Danîa 8 - Yálá laawoo hɛɓɛ (dc)Daniɛlə ə ɓɛlaa hilɛ da ɓoli hilɛ kaa hįi 1 Tɔɔmun Bɛlsasarə nwɔ tɔɔlaa gwɛlan ɉaaɓa lɔwai, ɲą́ą́ Daniɛlə, ŋą́ hįi takpɛli kaa nwɔ̨nɔ̨. 2 Ɉįi tii ŋą́ gaa, ə kɛ yɛ ŋą́ kɛ Elamə lɔi daa lee hu yii da kɛ mą: Susə. Ɉiin tii hu, ə kɛ yɛ ŋą́ kɛ Ulai ɲa lee kwɛlɛ. 3 Ŋą́ ɓɛlaa hilɛ ta kaa tɔɔni ɲa leei tii kwɛlɛ, mįnɛ̨ yɛ ɓo nwuɔ̨ hveelɛ. Mįnɛ̨ hveelɛ tii kwɛakwɛai kɛ, kɛlaa, dɔ̨nɔ̨ kwɛai kɛ dɛɛ mɛlan ma, gwɛa laa mun tii ɓə lɛɛ pulu yɛ tɛ. 4 Ŋą́ mɛlaa hilɛi tii kaa, yɛ nwun bili voló tooi pələ, ɲələi pələ da ɉɛɠɛɛ pələ, huwɔ lɔpee ta hva kɛ pɛli tɔɔi dɔwɔ, nui lɔpee ta hvo kɛi pɛli hɛn da kulɔi ɲəi. Yii a nɛɛ mą, ya ɓə a gɛ, ə lɛɛ, yɛ kɛnɛ̨. 5 Ɲá lɛɛ lɔ mɛlaa hilɛi tii kaai, ɓolu hilɛ ta ə həɠə voló tooi pələ, yɛ gilɛ həɠə kpɔ kɛnɛ̨, yɛ ɓo yɛ gɔwɔ a wala kɛ heei nɔi ɓa. Molu hilɛi tii, mįnɛ̨ ə kɛ nwuɔ̨ tɔ̨nɔ̨ gbən, a kaakaa hɛn, yɛ ɓo tɔɔni ɲɛ̨ikɔw hveelɛ lɔwai. 6 Mɛlaa hilɛi ŋɛ̨i ləi ŋą gaa tɔɔni ɲa lee kwɛlɛ, molu hilɛi tii ə pa ə tɔɔ nííla, ə kpuluun yɛ pa mɛlaa pɔ kpɔ a vaŋa kɛnɛ̨. 7 Ŋą́ gaa yɛ lɛɠɛ mɛlaa hilɛi tii ɓa a liikələn gwəi, ə kɛlɛ mɛlaai tii hu, ə mįnɛ̨ hveelɛi yali, hvaŋą hvo kpɛli lɛɛ mɛlaai tii yəi yii a pɛli kɛ tɔɔi la nííla. Molui tii ə mɛlaa too nɔi ɓa, ə ɓɔlɔn mɛ̨i, nu ta hvo hɔlɔɓo yii a pɛli ə mɛlaai tii kulɔ ɲəi kɛ. 8 Molu hilɛi tii ə kɛnɛ̨ laa hɔlɔɓo, kɛlaa, ɓɛlɔwai ɲee ə walawala la, mįnɛ̨ kɛnɛ̨ tɔ̨nɔ̨i tii kɛ nwuɔ̨, ə yali. Mįnɛ̨ nąąn dakpɛli ə pənə ə tɔɔ, yiliɠaai diɛ ɓo a kaakaa hɛn. Dɔ̨nɔ̨ ə tɔɔ voló həɠəi pələ, dɔ̨nɔ̨ ə tɔɔ voló tooi pələ, dɔ̨nɔ̨ ə tɔɔ ɲələi pələ, dɔ̨nɔ̨ ə tɔɔ ɉɛɠɛɛ pələ. 9 Mįnɛ̨ nąąn tii, dɔ̨nɔ̨ maapoo ə tɔɔ mą a mįnɛ̨ logolo, mįnɛ̨ lon tii ə