Dutɛrɔnome 23 - Yálá laawoo hɛɓɛ (dc)

¹ Mąą hvo nɛ̨ɛ̨li nu ta hvo laa a nąn nɛ̨ą, hvo yiihə́ɠə həɠə ə́ nąn nɛ̨ą mɛ̨i.

Nuąi mąąnɛ̨ɛ̨ di di laa kulɔ Yai-Laa nwɔ ɲąąkpɔn ɉɉu

² Hulɔnui daa mɛla, da nui daa ɉinąą hɛn dee ma, di hva li Yai-Laa nwɔ haláá ɲąąkpɔn hu.

³ Wɛlilon va lɔ Yai-Laa nwɔ haláá ɲąąkpɔn ɉu, ə mą kɛ, mąnįn bulu mąnįnŋąą daa kɛ pow, di hva lɔ Yai-Laa nwɔ haláá ɲąąkpɔn ɉu.

⁴ Amɔn nuą da Moabə nuą di hva lɔ Yai-Laa nwɔ haláá ɲąąkpɔn ɉu kpɔ tɔ̨nɔ̨ kpɛli. Ə mą kɛ di mąnįn bulu mąnįnŋąą bow nąą ɓə.

⁵ Mąąhɔlɔɓo, di hvo gɛ di hvo ka laakwiɛn a kɔ̨nɔ̨n da kpələyá, ka kɛ ɉiɛ pələi kaa həɠə Eziptə lɔi hu. Ɛlɛɛ, mąąhɔlɔɓo, Moabə nuą di lɔ Beɔrə lon Balaamə kilii ə gɛ, ə ka nɛ̨ŋɛ̨n naa. Di Balaamə təli ə həɠə Petɔrə Aramə ɲalee hveelɛ lɔwai.

⁶ Kɛlaa, Yai-Laa ka wɔ Yálái hvo nwəli tɔɔ Balaamə woo ɓa, ə nɛ̨ŋɛ̨n naa woo mąą pənə a lúwɔ́. Mąąhɔlɔɓo, ka wɛli kaa Yai-Laa ka wɔ Yálai ɓa.

⁷ Ka hvə kpɔ kɛ ka káá ka ɲɛ̨i kulɔi di wɔ hɛn da pɔ, ə mą kɛ di wɔ yee la hvólóon naa ka wɔ yɛnɛ̨ɛ̨ kəlee hu.

⁸ Ka hvə Edɔmə nuą kaa a nu ɲɔ̨nwɔ̨ɔ̨ɠaa, ka nąn nonnii ɓaa diɛ. Ka hvə Eziptə nuą kaa a nu ɲɔ̨nwɔ̨ɔ̨ɠaa, mąąhɔlɔɓo, ka kɛ di pɔ lɔi a nwɛ̨ą.

⁹ Di wɔ mąnįn bulu mąnįn, ɉaaɓa nąą kaa pai lɔi Yai-Laa nwɔ haláá ɲąąkpɔn ɉu.

Gɔ laɠa mąąhəɠə mɛ̨nį

¹⁰ Ka kulɔ kaa li kɔ́ pɛlɛi ka yowo ɓa, ka hvo ka yee lɔ mɛ̨nį ɲɔ̨n lɔpee ta hu.

¹¹ Nu ta a kɛ ka lɔwai tɔ́n ə ɓo mą, mąąhɔlɔɓo, mąą aa kala kwii héan, mąąnɛ̨ɛ̨ ə həɠə ɓɛi gɔ́ laɠa kaa laa; ɛlɛɛ hva pənə hvo pa laa.

¹² Yələ a kɛi wulu, a nwa yai, ɛlɛɛ a laa ə pənə kɛa ə pa gɔ́ laɠa hu.

¹³ Ka kɛɛnąą ta kulɔ gbomoi a ka lɔwɛi kɛi.

¹⁴ Mąąnɛ̨ɛ̨ ka kwɛli hɛn da lɔ ka tiɛ̨ hu, ə gɛ, ka li ka lɔwɛi kɛi gbomoi, kaa lɔwa tee la, kaa ka lɔwɛi mɛ̨i kpulu la.

¹⁵ Mąąhɔlɔɓo, Yai-Laa ka wɔ Yálá yaa kpinį lee ga ka lɔwai gɔ́ laɠa hu, yɛ li, yɛ pa ka ɓalo mɛ̨nį ɓa, yɛ ka yowoɠaa lɔ ka yee ŋą. Yili ɓa tii, ɓɛi ka kɛ laa, nwɔ kɛɛnąą li. Mąą hvo nɛ̨ɛ̨li Yai-Laa hvo hɛn da kaa laa a nwumɛ̨ mɛ̨nį yii a gɛ, yɛ bulu tɔɔ la kaa.

