Dutɛrɔnome 26 - Yálá laawoo hɛɓɛ (dc)

Ka wɔ hihɛn má tɔlɔɔ

¹ Nɔi tii Yai-Laa ka wɔ Yálái kaa dɛɛ ka pɔ a ka kwɛlin, ka pa lɔi ɉu, kaa ɉɔlɔɓo a ka wɔɔ, kaa hee laa,

² ka wɔ hihɛnŋąą má dɔlɔɔ-tɔlɔɔɠaa ka ɉɔlɔɓo nɔi tii hu, yai Yai-Laa ka wɔ Yálái ə dɛɛ ka pɔ, ka da həɠə ɉu ka gbili kɛ; ɓɛi Yai-Laa ka wɔ Yálái kaa pai ɲeekpiɛ lɛi laa, yɛ naa hee mą; ka li la laa.

³ Ɉaláá laa həli mun a kɛ góló ɓa a mąą yələi, ka li ka həli mą kaa mą: «Ku kaa moi háákələi Yai-Laa ə́ wɔ Yálái ɓa, kuɔ ma: nɔi Ə gwɛla ku nąnni diɛ yɛ gaa dɛɛi di pɔ, kwaa həli ɉu.»

⁴ Da paa la, ɉaláá laa həli mun a gbili hon di yəi, ə ɉee Yai-Laa ka wɔ Yálái nwɔ haláá kulɔi lííla.

⁵ Yili pulu, Yálá kɔ́ mun tii a nwooɠaa ŋɛ̨i ɓo Yai-Laa ka wɔ Yálái lííla. Yɛ kɛ mą: «Ną́n ə kɛ a Aramə mun, yɛ ɓo a toonwun mamun, ə li Eziptə lɔi hu; da nwɔ nuą, di hvo kɛ tamą li; yɛ li mąąkilɛi laa. Kɛlaa, di lɛɛ laa di tamą, di kɛ a nu kpulu kɛnɛ̨; di hvaŋą ə kɛnɛ̨.

⁶ Kɛlaa, Eziptə nuą di ku hon a ɲɔ̨nwɔ̨ɔ̨, diɛ ku laanɔ̨nwɔ̨ ɓo; diɛ ku mɔ̨nɔ̨ ɓo a kóló kpɛa kpɛaa kɛɛ.

⁷ Ku wɔlɔ Yai-Laa ku nąnni di wɔ Yálái ɓa. Yili ə ku wɔlɔ woo mu hon, ə ku wɔ mąąwɛli laa kaa; da mɔ̨nɔ̨i ku kɛi mįi, ə mą kɛ laanɔ̨nwɔ̨i ku kɛ ɉu.

⁸ Ə ku kulɔ Eziptə lɔi hu a nwɔ huwalawala yii hɛn da hva tɔɔ na, a ɲee walawalaa, ə kpalo ɓɛla ku mɔ̨nɔ̨ ɓo nuą diɛ, a kpalo mɛ̨nį da kwɛlɛɛn mɛ̨nį kpɛa kpɛaaɠaa.

⁹ Ə pa a kuɔ nɔi ŋɛ̨i hu; ə bɔlɔi ŋɛ̨i tɛɛ ku pɔ; a lɔi lɛlɛɛ kpɔ kpɔ, ɓɛi hɛn gəlee a lɛlɛ laa.

¹⁰ Yili mąą mɛ̨nį ɓa, yiihu kɛa, gáá Yai-Laa ku wɔ Yálái kɔ́i a nɔi ŋɛ̨i ə dɛɛ ku pɔ, ɉu hihɛn dɔlɔɔ-tɔlɔɔ.» Nui tii a yili ɓo tii, a pɛlɛ Yai-Laa lííla, yɛ kwɛli hvilɛn mą.

¹¹ Ɛlɛɛ nwunnąnɛ̨ɛ̨ kpɔ tii, Yai-Laa ka wɔ Yálái ə gɛ kaa, ka ka yəi bɛlɛ́n nuą, ka kɛ kwəinɛ̨ɛ̨ hu, ka Levi lonnii da nwɛ̨ąi di kaa ka kɔ́wɔ mɛ̨i.

