Dutɛrɔnome 10 - Yálá laawoo hɛɓɛ (dc)

Yai-Laa ə nuą mąą hvaalɛɛ

¹ Nąąlɔwai, Yai-Laa yɛ mą́ą́: «Kwɛni ɓɛla hveelɛ haɠa lɔ, yɛ bələi dɔlɔɔɠaa tii di kɛ la. 'Tɛ́ ə́ həli mą́ą́ ɲee nwuɔ̨, ə́ kəhi ta pɛli a wulu,

² nwooɠaa tii gwɛni ɓɛla dɔlɔɔɠaa mɛ̨i, yaa tii ə́ ɉuyali, gáá pai pənəi ŋį́ di pɛ̨ɛ̨ nįnɛ̨ɠaa tii mɛ̨i; ə́ di laa gəhi lon ɉu.»

³ Ŋą́ kəhi lon bɛli a lɔwɔ wəlaan, ŋį́ kwɛni ɓɛla hveelɛ ta mąą haɠa, di kɛ pələ yɛ ɓo yɛ dɔlɔɔɠaa tii, ɛlɛɛ, ŋį́ tɛ a diɛ ɲee nwuɔ̨.

⁴ Dɔ́n bowi Yai-Laa ə di ɓo kaa, ɲee nwuɔ̨, nwɔ̨n nən ɉu a ɲąąkpɔn gɛnɛ̨ yələ, ə pənə ə di pɛ̨ɛ̨ gwɛni ɓɛlaɠaa mɛ̨i; yili pulu, ə pənə ə di tɛɛ bɔ́.

⁵ Yili pulu, ŋį́ pənə ŋį́ ɲee yɛɛ, ŋą di laa gəhi lon tii ŋį́ bɛli ɉu; di kaa lɔ nii laa yɛ bələi Yai-Laa ə mo la mą́ą́.

⁶ Israɛlə lonnii di həɠə Bene-Yaakan yálɔwa la, diɛ li Mosera. Nąą ɓə Aarɔn ə haa laa di noo laa. Aarɔn lon Eleazarə ɓə tɔɔ nąn dɔɔi a ɉaláá laa həli mun.

⁷ Di həɠə laa, də li Gudgoda, di həɠə laa, də li Yotvata, tɛɛ yá lɔi hu.

⁸ Nąąlɔwai ɓə Yai-Laa ə Levi nwɔ pɛlɛ́i həɠə la ɉu, Yai-Laa nwɔ mįnɛ̨ pɛlɛ́ lon kpəŋə mɛ̨nį ɓa; diɛ tɔɔ Yai-Laa lííla, diɛ ɉaláá kulɔ, diɛ lúwɔ́ too naa hu, yɛ bələi lɔ di kaa gɛi la yiihu.

⁹ Yili mąą mɛ̨nį ɓə gɛ, Levi huwu hvo lɔi hɔlɔɓo la a nwɔɔ, yɛ di ɓəlaa. Yai-Laa ɓə gaa a di kwɛlin, yɛ bələi Yai-Laa ka wɔ Yálái ə mo la diɛ.

¹⁰ Ŋą́ hvóló pow nąąn da kpinį pow nąąn gɛ lɔ nwɔ̨nɔ̨ ɲee nwuɔ̨, yɛ bələi ŋą́ gɛ la dɔlɔɔ tɔlɔɔ yələ. Yai-Laa ə nwəli tɔɔ nwɔ̨nɔ̨ nwóó ɓa; Yai-Laa hvo hvaa li mą, hvo ka nwun napili.

¹¹ Yai-Laa ə kɛ mą́ą́: «'Ə́ muhəɠə! 'Lí nuą pɔ, mo diɛ di hvilɛn bələ ɓa də li, nɔi ŋį́ naakwɛlanmo di nąnni diɛ, gɛ kɛ di kaa heei laa, di lɔ ɉu di hee laa.»

¹² Yii hu kɛa, Israɛlə lonnii, ə həli kaa! Lə ɓə Yai-Laa ka wɔ Yálái kaa bɔ ka gɛ mą? Mɛ̨nįi ɲɛ̨i kaa dɔwɔ, ya ɓaa: ka ɲɔw Yai-Laa ka wɔ Yálái ɓa, a, lɛɛi ka mo nwooɠaa pulu; kaa Yai-Laa ka wɔ Yálái wɛli la kɛ, kaa tí mą a kwəi kwələ laa, a ka wɔ huwalawala kəlee, da ka wɔ yɛnɛ̨ɛ̨ kɛ pələ kəlee.

¹³ Ka Yai-Laa nwɔ tíɓoɠaa kɛ, ka nwɔ tɔ́n nwooɠaa hon; yii gáá dɛɛi ka pɔ háákələi ka ɓalo mɛ̨nį ɓa.

¹⁴ Yai-Laa ka wɔ Yálái ɓə yələkɔlɔn da yələkɔlɔn mɛ̨i pələ kaa a nwɔɔ, ə mą kɛ, lɔi da ɉu hɛnŋąą kəlee.

¹⁵ Yaan, ka nąnni lɔ ɓə Yai-Laa ə kanąn diɛ, yɛ di wɛli la kɛ, ɛlɛɛ, haai di mo, di huwu lɔ ɓə ə ɉəɠə ɉu a niiɓa nu huwu, nu huwuɠaa kəlee lɔwai, ya ɓaa kaa; yɛ bələi gu kaa gaai la háákələi.

¹⁶ Yili ɓa, ka ka kpɔɔ lɛɛ kan Yai-Laa ka wɔ Yalai yee kɔ́nma, ka hvo tɔɔ na.

¹⁷ Mąąhɔlɔɓo, Yai-Laa ka wɔ Yálái ɓə gaa a yáláɠaa di wɔ Yálá; a tɔɔɓɛlaa di wɔ Tɔɔmun; Yálá yii gɛnɛ̨, vaŋą kɛnɛ̨ mąą ɲɔuwɔ, ɉaŋąą, di hva lɔ gwəi.

¹⁸ A təli lon da kalanen di wɔ tɛ̨ąą kulɔ pɔ̨nɔ̨ ŋą, a nwɛ̨ą wɛlila kɛ, yɛ kɔ̨nɔ̨n dɛɛ bɔ da həɠə.

¹⁹ Kaa kpɛli mąn, ka nwɛ̨ąą wɛli la kɛ. Mąąhɔlɔɓo, kaa ta kɛ a nwɛ̨ąą Eziptə lɔi hu.

²⁰ Yai-Laa ka wɔ Yálái ɓə mąąnɛ̨ɛ̨ ka ɲɔw mą, kaa tí mą, ya ɓə ka ka kwɛla a naa.

²¹ Ya ɓə mąąnɛ̨ɛ̨ ka dɛnɛ, ka wɔ Yálá li. Mɛ̨nį kpɛa kpɛaai, da mɛ̨nį mąą ɲɔuwɔɠaai ə gɛ ka mąą mɛ̨nį ɓa, ka kpinįi ka gaa, a ka ɲɛ̨ikɔw, ya ɓə di kɛ.

²² Ɛlɛɛ, ya pa, ka nąnni di hvo kɛ tɛɛ li nu pow mɛ̨ihveelɛ hu, ɓɛlɔwai di kɛi li la Eziptə lɔi hu; ya ka ŋɛ̨i Yai-Laa aa ka kpulu hu kɛnɛ̨, yɛ yələkɔlɔn ɉu pɛmɛ̨lɛ̨n-gɔwɠaa.