Dutɛrɔnome 15 - Yálá laawoo hɛɓɛ (dc)

Gwɛlan mɛ̨ihveelɛ nąą: kwələ a lɛɛ a kpɛli

¹ Kwɛlan mɛ̨ihveelɛ a tɛɛ, gwələɠaai ka di tɔɔ, ka di lɛɛ a kpɛli.

² Gwələ lɛɛ mɛ̨nį nuą diɛ a kpɛli, gɛ pələ ka: Nui a kwələ tɔɔ mɛlan mun ma, a gwələ lɛɛ mą a kpɛli. Da gwələ lɛɛ mɛ̨nį a kpɛli loloɓo Yai-Laa laa hu. Mąą nu hva pɛli mɛlan, awala kɛ tii nąn non ganąn ɉii.

³ Nwea nwɛi, ka pɛli gbaan ɉii; kɛlaa ka yəi hɛn ka nąn nonnii yəi, ka nɛɛ di yəi a mɛ̨inɛ̨ɛ̨.

⁴ Kɛlaa mąą hvo nɛ̨ɛ̨li yeehowolo mun və kɛ ka pɔɔli, núwɔ́i Yai-Laa kaa pai dooi kaa nɔi tii gaa pai dɛɛi ka pɔ a ka wɔɔ ɉu, núwɔ́i tii kɛnɛ̨i.

⁵ Ka ka wəli tɔɔ lɔ a nɛlɛɛ Yai-Laa ka wɔ Yálái woo ɓa. Díɓoi ŋɛ̨i gáá dɛɛi ka pɔ háákələi, kaa gəlee kɛ.

⁶ Mąąhɔlɔɓo, Yai-Laa ka wɔ Yálái kaa pai lúwɔ tooi kaa; yɛ bələi ə naakwɛlanmo la kaa. Ka káá pai kwələ tɔɔi nu huwu tamąą ɓa, diɛ tolaa tɛɛ ka pɔ. Kɛlaa kaa kpinįi ŋɛ̨i di hvo pai ka tolaa heei, ka hvo pai kwələ hon ɉii; ka káá pai heei nu tamąą mɛ̨i, ka wɛi, di hvo pai heei ka mɛ̨i.

⁷ Yee howolo mun da a kɛ ka pɔɔ li, ə ɓo a ka kaayɔwɔ ta, ka wɔ taai ta hu, nɔi ŋɛ̨i Yai-Laa ka wɔ Yálái kaa dɛɛi ka pɔ ɉu, ka hvo ɉon a kili wala wala laa, ka hvo ka yee laa kpulu ka kaayɔwɔ ta tɔwɔ, a kɛ a yeehowolo mun.

⁸ Kɛlaa ka ka yee laa ɓo dɔwɔ a nɛlɛɛ, ə lɛɛ hɛn lɔpee mąąkpaan a kɛ mą, ka gwələ tɔɔ mą.

⁹ Ka gɛ a nɛlɛɛ, kiliŋąhiɛ ɲɔ̨nwɔ̨ɔ̨ hvo too ka kwəi, kaa kɛ diɛ: «Gwəlan mɛ̨ihveelɛ nąą həli hiɛ ka, gwələɠaa lɛɛ mɛ̨nį a kpɛli kwɛlan», kaa kɛa ɲɛ̨i wala wala laa kulɔ a ka kaayɔwɔi gaa yeehowolo laa hu; ka hva hɛn da tɛɛ bɔ, ka gɛ tii, gaa pai nwoo laai Yai-Laa ɓa a ka laa, ɛlɛɛ kaa nɛ̨ŋɛ̨n ɉee ka kpɔɔ nwuɔ̨.

¹⁰ Ka mɛ̨inɛ̨ɛ̨ kɛ mą a ka kwəinɛ̨ɛ̨. Ka hvə gɔ́ a ka ɲənąą yiliɛ, ka gɔ́ tii, Yai-Laa ka wɔ Yálái kaa pai lúwɔ tooi kaa ka kɛ mɛ̨nįɠaa kəlee hu.

¹¹ Ɛlɛɛ yɛ bələi yeehowolo nuą di hva kpɛɛ la lɔi, gáá díɓoi ŋɛ̨i tɛɛi ka pɔ, gɛ́, ka ka yee laaɓo a gɛnɛ̨ ka kaayɔwɔɠaai a yeehowolo nuą da mąąwɛli nuąi nɔi di tɔwɔ, kaa di kɔ́.

