Dutɛrɔnome 21 - Yálá laawoo hɛɓɛ (dc)

Nu paamun yii di hvo gɔlɔn

¹ Nɔi tii Yai-Laa ka wɔ Yálái kaa dɛɛ ka pɔ, kaa hee ɉu, akɛ da nu ta kaa, daa baa ə ɓo tooni kpomói, ɛlɛɛ, nui baa di hvo gɔlɔn;

² Galanɉonŋąą da giti tee nuą da kulɔ di daaɠaa kpɔ tii nąą kwɛlɛ, di di lɔwai kɔ́ɔn da gɛɛnąą tii;

³ daai nɛɠɛɛ nui di baa mą, di gaa; da gaai mąąnɛ̨ɛ̨ daa tii hu kalanɉonŋąą di nįŋɛ̨ kpəla tɔ̨nɔ̨ həɠə, yii di hvo ni tíi kɛ li la;

⁴ daa kalanɉonŋąą da nįŋɛ̨ kpɛlai tii tənən dɔɔ tɛɛ yá ta pɔ pələ, ɓɛi di hvo ni tíi kɛ li laa; di hvo ni hɛn da hin ni laa. Da həli ɲá ɓa, di nįŋɛ̨ kpɛlai tii kpowo kalan nwolo ɲá kwɛlɛ.

⁵ Nąąlɔwai, Levi lonnii ŋɛ̨i a ɉaláá kulɔ nuą, da pa. Levi lonnii tii ɓə Yai-Laa ka wɔ Yálái ə di həɠə ka lɔwai, diɛ haláá kulɔ kólóɠaa kɛ, diɛ lúwɔ́ too Yai-Laa laa hu. Di woo ɓə a hvaa kpɛɛ, da nu mąą nwąną mɛ̨nį.

⁶ Daa kalanɉonŋąą kəlee, diɛi tii lɛɠɛ nu powa ɓa, da di yəi waa ɲái, nįŋɛ̨ kpəla kpowo kalan nwoloɔ tii mɛ̨i.

⁷ Diɛ di hɛatɔɔ, diɛ kɛ mą: «Ku yee hvo ɲąmąi ŋɛ̨i pu li; Ku ɲɛ̨i hvo tɔɔ li baa mɛ̨nį hu.

⁸ Yai-Laa, Israɛlə lonnii mąąhvaalɛɛ, yɛ́ ɓə di nwun mąąɓo, hvo kwəi kwələ mun ɲąmą pu mɛ̨nį wulu lɛɛ ə́ wɔ nu huwui nwuɔ̨.» A kɛ tii, ka mąąhvaa a lɛɛ ɲąmąi tii pu mąą mɛ̨nį ɓa.

⁹ Bələ ɓə ka káá pai kwəi kwələmun ɲąmą pu mɛ̨nį kulɔi la ka lɔwai; Mɛ̨nįi ɉaŋąą Yai-Laa ɲɛ̨i ɓa kaa gɛ.

Kɔ luwɔ nɛ̨ɛ̨nu nwɔ hilɛtaa kɛ mɛ̨nį

¹⁰ Ɲələi lɔpee ka kulɔ la kaa li kɔ́ pɛlɛi ka yowo ɓa; Yai-Laa ka wɔ Yálái a ka yee tɛɛ ka yowoɠaa diɛ, ka kɔluwɔɠaa hon;

¹¹ Ka nɛ̨ɛ̨non nɛlɛɛ ta kaa gɔ́ luwɔɠaa lɔwai, nwɛli a too kaa, kaa kɛ ka ɉəɠə a ka nɛ̨ą;

¹² ka nɔ ka yəi bɛlɛ́n, ka nwun galaan, ə ɲee ɲąnin dee.

¹³ Ɉəɠəi kɛ mą diɛ ɉon a luwɔ, ə gulɔ mą; a kɛ tii, a lɛɛ kɛa ə́ yəi bɛlɛ́n. Nɛ̨ɛ̨nui tii a nąn da nee di wɔlɔ ɓo ɲąnin dɔ̨nɔ̨ yee mu, yili pulu, ə́ lɛɠɛ mą, ə́ gɛ a ə́ nɛ̨ą.

