Dutɛrɔnome 17 - Yálá laawoo hɛɓɛ (dc)

¹ Kpɛɠii a kɛ ka wɔ nįŋɛ̨ ta ɓa, a wala kɛ tii, ka wɔ taatɛlɛɛ ta ɓa, ka hvo Yai-Laa ka wɔ Yálái kɔ́ la, yili kaa a mɛ̨nį mąąliɓiɛ Yai-Laa ka wɔ Yálái ɲɛ̨i ɓa.

² Hulɔnu ta, a wala kɛ tii, nɛ̨ɛ̨nu ta a kɛ ka lɔwai, daaɠaa tii Yai-Laa ka wɔ Yálái kaa pai dɛɛi ka pɔ da hu, mɛ̨nįi ɲɔ̨nwɔ̨ɔ̨ Yai-Laa ka wɔ Yálái ɲɛ̨i ɓa, yɛ gɛ, a nwɔ mįnɛ̨i hukala pələ,

³ mąą nu yɛ haliɠaa mąąwiɛ, yɛ pɛlɛ di lííla, yɛ pɛlɛ hvóló da ŋąnin, da yələ kwəi hɛnŋąą lííla; ɲą́ą́ hvəi dí la.

⁴ Akɛ da mɛ̨nį taaləi tii hukulɔ kaa, a wala kɛ tii ka bələ mɛ̨n, mąąnɛ̨ɛ̨, ka kɛɛmąąnin kɛ ɉu a nɛlɛɛ kpɔ kpąą. Ka dɛ̨ą kaa, diɛ kɛ diɛ: di gɛɛ kala mɛ̨nįi tii kɛ Israɛlə lɔi hu;

⁵ ɉulɔnui tii, a wala kɛ tii, nɛ̨ɛ̨nui tii dúwɔ́ pələ ɲɔ̨n tii kulɔ, ka kulɔ la ɉįi pulu. Ə kɛ a hulɔnu-o, ə kɛ a nɛ̨ɛ̨nu-o, ka ɉɔɔ a kwɛni ə haa.

⁶ Kəla hveelɛ ɉaaɓa woo hukulɔ woo mɛ̨i ɓə, mąąnɛ̨ɛ̨ nui haa kaa mą, da baa la. Di hva baa a nu tɔ̨nɔ̨ woo.

⁷ Gəlaɠaa ɓə da gbɛa di yee pɛlɛ baa mɛ̨nį ɓa, yili pulu, nuą kəlee diɛ tɛɠa di laa too ɉu. Ka mɛ̨nį ɲɔ̨n gbɛɛ tii ka lɔwai.

Mɛ̨nį walawalaɠaa ɓo pələ

⁸ Mɛ̨nį ta ɓo pələ a walawala ka yəi, hea yɛ too ɉu ka pɔ taai, giti haɠa ɓa, ə kɛ a ɲąmą mɛ̨nį, ə kɛ a hvaa mɛ̨nį, ə kɛ a nu mąą nwąną mɛ̨nį, ka bələ ɓo həɠə, ka li la ɓɛi Yai-Laa ka wɔ Yálá ə ɲeekpiɛ lɛ laa.

⁹ Ka li ka ɉaláá laa həli nuąi a Leviɠaa ka həli diɛ, da giti tee mun a kɛ laa nąąlɔwai tii, ka di mąąni kɛ, di kaa pai mɛ̨nįi tii ɓo pələ lɛi kaa.

¹⁰ Bələi di kaa pai moi la kaa, gɛɛnąą tii Yai-Laa ka wɔ Yálá ə ɉəɠə ɉu nąą, ka gɛ tii. Mɛ̨nįɠaa kpɔ di kaa pai moi kaa, ka gəlee kɛ.

¹¹ Mɛ̨nįɠaa di kaa pai moi kaa, ka hvilɛn bulu, ka hvo həɠə mɛ̨i, ka ɉon di. Ka hvə həɠə nwooɠaai da mo kaa di mɛ̨i, kaa li ɓa mįi yee hu, a wala kɛ tii, kɔ́ɓɛyee hu.