kɛnɛ̨ yɛ yɛɛ ɉɛɠɛɛ pələ, yɛ li voló həɠəi pələ, ə lɛɛ yɛ li nɔi lɛlɛɛ hu pələ. 10 Mįnɛ̨ lon tii ə kwɛa yɛ tɛ yələkɔlɔn ma. Tɛi tii ə mo laa, ə yələkɔlɔn ɉu hɛnŋaa bələ tɔ̨nɔ̨ da pɛmɛ̨nɛ̨n gɔw bələ, tɔ̨nɔ̨ kulɔ ə bu nɔi ɓa, ə tɛ di mɛ̨i. 11 Mįnɛ̨ logoloi tii, ə tɛ kpɔ ə həli yələkɔlɔn ɉu hɛnŋaa nwun nąmu ɓa. Ə lɛɛ, ɉaláá hɛn ŋɛ̨i da naa həli a hvoló kəlee, mįnɛ̨i lon tii ə yili naa həɠə, ə Yálá hee pɛlɛ́i ŋɛ̨i gaa ɓɛ lɔi mɛ̨i, ə muhəɠə naa ɓa. 12 Yálá nwɔ nu kpului tii da ɉaláái ŋɛ̨i di kɛi gulɔ a hvoló kəlee, di lɛɛ mįnɛ̨i tii yee mu, nwąnąlɔi tii ə kɛi gulɔ mąą mɛ̨nį ɓa. Mįnɛ̨i tii ə tɛ̨ą too lɔi ɓa, ə yeetɛɛmąą hɔlɔɓo gɛ mɛ̨nįɠaa hu. 13 Ŋą́ malaka ta woo mɛ̨n, malaka yii ŋɛ̨i kɛi mɛ̨nį ɓo, yɛ yili ɓa: «Ɉaláá ŋɛ̨i da kɛi gulɔi a yələ kəlee da ɉaláá kulɔi, ɓɛi kɛɛ kalamun nwɔ nwąnąlɔ aa hee naa mɛ̨i, da Yálá nwɔ nu kpului ŋɛ̨i tooni nɔi ɓa diɛ bɔlɔn mɛ̨i, mįnɛ̨ lɔwai ɓə yili kaa pai kpɛlai la ma?» 14 Malaka dɔlɔɔi tii ə nwoo ŋaapɛ̨nɛ̨ yɛ mą: «Yələwulii da yələwala waa hveelɛ pulu nwun ɉaaɓa tɛɛ pulu ɓə, di kaa pai pənəi di ɉaláá kulɔi pɛli la.» Daniɛlə nwɔ hįi veelɛnąą ɉukulaa 15 Ɲą́ą́ Daniɛlə, ɉįi tii ŋą́ gaa, ŋą́ kɛ bɔ ŋą́ mukulaa kɔ́lɔn, ŋaaɓa, ŋą́ nu ta kaa tɔɔni nííla, 16 ŋą́ nu ta woo mɛ̨n ɲa lee kɛnɛ̨i tii da kɛ mą Ulai ɉamai yɛ tomą, yɛ kɛ mą: «Gabriɛlə ɉįi tii hukulɔ nui tii ɓa.» 17 Gabriɛlə ə lɛɠɛ mą́ą́, ɓɛlɔwai ə kɛi mąą lɛɠɛ la mą́ą́, ŋą́ ɲɔw kpɔ kɛnɛ̨, ŋą́ pɛlɛ nɔi ɓa gɔwɔ mu. Yɛ mą́ą́: «Daniɛlə, pələi mąn kaa la a nu, mąąnɛ̨ɛ̨ ə́ gbaɠala kaa yɛ́ diɛ, yɛnɛ̨ɛ̨ ɲąąkpɛɛi lɔwai mɛ̨nį ka ŋɛ̨i ə́ gaa.» 18 Ɓɛlɔwai tii ə kɛi hvaa la bɔ́, ŋą́ kɛ pɛlɛ ni nɔi ɓa, gwə́i pilɛɛ mą́ą́. Nąąlɔwai, ə ɲee too ɉú, ə muhəɠə ə dɔɔ ɓɛi tii ŋą́ kɛ laa. 19 Yili pulu, yɛ mą́ą́: «Mɛ̨nii pai kɛi ɓɛlɔwai Yálá nwɔ líiɲąnwąną kaa pai kpɛɛi la, gáá nɛi yɛ́. 