Danîa 7 - Yálá laawoo hɛɓɛ (dc)

Daniɛlə ə huwɔ nąąn gaa hįi hu

¹ Bɛlsasarə ŋɛ̨i kɛ a Babilonə tɔɔmun, nwɔ tɔɔlaa gwɛlan dɔlɔɔ hu, Daniɛlə ə hįi kaa, ɓɛlɔwai ə kɛ la laani ɲəi gbinŋa, mɛ̨nį walawalaɠaai kɛ ɉįi tii hu, ə bɛ̨ɛ̨, ə ɉukulɔ, yɛ diɛ:

² Ɓɛlɔwai ŋą kɛ la laani ɲəi gbin ŋą a kpinį, ŋą́ hįi kaa. Hvaŋą ə həɠə yɛnɛ̨ɛ̨ nwoɔo nąąn ɉu, yɛ tɛɛ, yɛ li gboloyá ŋą, yɛ ɲa kɛ takpa takpa.

³ Huwɔ kpɛa-kpɛa nąąn di kulɔ gboloyá hu, di kɛ pələ kulaa gee mu.

⁴ Dɔlɔɔ tii, ə kɛ yɛ: Yala, goon ɲɛ ɓo mą yɛ kuwɔ, ɲɛ̨i ə lɛɛ lɔ ma, di goon gulɔ ma, ɉuwɔi tii ə haŋą ə tɔɔ gɔwɔ hveelɛi mɛ̨i yɛ nu, nu kili ə nɛɛ mą ə too ɉu.

⁵ Ŋą́ veelɛ kɛɛnąą kaa, yɛ ɓo yɛ: Ursə, viyən ŋąą ɓələ tɔ̨nɔ̨, huwɔ kəŋə kpɛa kɔ́w haaɓa ə ɓo ɲin nɔwai. Woo ta ə tɔɔ, yɛ mą: «Ə́ muhəɠə, ə́ huwɔ tamąą mɛɛ.»

⁶ Yili pulu, ŋą́ ɲɛ̨i hee lɔ nwɔ̨nɔ̨, ŋą́ huwɔ takpɛli kaa, yɛ ɓo yɛ kwɛ́li, goon yɛ ɓo bulu nąąn, yɛ nwɛ̨nį. Ɉuwɔ tii nwun galən ə kɛ ŋą nąąn, di yeetɛɛmąą tɛɛ bɔ.

⁷ Yili pulu, ɉįi tɔ̨nɔ̨i tii hu, ŋą́ ɉuwɔ naa gɛɛ naa kaa, maa ɲɔwɔ kpɔ kɛnɛ̨, ɉuwalawalaa ɲee tɛɛ mɛlaa diɛ, ɲin ə kɛ a kwɛli, gbɛa-kpɛa, ə kɛi naa mįi, yɛ hɛnŋaa huwɔɔ, yiiɠaai lɛɛ, ə tɛ gəlee mɛ̨i. Nwɔ kɛ pələi kulaa kɛ, mɛlaa haaɓai tii di wɛi mu, mįnɛ̨ yɛ ɓo nwuɔ̨ pow.

⁸ Ɲɛ̨́i ə lɛɛ lɔ ɉuwɔi tii mįnɛ̨ɠaa diɛ, nogolo ta yɛ tɔɔ di lɔwai. Ɓɛlɔwai nogoloi tii ə kɛi tɛ la, ɉuwɔi tii mįnɛ̨ haaɓa ə kulɔ ɉu. Ɉuwɔ mįnɛ̨ logoloi ŋɛ̨i tɛ a nįnɛ̨, ɲɛ̨ikɔw ə kɛ mą yɛ nu, naaləi yɛ ɓo mą, yɛ mɛ̨nį kpɛa-kpɛa ɓo.