Hebreu ta a kɛ a luwɔ ɉon bələ

¹² Ka kaayɔwɔ ta, yii a Hebreu, akɛ a hulɔnu, a wala kɛ tii, nɛ̨ɛ̨nu, a gbɔwɔ tɔlaa hee ka ta ɓa, a kóló kɛ kaa yɛ luwɔ, kwɛlan mɛ̨ida yee mu. Kɛlaa, gwɛlan mɛ̨ihveelɛnąą, mąąnɛ̨ɛ̨ ka ɓo mą, ə lɛɛ gbɔwɔ ɓa.

¹³ Ka ɓo mą, mąąnɛ̨ɛ̨ ə həɠə ka pɔɔli, kɛlaa, ka hvo nɛɛ laa hvo li a ɲeehowolo.

¹⁴ 'Ka dɔɔ bələi a ka wɔ ɓɛlaaɠaa ta, da ka wɔ ɓoliɠaa ta, ka yəi gələ hu hɛn da, ka wɔ viɲə yá kulɔi hɛn da. Yili a kulɔ Yai-Laa ka wɔ Yálái wɔ lúwɔ́ hu.

¹⁵ Mąąnɛ̨ɛ̨ ka ka kiliŋąhiɛ, kaa diɛ, ka kɛ a luwɔɠaa Eziptə lɔi hu, ɛlɛɛ, Yai-Laa ka wɔ Yálái ɓə ka nwun mąąɓo. Yili mąą mɛ̨nį ɓə gɛi, gɛ́ dɔ́nŋąą ŋɛ̨i tɛɛ la ka pɔ háákələi.

¹⁶ Kɛlaa, akɛ nui tii a kɛ kaa: «Və́ bɔ, və́ kulɔ ka pɔ, mąąhɔlɔɓo, ka wɛlikaa mą́ą́, ka ka yəi bɛlɛ́n nuą», yaan ə ɓo nɛ̨ɛ̨ hu ka pɔɔli;

¹⁷ a mo tii, yá haliɛn ɉəɠə, ə́ nwəli ɓɔ la bɛlɛ́ laaləi, a lɛɛ kɛa a ka wɔ luwɔ a yələ kəlee.

¹⁸ Gwɛlan mɛ̨idai tii ə gɛ nuwɔ laa hu, yá kɛi nɛɛ laa yɛ li, yili hvo nwąną yɛ́. Mąąhɔlɔɓo, gwɛlanŋąą tii ə gɛ, aa wali tiɛ̨ kaa gee hu hveelɛ aa tɛɛ nu hala walii ka kɛ dɛɛi kóló kɛmun bɔ mą. A kɛ tii, Yai-Laa ka wɔ Yálá kaa pai lúwɔ́ tooi kaa ka kɛ mɛ̨nį kəlee hu.

Lon dɔlɔɔɠaa kaa a Yai-Laa nwɔɔ

¹⁹ Ka wɔ nįŋɛ̨ɠaa, ka wɔ taatɛlɛɛ pɛlɛɛɠaa lon dɔlɔɔɠaa, da kɛ a ɉilɛ, ka naakwɛlanmo Yai-Laa ka wɔ Yálái ɓa, nwɔɔ li. Ka hvə kóló kɛ a ka wɔ nįŋɛ̨ lon dɔlɔɔɠaa, ə mą kɛ, ka wɔ taatɛlɛɛ pɛlɛɛɠaa lon ɉilɛ dɔlɔɔɠaa, ka hvo di ləɠa mɛ̨i tee.

²⁰ Yai-Laa ka wɔ Yálái lííla ɓə ka mįi laa, ka ka yəi bɛlɛ́n nuą, ɓɛi Yai-Laa ka wɔ Yálá a ɲeekpiɛ lɛ laa.

²¹ Kɛlaa, kiliin ɉii a kɛ ɉuwɔi tii ɓa, yɛ lɔwu, a wala kɛ tii, ɲɛ̨ipuɔ, awala kɛ tii, nąą takpɛli ə ɓo mą, ka hvo Yai-Laa ka wɔ Yálá kɔ́ la.

²² Ka mįi ka wɔ taaɠaai hu, nui tɔ́n gaa mą, da nui tɔ́n və mą, da pɛli di mįi gee pɔ, lɔ yɛ bələi ka lomą, awala kɛ tii, lan gaa la.

²³ Kɛlaa, ka hvo ɲąmą mįi, ka huwɔ paa, ka ɲąmą pu nɔi ɓa yɛ yá.