¹² Kɛlaa, akɛ, nu ta a gbɔwɔ ŋąą kɛnɛ̨, ɉaláá laa həli nuą ŋɛ̨i di kaa kóló kɛi Yai-Laa ka wɔ Yálá hee pɛlɛ́ mu, mąą nu hvo túwɔ́ li yɛ bələi di mo la, awala kɛ tii, yɛ bələi giti tee mun ə mo la, mąąnɛ̨ɛ̨ di mąą nu paa. Ka mɛ̨nį ɲɔ̨n gulɔ Israɛlə lɔi hu.

¹³ Nɔi lonnii kəlee kaa pai bələ mɛ̨n ɉii, diɛ ɲɔw. Yili a kɛ tii, nu ta hva kɛa ɓɔ nwun ɉu.

Tɔɔmun mąą mɛ̨nį

¹⁴ Nɔi ŋɛ̨i Yai-Laa ka wɔ Yálá kaa pai dɛɛi ka pɔ, ka pa kɛa lɔi ɉui, kaa ɉɔlɔɓo a ka wɔɔ, kaa hee laa; ɲələi ka kɛ la diɛ, ka káá tɔɔmun ɉeei ka nwun na, yɛ nu huwu takpɛliɠaai gu kwɛlɛi.

¹⁵ Nui ka káá pai ɉeei ka nwun na, mąąnɛ̨ɛ̨ ə kɛ a nui Yai-Laa ka wɔ Yálá a ɲeekpiɛ lɛ mą. Ka nąn nonnii lɔwai ɓə ka káá pai dɔɔmun ɉəɠəi laa. Mąą laa hvo pai kɛi ka yəi, kaa nwɛ̨ą hee ka nwun na, a nui hvo a ka nąn non.

¹⁶ Ka wɔ tɔɔmun gbɔ, mąą hvo nɛ̨ɛ̨li hoo kpulu kɛnɛ̨ hvo kɛ ɲəi, hvo kɛ gaa nuą tɔɔi Eziptə lɔi hu hoo kpulu kɛnɛ̨ ya mɛ̨nį ɓa. Mąąhɔlɔɓo, Yai-Laa ə kɛ kaa: «Ka hvə kpɔ kɛa pənə ka hvo ɉon a Eziptə lɔi hu pələi tii tɔ̨nɔ̨ kpɛli.»

¹⁷ Mąą hvo nɛ̨ɛ̨li nɛ̨ą kpulu kɛnɛ̨ hvo kɛ ɲəi, mąąhɔlɔɓo, yili a pɛli nwɔ kiliŋąhiɛ mąą pənəi gwəi, yɛ nwɔ kiliŋąhiɛ hvilɛn wali ɓa a wala kɛ tii, hɛni ɓa, yɛ kɛ diɛ ə kɛ ɲəi kɛnɛ̨.

¹⁸ Akɛ kɛa, dɔɔmun a pa tɛi ə hee dɔɔ kpəlin ɉu, ɉaláá kulɔ nu huwui ŋɛ̨i a Leviɠaa, di kaa pai dɔ́n ɉɛɓɛ́ pɛ̨ɛ̨ tɔ̨nɔ̨ tɛɛi bɔ a nwɔɔ.

¹⁹ Gaa pai kɛi gwɛlɛ yɛ mo a yələ ɓɔ pələ tɛitɛi, ɲíi hvóló kəlee hu. Yɛ mąąkwɛli yɛ ɲɔw la Yai-Laa nwɔ Yálái ɓa, yɛ pɛli dɔ́n ɉɛɓɛ́i tii hu mɛ̨nįɠaa kɛi, yɛ ɉon.

²⁰ Hvo kɛ gaa gbɔwɔ ŋąą kɛnɛ̨i nąn nonnii mɛ̨i, hvo həɠə dɔ́n nwooɠaa pulu, yɛ li mamįiyee mɛ̨i, a wala kɛ tii gɔɓɛ yee mɛ̨i. A gɛ tii, a nwɔ tɔɔlaa voló hu kwɛa gbɔwɔ yəi, dɔɔlaa hu ə nɛ̨ɛ̨ mą da nąn nonnii kəlee.