¹⁴ Ka lɛɛ ɲíi ɓa, nwɛli a wala kɛa kɛ yɛ́, ya pɛli nɛɛi laa, ə li a niiɓa. Hvá pɛli nɔwɔtɔɔi, hvá mɔ̨nɔ̨ ɓo, mąąhɔlɔɓo, ə kɛ a ə́ nɛ̨ą.

Lon dɔlɔɔ mąą mɛ̨nį

¹⁵ Hulɔnu nɛ̨ani da kɛ hveelɛ, dɔ̨nɔ̨ wɛli ə ɓo mą, dɔ̨nɔ̨ wɛli hvo mą; nɛ̨ąą hveelɛi da lon ɉinąą kaa; ɛlɛɛ, nonŋąą tii nu pɔlɔ laamun ə ɓo a nɛ̨ɛ̨nu yii nwɛli hvo mą non,

¹⁶ Ɲələi a kɛi pa ɲəi hɛnŋąą tɛɛi la nonnii pɔ a di kwɛlin, hva pɛli nu pɔlɔ laa heei nwɛlikɛmąą nɛ̨ɛ̨nu lon ma; yɛ nu pɔlɔ laa həɠə nɛ̨ɛ̨nu yii nwɛli hvo mą non ɲəi.

¹⁷ Nɛ̨ɛ̨nui tii nwɛli hvo mą non mə mąąnɛ̨ɛ̨ ə gɛ a nu pɔlɔ laamun. Ɲəi hɛnŋąą ɲąąkwɛlɛi lɔwai a yili kwɛlin gɛ a gɛnɛ̨mun. Mąąhɔlɔɓo, non tii ɓə a nąn nwɔ hulɔnu laa ɉu lon dɔlɔɔ-tɔlɔɔ, yili ɓa, mąąnɛ̨ɛ̨ di ɉon yɛ nu pɔlɔ.

Lon a nąn nwoo pili mąą mɛ̨nį

¹⁸ Akɛ nu ta lon a kɛ laa, yɛ ɓo a kulɔ nwoo mu lon, yɛ ɓo a nu kpɛli kpɛli, hva gaa nuą woo mɛ̨n, mɛ̨nį yiiɠaai da niɛwoo ɓo la a wala di woo hon;

¹⁹ Mąąnɛ̨ɛ̨ nąn da nee di ɉon də li la daa kalanɉonŋąą pɔ, daa mɛ̨nį ɓo kɛi, ɉį́i la.

²⁰ Diɛ galanɉonŋąą diɛ: «Ku lon ga, hva ku woo mɛ̨n, ɛlɛɛ, aa gwɛli tee, aa nwɔ yɛnɛ̨ɛ̨ hon a ɲɔ̨nwɔ̨ɔ̨ yɛ ɓo lɔ hvóló kəlee a lɔɔ hon.»

²¹ Mąąnɛ̨ɛ̨ daai tii hu nuą kəlee di ɉɔɔ a kwɛni ə haa. Bələ ɓə mąąnɛ̨ɛ̨ ka mɛ̨nį ɲɔ̨n gulɔ la ka lɔwai. Israɛlə nuą kəlee kaa pai bələ mɛ̨n ɉii, diɛ ɲɔw.

Nui daa ɉɛlɛn bowa hon bələ

²² Nu ta a kɛ laa, ə nɛ̨ŋɛ̨n ɉəɠə, yii mąąnɛ̨ɛ̨ ə haa ɉu, ka ɉɛlɛn wulu ɓa, ə haa.

²³ Mąą hvo nɛ̨ɛ̨li bowa hvo yii hɛlɛn ni nwulu ɓa; da bowa loo a mąą yələ. Mąąhɔlɔɓo, nui da ɉɛlɛn wulu ɓa, nɛ̨ŋɛ̨n naa ɓə Yálá ə mo; mąą hvo nɛ̨ɛ̨li, hvo ka wɔ lɔi kɔ́hɔ ɓo, yaai Yai-Laa ka wɔ Yálái ə dɛɛ ka pɔ a ka hɔlɔɓo lɔi.