Dutɛrɔnome 28 - Yálá laawoo hɛɓɛ (dc)

Yálá aa nwun na nɛ̨ɛ̨ laakwɛlanmo

¹ «Akɛ ka ka wəli tɔɔ kpɔ a nɛlɛɛ, Yai-Laa ka wɔ Yálái woo ɓa, kaa tɔɔ a ka nwanąi kaa nwɔ tɔ́nŋąą kəlee hon diɛi gáá di tɛɛi ka pɔ háákələi; ka gɛ tii, Yai-Laa ka wɔ Yálái kaa pai ka kɛnɛ̨i lɔi mɛ̨i nu huwuɠaa kəlee diɛ.

² Núwɔ́ɠaai pai yɛɛ ka mɛ̨i, di mɔ kaa, akɛ kpɔ ka ka wəli tɔɔ Yai-Laa ka wɔ Yálái woo ɓa, diɛ ka:

³ «Lúwɔ́ a kɛ kaa taai, ə kɛ kaa ɲɛa kɔ́wɔ hu!

⁴ Lúwɔ́ ə kɛ ka kwəi lonnii diɛ, ə kɛ ka wɔ hihɛnŋąąi diɛ, ə kɛ ka wɔ taatɛlɛɛ lonnii diɛ, ka wɔ nįŋɛ̨ koo nɛ̨aɠaa da mɛlaa kɔ̨nwɔ̨leeɠaa.

⁵ Lúwɔ́ ə kɛ ka wɔ yɛa kɔ́ɔi ɓa da ka yəi nwɔ̨n dinii.

⁶ Lúwɔ́ ə kɛ ka lii da ka pai ɓa.

⁷ «Ɓɛlɔwai ka yowoɠaa da di muhəɠə la diɛ pɛlɛ kaa a kɔ́, Yai-Laa ka wɔ Yálái a di too ka kɔ́wɔ mu. Di kaa pai pai a pələ tɔ̨nɔ̨ diɛ wolo kaa, kɛlaa da pu ka tɔwɔ diɛ li a pələ mɛ̨ihveelɛ tee-tee.

⁸ Yai-Laa kaa pai ka wɔ kɔ̨nɔ̨n gələɠaa mɛ̨i kaai, mɛ̨nį lɔpee ka káá pai ka yee tooi ɉu, yɛ lúwɔ́ too mą. Nɔi Yai-Laa ka wɔ Yálái ə dɛɛ ka pɔ, gaa pai lúwɔ́ tooi kaa ɉu.

⁹ «Yai-Laa kaa pai ka kɛi a nwɔ nu huwu, yɛ bələi ə gwɛla la kaa, akɛ ka Yai-Laa ka wɔ Yálái nwɔ tɔ́nŋąąi hon, kaa hiɛ a ɲeekpiɛ tənən.

¹⁰ Yɛnɛ̨ɛ̨ nąą kəlee nuą, di kaa pai kɛi diɛ: ka káá a Yálá nwɔ nu huwu.

¹¹ Yai-Laa kaa pai kaa pai ka kwəi nwun ɉii, kaa lon gaa, ə mą kɛ ka wɔ taatɛlɛɛɠaa, ka wɔ lɔi ə lɛlɛ, yɛ ɉihɛnŋąą ŋąąnɛ̨ɛ̨, nɔi ŋɛ̨i Yai-La ə gwɛla, ka nąnni diɛ yɛ gaa dɛɛi ka pɔ, ɉu.

¹² Yai-Laa kaa pai pələ laa ɓoi nwɔ yələkɔlɔn ɉu hɛn gɔw neelee tɔwɔ, yɛ tulɔ pu a bui lɔwai ka wɔ lɔi ɓa, yɛ lúwɔ́ too ka kɛ mɛ̨nįɠaa kəlee diɛ. Ka káá pai kwələ tɔɔi hį́i tamąą ɓa, kɛlaa, ka hvo pai kpaan ɉii, ka hvo kwələ həɠə.

