, ə kɛ a ka kwɛlin. Gaa pai ka nwun na nɛ̨ɛ̨i, ə ka huwuhu ɓɛlɛ ə tɛɛ la ka nąnni diɛ.

⁶ «Yai-Laa ka wɔ Yálá yaa kpinįi gaa pai ka lii mąąhəɠəi, kaa, ka ka huwuhu nuą kəlee, kaa pɛli Yai-Laa ka wɔ Yálá wɛli la kɛi a ka lii kəlee da ka wɔ yɛnɛ̨ɛ̨ kəlee.

⁷ Mɛ̨nįɠaa kpɔ Yai-Laa ka wɔ Yálái ə mo, yɛ hvilɛn na ka yowoɠaa diɛ, diɛi kɛ di hvilɛn ŋąą ka pulu a yowo laa kɛnɛ̨, Yai-Laa ka wɔ Yálá a mɛ̨nįɠaa tii kəlee pɔ mɛ̨nį kɛ.

⁸ Nąąlɔwai tii hu, ka káá pai pənəi kaa ka wəli tɔɔ Yai-Laa ka wɔ Yálái woo ɓa, nwɔ tíɓoɠaai gáá dɛɛi ka pɔ háákələi, kaa gəlee pɔ mɛ̨nį kɛ.

⁹ Ka kɛ mɛ̨nįɠaa kəlee hu, Yai-Laa ka wɔ Yálái a ɉu nɛ̨ɛ̨ ka yəi. A ka kwəi nwun, kaa lon damąą kaa, ka wɔ taatɛlɛɛɠaai kpɛli mąn diɛ di kaa tamąą, ə mą kɛ ka wɔ hihɛnŋąą diɛ ɓá kpɔ kɛnɛ̨. Mąąhɔlɔɓo, hɛn nwɔ̨nɔ̨ pai kɛi a Yai-Laa nwɔ kwəinɛ̨ɛ̨ mɛ̨nį, ya ɓaa, ka kɛ nwun nąnɛ̨ɛ̨ hu yɛ bələi ə gɛ la ka nąnni diɛ.

¹⁰ Akɛ ka ka wəli tɔɔ Yai-Laa ka wɔ Yálái woo ɓa, ka nwɔ tɔ́n nwooɠaai hon da nwɔ tíɓoɠaai bɛ̨ɛ̨ ɉɛɓɛ́i ŋɛ̨i hu, kaa pənə kaa pa Yai-Laa ka wɔ Yálái pɔ ka kwəi tɔ̨nɔ̨ mɛ̨i, a ka lii kəlee.

Yálá woo lɛɠɛɛ kpɔ kaa hɔɔlɛɛ

¹¹ «Dɔ́n ŋɛ̨i gáá dɛɛi ka pɔ háákələi, hvo a mɛ̨nį yii gbaɠala kaa la walaa, hvo nwɔ̨nɔ̨ laŋin ni ka yee mɛ̨i.

¹² Hvo a mɛ̨nįi gaa yələi, mąą kwɛaa kaa, əgɛ, ka hvo pa kɛ diɛ: ‹Gbɛɛ ɓə pai tɛi yələi ə ɉəɠə ə paa la, ə ɉukulɔ kuɔ, əgɛ, ku mɛ̨n?›

¹³ Hvo kpɛli gboloyá pulu pələ, əgɛ, ka hvo pa kɛ diɛ: ‹Gbɛɛ ɓə pai lii gboloyá pulu pələ, ə ɉəɠə ku yəi, ə pa ə ɉukulɔ kuɔ, ku mɛ̨n, kuɔ bɔ mɛ̨nį kɛ?.›

¹⁴ Mąąhɔlɔɓo, nwoo tii kaa kpɔlɔɔ ka kwɛlɛ, mąą lɛɠɛɛi kaa kpɔ hɔɔlɛɛ, gaa ka laaləi, ə ɓo ka lii pɔ, ka pɛli bɔ mɛ̨nį kɛi.

Yɛnɛ̨ɛ̨ kɛɛ həɠə ɉu

¹⁵ «Ka ka ɲɛ̨i hee, háákələi, gáá ɓalo da nwun nąnɛ̨ɛ̨ laai ka ɲɛ̨i, ə lɛɛ, haa da mɛ̨nį nwąnąą.

¹⁶ Mɛ̨nįi háákələi gáá ka tí a gɛ mɛ̨nį, ya ɓaa: Ka Yai-Laa ka wɔ Yálái wɛli la kɛ, ka hiɛ a gbaaləi ŋɛ̨i ə nɛ kaa, ka nwɔ tɔ́nŋąą hon, bɛlɛɛ nwɔ tíɓoɠaa diɛ. Ka yili kɛ tii, ka lɛɛ yɛnɛ̨ɛ̨, ka yíi hvólóɠaa hu ə kwɛa, ka ɓuwu ɓo; akɛ tii, nɔi ŋɛ̨i ka káá pai ɉɔlɔɓoi a ka wɔɔ, Yai-Laa ka wɔ Yálá a lúwɔ́ too kaa.

¹⁷ Kɛlaa, akɛ, ka ka pulu tɔɔ mą, ka ka kili kulɔ nwoo hu, ka nɛɛ laa di ka ɲąąhɛŋi kaa kwɛli hvilɛn haliɠaa diɛ, kaa tí diɛ;

¹⁸ Gáá kpɔ moi kaa háákələi, nɔi ŋɛ̨i ka káá lii heei ɉu Ɉurdɛn yá pulu, ka wɔ yɛnɛ̨ɛ̨ hu hva kwɛa laa, ɛlɛɛ, ka nwun na a pili hea hvo kpɛli ɉu.

¹⁹ «Gáá háákələi yələkɔlɔn da lɔi di kɛi a kɛla ka mąą mɛ̨nį hu. Gáá ɓalo da haa laai ka ɲɛ̨i; lúwɔ́ da nɛ̨ŋɛ̨n naa. Yɛnɛ̨ɛ̨ həɠə ɉu, ə gɛ, kaa-o, ka huwu hu nuą-o ka lamun yɛnɛ̨ɛ̨.

²⁰ Ka Yai-Laa ka wɔ Yálái wɛli la kɛ, ka ka wəli tɔɔ nwoo ɓa, ɛlɛɛ, ka kanąn mą. Mąąhɔlɔɓo, nɔi ka Yai-Laa ə gwɛla yɛ kɛ gaa dɛɛi ka kalaɓɔlɔni pɔ: Abrahamə, Isaakə da Ɉakɔbə; bələ ɓə ka yíi nɛ̨ɛ̨ hɔlɔɓo la nɔi tii hu.»