Dutɛrɔnome 12 - Yálá laawoo hɛɓɛ (dc)

Yálá nwɔ tɔ́nŋąą 12—26

¹ Dɔnŋąą da nɔi hu yíi ɓo pələi mąąnɛ̨ɛ̨ ka gɛ, nɔi ŋɛ̨i Yai-Laa ka nąnni di wɔ Yálá aa dɛɛ ka pɔ, kaa li heei ɉu, ka mɛ̨nįɠaa ŋɛ̨i kɛ ka yíi hvóló kəlee hu, nɔi ti mɛ̨i.

Haláá kulɔi tanɔ̨n

² Nu huwui ti ka káá pai di wɔ lɔi kulɔi di yəi, gɛɛnąąɠaa kpɔ di kɛi gɔ́, nąą ə kɛ a yee nwuɔ̨, ə kɛ a yee kpu kpuɠaa, ə kɛ a wəla wuluɠaa, ka gəlee nąą kala.

³ Ka di wɔ hali kɔ́iɠaa wolo, ka di hvaa kwɛniɠaa huɓuwɔ, ka di hvaa wuluɠaa tee, ka di wɔ mąą nįnįn ɉaɠaaɠaa kələn, ka di pɔɔ kpɛɛ laa kpɔ tɛ̨ɛ̨tɛ̨ɛ̨.

⁴ Yai-Laa ka wɔ Yálái mąąwiɛ pələ ə kɛ a dee, ka hvo di pɔɔ kɔ́ɔn, ka hvo gɛ yɛ diɛ.

⁵ Kɛɛnąą lɔpee Yai-Laa ka wɔ Yálá kaa pai ɲeekpiɛ lɛi nąą, Israɛlə huwu kəlee lɔwai, yɛ naa hee laa, yɛ daa tɔɔ laa, gɛɛnąą tii lɔ ɓə ka káá pai kɛi lii laa, kaa hvaa bɔ.

⁶ Nąą ɓə ka káá pai kɛi lii laa a ka wɔ haláá hɛnŋąąi da gəlee kələn, da ka wɔ nɛ̨ɛ̨yɔwɔ laa haláá, ə mą kɛ, ka wɔ hihɛnŋąą má bow nąą, ə mą kɛ, ɉɛnŋąąi ka káá pai kɛi lɛɛi ka kpɔɔ ɓa, kaa Yálá kɔ́ la, ə mą kɛ, yiiɠaai ka káá pai kɛi di laakwɛlanmoi, yɛ bələi: ka wɔ nįŋɛ̨ lonnii dɔlɔɔɠaa kaa la, da mɛlaa lonnii dɔlɔɔɠaa.

⁷ Nąą ɓə ka káá pai kɛi ka laa mį́i laa gee ɓa, ka ka yəi bɛlɛ́n nuąi Yai-Laa ka wɔ Yálá ɲɛ̨i ɓa a kwəinɛ̨ɛ̨. Mąąhɔlɔɓo, mɛ̨nįɠaa kpɔ ka káá pai ka yee tooi ɉu, Yai-Laa ka wɔ Yálái kaa pai ɉu nɛɛi, ə lúwɔ́ too ka.

⁸ Ka hvə pai kɛi tuwɔi yɛ bələi gu ka tuwɔi la ɓɛ yiihu, yii lɔ a nɛɛ nu ɓa yɛ gɛ.

⁹ Hvo gaai ka hvo nii lɔ li vįitɔɔ lɔi hu, yii gaa pai kɛi a ka kwɛlin nɔi yii Yai-Laa ka wɔ Yálái kaa dɛɛi ka pɔ.

¹⁰ Kɛlaa, ka káá pai Ɉurdɛn teen ɉii; ka li ka lɔ nɔi Yai-Laa ka wɔ Yálá aa dɛɛ ka pɔ a ka wɔɔ kaa hee ɉu. Gaa pai hvįįtɔɔ tɛɛ ka pɔ, ka yowoɠaa kpɔ tii ka hvanąi, yɛ di mąą kwɛa kaa. Ka káá pai kɛi laa a ka wəli pulu laɠiɛ.