¹³ Yai-Laa kaa pai ka tɔɔi nu huwu kəlee ɲɛ̨i tɔwɔ, ka hva yɛɛ nui lɔpee ta mu pələ; akɛ Yai-Laa ka wɔ Yálái nwɔ tɔ́nŋąąi gáá dɛɛi ka pɔ háákələi, ka ka wəli tɔɔ mą, kaa bɔ mɛ̨nį kɛ;

¹⁴ akɛ nwɔ pələɠaa ŋɛ̨i gáá dɛɛi ka pɔ háákələi, ka wala həɠə mɛ̨i, kaa li ɓa mįi yee hu, a wala kɛ tii, kɔ́ɓɛyee hu; ɛlɛɛ, akɛ ka wala hvilɛn haliɠaa pulu, kaa kwɛli hvilɛn diɛ.

Mɛ̨nį nwąnąąɠaa

¹⁵ «Kɛlaa, akɛ Yai-Laa ka wɔ Yálái nwɔ tíɓoɠaa da nwɔ tɔ́nŋąąi gáá dɛɛi ka pɔ háákələi, ka wala ka wəli tɔɔ ɉu woo ɓa, ɛlɛɛ, ka wala tɔɔ a ka nwąnąi, kaa di pɔ mɛ̨nį kɛ, mɛ̨nį nwąnąɠaai pai həlii kaa, diɛ ɓɛla kaa a kpalo, diɛ ka:

¹⁶ «A ka nɛ̨ŋɛ̨n naa taai, ə mą kɛ, ɲɛaɠaa ɓa.

¹⁷ A ka nɛ̨ŋɛ̨n naa ɲɛa kɔ́wɔ hu, da ka yəi nwɔ̨n dinii.

¹⁸ A ka kwəi lonnii nɛ̨ŋɛ̨n naa, da ka wɔ hihɛnŋaa, ka wɔ taatɛlɛɛɠaai kwəi a haa, ka wɔ nįŋɛ̨ koonɛ̨ąɠaa nɛ̨ŋɛ̨n ə laa, da ka wɔ ɓɛlaa kɔ́nwɔ̨leeɠaa.

¹⁹ Ka nɛ̨ŋɛ̨n ə laa, ka lii, da ka pai.

²⁰ «Kóló lɔpee ka ka yee too ɉu, Yai-Laa a kulɔ ka pulu ə ka nɛ̨ŋɛ̨n naa, ɉu hva nɛ̨ɛ̨. Ɛlɛɛ ɉu ə ka nwun na pili kpɔlɔɔ a ɉu kwɛaa; mɛ̨nį kɔ́hɔɓoɔ tii ka káá pai gɛi mąą mɛ̨nį ɓa;

²¹ Yai-Laa kaa pai nu huwu pu ɲɔ̨n bɛlɛi kaa, ə lɛɛ la ɉu, ka kpɛɛ, nɔi ŋɛ̨i ka káá lii ɉɔlɔɓoi ɉu.

²² Yai-Laa kaa pai huhaa ɲɔ̨n, kwɛlɛ ɲɔ̨n, kɔ́lɔ kələn mąą, da kwəi kulɔ ɲɔ̨n bɛlɛi kaa, yɛ ka wɔ tíiɠaai kala, ɲɔ̨nŋąą tii da lɛɛ ka pulu, ə lɛɛ ɉu, di ka nwun na pili.

²³ Yələkɔlɔn a walawala ka nwun mɛ̨i yɛ kwɛli kpɔlu, lɔi yɛ walawala ka kɔ́wɔ mu yɛ kwɛli kpèlèè.

²⁴ Yai-Laa hvo pai tulɔ pui ka wɔ lɔi ɓa, kɛlaa luwu da muluun gbala ɓə pai kɛi kulɔi yələi, diɛ yɛɛ ka mɛ̨i, əlɛɛ ɉu ka kpɛɛ lɔi mɛ̨i.

²⁵ Yai-Laa kaa pai ka yowoɠaa yee tɛɛi kaa, ka kulɔ a pələ tɔ̨nɔ̨ kaa li pɛlɛi diɛ, kɛlaa da pu ka hu, kaa pu di tɔwɔ a pələ mɛ̨ihveelɛ a dee tee. Ka káá pai yɛnɛ̨ɛ̨ lɔiɠaa kəlee kwəi pili diɛ.

