Dutɛrɔnome 16 - Yálá laawoo hɛɓɛ (dc)

Gwɛlan dɛitɛi hu hɛli haaɓai

¹ Abibə ɲąnįn a tɔɔ, ka hvo lɛ̨ą, ka pakə hɛli pu Yai-Laa ka wɔ Yálái mąąwiɛ mɛ̨nį ɓa. Mąąhɔlɔɓo, Abibə ɲąnįn tii ɓə Yai-Laa ka wɔ Yálá ə ka kulɔ la Eziptə lɔi hu a kpinį.

² Ka pakə hɛli haláá kulɔ a nįŋɛ̨, a taatɛlɛɛɠaa, Yai-Laa ka wɔ Yálái ɓa. Ka gɛ tii, ɓɛi ŋɛ̨i Yai-Laa ka wɔ Yálái kaa pai ɲeekpiɛ lɛi laa, yɛ naa hee laa.

³ Lɛɠɛi dɛ hɛn gaa ɉu, ka hva mįi, gɔ̨nɔ̨n tii mįi lɔwai; hvóló mɛ̨ihveelɛ yee mu, lɛɠɛi dɛ hɛn gaa ɉu, ka hva mįi. Gaa a mɔ̨nɔ̨ kɔ̨nɔ̨n, mąąhɔlɔɓo, ka kulɔ Eziptə lɔi hu a ka kɔ́wɔ mąąhulaa. Bələ ɓə ka káá pai kɛi ka kulɔ mɛ̨nį Eziptə lɔi hu, nąą kili tooi la ka ŋą ka wɔ yɛnɛ̨ɛ̨ kəlee hu.

⁴ Ma hvo nɛ̨ɛ̨li, di hvo lɛɠɛ tɛ hɛn gaa ka pɔ lɔi voló mɛ̨ihveelɛi tii yee mu, ə mą kɛ, huwɔ yii ka baa a voló dɔlɔɔ yələ yələwulii pɔ, da hvo lɛɛ yələ hvo ɓɔ ma.

⁵ Daaɠaa ŋɛ̨i Yai-Laa ka wɔ Yálá ə dɛɛ ka pɔ, mąą hvo nɛ̨ɛ̨li ka hvo pakə hɛli pu da hu.

⁶ Ɓɛi lɔ ka bu laa nąą ɓaa, gɛɛnąą ŋɛ̨i Yai-Laa ka wɔ Yálá ə ɲeekpiɛ lɛ mą, ə naa hee laa, nąą lɔ ɓə ka ɉaláá kulɔ laa yələwulii pɔ, a hvóló kɔ́w tooi lɔwai, a ɓɛlɔwai kpɔlɔ tii ka kulɔ la Eziptə lɔi hu.

⁷ Ka daatɛlɛɛ yili, ka mįi ɓɛi Yai-Laa ka wɔ Yálá kaa pai ɲeekpiɛ lɛi laa. Mąą yələ laa a ɓɔ, ka pənə ka li ka pɔɔliɠaa.

⁸ Hvóló mɛ̨ida yee mu, ka káá pai kɛi lɛɠɛ mįi, yii lɛɠɛ tɛ hɛn və ɉu. Voló mɛ̨ihveelɛ yələ, Yai-Laa ka wɔ Yálá nwɔ hɛli laa kulɔ yələ li. Ka hva kóló kɛ a mąą yələ.

Pantəkotə hɛli

⁹ Ɓɛlɔwai ka káá pai kɛi mɔ̨nun dɔlɔɔɠaa teɛ kɔ́wɔ tɔɔi la, ka lɔwɔ mɛ̨ihveelɛ lonon; ka nonoɔ kɔ́wɔ tɔɔ a mɔ̨nun tɔlɔɔ tee yələ.

¹⁰ Yili pulu, ka nɔwɔ mɛ̨ihveelɛ tɛɛ hɛli pu a Yai-Laa ka wɔ Yálái mąąwiɛ hɛli, kaa pa a gɔ́ hɛnŋąą a ka liiɓa, kaa gɛ yɛ bələi Yai-Laa ka wɔ Yálái ə lúwɔ́ too la kaa.

¹¹ Gɛɛnąą tii Yai-Laa ka wɔ Yálái kaa pai ɲeekpiɛ lɛi laa, yɛ naa hee laa, ka káá pai kɛi laa kwəinɛ̨ɛ̨ hu, Yai-Laa ka wɔ Yálái lííla, ka ka lonnii ɉinąą mąn nɛ̨ąą mąn, ə mą kɛ ka wɔ luwɔɠaa, ɉinąą mąn, nɛ̨ąą mąn, ə mą kɛ, Leviɠaai di kaa ka lɔwai ka wɔ taaɠaa hu, da ka wɔ nwɛ̨ąą, təliɠaa, da galaninŋąąi ka lɔwai.