Kwɛlan ɉaaɓa haaɓa nwɔ hɛn bow nąą

¹² Kwɛlan ɉaaɓa haaɓa həli pələ tɛi tɛi, yaai gaa a hɛn bow nąą tɛɛ kwɛlan; hɛn lɔpee ya ɉɔlɔɓo, ə́ yəi ɲɛa, ya nono mɛ̨inąą nąąn, ə́ bow nąą pu gee mɛ̨i, ya yili tɛɛ: Levi lonnii pɔ, da nwɛ̨ą, galaninŋąą, ɛlɛɛ, da təliɠaa; di mįi di pilɛ ɉu; ka wɔ taaɠaa hu,

¹³ nąąlɔwai ka mo kɛa Yai-Laa ka wɔ Yálái lííla, kaa mą: Yii kɛ a ə kɔ́ hɛn Yai-Laa, kwa gulɔ bɛlɛ́n, kwa dɛɛ Levi lonnii pɔ, da nwɛ̨ą, da galaninŋąą, ə mą kɛ təliɠaa. Yɛ bələi ə́ dí la, ŋį́ gəlee kɛ, və́ da lɔpee mąą kala li, və́ lɛ̨ą li da ɓa.

¹⁴ Və́ ɉɛnŋąą tii ta mįi, ɓɛlɔwai haa ə too la mą́ą́ və́ kpɛli da kulɔ ɉu, ɓɛlɔwai tɔ́n ə kɛ la mą́ą́, ɛlɛɛ və́ kɛ ɲɔ̨muą kɔ́ li a da. Ŋą́ lɛɛ Yai-Laa nwɔ́ Yálái woo mu, ŋį́ gɛ yɛ bələi ə mo la mą́ą́.

¹⁵ Yili ɓa, yɛi tii ə́ kaa yələkɔlɔn ɉu, ə́ ɲɛ̨i lɛlɛɛ hee ə́ wɔ pɛlɛ mąąhəɠɛɛ ɓa. Yɛ́i ə́ kaa yələi, lúwɔ́ too Israɛlə ɓa. Ə́ wɔ nu huwui da nɔi ŋɛ̨i ə́ dɛɛ ku pɔ, yɛ bələi ə́ ə́ kwɛla la ku nąnni diɛ, nɔi ŋɛ̨i ɲįnįyá da kwɛi nwulɔ di kpoloon naai ɉu yɛ yá.

¹⁶ Yai-Laa ka wɔ Yálái aa háákələi ka kɛ kóló laa ka nwuɔ̨; yɛ ka díɓoɠaa ŋɛ̨i kɛ da nwɔ tɔ́nŋąąi ka lɛɛ di pulu, ka di kɛ ka kwəi tɔ̨nɔ̨ mɛ̨i kpɔ a ka nwąnąąi.

¹⁷ Kaa háákələi ka woo kwɛlɛ Yai-Laa ɓa, kaa gaa a ka wɔ Yálá, ka káá bɔ, ka hiɛ nwɔ kpaaləɠaa mɛ̨i, ka yíi pələi ə nɛ kaa, nwɔ tíɓoɠaa da nwɔ tɔ́n nwooɠaa, kaa gəlee pɔ mɛ̨nį kɛ, kaa lɛɛ la nwoo mu.

¹⁸ Yai-Laa aa háákələi ka həɠə ɉu yɛ ka kɛ a nwɔ nu huwu; yɛ bələi ə mo la kaa. Kaa pɛli lɛɛi nwɔ tíɓoɠaa kəlee pulu.

¹⁹ Nu huwui kpɔ ə bɛli yɛnɛ̨ɛ̨, aa ka həɠə ɉu, gəlee lɔwai, yɛ ka laa tɛ, yɛ ɓaalɔ kaa, yɛ ka kɛnɛ̨, kaa kɛ la a nu huwu mąąhəɠɛɛ, a Yai-Laa ka wɔ Yálá nwɔ nu huwu yɛ bələi ə nwoo kwɛlɛ la.