Dutɛrɔnome 25 - Yálá laawoo hɛɓɛ (dc)

Kiti tee mɛ̨nį

¹ Mɛ̨nį ɓo a kɛ nu hveelɛ lɔwai, di pa giti haɠa ɓa, di di kiti tee, nui a kala mą, di gala mą, nui a nɛ̨ɛ̨ mą, di nɛ̨ɛ̨ mą.

² Akɛ mąąnɛ̨ɛ̨ di ɉɔn mąą mun gɛlɛ, giti tee mun a bɛlɛ nɔi ɓa, di gɛlɛ ɲɛ̨i ɓa, yɛ bələi ɉɔn ə kɛ la.

³ Di hvaɠa ɲą pow nąąn dɛɛ bɔ, hvo tɛɛ yili ɓa, a tɛɛ nee yili ɓa pala hvo pa tee mą kɛnɛ̨, ka ɲɛ̨i yɛ tɛɠɛ ɓo la ka nąn non ɉu.

⁴ Nįŋɛ̨ a kɛi mɔ̨nun dan, hvo kwɛli too na.

Kalanin mąą mɛ̨nį

⁵ Nąn gaaɠaa da kɛ kɛɛnąą tɔ̨nɔ̨ ɓa, dɔ̨nɔ̨ a haa, lon ɉulɔnu awala kɛ mą, mąą hvo nɛ̨ɛ̨li nui tii haa nɛ̨ą hvo lɛɛ nu takpɛli yəi, yii hvo a bɛlɛ́nmun da. Nɛ̨ɛ̨nui tii ɉilɛ pulumun da ɓə a lɛɠɛ mą, ə ɉəɠə a nɛ̨ą.

⁶ Lon ɉulɔnu tɔlɔɔi nɛ̨ɛ̨nui tii kaa pai gaai, a nui tii haa naa lɛɛ yɛnɛ̨ɛ̨. Akɛ tii naa hvo pai kpɛɛi Israɛlə lɔi hu.

⁷ Nui tii a wala kɛ bɔ hvo nɛ̨ɛ̨nu tii həɠə a nɛ̨ą, mąąnɛ̨ɛ̨ yili ə li mɛ̨nį ɓo kələ mu, ə galanɉonŋąą kaa, yɛ diɛ: «Dɔ́wɔ́lee hvo bɔ hvo nąn non naa laahɔnmo Israɛlə lɔi hu, hvo gɛli hvo ɲee hee mú.»

⁸ Daa kalanɉonŋąą kaa pai nui tii təlii, di mąąnikɛ; yaan gaa pai tɔɔi di ɲɛ̨i ɓa, yɛ diɛ: və́ bɔ və ɉəɠə a nɛ̨́ą.

⁹ A mo tii, dɔwɔlee kaa pai lɛɠɛi mą galanɉonŋąą ɲɛ̨i ɓa, ə ɉulɔnui nwɔ gbakwɛakwɛai kulɔ gɔwɔ ŋą, ə naa ya taɠa ɲɛ̨i, yili pulu, yɛ diɛ: «Bələi da gɛ la a nui hva pənə hvo nąn non nwɔ pɛ́lɛ́i tɔɔ, bələ ka tii.»

¹⁰ Ɛlɛɛ di kaa pai naa heei Israɛlə pɛlɛ́ mu a «Kɔlɔ hvo gɔwɔ ŋą pɛlɛ́.»

Mɛ̨nį pɛlɛɛ takpɛliɠaa

¹¹ Nu ta da nąn non da wolo di kee ɓa, dɔ̨nɔ̨ nɛ̨ą a lɛɠɛ laa yɛ kɛ ə ɉilɛ kulɔ mɛlan ɲəi, a ɲee lɔ di lɔwai yɛ yili hinąą hɛn ɉon,

¹² Ka nɛ̨ɛ̨nui tii yee tee mą, ka hvo ɲɛ̨imąąwɛli kaa.

Yɔw kɛɛ a tələnmolaa

¹³ Hɛn gɔɔn ɉɛn və kɛ ə́ yəi mii hu hveelɛ, di kulaa di kee mu; gɛnɛ̨mun da nogolo mun.

¹⁴ Hɛn gɔɔn gəgən və kɛ ə́ yəi bɛlɛ́n hveelɛ di kulaa di kee mu, gɛnɛ̨mun da nogolo laa mun.

¹⁵ Mąąnɛ̨ɛ̨ hɛn gɔɔn ɉɛn ə kɛ a ɲąą pɛliɛ, nɛlɛɛ; hɛn gɔɔn gəgən ɲąą pɛliɛ, nɛlɛɛ di kɛ ka yəi; ka yii hvóló ə tamą nɔi ɲɛ̨i Yai-Laa ka wɔ Yálái kaa dɛɛi ka pɔ ɉu.

¹⁶ Nui lɔpee a vulu tuwɔ taaləi tii ɓo, yɛ mɛ̨nįi tii kɛ nwɛli kpɛɛ Yai-Laa ka wɔ Yálá ɓa kpɔ kɛnɛ̨.

Amalɛkə nuą mąą mɛ̨nį

¹⁷ Mɛ̨nįi Amalɛkə ə naa kaa ka kulɔi lɔwai Eziptə lɔi hu gili ə lɛɛ ka ŋą.

¹⁸ Ə pa ə pɛlɛ kaa bələi a kɔ́, nuąi kɛi hiɛ ɲąą-ɲąą, nu kpulu pulu pələ, ə di paa; nąąlɔwai ka hviikpɛɛi kɛ, pulu ə ɓo kaa, hvo ɲɔw Yálá ɓa.

¹⁹ A kɛ tii Yai-Laa ka wɔ Yálái a pa hvįįtɔɔ tɛɛi ka pɔ, yɛ ka kulɔ ka yowoɠaa kəlee yəi nɔi hu, a nɔi Yai-Laa ka wɔ Yálái kaa dɛɛi ka pɔ a ka kwɛlin yɛ ka hee ɉu; Amalɛkə laa kulɔ yələkɔlɔn mu; ka hvo lɛ̨ą yili ɓa.