Luwɔ a pu mąą mɛ̨nį

¹⁶ Luwɔ a pu Ną́mu ɓa yɛ pa mąąkilɛi ka pɔ, mąą hvo nɛ̨ɛ̨li ka hvo nɔ nąmu yee ŋą.

¹⁷ A lɛɛ kɛa ka pɔɔli ka wɔ nuą lɔwai, ɓɛi tii ə nąą həɠə ɉu ka wɔ taaɠaa lɔwai, mąąhɔlɔɓo, nąą a nɛɛ mą. Ka hvə ka yee pənə ɉu.

Haláá wɛli kɛ nuą

¹⁸ Mąą hvo nɛ̨ɛ̨li haláá wɛli kɛ nɛ̨ąą di hvo kɛ Israɛlə nɛ̨ąą lɔwai, mąą hvo nɛ̨ɛ̨li nwɔ̨nɔ̨ haláá wɛli kɛ nuą di hvo kɛ Israɛlə hinąą lɔwai.

¹⁹ Wɛli kɛ nɛ̨ɛ̨nu hvɛla, a wala kɛ tii wɛli kɛ hulɔnu hvɛla, ka hvo pa a da Yai-Laa ka wɔ Yálái yəi bɛlɛ́n, kaa gɔ́ la, yɛ hɛn da naakwɛlanmo. Mąąhɔlɔɓo, nwɛli kpɛɛi Yai-Laa ka wɔ Yálái ɓa a gɔbulu pələ.

Kwələ tɔɔ yɛ́ tɔ̨nɔ̨ laa mɛ̨i

²⁰ Ka hvo kwələ tɔɔ ka kaayɔwɔ ta ɓa, a tɔ̨nɔ̨ kwɛli pələ ɉu. Ə kɛ a wali, ə kɛ a kɔ̨nɔ̨n, ə kɛ a hɛn nɔpee gəlee yii ka pɛli gwələ tɔɔi kaa tɔ̨nɔ̨ hɔlɔɓo ɉu.

²¹ Ka kwələ tɔɔ nwɛ̨ą ɓa, ka kɛi gbɛ, ka tɔ̨nɔ̨ laa mɛ̨i. Kɛlaa, ka hvo gwələ taalə yili ta tɔɔ ka kaayɔwɔ ta ɓa. Ə gɛ Yai-Laa ka wɔ Yálá yɛ pɛli lúwɔ́ tooi ka kɛ kólóɠaa diɛ nɔi tii ka káá lɔi ɉu kaa hee laa.

Hɛn naakwɛlanmoɔ mąą mɛ̨nį

²² Ka hɛn da laakwɛlanmo Yai-Laa ka wɔ Yálái ɓa, ɉu hvo kwɛa, ka mąą mɛ̨nį kɛ. Ka wala gɛ tii, Yai-Laa ka wɔ Yálái kaa pai gwələ kpɛi kaa. Yili a nəi kɛ kaa a nɛ̨ŋɛ̨n.

²³ Kɛlaa, ka wala gɛ ka hvo hɛn da laakwɛlanmo a ka woo kwɛlɛɛ, nɛ̨ŋɛ̨n va kɛ kaa.

²⁴ Mɛ̨nįi a kulɔ ka la, ka tɔɔ a ka nwąnąi ka gɛ. Mɛ̨nįi ka lɛɛ ka kpɔɔ ɓa ka naakwɛlanmo, Yai-Laa ka wɔ Yálái ɓa, yɛ kulɔ ka la, ka gɛ.

Nu takpɛli pɔ yɛa mɛ̨nį

²⁵ Yá lɔ ə́ ɓɛlan gaalon nwɔ viɲə yɛa, yá pɛli ə má ta kulɔ ə́ mįi yɛ bələi ə́ kaa la bɔ, ə́ pilɛ ɉu. Kɛlaa, da hvo lɛɛ ə́ yəi hvo li la.

²⁶ Bələ lɔ ɓə gaa la, yá lɔ ə́ ɓɛlan mun da nwɔ tíi hu, yá pɛli ə́ pulu kulɔ yɛ́ a nąą kpai, kɛlaa hvo gɛ a yɛ́ laa-mɔ̨nun deei.