Dutɛrɔnome 22 - Yálá laawoo hɛɓɛ (dc)

Ə́ ɓɛlan gaalon ɉɔlɔɓo hɛn ɉon bələ

¹ Akɛ yá ə́ ɓɛlan gaalon da nwɔ nįŋɛ̨, a wala kɛ tii, nwɔ ɓɛlaa kaa, yɛ li nwun ma, hvó tɛɛ mą. Ɉon, ə́ pənə ə́ li la nąmu pɔ.

² Akɛ ka ə́ ɓɛlan gaalon tii ka wala kɛ ka kee kwɛlɛ, a wala kɛ tii, yá wala kɛ a gɔlɔn ŋąą, lí a nwɔ taatɛlɛɛi ə́ yəi bɛlɛ́ laaləi, ə lɛɛ laa, ə́ noloɓo, nąmu ə pa ə ɉəɠə.

³ Akɛ ə́ ɓɛlan gaalon tii nwɔ hoohvaalən mə, nwɔ həɠə ɓə, a wala kɛ tii, hɛn nɔpee gəlee ta ɓə, a pili ə́ ɓɛlan gaalon ɲəi, yá gɛ pələ kɛ lɔ yɛ bələi tii ə́ nwɔ taatɛlɛɛi mąą mɛ̨nį kɛ la.

⁴ Yá ə́ ɓɛlan gaalon nwɔ hoohvaalən gaa, a wala kɛ tii, nwɔ nįŋɛ̨, aa too pələ pɔ, hvó tɛɛ mą; kpɔmąą tɛɛ nąmu bɔ ka muhəɠə.

Mɛ̨nį pɛlɛɛ-pɛlɛɛɠaa hon bələ

⁵ Mąą hvo nɛ̨ɛ̨li, nɛ̨ɛ̨nu hvo hulɔnu həɠə too gwaną. Hulɔnu yaan, hvo nɛ̨ɛ̨nu hɛnŋąą kɛ mą. Nui lɔpee a dúwɔ́ taaləi tii ta ɓo, yili kaa a mąąliɓi túwɔ́ Yai-Laa ka wɔ Yálái ɲɛ̨i ɓa, yili gɔhɔɓoɔ.

⁶ Akɛ yá nwɛ̨ni taa kaa, ə kɛ wulu hu-o, ə kɛ lɔi ɓa-o, ɓɛi lɔpee ə kɛ laa, nwɛ̨ni lonnii, a wala kɛ tii, nwɛ̨ni ɲąnin yɛ ɓo ɉu, nee pɛlɛɛ mɛ̨i, mąą hvo nɛ̨ɛ̨li, hvó nee da nonnii di hon, awala kɛ tii, hvó ɲąnin bɛlɛ nee ɓa hvó ɉəɠə.

⁷ Akɛ yá yili ɲɔ̨nwɔ̨mąn gaa tii, yá nwɛ̨ni lonnii həɠə, a wala kɛ tii, nwɛ̨ni ɲąnin, ə́ wɔɔ li, ə́ nee lɛɛ laa. Yá gɛ tii, bələ ɓə yá kɛ la a nwun na nɛ̨ɛ̨mun, ə́ yii yɛ kwɛa.

⁸ Yá pɛlɛ́ tɔɔ a nįnɛ̨, gala tɔɔ mɛ̨i nwəli la, ə gɛ nu ta hvo pa kulɔ laa hvo too ɲąmą wulu hvo lɛɛ ə́ wɔ pɛ́lɛ́i nwuɔ̨.

⁹ Viɲə yɛa a kɛ ka yəi, ka hvo hihɛn dakpɛli hin ɉu, əgɛ, gəlee hvo pa kɛ a hɛn naakwɛlanmoɔ Yálá ɓa, viɲə ɓá da ɉihɛn dakpɛlii tii.

¹⁰ Ka hvo nįŋɛ̨ da hoohvaalən di kpulɔn kɛɛhin kali tɔ̨nɔ̨ ɓa.

¹¹ Hvó yeekalə həɠə da huwɔ kɔ́lɔ həɠə di humo a gee hvó doo ə́ kwaną.

¹² Yiihəɠəi yá bɛlɛ ə́ mɛ̨i, viliɲɛn gɛ nwəli la nąąn ma a gbuwulu pɛlɛɛ.

Hvaa a kulɔ nɛ̨ɛ̨nu ta mąą mɛ̨nį hu

¹³ Akɛ hulɔnu ta a nɛ̨ɛ̨nu ta həɠə a nɛ̨ą, da yaa di lɔ pɛlɛ́n, nɛ̨ɛ̨nu wɛli ə kpɛɛ ɉulɔnu ɓa,

¹⁴ ɉulɔnui tii yɛ nɛ̨ɛ̨nui tii laa kala, yɛ ɉɔn mo, yɛ kɛ mą: «Ɲá nɛ̨ɛ̨nui ŋɛ̨i həɠə a nɛ́ą, kwa yaa kwaa lɔ pɛlɛ́n, kɛlaa, və́ gbəlaa kaa li!»

