Danîa 6 - Yálá laawoo hɛɓɛ (dc)

¹ Medi mun ŋɛ̨i da kɛ mą Dariusə, di gɛ a tɔɔmun, ɓɛlɔwai gaa kwɛlan ə kɛ la pow mɛ̨ida kɔ́w hveelɛ.

Di Daniɛlə pili yala kwənąn ɉu

² Dariusə ə giliŋąhiɛ yɛ diɛ, gaa nu kpɛa-kpɛa nwun dɔ̨nɔ̨ ɲee hveelɛ heei nwɔ tɔɔlaai hu, nɔi nąą kəlee.

³ Ə nwun nąmįnąa haaɓa hee nuąi tii kəlee nwun na. Nu haaɓai tii dɔ̨nɔ̨ ɓa kɛ a Daniɛlə. Daniɛlə tii ɓə mąąnɛ̨ɛ̨ kɛ nu kpɛa-kpɛaɠaai tii kəlee diɛ pa diɛ nɔi mɛ̨nįɠaa hu lɛ mą, ə gɛ, nuą di hvo pa kɛ tɔɔmun ɲəi hɛnŋaa kalai.

⁴ Daniɛlə kpinį tii, nwɔ mɛ̨nį kɔ́lɔn ŋąą tɛɛi kɛ nɔi nwun nąmįnąa da nɔi nu kpɛa-kpɛaɠaa diɛ, mąąhɔlɔɓo, gili kɛnɛ̨i kɛ, ə lɛɛ, tɔɔmun ə giliŋąhiɛ yɛ: ə ɉee nwɔ lɔi kəlee nwun na.

⁵ Nąąlɔwai, nwun nąmįnąa da nɔi nu kpɛa-kpɛaɠaa, di kɛi Daniɛlə hɔn gwɛli ma, nɔi nwɔ tɔɲaa hu. Kɛlaa, di hvo dɔ̨nɔ̨ kpɛli kaa yii Daniɛlə a gɛ a ɲɔ̨nwɔ̨ɔ̨. Mąąhɔlɔɓo, Daniɛlə ə kɛ a woo tɔ̨nɔ̨ Nąmu, ə lɛɛ, hvo kɛi mɛ̨nį lɔpee ta viikpɛɛ kulɔ, hɔn, və kɛ mą.

⁶ Nuąi tii di mo kɛa, diɛ mą: «Gu hvo pai hɔn nɔpee ta kaa Daniɛlə ɓa, hvo kɛli, gu ɉɔn gwɛli ma nwɔ Yálái nwɔ tɔ́n ɉu.»

⁷ Yili pulu, nwun nąmįnąa da nɔi nu kpɛa-kpɛa di lɔ di kee hu, də li tɔɔmun bɔ, diɛ mą: «Tɔɔmun Dariusə, ə́ yii ə kwɛa, kɛi a mo tii Yálá ə kɛ!

⁸ Ə́ wɔ tɔɔlaai hu, nwun nąmįnąa kəlee, ɉɛn gɔw laaikɛ nuą kəlee, da nɔi nu kpɛa-kpɛa, dɔɔmun gwɛlɛ nuą, da guvɛnɛɛliɠaa kəlee, daa pɛli ɉu diɛ: Ə́ hvaa mą, tɔ́n ə tɔɔ, hvóló pow haaɓa kuu mu, di noloɓo nɔi nąą kəlee, nui lɔpee ta hvo kwɛli hvilɛn ala takpɛli ɓa, ə mą kɛ nu ta ɓa, a kɛ yɛ́ tɔɔmun yɛ́ hvəi. Nui a wala dɔ́n tii hon, di pili ɲala kwənąn ɉu.

⁹ Yii hu, oo tɔɔmun, ku kaa bɔ mɛ̨nį ŋɛ̨i ku mo, ə́ hvaa mą, ə́ ə́ yee pɔɔ too ɉu, ya ɓə a gɛ, ɉəɠə maa hva kɛ mą; yɛ pələi Medi nuą, da Pɛrsə nuą, di wɔ tɔ́n gaa la, yii hva həɠə mą.»

¹⁰ Nwoo tii ɓoɔ pulu, tɔɔmun ə hvaa mą, ə ɲee pɔɔ too dɔ́n tii hu.

