Dutɛrɔnome 24 - Yálá laawoo hɛɓɛ (dc)

Nɛ̨ɛ̨nui daa gulɔ lɔwɔi mąą mɛ̨nį

¹ Hulɔnu a nɛ̨ɛ̨nu ta həɠə a nɛ̨ą, yili pulu ə mɛ̨nį ta kaa nɛ̨ɛ̨nui tii yee pɔ, yɛ nwumɛ̨ tɛ ɉulɔnu ɓa, ɛlɛɛ nɛ̨ɛ̨nu wɛli hva kɛa lɛɛ mą; ɉulɔnu a nɛ̨ɛ̨nu kpɛ hɛɓɛ́ kɛ ə dɛɛ bɔ ə gulɔ lɔwɔi.

² Da gulɔ tii lɔwɔi a pɛli mą hilɛ takpɛli həɠəi.

³ Akɛ ɉulɔnu veelɛ nąą a wala kɛa kɛ nwɛli la kɛi, yɛ gbɛ hɛɓɛ́ pɛ̨ɛ̨ yɛ dɛɛ bɔ, a wala kɛ tii, ɉulɔnu veelɛ nąą tii a haa.

⁴ Ɉilɛ tɔlɔɔ-tɔlɔɔ tii hva pɛli mą hvo pənə hvo ɉəɠə a nɛ̨ą. Mąąhɔlɔɓo, nɛ̨ɛ̨nui tii aa tɔ́n bɛlɛ gbɔwɔ ɓa, mɛ̨nį ɲɔ̨nwɔ̨ɔ̨ kɛnɛ̨ li Yai-Laa ɲɛ̨i ɓa. Nɔi Yai-Laa ka wɔ Yálái aa dɛɛ ka pɔ, ka hvo ŋɛŋɛn nɔ mą.

Hulɔnui aa nɛ̨ą həɠə a nįnɛ̨

⁵ Hulɔnu a nɛ̨ą həɠə a nįnɛ̨, di hva ɉon a kɔ́kuláá, di hvo pa bɔɔli mɛ̨nį lɔpee ta mąą mɛ̨nį ɓa. Di hva viikpɛɛ a mɛ̨nį lɔpee ta. Da nɛ̨ą da lɛɛ di yəi bɛlɛ́n kwɛlan dɔ̨nɔ̨ yee mu, nɛ̨ɛ̨nui tii ə ɉəɠə a nɛ̨ą yɛ gwəinɛ̨ɛ̨.

Tolaa mɛ̨nį

⁶ Mąą hvo nɛ̨ɛ̨li di hvo nu nwɔ kwəną da ɲənə həɠə a tolaa, a kɛ tii, daa mąą nu nwɔ yɛnɛ̨ɛ̨ həɠə ɲəi.

Nu nwuɔ̨ mɛ̨nį

⁷ Da nu ta kaa aa nɔi lon da, yii gaa a Israɛlə lon da aa nwuɔ̨, yɛ ɲee pənə ɉu, a wala kɛ tii, yɛ nɔwɔtɔɔ; ka nu nwuɔ̨ mun tii paa, ka mɛ̨nį ɲɔ̨n gulɔ ka lɔwai.

Hvólóɲɔ̨n mąą mɛ̨nį

⁸ Ka gɛ a nɛlɛɛ hvólóɲɔ̨n ɉuwui lɔpee gəlee ɓa; mɛ̨nįɠaa ɉaláá kulɔ nuą Levi lonnii da mo kaa mɛ̨nįi tii hu, ka ɉon a nɛlɛɛ; ka bɔ mɛ̨nį kɛ. Ka tɔɔ a ka nwąnąąi, ka túwɔ́ yɛ bələi ŋą mo la diɛ.

⁹ Mɛ̨nį Yai-Laa ka wɔ Yálái ə naa Miriamə ɓa, ka kɛɛ ɉiɛ ɓa kaa kulɔ Eziptə lɔi hi, gili ə kɛ ka ŋą.

