Dutɛrɔnome 19 - Yálá laawoo hɛɓɛ (dc)

Nu mąąkilɛ taaɠaa

¹ Ɓɛlɔwai Yai-Laa ka wɔ Yálá kaa pai nu huwuɠaa tii hukalai la ka ɲɛ̨itɔwɔ, yɛ di wɔ lɔi tɛɛ ka pɔ da di wɔ taaɠaai, da di wɔ pɛlɛ́ɠaai, kaa hee laa,

² Nɔiɠaai Yai-Laa ka wɔ Yálá kaa pai dɛɛi ka pɔ, di lɔwai, ka taa haaɓa kulɔ ɉu a dee.

³ Nɔi yii Yai-Laa ka wɔ Yálá kaa pai dɛɛi ka pɔ, ka ŋąąkwɛlɛ ɉu haaɓa, ka bələɠaa laa a ɲɛ̨i kulaa, yili ɓə a gɛ, nui a nu paa ə pɛli mąąkilɛi hɔlɔɓoi.

⁴ Nu paa mun yii a pɛli mąąkilɛi daaɠaa tii hu, yɛ lɛɛ a vulú, mąą nu ɓaa: nui ə nu paa dɛɠii, nui ŋɛ̨i ə baa, yowolaa takpɛli hvo kɛ da yaa di lɔwai, wɛli kpɛɛ mąą laa hvo kɛ li ɉu, yɛ hvilɛn mą; mąą nu ɓə a pɛli gbɔwɔ nwun mąąɓoi daaɠaa tii hu.

⁵ Akɛ gbəli hu, nu ta da mɛlan da li lɔwɔi wulu pɔn ɉii, da lɛɛ nwulu pɔn ɉii, nu tɔ̨nɔ̨ nwɔ yowai ə kpoloon ə hee mɛlan ma, yili ə haa; nui tii mɛlan baa, a pɛli lii daaɠaa tii ta hu, ə mąąkilɛ ə lɛɛ yɛnɛ̨ɛ̨.

⁶ Nui ŋɛ̨i di baa, mąą hvo nɛ̨ɛ̨li, nwɔ kwələ kulɔ mun hvo hvilɛn nu paa mun di pulu, hvo mąn bələ kwɛa mɛ̨nį ɓa, hvo baa bələ pɔ. Nui ŋɛ̨i mɛlan baa a ɲowa, yii kpɔ yaan wɛli kpɛɛ mąą laa hvo kɛ li di lɔwai a bɔlɔ, mąą hvo nɛ̨ɛ̨li di hvo baa.

⁷ Yili mąą mɛ̨nį ɓə gɛi, gɛ́ kɛ kaa: Ka taa haaɓa kulɔ ɉu a dee.

⁸ Akɛ Yai-Laa ka wɔ Yálá a ka wɔ lɔi ta pɛlɛ mą yɛ bələi ə gwɛla la ka nąnni diɛ, ɛlɛɛ, ə nąą tɛɛ ka pɔ yɛ bələi ə nwoo kwɛlɛ la diɛ, yɛ gaa dɛɛi di pɔ;

⁹ Mąąhɔlɔɓo, ka ka yee kanąn nwɔ tɔ́nŋąą diɛ, kaa di pɔ mɛ̨nį kɛ, yaai háákələi gáá dɛɛ ka pɔ, kaa Yai-Laa ka wɔ Yálái wɛli la kɛ, ka hvilɛn ŋąą nwɔ pələi mɛ̨i a hvóló kəlee; a kɛ tii, ka pənə ka daa haaɓa tɔlɔɔ tii ɉaaɓa pɛlɛ mą.

¹⁰ Bələi ka tɛɛ la, nui hɔn və mą, ka hva ɲąmą pu nɔi ŋɛ̨i Yai-Laa ka wɔ Yálái ə dɛɛ ka pɔ mą, yaai gaa a ka kwɛlin, bələ li. Ka wala gɛ tii, ɲąmąi tii nwulu a lɛɛ ka nwuɔ̨.

¹¹ Kɛlaa, nu a kɛi wɛli kpɛɛ mąą laa kulɔ a mɛlan gaalon, ə hee dɔwɔ, ə wolo mą, yɛ gɛlɛ a baa pələ, ə lɛɛ ɉu, yili ə haa, mąą nui tii a pu, a li daaɠaa tii ta hu,

¹² bɔ taai kalanɉonŋąą da nuą tɔɔlaa, də li di ɉon, di dɛɛ nui tii ə baa nwąną kulɔ mun bɔ, ə baa.

¹³ Ka hvə mąą nu mąąwɛli kaa, gwəi kwələ mun ɲąmąi tii ə bu mąą mɛ̨nį ɓa. Ka yili kulɔ Israɛlə lɔi hu, ə gɛ, ka kɛ a nwun na nɛ̨ɛ̨ nuą.

Lɔi ɲɛn mɛ̨nį

¹⁴ Ka hvə ka ɓɛlan nwɔ lɔi ɲɛn mąąhvalin, ka nɛɛ lɔ yɛ bələi nu tɔlɔ-tɔlɔɔɠaa kɛ laa heeni, di ka lɔwai ɲɛn naa la. Ka kwɛlin tii ka ɉɔlɔɓo nɔi Yai-Laa ka wɔ Yálá ə dɛɛ ka pɔ ɉu.

¹⁵ Mąą hvo nɛ̨ɛ̨li nu tɔ̨nɔ̨ nwɔ kɛla hvaa hvo nɛ̨ŋɛ̨n gɛmun, a wala kɛ tii, nu paamun giti tee, hvo kɛli nu hveelɛ ɉaaɓa, nwɔ kɛla hvaa ɓə da pɛli mɛ̨nįi tii hutɔɔi la.

¹⁶ Akɛ nu ta a lɛɛ pɛlɛ a nu ta laa,

¹⁷ nu hveelɛi tii vaa kaa di lɔwai, da li Yai-Laa hee pɛlɛ́ laaləi, di di wɔ mɛ̨nįi tii laa həli ɉaláá laa həli nuąi da kɛ laa, da giti tee nuą diɛ, diɛi da kɛ laa a volói tii.

¹⁸ Giti tee nuą da kɛɛ mąąnikɛ kpɔ ɉu yɛlɛ tɛ-tɛ; ɓɛlɔwai da gaa la diɛ kɛ gɛla aa lɛɛ hvaa ɓo, aa lɛɛ pɛlɛ mɛlan gaalon ma;

¹⁹ mɛ̨nį yii ə giliŋąhiɛ mą, yɛ kɛ di naa mɛlan gaalon tii ɓa, yili ɓə da naa yaa tii mą. Ka mɛ̨nį ɲɔ̨n gulɔ tii ka lɔwai.

²⁰ Nu takpɛliɠaa di kaa pai mɛ̨nįi tii bələ mɛ̨n ɉii, diɛ ɲɔw dúwɔ́ pələ ɲɔ̨n tii ta kɛ mɛ̨nį ɓa ka lɔwai.

²¹ Ka hvo nu taaləi tii mąąwɛli kaa, mąąnɛ̨ɛ̨ di ɉutɔɔ. Nu nɔ̨ɔ̨ pɔɔi ɓaa nu nɔ̨ɔ̨, nu ɲɛ̨ikɔw pɔɔi ɓaa nu ɲɛ̨ikɔw, nu ɲin bɔɔi ɓaa nu ɲin, nu yee pɔɔi ɓaa nu yee, nu kɔ́wɔ pɔɔi ɓaa nu kɔ́wɔ.