Dutɛrɔnome 3 - Yálá laawoo hɛɓɛ (dc)Ogə nwɔ lɔi hon mɛ̨nį 1 Gu tinɛ̨n gu ɉon a Basan lɔi hu pələ; kɛlaa, Basan tɔɔmun Ogə ə kulɔ, ə gu laakwiɛn a kɔ́, Ɛdrɛi, yaa da nwɔ lɔi hu nuą kəlee. 2 Yai-Laa yɛ mą́ą́: «Hvo ɲɔw mą! Mąąhɔlɔɓo, ŋą́ą́ doo ə́ yee ŋą, da nwɔ lɔi hu nuą kəlee, bɛlɛɛ nwɔ lɔi ɓa. Naa mą yɛ bələi ə́ naa la Amɔrə nuą di wɔ tɔɔmun Sihɔn ɓa, yai kɛ heeni Hɛsbɔn daai.» 3 Yai-Laa gu wɔ Yálái, ə Basan tɔɔmun Ogə da nwɔ lɔi hu nuą kəlee lɔ gu yee ŋą. Gu yee ə tɛɛ mą, gu hvo nu ta lɔpee lɛɛ laa a vulú. 4 Gu lɔ nwɔ taaɠaai kəlee hu, taa hvo kɛ di pɔɔli yii gu hvo ɉon. Taa pow mɛ̨ida yai kɛ a Argɔvə lɔi kəlee Basan lɔi hu yii Ogə ə kɛi tɔɔlaa kɛ mɛ̨i. 5 Gəlee di kɛ a taai hįį kpoloon dɔɔ mą. Ɉįį kpoloon ɲee muhəɠɛɛ, kpon veelɛ ə ɓo naaləi. Kwɛli hɔlɔɔn naa bulu; daa pɛlɛɛɠaa laa hvo kɛ ɉu. 6 Gu gəlee hu wolo, yɛ bələi gu gɛ la a Hɛsbɔn tɔɔmun Sihɔn, gu daa kəlee kɛ a haláá hɛn, ɉinąą, nɛ̨ąą da nɛapɛlɛɛ. 7 Gu daatɛlɛɛ kəlee həɠə a kɔ́ hon, da daa hu hɛn gɔwɠaa. Di Galaadə lɔi ɲąąkwɛlɛ 8 Bələ ɓə gu Amɔrə tɔɔɓɛlaa hveelɛi di wɔ lɔi kulɔ la di yəi, ə həɠə Arnɔn ɓa, ə həli la Hɛrmɔn yee ɓa. 9 Sidɔn nuą da kɛ Hɛrmɔn laa ɓaa a Siryon, Amɔrə nuą diɛ kɛ mą Senirə. 10 Gu ɲee hu taaɠaa kəlee hon, Galaadə lɔi kəlee, Basan lɔi kəlee, ə həli la Salka da Ɛdrɛi ɓa. Basan taaɠaai tii Ogə ə kɛ a nąą tɔɔmun. 11 Basan tɔɔmun tii kɛ a Ogə, yaa tɔ̨nɔ̨ ɓə kɛ aa lɛɛ a Refaitə nuą kpəli. Nwɔ gbin ə kɛ a kwɛli gbin, gaa Raba Amɔn nuą di wɔ taaleei hu, gwɛa yee ə kɛ a yee laa mą mɛ̨inąą, ɲąą kɛnɛ̨ yee ə ɓo a yee laa mą nąąn; yɛ bələi da hɛnŋąą kɔ́ɔn na a bɔlɔ. 12 Gu nɔi tii hon, Galaadə yeeɠaa bələ tɔ̨nɔ̨ da ɉu taaɠaa, ə həɠə Aroɛrə Arnɔn ɓa, ŋį́ dɛɛ Rubɛn da Gadə di wɔ nuą pɔ. 13 Galaadə lɔi kpɛli, da Basan lɔi kəlee, yai kɛ a Ogə nwɔ lɔi, ŋį́ yili tɛɛ Manase huwu bələ tɔ̨nɔ̨ pɔ. Argɔvə lɔi kəlee, da Basan lɔi kəlee, di kɛi kɛ diɛ yili kaa ɓaa Refaitə nuą di wɔ lɔi. 14 Manase lon Yairə ə Argɔvə lɔi kəlee hon ə həɠə Gesurə nuą di wɔ lɔi ɓa, ə həli Maaka nuą di wɔ lɔi ɓa, ə gbɔwɔ laa hee Basan lɔiɠaa diɛ; di kɛ lɔ ni di təli a Yairə taaɠaa. 