Dutɛrɔnome 20 - Yálá laawoo hɛɓɛ (dc)

Kɔ mɛ̨nį

¹ Ka kulɔ kaa li pɛlɛi ka yowoɠaa diɛ a kɔ́, ka hooɠaa kaa, da kɔ́ kɔ́ wotoloɠaa, di kpulu hu kɛnɛ̨ dɛɛ kaa, mąą hvo nɛ̨ɛ̨li ka hvo ɲɔw; mąąhɔlɔɓo Yai-Laa ka wɔ Yálái kaa ka pɔ, yaai ka kulɔ Eziptə lɔi hu.

² Kaa kɛi kɛa pa gɔ́ yiliiŋą, ɉaláá laa həli mun a kulɔ ə mɛ̨nį ɓo nuą diɛ,

³ yɛ kɛ diɛ: «Israɛlə nuą, ka ka wəli tɔɔ, ka káá lii háákələi kɔ́ kɔ́i, ka ka yowoɠaa kaa, ka lii hvo kulɔ kaa, ka hvo ɲɔw, ka hu hvo pu kaa; ka mąą hvo kpɛlin di tɔwɔ.

⁴ Mąąhɔlɔɓo, Yai-Laa ka wɔ Yálái ɓə vilɛn ŋąą ka tɔwɔ, yɛ gɔ́ kɔ́ da ka yowoɠaa, yɛ kpɔnmąą tɛɛ ka pɔ.»

⁵ Nɔi mąąkpɛ nuą kaa pai nwooi ŋɛ̨i ɓoi nuą diɛ, diɛ kɛ diɛ: «Gbɛɛ ɓə aa pɛlɛ́ nįnɛ̨ tɔɔ, ɛlɛɛ, hvo ni lɔ li mu? Mąą nu ə yali bulu ə li bɔɔli; əgɛ, hvo pa li haa gɔ́ ɓa, nu takpɛli yɛ lɔ ɲəi bɛlɛ́n.

⁶ Nu ta kaa laa yii aa viɲə yɛa laa, hvo ni má tɔlɔɔ kulɔ li? Ə yali bulu ə li bɔɔli, əgɛ, hvo pa li haa gɔ́ ɓa, nu takpɛli yɛ nwɔ viɲəi má dɔlɔɔ kulɔ.

⁷ Nu ta kaa laa yii aa nɛ̨ɛ̨nu wɛli təli hvo ni ɉəɠə li a nɛ̨ą, ə yali bulu ə li bɔɔli, əgɛ, hvo pa li haa gɔ́ ɓa, ɛlɛɛ, nu takpɛli hvo pa nwɔ wɛlii həɠə a nɛ̨ą.»

⁸ Nɔi mąąkpɛ nuą di kaa nwɔ̨nɔ̨ pai kɛi diɛ: «Nu ta kaa laa yɛ ɲɔw, nii yɛ kulɔ mą? Mąą nu ə yali bulu ə li bɔɔli, hvo pa nəi nąn nonnii hviikpɛɛ yɛ yaa.»

⁹ Nɔi mąąkpɛ nuą da kpɛɛ a yili ɓoɔ diɛ, di kaa kɛa pai gɔ́ laɠa nwun nąmįną heei nuą nwun na.

¹⁰ Ka li taa ta kpala kɔ́ pɛlɛ mɛ̨nį ɓa mą, ka gbɛa mo diɛ kaa diɛ, ku ka bɔ ka gu nɛɛ, liilaa ə kɛ gu lɔwai.

¹¹ Da hvaa mą, da di wɔ taa kponŋąą laaɓo ka tɔwɔ, nui lɔpee a kɛ daai tii hu, a lɛɛ kɛa ka yee mu a kóló kɛ nuą.

¹² Kɛlaa, da wala hvaa liilaa mɛ̨nį ɓa ka diɛni ka lɔwai, da di muhəɠə a kɔ́, ka hee diɛ a kɔ́.

¹³ Yai-Laa ka wɔ Yálái kaa pai nɔi ka yee ŋą, ka ɉu hinąą kəlee paa a kɔ́ kɔ́ ɓɔwa.

¹⁴ Kɛlaa, nɛ̨ąą da nɛapɛlɛɛ, daatɛlɛɛɠaa da hɛn lɔpee a kɛ laa daai, ka gəlee həɠə a kɔ́ honŋąą. Ka yowoɠaa yəi hɛnŋąą di kɛ a ka kɔ̨nɔ̨n, a ɉɛn Yai-Laa ka wɔ Yálái kaa pai dɛɛi ka pɔ.

¹⁵ Daaɠaai kpɔ tii di mąą kwɛa kaa, bələ ɓə ka káá pai di hon ɉii la, ə mą kɛ yiiɠaai di hvo a nɔi tii hu taaɠaa.

¹⁶ Kɛlaa nu huwuɠaai ŋɛ̨i Yai-Laa ka wɔ Yálái kaa di wɔ taaɠaai tɛɛi ka pɔ a ka hee taa, nąąɠaa lɔ ɓə mąą hvo nɛ̨ɛ̨li ka hvo nu kan da lɔpee lɛɛ la a vulú.

¹⁷ Yiiɠaai a Hɛtə nuą, Amɔrə nuą, Kanaan nuą, Perizi nuą, Hivi nuą, da Ɉebusə nuą, ka gəlee paa kpɔɔ tɛ̨ɛ̨tɛ̨ɛ̨; yɛ bələi Yai-Laa ka wɔ Yálái kaa ka tí la.

¹⁸ Di hvo pa nee di yii pələ ɲɔ̨nwɔ̨ɔ̨ lɛ kaa, kaa hvilɛn di pulu, di wɔ hali mɛ̨nįɠaai hu. A nee kɛ a nɛ̨ŋɛ̨n ɉəɠɛɛ Yai-Laa ka wɔ Yálái ɓa.

¹⁹ Ka hee taa ɓa a kɔ́ ɉu a kwɛa kaa kɛ ka ɉon, mąą hvo nɛ̨ɛ̨li ka hvo nąą hin nwuluɠaai tii tee; mąąhɔlɔɓo, di ɓá ɓə ka káá pai mįi. Ka hvə nwuluɠaa tii tee; kpomói wulu kɛ ɓo mɔ̨ɔ̨ a nu kan yai ka li kɔ́ pɛlɛi mą?

²⁰ Kɛlaa nwulu yiiɠaai ka gɔlɔn di hva ɓá, ka pɛli mą ka di pɔn; kaa ka wɔ kólóɠaa kɛ la, daai tii gɔ́ kaa ka yaa ka lɔwai ɉon mɛ̨nį ɓa, ə lɛɛ ɉu ka ɉon.