¹¹ Ɓɛlɔwai Daniɛlə ə gɔlɔn na, yɛ diɛ, daa dɔ́n tii tɔɔ, tɔɔmun aa ɲee pɔɔ too ɉu, Daniɛlə ə tɛ ɲəi ɲələi pɛlɛ hu, ə lɔ ɲəi bɛlɛ́n, nwɔ pɛlɛ́i vinɛɛtɛlɛ ə kɛ Ɉerusalɛmə taa tənən ma pələ. Yɛ pələi a gɛ la a bɔlɔ, hvóló tɔ̨nɔ̨ mu, yɛ Yálá hvɛli gee mɛ̨i haaɓa, ə lɔ, ə pu gbəlin na, yɛ nwɔ Yálái hvɛli, yɛ mąątɛ̨nɛ̨ yɛ pələi a gɛ la a bɔlɔ.

¹² Nąąlɔwai, nuą tii di bɛlɛ gee ɓa, di lɔ Daniɛlə yəi bɛlɛ́n, di gaa, yɛ nwɔ Yálái hvɛli, yɛ mąąnɛ̨ɛ̨.

¹³ Yili pulu, də li, dɔ́n ŋɛ̨i da tɔɔmun ni di dɔɔ, di pənə di ɉu lɛ tɔɔmun ma, diɛ mą: «Kuɔ tɔɔmun, kɛlɛi yɛ́ kpinįi ɓə ə́ yee pɔɔ too dɔ́n ŋɛ̨i hu-e! Yaai moɔi yɛ kɛ mą: ‹Holo pow haaɓa kuu mu, nui a kwɛli hvilɛn ala takpɛli ɓa, a wala kɛ tii nu ta ɓa, akɛ yɛ́ tɔɔmun yɛ́ hvəi, da mąą nu pili yala kwənąn ɉu?›» Tɔɔmun ə di woo ŋąąpənə, yɛ diɛ: «Pələ ɓə gu mo la. Gaa a Medi nuą da Pɛrsə nuą di wɔ tɔ́n, hva həɠə mą.»

¹⁴ Di pənə nwɔ̨nɔ̨ di mo tɔɔmun ma, diɛ mą: «Nuwɔɠaa ŋɛ̨i di həɠə a diɛ Ɉuda lɔi hu, dɔ̨nɔ̨ kaa di lɔwai, diɛ kɛ naa ɓaa: Daniɛlə; oo Tɔɔmun, hvo ə́ woo kaa li a mɛ̨nį walawala, hvo dɔ́n ɉon ni. A kɛ Yálá hvɛlii gee mɛ̨i haaɓa hvóló tɔ̨nɔ̨ kuu mu.»

¹⁵ Nwooi tii mɛ̨n tɔɔmun ə mo, ə hee kpɔ ɉu kɛnɛ̨, ə giliŋąhiɛ yɛ ə Daniɛlə kulɔ mɛ̨nįi tii hu, ə həɠə nąąlɔwai ɓa, ə lɛɛ la ɉu, hvóló ə too, ə kpaalə kəlee kwɛli, ə gɛ, ə Daniɛlə nwun mąąɓo.

¹⁶ Kɛlaa, nuąi tii, di bɛlɛ nwɔ̨nɔ̨ gee ɓa, di pa diɛ tɔɔmun ma: «Oo Tɔɔmun, ə́ kili kaa ɉu yɛ́ diɛ, Medi nuą da Pɛrsə nuą di wɔ tɔ́n, tɔɔmun a ɲee pɔɔ too ɉu, hva kɛa ɉəɠə mą.»

¹⁷ Nąąlɔwai, tɔɔmun ə mo, yɛ diɛ di pa a Daniɛlə, ə gə, di bili ɲala kwənąn ɉu. Kɛlaa, tɔɔmun ə mo Daniɛlə ɓa, yɛ mą: «Ə́ wɔ Yálái ɲɛ̨i ya kwɛli hvilɛn mą a hvaŋąlɔi, gɛ́ ə ə́ nwun mąąɓo!»

¹⁸ Nąąlɔwai, di Daniɛlə pili ɲala kwənąn ɉu, di hvɛni kpuwulu kɛnɛ̨ laa gwənan naaləi. Tɔɔmun ə ɲee ɓa gbono kulɔ, ə bɔɔ laa gwɛni ɓa, da nwɔ nu kpɛa-kpɛaɠaai yee ɓa gbonoɠaa, ya ɓə a nɛ yɛ: mɛ̨nį lɔpee ta maa hva hvalin Daniɛlə mąą mɛ̨nį hu.