¹⁵ Ɉulɔnu a mo tii nɛ̨ɛ̨nui tii laa mɛ̨i, nɛ̨ɛ̨non nee da nąn da nwɔ nɛ̨ɛ̨gbɛla laa mąą kɛla həɠə, di nɛ daa kalanɉonŋąą diɛ.

¹⁶ Nɛ̨ɛ̨non nąn a mo daa kalanɉonŋąą diɛ, yɛ diɛ: «Nón nɛ̨ɛ̨nui ŋɛ̨i, ŋį́ dɛɛ ɉulɔnui ŋɛ̨i pɔ a nɛ̨ą; ya ka nwɛli aa kpɛɛ kɛa ma,

¹⁷ ɛlɛɛ, ə tɔɔ yɛ naa kala, yɛ kɛ diɛ: ‹Və́ ə́ lon gbəlaa kaa li!› Nón nɛ̨ɛ̨nu kpəlaa kɔ́lɔn ɉɛn ga!.» Yili pulu, di ɲiihəɠəi tii huholoon galanɉonŋąą ɲɛ̨i ɓa.

¹⁸ Daa kalanɉonŋąą da ɉulɔnui tii hon, di ɉutɔɔ.

¹⁹ Daa kalanɉonŋąą da tɔ́n bili mą, ə gbɛɛ a wali kwələ nwun dɔ̨nɔ̨, di dɛɛ nɛ̨ɛ̨non tii nąn bɔ. Mąąhɔlɔɓo, ɉulɔnui tii aa Israɛlə halakpɛla ta laa kala. Nɛ̨ɛ̨nui tii a lɛɛ a nɛ̨ą ɲii hvóló kəlee hu.

²⁰ Kɛlaa, mɛ̨nįi tii ɉulɔnui tii ə mo a nɛ̨ɛ̨non laa, akɛ a tɛ̨ąą, di hvo gbəlaa kaa li!

²¹ Mąąnɛ̨ɛ̨ də li a nɛ̨ɛ̨non tii nąn ɲəi bɛlɛ́ laaləi, daa hilɛlɛa di ɉɔɔ a kwɛni ə haa. Mąąhɔlɔɓo, aa ɓɛlɛkpɛɛmąą túwɔ́ ɓo Israɛlə lɔi hu, aa lɛɛ nąn ɲəi bɛlɛ́n aa wɛli kɛ. Ka mɛ̨nį ɲɔ̨n gulɔ ka lɔwai.

²² Da hulɔnu ta hon, da hilɛtaai nɛ̨ą di ɓo laani, da gəlee hveelɛi paa, ɉulɔnui tii laa a nɛ̨ɛ̨nu, ə mą kɛ nɛ̨ɛ̨nu kpɛli mąn. Bələ ɓə ka mɛ̨nį ɲɔ̨n gulɔ la ka lɔwai.

²³ Akɛ halakpɛla, akɛ a mąąɲaŋąą, doonwəlii kɛɛ hulɔnu ta yəi, hulɔnu takpɛli a ɉon daa kwəi ə laa la,

²⁴ ka li a diɛ daa kpala, ka di hɔɔ a kwɛni, di haa. Ɉalakpəlai tii a haa mąąhɔlɔɓo, ə kɛ taai, hvo gɛ li hvo tómą yɛ nuą təli mą. Ɉulɔnui tii yaa kpɛli a haa, mąąhɔlɔɓo, aa laa a mɛlan mun nɛ̨ą. Bələ ɓə ka mɛ̨nį ɲɔ̨n gulɔ la ka lɔwai.

²⁵ Akɛ kpomói ɓə ɉulɔnu ə nɛ̨ɛ̨nu toonwəlii kɛɛ tii kaa laa, ə laa la, ɉulɔnui tii mɛ̨nį kɛ, yaa tɔ̨nɔ̨ ɓə a haa.

²⁶ Kɛlaa, ka hva mɛ̨nį ta kɛ nɛ̨ɛ̨non ma. Hvo nɛ̨ŋɛ̨n gɛ li, yii mąąnɛ̨ɛ̨ ə haa ɉu. Gaa lɔ yɛ, hulɔnu ta a wolo mɛlan ɉulɔnu ɓa, ə baa lɔwɔi.

²⁷ Kpomói ɓə ə wolo laa nɛ̨ɛ̨non ɓa, nɛ̨ɛ̨non ə tómą, nu ta hvo pa li mą.

²⁸ Hulɔnu ta, da halakpɛla ta da kwiɛn, yɛ ɓo a mąąɲaŋąą, nu ta hvo nii ɉalakpəlai tii toonwəlii kɛ li, ə ɉon ə laa la, da di hon,

²⁹ ɉulɔnui tii laa a nɛ̨ɛ̨non, a wali kwələ pow lɔɔli tɛɛ nɛ̨ɛ̨non nąn bɔ. Yii kpɔ aa nɛ̨ɛ̨non tii kpəla laa, a lɛɛ ɲəi a nɛ̨ą. Ɛlɛɛ, ɉulɔnu hva pɛli nɛ̨ɛ̨nui tii kpɛi yii kpɔ yaa tii a ɉulɔnu gaa nii yɛnɛ̨ɛ̨.