²⁶ Ka powa a lɛɛ a yələi nwɛ̨niɠaa da ka pɔ yɛa huwɔɠaa kɔ̨nɔ̨n; nu hvo pai hɔlɔɓoi yɛ di kpɛ.

²⁷ «Yai-Laa kaa pai munwɔ̨ɠaa da nwɔ tɔɔ hɛnŋąą pɛlɛi kaa; da lɔ́wɔ́ ɲɔ̨n, ə mą kɛ tiha yɛ bələi ə gɛ la a Eziptə nuą; ɛlɛɛ, ka nwun va kulɔ ɉu.

²⁸ Yai-Laa kaa pai ɓowo ɲɔ̨n, ɲɛ̨ipu ɲɔ̨n da hupu mąą ɲɔ̨n bɛlɛi kaa.

²⁹ Hvóló haɠan ɉii lɔwai, ka hiɛ ɓɛ-ɓɛ yɛ ɲɛ̨ipumun, ka hva ka li pələ kɔ́lɔn. Di kaa lɔ pai kɛi di yee pənəi ka hu, diɛ too ka mɛ̨i, nu hva hɔlɔɓo, hvo kpɔmąą tɛɛ ka pɔ.

³⁰ «Nɛ̨ɛ̨nui ka káá pai doonwəlii kɛi, nu takpɛli ɓə a laa la. Pɛ́lɛ́i ka dɔɔ, ka hva lɔ mu. Ka viɲə yɛa laa, ka hva ma dɔlɔɔ kulɔ.

³¹ Da ka wɔ niŋɛ̨i paa ka ɲɛ̨i ɓa, ka hva ɉuwɔ ta mįi. Da ka wɔ hoohvaalən kulɔ ka yəi, hva kɛa bulu pənə kaa. Ka wɔ ɓɛlaa haaɠaa da lɛɛ a ka yowoɠaa pɔɔ, nui lɔpee ta hva hɔlɔɓo, hvo ka mąą kpɔmąąɓo.

³² Ka lon ɉinąą, da ka lon nɛ̨ą da lɛɛ a nu huwu takpɛliɠaa di wɔɔ; ka ɲɛ̨i a lɛɛ di tɔwɔ, ɛlɛɛ ɉu, ka ɲɛ̨i lon ɉu yɛ haa, kaa di mąą kpɔn, di hva pa, ɛlɛɛ, ka hva pɛli mɛ̨nįi lɔpee ta kɛi ɉu.

³³ Ka wɔ hihɛnŋąąi ɓa, da ka kɛ kóló dɔlɔ, a lɛɛ a nu huwui ka hvo di kɔ́lɔn di kɔ̨nɔ̨n. Ka kɛ lɔ a nu huwui da di yee pənə ɉu, diɛ giin-giin.

³⁴ Mɛ̨nįɠaa tii kaai ka káá pai moi, yili kaa pai ɓowo ɲɔ̨n bɛlɛi kaa.

³⁵ «Yai-Laa kaa pai munwɔ ɲɔ̨nwɔ̨ɔ̨ɠaa pui kaa, diɛ tɔɔ ka kpəlina, da ka wɛlɛɠaa ɓa, ka ɉalə kɛ, hva kpɛɛ. Daɠaa diɛ tɔɔ ka kɔ́wɔ mɛ̨i, daɠaa diɛ tɔɔ ka nwuɔ̨.

³⁶ «Dɔɔmun ka ɉee ka nwun na, Yai-Laa kaa pai ka diɛni ka tɛɛi, nu huwui wɔlɔ ka nąnni di hvo gɔlɔn, ɛlɛɛ, kaa kpɛli ŋɛ̨i ka hvo gɔlɔn, di pɔ, kaa ɓo di yee kɔ́nma, kaa tí haliɠaa diɛ, diɛi di kaa a wulu, da kwɛni.

³⁷ Nu huwuɠaai kpɔ Yai-Laa ka wɔ Yálái kaa pai ka tɛɛi di pɔ, ka káá pai kɛi di yəi a mąą ɲɔwu kɛ hɛn, a hɛn da yɛlɛ kulɔ ɉu, a nuąi da di laa pələ ɓo diɛ kwələn ɉɔɔ a diɛ.

