Dutɛrɔnome 11 - Yálá laawoo hɛɓɛ (dc)

Mɛ̨nįɠaai Yálá ə gɛ Israɛlə ɓa nąą kili too mɛ̨nį ŋą

¹ Ka Yai-Laa ka wɔ Yálái wɛli la kɛ, nwɔ tíɓoɠaa nwɔ yɛnɛ̨ɛ̨ mąą tɔ́nŋąą, da nwɔ yɛnɛ̨ɛ̨ hon bələɠaai gáá dɛɛi ka pɔi, ka di kɛ a yələ kəlee.

² Mɛ̨nįɠaai Yai-Laa ka wɔ Yálái ə gɛ, gbaɠala kaa ka kəlee kaa, gɛnɛ̨ pələ, ɲee huwalawala pələ, ɲee kwɔnwɔ̨n ɉu hvaŋą kɛnɛ̨ pələ, gbaɠala hvo ka lonnii diɛ, di hvo mɛ̨nįɠaa tii ka gɔlɔn, di hvo da kaa, da nwɔ kpalo mɛ̨nįɠaa;

³ ə mą kɛ gɛ mɛ̨nįɠaai ə gɛ Eziptə lɔi hu; mɛ̨nįɠaa kpɔ tii ə di laa Eziptə tɔɔmun ma da nwɔ lɔi hu nuą kəlee,

⁴ mɛ̨nįi ə naa Eziptə kɔ́kulááɠaa diɛ, di wɔ hooɠaa da di wɔ kɔ́ wotoloɠaa diɛ, ə veen gbɔ̨nɔ̨ gboloyá yali ə naa di mɛ̨i, ɓɛlɔwai di hvilɛn na ka pulu. Yai-Laa ə di nwun na pili kpɔ tɛ̨ɛ̨tɛ̨ɛ̨.

⁵ Mɛ̨nį lɛlɛɛɠaai ə gɛ kaa nɔi pun ɉu, ə lɛɛ ɉu ka həli la gɛɛnąą ŋɛ̨i ɓa,

⁶ Mɛ̨nįi ə naa Datan da Abiramə diɛ diɛi kɛ a Eliavə lonnii, a Rubɛn huwu hu nuą; diɛ ɓə lɔi laa ə ɓo, ə di mukpələ da di yəi bɛlɛ́n nuą. Da di wɔ pɛlɛ́ɠaai ə mą kɛ da nuąi kpɔ kɛ da diɛni di tɔɔ; yili ə kɛ tii Israɛlə lonnii kəlee ɲɛ̨i ɓa.

⁷ Ka ɲɛ̨i ə tɔɔ Yai-Laa kɛ mɛ̨nį kɛnɛ̨ɠaa tii kəlee hu.

⁸ Yili ɓa, díɓoɠaa kpɔ gáá dɛɛi ka pɔ háákələi, ka gəlee pɔ mɛ̨nį kɛ; yili ɓə pai huwalawalaa tɛɛi ka pɔ, ka yee yɛ tɛɛ nɔi tii ka káá li ɉu mą, kaa ɉon a kɔ́ kaa hee laa.

⁹ Nɔi tii Yai-Laa ə gwɛla ka nąnni diɛ yɛ kɛ, gaa pai dɛɛi ka pɔ da ka huwu pɔ, bələ ɓə ka káá pai yɛnɛ̨ɛ̨ kpɛɛ hvo mą hɔlɔɓoi la ɉu. Nɔi tii hu, kwɛį́n nwulɔ da ɲįnįyá da kɛ tɛɛi laa yɛ yá lon.

¹⁰ A tɛ̨ą! Nɔi tii ka káá lii ɉɔlɔɓoi a ka wɔɔ, hvo yɛ bələi Eziptə lɔi ka kulɔ ɉu, gaa la. Ka kɛɛ Eziptə lɔi hu, ka kɛi tíi kɛ kaa yá pu mą yɛ a kɛ lɔ a nɔwu yɛa.

¹¹ Nɔi ŋɛ̨i ka káá bələ pɔ, kaa ɓo bələ ɓa, kaa li heei ɉu, gaa a yéé da yéé lɔwai lɔi, tulɔ yɛ pu laa kɛlɛ-kɛlɛ.

¹² Nɔi tii kaa a lɔi yii Yai-Laa ka wɔ Yálái a mɛ̨i kaa kpɔ a mɔlɔɔ. Ə həɠə gwɛlan gbala tɔɔi lɔwai ɓa, ə lɛɛ ɉu naa ə kulɔ, Yai-Laa ka wɔ Yálái a mɛ̨i kaa.

¹³ A tɛ̨ąą! A kɛ ka ka wəli tɔɔ kpɔ a nɛlɛɛ nwɔ tɔ́nŋąą diɛ, yaai gáá háákələi naa həlii kaa, kaa Yai-Laa ka wɔ Yálái wɛli la kɛ, kaa tí mą a ka kwəi tɔ̨nɔ̨, a ka nwąnąąi kpɔ-kpɔɔ,

¹⁴ tulɔi mąąnɛ̨ɛ̨ ə pu ka wɔ lɔi ɓa, ŋą́ bu a bui lɔwai. Ka káá pai kɛi ka wɔ mɔ̨nun ɉɔlɔɓoi, da nɔɔ nįnɛ̨, ə mą kɛ, ka wɔ wulɔi.

¹⁵ Gaa pai kɛi kala tiliin dɛɛi ka wɔ taatɛlɛɛɠaai pɔ, kaa kɔ̨nɔ̨n mįi kaa pilɛ ɉu.