¹⁹ Tɔɔmun ə li ɲəi bɛlɛ́ laaləi, mąą kpinįi tii hu, tɔɔmun və kɔ̨nɔ̨n nɔpee ta mįi, hvo kpɛli hvaa mą nwɔ wɛli Nɛ̨ɛ̨nu ta hvo laa gwɛlɛ, ə lɛɛ, hvo pɛli yii.

²⁰ Yələ ɓɔi lɔwai, tɔɔmun ə homo ɲala kwənąn naaləi.

²¹ Gɛɛ kɛa həlii ɲala kwənąn na, ə Daniɛlə təli, nwoo maa yɛ kpɛlin, yɛ mą: «Daniɛlə, Yálá hvulú nwɔ tímun, ə́ wɔ Yálái ŋɛ̨i ya kwɛli hvilɛn ma a hvaŋąlɔ, aa ə́ nwun mąąɓo ɲalaɠaa yəi?»

²² Daniɛlə ə tɔɔmun nwoo ŋąąpənə, yɛ mą: «Oo Tɔɔmun, ə́ yii ə kwɛa, kɛi a mo tii Yálá ə kɛ!

²³ Ee! Nwɔ́ Yálái ə nwɔ malaka tɔɔ, ə pa ə ɲalaɠaa laaləi hon, di hvo mɛ̨nį lɔpee ta kɛ a ɲą́ą́. Mąąhɔlɔɓo, hvo kɛ ɉɔn gaa li mɛ̨nįi ŋɛ̨i hu, ə lɛɛ, və́ nwɔ̨nɔ̨ a hɔn maa mun ə́ ɲɛ̨i ɓa. Oo nwɔ́ Tɔɔmun, və́ kɛ mɛ̨nį ɲɔ̨n gɛ li.»

²⁴ Nąąlɔwai, tɔɔmun gwəi ə nɛɛ kpɔ kɛnɛ̨, ə mo yɛ diɛ: «Ka Daniɛlə kulɔ ɲala kwənąn ɉu.» Gulɔi di mo, pɔɔ lɔpee ta hvo kɛ mą, mąąhɔlɔɓo, ə gilitɔɔ nwɔ Yálái ɓa.

²⁵ Tɔɔmun ə pənə ə mo, yɛ diɛ: «Nuąi kpɔ tii Daniɛlə mąąɲaba lɔ, di pa a gəlee, di di pili ɲala kwənąn ɉu; diɛ di lonnii da di nɛ̨ąni.» Di pili tii di mo ɲala kwənąn ɉu, gɛɛ di hvo həli nɔi ɓa, di kɔ́w kpuɔkpuɔɠaa lɔ ɓə kɛi too nɔi ɓa.

²⁶ Mɛ̨nįgaai tii tɛɛ pulu, tɔɔmun Dariusə ə hɛɓɛ́ pɛ̨ɛ̨, ə naa həli hįi kəlee ɓa, nɔiɠaa kəlee hu, hįi woo kəlee ɓo nuą diɛ, diɛi di kaa lɔi mɛ̨i naa kəlee, yɛ diɛ: «Gɛ́ liilaa ə tɛɛ ka pɔ kpɔ kɛnɛ̨!

²⁷ Gáá tɔ́n dɔɔi ɓɛi kpɔ nwɔ́ tɔɔlaai ə həli laa, naa nuą kəlee diɛ, gɛ diɛ: Mąąnɛ̨ɛ̨ nu kəlee di ɲɔw Daniɛlə nwɔ Yálái ɓa, di mąąwiɛ. Mąąhɔlɔɓo: «Ya ɓə gaa a Yálá hvulú, Ya ɓə a Yai-Laa. Nwɔ tɔɔlaai hva kpɛɛ. Nwɔ heeɓolaa kpɛlai hvo mą.

²⁸ Ya ɓə a nu nwun mąąɓo, yɛ gulɔ haa hu. Ya ɓə a kpalo mɛ̨nį kɛ, da kwəi pili mąa mɛ̨nįɠaa, yələkɔlɔn ɉu, da lɔi mɛ̨i. Ya ɓə Daniɛlə nwun mąąɓo, Ya bə gulɔ yalaɠaa yəi.»

²⁹ Daniɛlə tɔɔi ta ə pɛli mą kpɔ nwɔ̨nɔ̨ kɛnɛ̨, Dariusə nwɔ tɔɔlaai hu, ə mą kɛ, Pɛrsə mun ŋɛ̨i a Sirusə nwɔ tɔɔlaa hu.