¹¹ Akɛ ti gɛɛnąąi Yai-Laa ka wɔ Yálái kaa pai ɲee kpuwɔ lɛi mą, yɛ naa hee nąą ɓa, nąą ɓə ka káá pai kɛi lii laa a ka wɔ Yálá kɔ́ haláá yii da gəlee kələn, nɛ̨ɛ̨yɔwɔ laa haláá, a ka wɔ hihɛnŋąą má bow nąą, ɉɛnŋąą ka káá pai lɛɛi ka kpɔwɔ ɓa kaa Yálá kɔ́ la; ɉɛnŋąą ka káá pai kɛi di laakwɛlanmoi Yai-Laa ɓa.

¹² Nąą ɓə ka káá pai kɛi kwəinɛ̨ɛ̨ kulɔi laa Yai-Laa ka wɔ Yálái lííla; kaa mąn, ka lon ɉinąą mąn, ka lon nɛ̨ąą mąn, ka wɔ luwɔ hinąą da ka wɔ luwɔ nɛ̨ąą, ə mą kɛ Levi lonnii di kaa ka wɔ taaɠaai hu. Mąąhɔlɔɓo, Levi lonnii tii lɔi hvo di yəi, di kwɛlin və di yəi yɛ kaa.

¹³ Ka gɛ a nɛlɛɛ, ka hvo ka wɔ Yálá mąąwiɛ haláá kulɔ ɓɛi lɔpee ka nąą kaa.

¹⁴ Ɓɛi lɔ tii Yai-Laa kaa pai ɲee kpuwɔ lɛi laa ka huwu ta nwɔ lɔi hu, nąą lɔ ɓə ka káá pai kɛi ka wɔ haláái kulɔi laa. Kaa Yálá hɛɠɛɛɓo laa. Mɛ̨nįɠaa kpɔ gáá ka tíi la nąą ɓə ka káá pai kɛi di kɛi laa

¹⁵ Kɛlaa, ka pɛli mą ka huwɔ paa, ka huwɔ mįi taa kəlee hu, yɛ bələi Yai-Laa ka wɔ Yálá ə mąą lúwɔ́ too la kaa. Nui tɔ́n gaa mą, nui tɔ́n və mą, da pɛli di ɉuwɔi ti ta mį́i; yɛ bɛlɛi lomą kaa la, a wala kɛ ti lan.

¹⁶ Kɛlaa ka hvo ɲąmą mį́i, ka bu lɔi ɓa yɛ ya.

¹⁷ Mąą hvo nɛ̨ɛ̨li ka hvo ka wɔ mɔ̨nun gɔ́n bow nąą, da ka wɔ lɔɔ nįnɛ̨, da ka wɔ wulɔɠaa mįi ka wɔ taaɠaa hu, ə mą kɛ ka wɔ taatɛlɛɛɠaa gbɛa-kpɛa da bɛlɛɛɠaa lon dɔlɔɔɠaa, da haláá lɔpee ka káá pai naakwɛlanmoi, ə mą kɛ ka wɔ naa gwəi haláá, da ka kɛ kóló má dɔlɔɔ-tɔlɔɔɠaa.

¹⁸ Ka pa a ɉɛnŋąą tii, ka mįi Yai-Laa ka wɔ Yálái lííla; ɓɛi gaa pai ɲee kpuwɔ lɛi laa. Gɛɛnąą tii ɓə ka káá pai kɛi di mįi laa ka ka lon ɉinąą da ka lon nɛ̨ąą, ə mą kɛ ka wɔ luwɔ hinąą da nɛ̨ąą, da Levi lon yii ka wɔ taai hu. Ɉɛn gɔwi ka káá pai ɉɔlɔɓoi ka kɛ kólóɠaa hu, ka yili mąą kwəinɛ̨ɛ̨ kulɔ Yai-Laa ka wɔ Yálái ɲɛ̨i ɓa.

¹⁹ Ka gɛ a nɛlɛɛ ka hvo lɛ̨ą Levi lonnii diɛ, ka wɔ yɛnɛ̨ɛ̨ kəlee yee mu.

²⁰ Yai-Laa ka wɔ Yálái a pa ka wɔ lɔi hu kɛnɛ̨i yɛ bələi ə naakwɛlan mo la kaa, ɲələi ka kɛ la diɛ: «Ku kaa bɔ ku huwɔ mįi» mąąhɔlɔɓo, huwɔ mįi wɛli kaa kaa, ka mįi a ka liiɓa.

²¹ Gɛɛnąąi Yai-Laa kaa pai ɲee kpuwɔ lɛi mą, yɛ naa hee laa. Akɛ nąą a kɛ a gwɛaa kaa, ka pɛli mą ka nįŋɛ̨ ta paa, awala kɛ tii ɓɛlaa da ɓolu ta, yii lɔpee Yai-Laa ka wɔ Yálái kaa pai dɛɛi ka pɔ, ka gɛ lɔ yɛ bələi gáá pai moi la kaa; ɛlɛɛ ka da mįi ka wɔ taaɠaa hu, yɛ bələi ka káá pai kɛi la bɔ.