Tolaa mɛ̨nį veelɛ nąą

¹⁰ Akɛ, yá kwələ tɔɔ ə́ ɓɛ́lan gaalon da ɓa, ə kɛ a pələ lɔpee, hvó tɛɛ mą hvo lɔ ɲəi bɛlɛ́n, hvó hɛn da həɠə a tolaa.

¹¹ Lɛ́ɛ́ tɔɔni ɲɛnɛ̨ɛ̨, nui ə gwələ tɔɔ mą ə lɔ ə pa a dolaa ɲɛnɛ̨ɛ̨ pələ.

¹² Akɛ a yeehowolo mun, dolaa hvo yíi ə́ yəi;

¹³ yá pənə ə́ dolaa hɛn tii tɛɛ bɔ, hvóló hvo tɛɠa laa kpɔlɔ ŋą; mąą nu a laa nwɔ yíihəɠəi tii hu, yɛ lúwɔ́ too yɛ́, ya gɛ tii, yá kɛ a tələnmomun Yai-Laa ka wɔ Yálái ɲɛ̨i ɓa.

Wali kóló kɛ mun mąąwiɛ pələ

¹⁴ Ya kɛi kóló kɛ mun vɛla kulɔ, mąąwɛliɛ, hɛn və ɲəi, hvo ə́ yee pənə ɉu; ə kɛ a ka wɔ lɔi hu lon da, ə kɛ a nwɛ̨ąi heeni ka wɔ lɔi hu, da ka wɔ taaɠaai hu.

¹⁵ Vɛla tɛɛ bɔ a voló, hvóló hvo laa yii hvo dɛɛ li bɔ. Mąąhɔlɔɓo, mąąwɛli mun ni, ɛlɛɛ, ɲɛ̨i kaa vɛla tɔwɔ a nwalawalaa. Hvo tómą Yai-Laa pɔ pələ a ə́ laa, a nee kɛ yɛ́ a nɛ̨ŋɛ̨n.

Mɛ̨nį takpɛliɠaa

¹⁶ Di hvo lon gaa nąn baa non mąą mɛ̨nį hu, di hvo lon baa nąn mąą mɛ̨nį hu. Nu kəlee ə haa a gbɔwɔ nɛ̨ŋɛ̨n naa pɔɔ.

Mąąwɛli nuą mąą mɛ̨nį

¹⁷ Ka hvo nwɛ̨ą, a wala kɛ tii təli lon nwɔ tɛ̨ą mɛ̨nį pili ɉu. Ka hvo galanin mąąhəɠə hon a tolaa.

¹⁸ Ka ka kiliŋąhiɛ kaa, ka kɛ luwɔlaa hu Eziptə lɔi hu, ɛlɛɛ Yai-Laa ka wɔ Yálái ɓə ka nwun mąąɓo laa. Yili mąą mɛ̨nį ɓə gáá kɛi la kaa, ka díɓoi tii kɛ.

¹⁹ Ka mɔ̨nun dee ka pɔ yɛa, ka hvo gbanɉu kwɛli, ka hvo pənə ka hvo dee; nwɛ̨ą, təli lon da galanin di wɔɔ li. Yai-Laa kaa pai lúwɔ́ tooi kaa ka kɛ mɛ̨nįɠaa kəlee hu.

²⁰ Ya ə́ wɔ olivəi kulɔ hvo gbaɉu kwɛli; yii a lɛɛ laa, nwɛ̨ą təli lon da galanin di wɔɔli.

²¹ Ka ka wɔ viɲəi kulɔ, ka hvo gbaɉu kwɛli, yii a lɛɛ ɉu, nwɛ̨ą təli lon da galanin di wɔɔ li.

²² Ka ka kiliŋąhiɛ kaa ka kɛ a luwɔ Eziptə lɔi hu. Yili mąą mɛ̨nį ɓə gáá kɛi la kaa ka díɓoi ŋɛ̨i kɛ.