Dutɛrɔnome 13 - Yálá laawoo hɛɓɛ (dc)

Kwɛli hvilɛn mɛ̨nį hali ɓa da nu ɲąą hɛn mɛ̨nį

¹ Dɔnŋąąi gáá dɛɛi ka pɔ, ka tɔɔ a ka nwąnąi, ka gɛ, ka hvo da pɛlɛ mą, ka hvo da kulɔ mą.

² Akɛ nu ta a muhəɠə ka lɔwai yɛ kɛ diɛ Yálá kwəi mɛ̨nį hukulɔ mun ni, awala kɛ tii hįį kaamun; ə mą kɛ mɛ̨nį ɲɛ̨i kɛnɛ̨ ta ɓə, awala kɛ tii kpalo mɛ̨nį, ə nɛɛ kwɛala yɛ ɉukulɔ;

³ ɛlɛɛ mɛ̨nį ɲɛ̨i kɛnɛ̨i tii, awala kɛ tii, gbalo mɛ̨nįi tii ə nɛɛ kwɛala yɛ ɉukulɔ, mąą mɛ̨nį yɛ kɛ; mąą nu ə tɔɔ kɛa, yɛ kɛ diɛ: «Gu hvilɛn haliɠaa pulu, gu di mąąwiɛ» diɛi di kaa a hɛnŋąąi ka hvo di kɔ́lɔn.

⁴ Mąą hvo nɛ̨ɛ̨li, ka hvo ka wəli tɔɔ mɛ̨nį hukulɔ mun tii ɓa, a wala kɛ tii, ɉįi kaamun tii. Mąąhɔlɔɓo, Yai-Laa ka wɔ Yálá ka tii pai kɛi ka hukɔɔn ɉii, ə gɛ, ə ka káá a nuąi da Yai-Laa ka wɔ Yálái wɛlilakɛ a di kwəi tɔ̨nɔ̨, a di nwąnąi kpɔ-kpɔɔ.

⁵ Yai-Laa ka wɔ Yálá ɓə mąąnɛ̨ɛ̨ ka hvilɛn bulu, ya ɓə mąąnɛ̨ɛ̨ ka ɲɔw mą. Nwɔ tɔ́n mə mąąnɛ̨ɛ̨ ka ɉon; nwoo ɓə mąąnɛ̨ɛ̨ ka ka wəli tɔɔ mą. Yai-Laa ɓə mąąnɛ̨ɛ̨ ka tí mą, ɛlɛɛ, yaa ɓə mąąnɛ̨ɛ̨ ka kanąn mą.

⁶ Nui tii gbɔwɔ kɛ a Yálá kwəi mɛ̨nį hukulɔ mun, nwɛi, a wala kɛ tii, ɉį́i kaamun tii, mąąnɛ̨ɛ̨ ka di paa. Mąąhɔlɔɓo, aa nuą ɲąątɔɔ a di lənə mɛ̨nį Yai-Laa ka wɔ Yálái ɓa, yaa tii ka kulɔ Eziptə lɔi hu, yɛ ka kulɔ luwɔ pɛlɛ́ mu. Bələi ŋɛ̨i Yai-Laa ka wɔ Yálá ə ka hvilɛn mɛ̨i, nui tii ə kɛ bɔ, ə ka həɠə mɛ̨i. Mąąnɛ̨ɛ̨ ka mɛ̨nį ɲɔ̨n gɛmun gulɔ ka lɔwai.

⁷ Akɛ a ə́ nąn non, a wala kɛ tii, ə́ lee lon, yili hvo mą, ə́ lon ɉulɔnu, a wala kɛ tii, ə́ lon nɛ̨ɛ̨nu; akɛ, ə́ nɛ̨ąi tii ka yaa ka káá yíi ɓa, a wala kɛ tii, ə́ ɓɛlan yii yáá nwɛli la kɛ yɛ ə́ kpinį, di ta a kɛ ka lɔwai, yɛ kɛ yɛ́: «Gwə li gu kwɛli hvilɛn yálá takpɛli ɓa» ɲáláɠaa tii, yɛ́ mąn, ə́ nąnni mąn, ka hvo gɔlɔn,