³⁸ Ka tíi kɛnɛ̨ kɛ, ká dee tiikpə. Mąąhɔlɔɓo, peeləɠaa da gəlee mįi.

³⁹ Ka viɲə yɛa laa, ka naa hɔn mo, kɛlaa, ka hva nɔɔ kpələ, ka hva kpɛli má kulɔ, mąąhɔlɔɓo, kolo a pu maáɠaa hu.

⁴⁰ Olivə wulu kaa pai kɛi ka wɔ lɔi hu nąą kəlee, kɛlaa, ka hva kpɛli ka mąątí wulɔ hɔlɔɓo. Mąąhɔlɔɓo, nwulu ɓaɠaa da lɛɛ a bɛlɛɛɠaa di pu kpɛli-kpɛli.

⁴¹ Ka káá pai lon ɉinąą da lon nɛ̨ą kaai, kɛlaa, di hva lɛɛ ka yəi, gəlee da li luwɔlaa hu.

⁴² Ka wɔ hihɛnŋąą kəlee da lɛɛ a poninŋąą kɔ̨nɔ̨n.

⁴³ «Nwɛ̨ąąi di kaa heeni ka kɔ́wɔ mɛ̨i, di hvaŋą ta lɔ ɓə a kɛ laai mɛ̨i, yɛ tɛɛ ka wɛi ɓa, kaa lɛɛ pulu pələ, ka wɛi yɛ tííkpə lɔ yələ kəlee.

⁴⁴ Nwɛ̨ąą tii ɓə pai kɛi kwələ tɔɔi kaa, hɛn da hvo pai hɔlɔɓoi ka yəi, kaa kwələ tɔɔ diɛ. Di kaa pai kɛi ka tɔwɔ, kaa ɓo di pulu.

⁴⁵ «Nɛ̨ŋɛ̨n naaɠaa tii kəlee kaa pai kɛi a gbanwoɔ kaa, vilɛn ŋąą ka pulu, ə lɛɛ ɉu ka kpɛɛ; Mąąhɔlɔɓo, ka hvo Yai-Laa ka wɔ Yálái woo hon ni, ka hvo nwɔ tɔ́nŋąą da nwɔ tíɓoɠaai kɛ li, yai ə dɛɛ ka pɔ.

⁴⁶ Yili mąą mɛ̨nįɠaa da həli kaa, ə kɛ a kpalo mɛ̨nį da kɔ́lɔn ɉɛn kaa, da ka huwuhu nuą a yələ kəlee mɛ̨nį.

⁴⁷ «Akɛ ka wala tí Yai-Laa ka wɔ Yálái ɓa a ka kwəinɛ̨ɛ̨, da ka lii kəlee, ɓɛlɔwai ka yee laahvɛɛi la a hɛn gəlee,

⁴⁸ ka lɛɛ ka yowoɠaa yee mu a di wɔ luwɔɠaa, diɛi Yai-Laa ka wɔ Yálái a di ŋąątɔɔ kaa. Pulu da kpələ wɛli diɛ ka kɛlɛ, ka lɛɛ a ka kpuwulu, ka hvɛɠɛɛ a hɛn gəlee. Yai-Laa a nwun ma wulu laa ka kɔ́n bulu, yɛ ɓo a kwɛli, ə lɛɛ ɉu ka huwu ə pu.

⁴⁹ Yai-Laa kaa pai nu huwu ta ŋąątɔɔi kaa, diɛ həɠə kpɔ kwɛa la lɔi kpon ɉeei, diɛ koon diɛ pa yɛ kuwɔ, diɛ ɓo a nu huwu yii ka hvo pai di laa woo mɛ̨n ɉii.

⁵⁰ Di kaa pai kɛi a nu huwu ɲɛ̨i walawalaa, di hva hulɔgolo mąąwiɛ, di hva nu nwunu ɲɛ̨imąąwɛli kaa.