20 Mɛlaa hilɛi tii kɛ ə́ gaa nįnɛ̨ yɛ ɓo nwuɔ̨ hveelɛi, mįnɛ̨ hveelɛi tii kaa a tɔɔɓɛlaa hveelɛ, dɔ̨nɔ̨ kaa a Medi tɔɔlaa, dɔ̨nɔ̨ yɛ ɓo a Pɛrsə tɔɔlaa. 21 Molu hilɛi tii ə́ gaa, gaa a Grɛkə tɔɔlaa. Mįnɛ̨ tɔ̨nɔ̨i tii kɛ tɔɔni ɲəi kɔ́w lɔwai, yili kaa Grɛkə tɔɔlaa hutɔɔmun dɔlɔɔ. 22 Ɓɛlɔwai mįnɛ̨ tɔ̨nɔ̨i tii ə yali la, mįnɛ̨ nąąn tii tɔɔ nwuɔ̨ a dɔ̨nɔ̨i tii pɔɔi, gaa a tɔɔlaa nąąn, yii pai kulɔi nɔi tɔ̨nɔ̨i tii hu. Kɛlaa, di wɔ huwalawala hva kɛ yɛ mįnɛ̨ tɔ̨nɔ̨i tii nwɛi. 23 Mįnɛ̨ nąąn tii di wɔ tɔɔlaai kpɛɛi lɔwai ɓə, nɛ̨ŋɛ̨n ɉəɠə nuą da di kɛ nɛ̨ŋɛ̨n naahvɛɛ la. Nąąlɔwai, tɔɔmun da a muhəɠə, ɉuɲąŋą kənə nwəlɛɛ nuą ɓowoi. 24 Nwɔ huwalawala kaa pai kɛnɛ̨i, kɛlaa, ɉuwalawalai tii hva kulɔ gbɔwɔ kpinį hu. Gaa pai kɛi kɛɛ kalai, yii nuą kili hva kɛ mą. Yi lɔpee a ɲee too ɉu, a kɛ, gaa pai huwalawala nuą tamąą tooi, ə lɛɛ, ɲee ə tɛɛ Yálá nwɔ nuąi diɛ. 25 Gaa pai kɛi a ɲɛlɛɛ mɛ̨nįɠaa kɛi, yɛ pɛli mą da kpɛliɠaa ɓowoi. Nwɔ huɲąŋą kɛnɛ̨ laa hu, gaa pai nu tamąą paai, diɛi gaa di wɔ kwəi di mąą kwənąn ŋaai, yili pulu, gaa pai kɔ́ pɛlɛi tɔɔɓɛlaa di wɔ Tɔɔmun ma. Nąąlɔwai ɓə gaa pai tooi la, nui lɔpee ta laa hva kɛ ɉu. 26 Ɉįi tii ə́ gaa yɛ hvilɛn na yələ wuliiɠaa da yələwalaɠaa diɛ, yili kaa a tɛ̨ą. Ə́ wɛi, mąąnɛ̨ɛ̨ ə́ mɛ̨nįɠaai tii lɛɛ ə́ kwəi, mąąhɔlɔɓo, vilɛn ŋaai mɛ̨nį hu kwɛa ɓa, yii gaa pai kɛi.» 27 Ɲą́ą́ Daniɛlə, ŋą́ Yələ tamąą kɛ, ɲɔ̨n yɛ ɓo mą́ą́, ə lɛɛ vįikpɛɛ. Vili tɛɛ pulu, ŋą́ pənə ŋą́ li gɛ́ kóló ɓa, yii tɔɔmun ə dɔ́ɔ́ ma. Ɉiin tii ŋą́ gaa, nwɔ kwəi pili maa ə kɛ mą́ą́, və́ kpɔ kɛi mukulaa kɔ́lɔn. |