⁸ nu huwuɠaa kpɔ tii ka kwɛlɛ, ə həɠə nɔi kpala tɔɔi pələ, yɛ li la naa kulɔi pələ, di kɛ a di lɛɠɛɛ kaa-o, di kɛ a di mąą kwɛaa kaa-o, di wɔ yáláɠaa tii,

⁹ nu a kɛ yɛ́ gwə li di pɔ, hvó hvaa nui tii woo ɓa, hvó mąą hvaalɛɛ, hvó mąą wɛli kaa, hvó tɔɔ bulu.

¹⁰ Kɛlaa yaamun, hvo kɛ li ka baa, gwɛni tɔlɔɔ pili mą, ɛlɛɛ nɔi nuą di gbəli laa kulɔ.

¹¹ Ka ɉɔɔ a kwɛni ə haa; mąąhɔlɔɓo, ə kɛi ka mąą kwɛa pələ kwɛli Yai-Laa ka wɔ Yálái ɓa; yaa tii ka kulɔ Eziptə lɔi hu, ə ka nwun mąąɓo nuwɔ pɛlɛ́i mu.

¹² Israɛlə nuą kəlee kaa pai bələ mɛ̨n ɉii, diɛ ɲɔw, nuą di kpəla mɛ̨nį ɲɔ̨n daaləi tii kɛɛ ɓa ka lɔwai.

¹³ Daaɠaa tii Yai-Laa ka wɔ Yálá kaa dɛɛ ka pɔ ka hee ɉu, ka mɛ̨nįi tii bələ mɛ̨n da hu,

¹⁴ diɛ kɛ nu kpoloonŋąą daa di muhəɠə ka lɔwai, daa di pɔ taai nuą nwun ɉu lan, diɛ kɛ diɛ: «Ka gu kwɛli hvilɛn yálá takpɛliɠaa diɛ!» A ɲáláɠaa tii ka hvo di kɔ́lɔn,

¹⁵ mąąnɛ̨ɛ̨ ka mɛ̨nį tii hu kwɛli, ka kɛɛ mąąni kɛ, ka ɉu kpɛ kpɔ a nɛlɛɛ; ka dɛ̨ą kaa, da gaa diɛ kɛ di gɛɛ kala mɛ̨nįi tii kɛ ka lɔwai,

¹⁶ mąąnɛ̨ɛ̨ ka daa tii hu nuą kəlee paa a ɓɔwa kwɛa, ka daa tii hu kala da ɉu hɛnŋąą kəlee, ə mą kɛ daatɛlɛɛɠaa, ka gəlee paa a ɓɔwa kwɛaa.

¹⁷ Hɛn kpɔ a kulɔ ɉu, ka gəlee ɲąą kpɔn gwəli hąąi, ka daa kələn da ɉɛnŋąą tii kəlee. Ka gulɔ tii a haláá Yai-Laa ka wɔ Yálái ɓa; nąą ə lɛɛ a taa kpoloon nąą hva kɛa pənə hvo tɔɔ.

¹⁸ Mąą hvo nɛ̨ɛ̨li ka hvo ka yee tunwɔ̨n ɉɛnŋąąi kpɔ di di kalaɠalai da ɓa. Ka wala tunwɔ̨n da ɓa, Yai-Laa kaa pai nwɔ liiholi kɛnɛ̨i kpɛlai bələi. Yɛ nwɔ wɛlikɛmąąlaa tɛɛ ka pɔ, yɛ ka mąąwɛli kaa, yɛ ka ɓuwuɓo yɛ bələi ə naakwɛlanmo la ka nąnni diɛ.

¹⁹ Hvo gaai, kaa ka wəli tɔɔ Yai-Laa ka wɔ Yálái woo ɓa; nwɔ tɔ́nŋąąi gáá dɛɛi ka pɔ háákələi kaa gəlee kɛ, mɛ̨nįi ɉaŋąą Yai-Laa ka wɔ Yálái ɲɛ̨i ɓa kaa gɛ.