Yálá nwɔ kitii

⁹ Ɲɛ́i ə lɛɛ lɔ laa, di tɔɔ kpəlinŋaa hvilɛn, hulɔgolo pɔlɔ-pɔlɔ. Ta ə pa ə hee ɉu. Ɉulɔgoloi tii mąą həɠə kwəlɛɛ kɛ yɛ wee kwələ, nwun nəɠa yɛ ɓo yɛ yee hunwɔ. Nwɔ tɔɔ kpəlin yɛ ɓo yɛ nwɔ̨n nən. Gɔwɔɠaa diɛ ɓo yɛ nwɔ̨n dəŋą.

¹⁰ Nwɔ̨n ə kɛi kulɔ nííla, yɛ tɛɛ yɛ, ya lee, nwɔ kɛlaɠaa di kɛ a nu waa nwun damaa, nu waa nwun damaa diɛ ɓo gwɛlɛ, kiti tee nuą di pa di hee, hɛɓɛ́ɠaa laa ə ɓo.

¹¹ Ŋą́ lɛɛ lɔ nwɔ̨nɔ̨ naa kaai, nwoo kpɛa-kpɛai tii ɉuwɔ mįnɛ̨i ə kɛi mo mąą mɛ̨nį ɓa, ɲɛ́í ə lɛɛ ɉuwɔi tii ɓa, di baa, di bowa too nwɔ̨n ɉu, ə gɛ, ə kələn.

¹² Ɉuwɔ haaɓa yiiɠaai tii, di di wɔ huwalawala kulɔ di yəi, kɛlaa, di di yii Yələ ta kɛ mą, ə lɛɛ la ɉu, lɔwai ta yɛ ɉəli.

¹³ Ɉįi tɔ̨nɔ̨i tii hu lɔ nwɔ̨nɔ̨, ŋą́ hɛn da kaa ə ɓo yɛ hulɔnu lon, yɛ ɓo tulɔ kpiliɠilin mɛ̨i, yɛ pa. Pai tii ə mo, ə mąą lɛɠɛ ɉulɔgolo pɔlɔ-pɔlɔ tii ɓa, ə lɛɛ, di mąą lɛɠɛ ma.

¹⁴ Di yeetɛɛmąą kɛnɛ̨ laa, da tɔɔlaa tɛɛ bɔ. Híín lɔpee gəlee, hįi wooi lɔpee gəlee ɓo nuą, di kɛ a nwɔ kóló kɛ nuą. Nwɔ heeɓo laa ə kɛ a yii kpɛɛ hvo mą, yii hva tɛɛ, nwɔ tɔɔlaai kala hvo mą a yələ kəlee da nwɔɔ.

¹⁵ Ɲą́ą́ Daniɛlə, gwə́i ə pili mą́ą́ kpɔ kɛnɛ̨, ɉįi tii ŋą́ gaa mąą mɛ̨nį ɓa.

¹⁶ Nuąi tii kɛ laa, ŋą́ mą́ą́ lɛɠɛ dɔ̨nɔ̨ ɓa, ŋą́ mąąnin gɛ, gɛ́ mą: «Mɛ̨niɠaai ŋɛ̨i ŋą́ gaa, mukulaa ɓaa lə?» Ə mo mą́ą́ yɛ mą́ą́:

¹⁷ «Ɉukulaa ɓaa: Ɉuwɔ kpɛa-kpɛa nąąn tii, yili kaa a lɔi mɛ̨i tɔɔɓɛlaa nąąn, diɛi di kaa pai di muhəɠəi.

¹⁸ Kɛlaa, Yálá Yii Gaa Hɛn Gəlee Nwun Mɛi, nonnii kaa pai tɔɔlaa həɠəi, di wɔ tɔɔlaai kpɛɛ hva kɛ ma.»

¹⁹ Yili pulu, ŋą́ kɛ bɔ ɉuwɔ nąąn gɛɛnąąi tii mąą mɛ̨nį kulaa mɛlaa di wɛi mu, ŋą́ mąą mɛ̨nį ɉukulaa kɔ́lɔn, yaai tii kɛ maa ɲɔwɔ, ɲin yɛ ɓo a kwɛli, ɲee ɲąnin yɛ ɓo a ɓala kwɛli, yɛ naa mįi, yɛ hɛnŋaa huwɔɔ, yii kpəli woloi lɛɛ, yɛ ɓɔlɔn mɛ̨i.