⁵¹ Diɛ ɓə pai ka wɔ taatɛlɛɛɠaa lonnii mįi, da ka wɔ hihɛnŋąąi ɓá; ə lɛɛ ɉu ka huwu ə pu, di hvo pai ka wɔ mɔ̨nun ta lɛɛi ka yəi, ə mą kɛ da lɔɔ nįnɛ̨, da nwulɔ, da ka wɔ nįŋɛ̨ koonɛ̨aɠaa, da ka wɔ ɓɛlaa kɔ̨nwɔ̨leeɠaa, ə lɛɛ ɉu di ka kpɛɛ nɔi.

⁵² Di kaa pai heei ka wɔ taaɠaa kəlee ɓa a kɔ́. Ə lɛɛ ɉu ka wɔ lɔi hu hįį kpoloon ɲee muhəɠɛɛ kwɛa-kwɛaɠaa di pu; a diɛi tii ka kɛi ka kilitɔɔ diɛ. Da hee ka tɔwɔ a kɔ́, ka wɔ taaɠaa kəlee hu; ka wɔ lɔi kəlee hu, ɓɛi ŋɛ̨i Yai-Laa ka wɔ Yálái kaa dɛɛi ka pɔi.

⁵³ Mɔ̨nɔ̨i ka yowoɠaa kaa pai naai ka mɛ̨i gɛnɛ̨ pələ ɓa, lon ɉinąą da lon nɛ̨ai Yai-Laa ə dɛɛ ka pɔ, ka káá pai kɛi di mįi.

⁵⁴ Nui gaa ka lɔwai, yɛ ɲɔw Yálá ɓa, yɛ mɛ̨nį ɲɔ̨n mąą laa, gaa pai kɛi nąn nonnii, da naa búlu nɛ̨ɛ̨nu da nonnii yiiɠaa daa lɛɛ di kaai gɔwɔyɔɔ.

⁵⁵ Mąąhɔlɔɓo, hvo pai nəi kpaanɉii, yɛ di kɔ́ a nonnii huwɔ ta, a gəlee mįi da hva lɛɛ; yili a həli kaa ɓɛlɔwai ka yowoɠaa kaa pai gɔ́ heei laa kaa, diɛ ka mąąwɛli ka wɔ taaɠaa kəlee hu.

⁵⁶ Nɛ̨ɛ̨nui gaa ka lɔwai yɛ ɲɔw Yálá ɓa, yɛ mɛ̨nį ɲɔ̨n mąą laa, nə́ŋə pələ hva hvaa mą hvo gɔwɔ hvilɛn lɔi ɓa; gaa pai ɲɛ̨i ɲɔ̨nwɔ̨ɔ̨ heei naa bulu hilɛ ɓa, ə mą kɛ, gaa gwəi lonnii diɛ.

⁵⁷ A lon kulɔ goolon ɉu, a lonŋąąi ə di kaa yɛnɛ̨ɛ̨; mąąhɔlɔɓo, hɛn gəlee kpɛɛ pələ ɲəi, gaa pai di mįi loo pələi; ɓɛlɔwai ka yowoɠaa kaa pai kɔ́ pɛlɛi la kaa, diɛ ka mąąwɛli ka wɔ taaɠaa hu.

⁵⁸ «Ka wala tɔɔ a ka nwąnąąi, kaa dɔ́n ŋɛ̨i bɛ̨ɛ̨ ɉɛɓɛ́i ŋɛ̨i hu, kaa ɉu wooɠaa kəlee kɛ, kaa ɲɔw naa ɓa, yii mąąwia mąą ɲɔuwɔ, naa tii ɓaa: ‹Yai-Laa›, ka wɔ Yálá.

⁵⁹ Akɛ ka wala ɲɔw ma, Yai-Laa kaa pai kwəi pili mąą ɲɔ̨nŋąą, diɛi di kpɛɛ la walaa di pɛlɛi kaa ka ka huwu kəlee.

⁶⁰ Mɛ̨nį nwąnąąɠaai ka kɛi ɲɔw diɛ Eziptə lɔi hu, a pənə ə yili laa kaa, diɛ kanąn kaa.