¹² Ka ka kili lɛɛ ɉu, kaa diɛ, ka kɛ a luwɔɠaa Eziptə lɔi hu. Dɔnŋąą ŋɛ̨i gáá dɛɛi ka pɔ, ka ɉon a nɛlɛɛ, ka bɔ mɛ̨nį kɛ.

Ɉəɠə kələ hɛli

¹³ Ɉəɠə kələ hɛli nwɛi, ka káá pai kɛi bui hvóló mɛ̨ihveelɛ yee mu, ka kpɛɛ a ka pɔ yɛa mɔ̨nun gəlee teɛ, da ka wɔ hihɛnŋąą kəlee ɓa kulaa.

¹⁴ Ka ɉɛlii tii pu a kwəinɛ̨ɛ̨, kaa, ka ka lonnii, da ka wɔ luwɔɠaa, Leviɠaa, da nwɛ̨ąą, ə mą kɛ, təliɠaa da galaninŋąą, diɛi di kaa ka wɔ taaɠaa hu.

¹⁵ Ɉɛlii tii, ka káá pai bui Yai-Laa ka wɔ Yálái mąąwiɛ mɛ̨nį ɓa a hvóló mɛ̨ihveelɛ, gɛɛnąą tii Yai-Laa ka wɔ Yálá kaa pai ɲeekpiɛ lɛi laa. Mąąhɔlɔɓo, Yai-Laa ka wɔ Yálá ə lúwɔ́ too ka wɔ tíiɠaai ɓa, da ka kɛ mɛ̨nįɠaa kəlee.

¹⁶ Kwɛlan dɛitɛi ye mu, hinąą kaa pai kɛi lii Yai-Laa ka wɔ Yálái lííla gee mɛ̨i haaɓa; gɛɛnąą tii gaa pai ɲeekpiɛ lɛi laa, ɓɛlɔwai ka káá pai kɛi lɛɠɛ yii dɛ hɛn və ɉu nwɔ hɛli pui la, da nɔwɔ mɛ̨ihveelɛ tɛɛ pulu hɛli, ɛlɛɛ, da gələ hɛli pu yələ. Nu ta lɔpee hvo kɛ gaa pai Yai-Laa ka wɔ Yálá lííla a ɲeehowolo.

¹⁷ Ka tɛitɛi kəlee ka li Yai-Laa ka wɔ Yálá lííla a kɔ́ɓo hɛn, yɛ bələi Yai-Laa ka wɔ Yálá ə lúwɔ́ too la kaa.

Kiti tee pələ

¹⁸ Ka káá pai mɛ̨nįɓo kɛ nuą heei, da nɔi nuą mɛ̨i kaa nuą, ka wɔ taaɠaai hu, yii Yai-Laa ka wɔ Yálái kaa pai dɛɛi ka pɔ, nu huwu tɛitɛi kəlee mɛ̨i, diɛ di kɛ kóló kɛ a tələnmolaa nuą lɔwai.

¹⁹ Mąą hvo nɛ̨ɛ̨li, ka hvo tɛ̨ąą mɛ̨nį pili ɉu, ka hvo tɔɔ hulu mun da pulu. Ka hvə ka yee hee nɔ gwəi hɛn mu. Mąąhɔlɔɓo, nɔ gwəi hɛn a mɛ̨nį kɔ́lɔn nuą ɲɛ̨ipu, yɛ tələnmomun nwɔ tɛ̨ąą mąą mɛ̨nį pili ɉu.

²⁰ Ka hvilɛn tɛ̨ąą pulu, ka gɛ tii, ka lɛɛ yɛnɛ̨ɛ̨, ɛlɛɛ, nɔi ŋɛ̨i Yai-Laa ka wɔ Yálá ə dɛɛ ka pɔ, kaa nąą hɔlɔɓo.

Mɛ̨nį takpɛliɠaai tɔ́n gaa diɛ

²¹ Ɉaláá taɓalii ka káá pai dɔɔi Yai-Laa ka wɔ Yálá ɓa, ka hvo wulu ta tɔɔ gwɛlɛ, kaa gɔ́.

²² Ka hvə kwɛni ta tɔɔ a ka mąą mɛ̨nį. Mɛ̨nįɠaa tii wɛli kpɛɛi Yai-Laa ka wɔ Yálái ɓa kpɔ tɛ̨ɛ̨tɛ̨ɛ̨.