15 Makirə ɓə ŋį́ Galaadə lɔi tɛɛ bɔ. 16 Ə həɠə Galaadə lɔi ɓa, ə həli la Arnɔn ɓa, ŋį́ nɔi tii tɛɛ Rubɛn da Gadə di huwu pɔ. Arnɔn ɓə a ɲɛ̨n ɉɛɠɛɛ pələ, Yabɔkə ə ɓo a di ɲɛ̨n da Amɔn nuą. 17 Ɉurdɛn ə ɓo a di ɲɛ̨n voló həɠəi pələ, ə həɠə Kinerɛtə ɓa, ə həli la Ɉurdɛn ɲa-ɓoloon bɔ gboloyá ɓa, gboloyá kponą, Pisga yee kɔ́wɔ mu; ŋį́ nɔi yili tɛɛ Rubɛn da Gadə di huwu pɔ. 18 Nąąlɔwai ɓə ŋį́ mɛ̨nįi ŋɛ̨i ɓo la kaa, gɛ́ kaa: «Yai-Laa ka wɔ Yálái ɓə nɔi ŋɛ̨i tɛɛ ka pɔ a ka wɔɔ. Kaai kpɔ a gɔ́kulááɠaa, ka Ɉurdɛn teen, ka ka hąą yili, ka tɔɔ ka nąn nonnii Israɛlə nuą tɔwɔ. 19 Gíli kaa ɉu gɛ́ diɛ, taatɛlɛɛ kpulu kaa ka yəi, yili ɓa, ka nɛ̨ąni, da ka lonnii ə pɛlɛ la ka wɔ taatɛlɛɛɠaa diɛ, da lɛɛ daa leeɠaai ŋį́ dɛɛ ka pɔ ɉu, 20 Ka kpɔmąą tɛɛ ka nąn nonnii pɔ ə lɛɛ ɉu, Yai-Laa ə hvįįtɔɔ tɛɛ diɛ kpɛli mąn di pɔ yɛ bələi kaa ɉɔlɔɓo la. Nɔi Yai-Laa ka wɔ Yálái kaa dɛɛi di pɔ Ɉurdɛn pulu pələ, di lɔ ɉu. Ka kəlee ka li kɛa ka hee ka wɔ lɔi ŋį́ dɛɛ ka pɔ ɉu.» 21 Nąąlɔwai, ŋį́ mo nwɔ̨nɔ̨ Ɉosue ɓa, gɛ mą: «Mɛ̨nii Yai-Laa ka wɔ Yálái ə gɛ a dɔɔɓɛlaa hveelɛi ŋɛ̨i, yaa gaa a ə́ ɲɛ̨ikɔw. Bələ ɓə Yai-Laa kaa pai gɛi la a dɔɔɓɛlaai kpɔ ka káá pai di kaai ɲa pulu pələ. 22 Ka hvo ɲɔw diɛ, mąąhɔlɔɓo, Yai-Laa ka wɔ Yálái ɓə ka wɔ kɔ́i kɔ́i.» Moisə hvo pai lɔi Kanaan lɔi hu 23 Nąąlɔwai ɓə ŋį́ Yai-Laa mąąnɛ̨ɛ̨ la, gɛ́ kɛ mą: 24 «Yai-Laa yáá gɔwɔ tɔɔ yɛ́ ə́ kɛnɛ̨ pələ da ə́ yee wala wala pələ lɛ ə́ wɔ tímun ɓa. Yálá ta kaa mɔ̨ɔ̨ yələi da lɔi mɛ̨i, gɛ mɛ̨nįɠaa da nwɔ heeɓolaa diɛ həli Ə́ pɔ? 25 Hvaa mą ŋį́ tɛɛ ɲá pulu pələ, nɔi lɛlɛɛi tii Ɉurdɛn pulu pələ ŋį́ ɲɛ̨́i tɔɔ mą, da ɲee lɛlɛɛi tii Liban.» 26 Kɛlaa, Yai-Laa ə níiholi bɔ́ ka mąą mɛ̨nį ɓa, ɛlɛɛ, hvo gɛ hvo nwəli tɔɔ mą́ą́. Yai-Laa yɛ mą́ą́: «Kpɛla mą, hvo kɛa yili da ɓo mą́ą́. 27 Tɛ́ Pisga yee tonna, ə́ ɲɛ̨́i hee voló kulɔi da voló tooi pələ, ə́ ə́ ɲɛ̨i hee ɲələi pələ da ɉɛɠɛɛ pələ; ə́ ɲɛ̨i kwəleen gəlee mąą taɠa, mąąhɔlɔɓo, Ɉurdɛn ŋɛ̨i ə́ kaa gaai, hvó pai deen ɉii. 28 Ə́ kwəi mɛ̨nįɠaa ɓo Ɉosue ɓa. Váŋąlɔ, ə́ niikpələ, mąąhɔlɔɓo, yaa tii ɓə pai kɛi nu kpulu nwun na diɛ Ɉurdɛn teen. Nɔi ŋɛ̨i ə́ kaa gaai, ɉu ɓə di kaa lɔi laa.» 29 Ɛlɛɛ, ka gu lɛɛ Bɛtə-Peɔrə yɛɛ kɔ́wɔ tənən ma. |