²² Ka pɛli da mįi lɔ yɛ bələi lomą kaa la, awala kɛ tii lan. Nui tɔ́n gaa mą, awala kɛ tii nui tɔ́n və mą, da pɛli di mįi gee pɔ.

²³ Kɛlaa, hɛɠɛ-hɛɠɛ nee hɛɠɛ-hɛɠɛ nąn, ka hvo huwɔ ɲąmą mį́i, mąąhɔlɔɓo, kɛ yɛnɛ̨ɛ̨ kaa ɲąmą hu. Mąą hvo nɛ̨ɛ̨li ka hvo hɛn da nwɔ yɛnɛ̨ɛ̨ lɛɛ ɉu ka hvo mį́i.

²⁴ Ka hvo ɲąmą mįi, ka bu lɔi ɓa yɛ yá.

²⁵ Ka hvo da mįi, bələ ɓə ka káá pai kɛi la nwunnąnɛ̨ɛ̨ hu. Kaa-oo, ka lonnii-oo, ka haa pulu. Hvo gaai, mɛ̨nį ɉaŋąą Yai-Laa ɲɛ̨i ɓa ya ka tii ka káá pai gɛi.

²⁶ Ɉɛnŋąąi lɔ mąąnɛ̨ɛ̨ ka pa paa diɛ gɛɛnąąi Yai-Laa kaa pai ɲee kpuwɔ lɛi mą, diɛ ɓaa a: ɉɛnŋąąi ka naakwɛlan mo Yálá ɓa, da ka wɔ Yálá kɔ́ hɛnŋąą.

²⁷ Ka káá pai kɛi haláá yii da gəlee kələn gulɔi, Yai-Laa ka wɔ Yálá nwɔ haláá kulɔ kəhi mɛ̨i, a ɉuwɔ da ɲąmą. Kɛlaa, ɉaláá takpɛliɠaa tii ka di kulɔ, ka ɲąmą pu Yai-Laa nwɔ haláá kulɔi, ka ɉuwɔ mįi.

²⁸ Díɓo wooɠaa kpɔ ŋɛ̨i gáá dɛɛi ka pɔ, ka ka wəli tɔɔ diɛ, ka di pɔ mɛ̨nį kɛ, yili pɔ pələ ɓə ka kɛ la nwunąnɛ̨ɛ̨ hu; ka ka lonnii ka haa pulu, a yələ kəlee; hvo gaai, mɛ̨nįi ɉaŋąą Yai-Laa ka wɔ Yálái ɲɛ̨i ɓa, ya ka tii ka káá pai kɛi gɛi.

Kanaan nuą di wɔ haliɠaa

²⁹ Ɓɛlɔwai Yai-Laa ka wɔ Yálái kaa pai nu huwuɠaa tii hukalai, yɛ di wɔ lɔi kulɔ di yəi, yɛ ka hee di heei di wɔ lɔi hu;

³⁰ Ka ka kpɔɔ hon a nɛlɛɛ nɔi ti hu. Ka hvə kɔ́ a di wɔ hɛlɛn, daa nuą tii huwu pu ka ɲɛ̨i tɔwɔ, ka hvo di yíi pələ pɔɔ kɔ́ɔn, ka gɛ a nɛlɛɛ, ka hvo hvilɛn di wɔ haliɠaai pulu, kaa kɛ diɛ: «Nu huwui ŋɛ̨i di kɛi di wɔ haliɠaai mąąwiɛ ləi? Ɲą́ą́ gbɛli mąn ŋį́ gɛ yɛ diɛ.»

³¹ Ka hvə di pɔɔ kɔ́ɔn, Yai-Laa ka wɔ Yálái mąąwiɛ mɛ̨nį hu. Mąąhɔlɔɓo, mɛ̨nįɠaa kpɔ da ɓaɠi lii tɛ a Yai-Laa, mɛ̨nįɠaa kpɔ di wɛli kpɛɛi mą, ya ɓə nu huwui tii ə kɛi gɛ di wɔ hali mąąwiɛ pələ hu; diɛ di lon ɉinąą da di lon nɛ̨ąą kələn di wɔ haliɠaa diɛ.