⁶¹ Ə mą kɛ mɛ̨nį nwąnąąɠaai di laa hvo dɔ́n ɉɛɓɛ́ hu, Yai-Laa a di laa kaa ə lɛɛ ɉu, ka huwu ə pu.

⁶² Ka lɔwai nu kpulu wolo tííkpə lɔ ɓə pai lɛɛi, kaa kpɔ ŋɛ̨i ka wɔ taaɠaa tamąą yɛ yələkɔlɔn ɉu pɛmɛ̨lɛ̨n-gɔwɠaa, ka wala pa gɛ ka hvo ka wəli tɔɔ Yai-Laa ka wɔ Yálái woo ɓa,

⁶³ bələi lɔ tii Yai-Laa liiɓa mɛ̨nį ɓaa la kɛ, yɛ kɛ ə ka mɛ̨i kaa, yɛ ka nwun na nɛ̨ɛ̨, yɛ ka huwu ɓɛlɛ, bələ lɔ ɓə, gaa pai ɲɛ̨i heei la kaa yɛ ka kpɛɛ yɛnɛ̨ɛ̨, yɛ ka huwu pu, a gwəinɛ̨ɛ̨; nɔi ŋɛ̨i ka káá lii ɉu kaa hee laa, da ka kulɔ laa a ka nwun.

⁶⁴ Yai-Laa kaa pai ka taɠa taɠai nu huwu kəlee lɔwai, yɛnɛ̨ɛ̨ nąą kəlee. Ka káá pai kɛi tíi kɛi haliɠaa diɛ, diɛi di kaa a: kwɛniɠaa da wuluɠaa, diɛi, kaa-o ka nąnni-o ka hvo ta di kɔ́lɔn ni.

⁶⁵ Ɛlɛɛ, ka hvo pai ka kpɔɔ hɔlɔɓoi nu huwuɠaa tii pɔɔli, ɓɛi kpɔ ka ka kɔ́wɔ hvilɛn naa, ka hvo pai nąą kaai. Yai-Laa kaa pai liihɛlɛn ɉeei kaa, yɛ ka ɲɛ̨i koloon kaa ka yee kpiɛ ɲin a mɔ̨nɔ̨ yii ka kili hvo kɛ mą.

⁶⁶ Ka yii hvóló kaa lɔ pai kɛi yɛ a kɛ a ɉɛlɛnŋąą ka ɲɛ̨i mu; Ka mąą yɛ kpɛlin a hvóló da kpinį, ka kili hva kɛ ɉu kaa kɛ ka káá yɛnɛ̨ɛ̨.

⁶⁷ Yələ a ɓɔ yələ wala pɔ, kaa kɛ diɛ: ‹Yələ ə wulu wɛ!› Ɛlɛɛ, yələ wului pɔ, kaa kɛ diɛ: ‹Yələ ə ɓɔ kpɔ wɛ ɉa!› Ka káá pai kɛi yili ɓoi tii liikələn gwəi da mɔ̨nɔ̨i ka ɲɛ̨i a kɛ ɉu mąą mɛ̨nį ɓa.

⁶⁸ «Ɛlɛɛ, Yai-Laa kaa pai ka pənəi ka pulu kaa li Eziptə lɔi hu kələn gbɛa-kpɛa hu, a ɓɛi ŋɛ̨i ŋį́ kɛ kaa: ‹Ka hva kɛa pənə ka hvo ka pulu pənə laa wɔi!› Ka pa lii nɔi tii hu, ka káá lii kɛi ka kpɔɔ lɔwɔ́tɔɔi kaa kɛ a ka yowoɠaa di wɔ luwɔ hinąą da luwɔ nɛ̨ąą. Kɛlaa, ə mą kɛ tii, nu ta hva hɔlɔɓo, hvo ka ya.»

Moisə nwɔ pələ ɓoɔ gbəla mąą 28—30

⁶⁹ Mįnɛ̨i Yai-Laa ə Moisə tí, yɛ kɛ da Israɛlə lonnii di ɉəɠə Moabə lɔi hu, ɉu wooɠaa ka tii, bɛlɛɛ mįnɛ̨ yii da diɛni di ɉəɠə Horɛbə yee ɓa, mą.