²⁰ Ŋą́ kɛ nwɔ̨nɔ̨ bɔ ŋą́ mɛ̨nį ta kɔ́lɔn yɛ hvilɛn na ɉuwɔi tii mįnɛ̨ kaa pow ma. Ə lɛɛ, dɔ̨nɔ̨i ŋɛ̨i tɔɔ nwun ma, ɉaaɓa diɛ too, ə lɛɛ, mįnɛ̨ tɔ̨nɔ̨i tii ɲɛ̨ikɔw ə kɛ mą yɛ nu, laaləi yɛ ɓo mą, yɛ woo kpɛa-kpɛaɠaa ɓo, yai kɛnɛ̨ ə tɛɛ mɛlaa diɛi.

²¹ Ɲɛ̨́i ə lɛɛ mįnɛ̨i tii ɓa, ə kɔ́ pɛlɛ Yálá nwɔ nuą diɛ, ə yeetɛɛmąą kɛ di mɛ̨i,

²² ə lɛɛ la ɉu, ɉulɔgolo pɔlɔ-pɔlɔ tii ə pa, Yálá yii gaa hɛn gəlee nwun mɛ̨i, ə nwɔ nuą da mįnɛ̨i tii ni, di lɔwai tɔɔ. Nąąlɔwai tii hu ɓə, Yálá nwɔ nuą di dɔɔlaa həɠə la.

²³ Nui tii ə mo mą́ą́, yɛ mą́ą́: «Ɉuwɔ nąąn gɛɛnąąai tii, gaa a tɔɔlaa ta, yii gaa pai heei lɔi mɛ̨i, hva kɛ yɛ dɔɔlaa yiiɠaai tii. Dɔɔlaai tii kaa pai lɔi mɛ̨i kəlee ŋąą woloi, ə gɔwɔ hiɛ ɉu, ə ɉu huwɔɔ.

²⁴ Mįnɛ̨ pow tii, gaa a tɔɔɓɛlaa pow, yiiɠaai pai di muhəɠəi dɔɔlaai tii hu. Tɔɔlaa takpɛli kaa pai muhəɠəi yili pulu, yii gɛ pələ hva kɛ yɛ dɔlɔɔɠaai tii, gaa pai tɔɔɓɛlaa haaɓa tooi.

²⁵ Gaa pai kɛi woo ɲɔ̨n moi a Yálá Yii Gaa Hɛn Gəlee Nwun Mɛi naa, yɛ Yálái tii nwɔ nuą laanɔ̨nwɔ̨ɓo, gaa nwɔ kwəi a pɛli pai kɛi lɔwai mąąhvalin ɉii, da Yálá nwɔ tɔ́n. Ə lɛɛ, di kaa pai Yálá nwɔ nuą tɛɛi bɔ, di kwɛlan ɉaaɓa da gbulɔ kɛ ɲee mu.

²⁶ Yili pulu ɓə Yálá kaa pai giti teei la, ə nwɔ yeetɛɛmąą kulɔ ɲəi, ə lɛɛ, ə nwun na pili.

²⁷ Tɔɔlaa, heeɓolaa, kɛnɛ̨ laa, da tɔɔlaaɠaai kpɔ di kaa lɔi mɛ̨i, di kaa pai gəlee tɛɛi Yálá Yii Gaa Hɛn Gəlee Nwun Mɛi nwɔ nuą pɔ. Dɔɔlaai tii kaa pai kɛi a tɔɔlaa yii kpɛɛ hvo mą. Huwalawala hɛnŋaa kəlee kaa pai kɛi nwoo mu.»

²⁸ Yili ɓə kɛ a nwɛlɛɛ tii kpɛlai. Ɲą́ą́ Daniɛlə, gwə́i ə pili mą́ą́, mą́ą́ yɛ kpɛlin, ɲɛ̨́i lai maa ə hvalin gáá nwooɠaai tii kəlee naa kili lɛɛi ŋą́.