¹⁶ Ka gɛ a nɛlɛɛ, ka hvo nɛɛ laa di hvo ka kili ŋąąpɛlɛ; di hvo ka nwun ɉu lan; kaa li tɔɔi kaa tí haliɠaa diɛ; kaa kwɛli hvilɛn diɛ.

¹⁷ Ka yili kɛ tii, Yai-Laa nwɔ liiholi a ɓɛla ka mɛ̨i, ə yələkɔlɔn naa kpulu, tulɔ hva pu, ka wɔ hihɛn da hva kɛa lɛlɛ lɔi ɓa; ə lɛɛ, ka huwu yɛ pu a ɉukpuaa nɔi lɛlɛɛ tii Yai-Laa kaa dɛɛ ka pɔ ɉu.

¹⁸ Nwooɠaa ŋɛ̨i gáá dɛɛ ka pɔ, ka ganąn ka kili pɔ, ka ɲili ka yee kwąną, ka ganąn ka tɔwɔla, ə gɛ, ka hvo pa lɛ̨ą diɛ.

¹⁹ Ka ka lonnii kalan na, kaa mo diɛ kɛlɛ-kɛlɛ; ka kɛ heeni ka yəi bɛlɛ́n-oo, ka kɛ pələ pɔ-oo, ka kɛ hiɛ ɓa-oo, ka kɛ laani-oo, ka kɛ tɔɔni-oo,

²⁰ ka di pɛ̨ɛ̨ ka wɔ pɛlɛ́ɠaa gbon ma, ə mą kɛ, ka wɔ taa mąąkpɛ hii kponŋąą diɛ. Daaɠaa hu.

²¹ Bələ ɓə ka yíi hvólóɠaa da ka lonnii di wɛi a lamun la; lɔ yɛ bələi yələkɔlɔn gaa pai lamuni la lɔi mɛ̨i, nɔi ŋɛ̨i Yai-Laa ə gwɛla ka nąnni diɛ, yɛ gaa dɛɛi di pɔ ɉu.

²² Mąąhɔlɔɓo, dɔnŋaa ŋɛ̨i gaa dɛɛi ka pɔ, ka ka yee kɛ mą kpɔ a nelee, a ɲąą pɛliɛ, kaa Yai-Laa ka wɔ Yálái wɛli la kɛ, kaa lɛɛ la nwɔ pələɠaai kəlee mɛ̨i, kaa kanąn mą a woo tɔ̨nɔ̨ laa;

²³ Yai-Laa kaa pai nu huwuɠaa tii kəlee hu kalai ka ɲɛ̨i tɔwɔ. A nu huwu kpulu kɛnɛ̨ɛ tii, di hvaŋą kɛnɛ̨ di tɛɛ kaa; ka káá pai di wɔ lɔi kulɔi di yəi.

²⁴ Ɓɛɠaa lɔpee ka kɔ́wɔ kaa pai tɛɛi laa, nąą a lɛɛ a ka wɔɔ. Ə həɠə nɔi pun ɉɛɠɛɛ pələ, ə həli la Liban lɔi ɓa ɲələi pələ, ə həli Eufratə ɲálee ɓa voló həɠəi pələ, ə həli la voló tooi gboloyá ɓa; ka wɔ lɔi ka tii pai kɛi.

²⁵ Nui lɔpee ta hvo pai tɔɔi ka la. Mąąhɔlɔɓo, Yai-Laa kaa pai gɛi nuą diɛ ɲɔw kaa kɛɛnąą kəlee ɓa, di mąą yɛ kpɛlin ka tɔwɔ yɛ bələi ə naakwɛlanmo la kaa.

Lúwɔ́ da nɛ̨ŋɛ̨n naa

²⁶ Háákələi, gáá lúwɔ́ da nɛ̨ŋɛ̨n naa lɛi kaa, ya ka.

²⁷ Akɛ ka Yai-Laa ka wɔ Yálá nwɔ tɔ́nŋąąi gáá naai ka nwuɔ̨ háákələi ka di hon, lúwɔ́ a kɛ kaa.

²⁸ Ka ka nwun gulɔ Yai-Laa ka wɔ Yálái nwɔ tɔ́nŋąąi mu, bələi ŋɛ̨i gáá nɛi kaa háákələi, ka həɠə mɛ̨i, kaa hvilɛn haliɠaa pulu, diɛi di kaa a hɛnŋąąi ka hvo di kɔ́lɔn yiihu; nɛ̨ŋɛ̨n naa ɓə ka ɉɔlɔɓo.

²⁹ Nɔi tii ka káá lii ɉu, Yai-Laa ka wɔ Yálái a pa ka lɔi ɉu, kaa hee laa, volói tii, lúwɔ́ kaa pai kɛi Garizimə yee nwuɔ̨, nɛ̨ŋɛ̨n naa yɛ ɓo Ebalə yee nwuɔ̨.

³⁰ Ɲeeɠaa tii kaa Ɉurdɛn yá pulu, voló tooi pələ Kanaan nuą di wɔ lɔi hu, diɛi tii heeni Ɉurdɛn ɲa-ɓoloon bɔ, Gilgalə tənən ma, More wəla kwɛlɛ.

³¹ Ka hvo gaai, ka káá pai Ɉurdɛn yá teen ɉii, kaa li heei nɔi tii Yai-Laa ka wɔ Yálá kaa pai dɛɛi ka pɔ ɉu. Ka káá pai gɛɛnąą tii hɔlɔɓoi a ka kwɛlin, ka hee laa.

³² Ka tɔɔ a ka nwąnąi, dɔ́nŋąą, da nɔi mąą tɔ́nŋąąi kpɔ gáá dɛɛi ka pɔ háákələi, ka di pɔ yii ɓo.