Danîa 5 - Yálá laawoo hɛɓɛ (dc)Bɛlsasarə nwɔ ɓɛlɛ kɛnɛ̨i ə gɛ, da Babilonə tɔɔlaa too mɛ̨nį 1 Yələ ta, tɔɔmun Bɛlsasarə ə laa mįi kɛnɛ̨ kɛ pələ pɛli, nwɔ nu kpɛa-kpɛaɠaai mąą mɛ̨nį ɓa, di kɛ a nu waa tɔ̨nɔ̨. Tɔɔmun ə pɛlɛ yɛ lɔɔ kɛnɛ̨ kpələ nuąi tii ɲɛ̨i ɓa. 2 Yii kɛa ə nɔɔ tii kpələ, ə mo yɛ diɛ: Di pa a ɉɛni hɛn ɲąŋąɠaa da nwali kwɛli hɛn ɲąŋąɠaai ŋɛ̨i nąn Nabukodonosorə ə ɉəɠə Yálá hee pɛlɛ́ mu Ɉerusalɛmə daai, ə gɛ, tɔɔmun da nwɔ wɛli nɛ̨ąą, ə mą kɛ nɛ̨ąni da nwɔ nu kpɛa-kpɛai di di kpələ ɉu. 3 Nąąlɔwai, ɉɛni hɛn ɲąŋąɠaai ŋɛ̨i di ɉəɠə Ɉerusalɛmə daai Yálá hee pɛlɛ́ mu, Yálá yəi bɛlɛ́n, di paa la, tɔɔmun da nwɔ wɛli nɛ̨ąąi, ə mą kɛ nɛ̨ąni da nwɔ nu kpɛa-kpɛai diɛ di kpələ ɉu. 4 Ɓɛlɔwai kɛa di pilɛ la nɔɔ hu, di wɔ yáláɠaai ŋɛ̨i kɛ a hɛni, wali kwɛli, ɓala kwɛli, wulu da kwɛni maa haɠaa, diɛ di mąąwiɛ. 5 Nąąlɔwai tii hu kpɔlɔ, nu yee kpiɛ ta ə kulɔ nwulɔ nwɔ̨n bulu yɛ hɛɓɛ́ pɛ̨ɛ̨ dɔɔ pɛlɛ́ ɓa. Tɔɔmun ə nu yee kpiɛi tii kaa yɛ ɉɛɓɛ́ pɛ̨ɛ̨. 6 Nąąlɔwai, tɔɔmun maa ə kpɛli, gwəi ə pili mą, ə ɲɔw kpɔ kɛnɛ̨, ɉu ə haa, maa yɛ kpɛlin, gbəlin yɛ kɛlɛ gee hu. 7 Tɔɔmun ə tomą kpɔ a nwoo kɛnɛ̨ yɛ diɛ: «Ka mo, nuąi da kɛ kwɛli hvilɛn ɉii pɛmɛ̨nɛ̨n gɔwɠaa diɛ da Kilimąą nuą, ə lɛɛ da tɔlikpɛ nuą di pa.» Tɔɔmun ə mo Babilonə Kilimąą nuą tii diɛ, yɛ diɛ: «Nui lɔpee, ɉɛɓɛ́i ŋɛ̨i bɛ̨ɛ̨ bɛlɛ ɓa, a pɛli moi, ə ɉukulɔ mą́ą́, ŋą́ nini kɔ́lɔ həɠə too gwąną, ŋą́ hɛni kwɛɛn doo gwąną, ə lɛɛ, mąą nu a tɔɔi ɉaaɓa kɛɛnąą hɔlɔɓo nwɔ́ tɔɔlaai hu.» 8 Tɔɔmun nwɔ Kilimąą nuą kəlee di pa, kɛlaa, dɔ̨nɔ̨ kpɛli hvo pɛli ɉɛɓɛ́i tii ɓoi, hvo ɉukulɔ tɔɔmun ma. 9 Kɛi ə mo tii, tɔɔmun Bɛlsasarə ə ɲɔw kpɔ kɛnɛ̨, maa yɛ kpɛlin, ə mą kɛ nwɔ nu kpɛa-kpɛaai diɛ kpɛli, naa ə di ɲɛ̨i maa hon gbɔ kpaan. Daniɛlə ə ɉɛɓɛ́i tii ɓo ə ɉukulɔ 10 Tɔɔmun nwoo kulɔ pələi tii da nwɔ nu kpɛa-kpɛaai, tɔɔmun nee, ə pa, ə mo non ma, yɛ mą: «Tɔɔmun, ə́ yii ə kwɛa, kɛi a mo tii Yálá ə kɛ! Ə́ kwəi hvo pili yɛ, hvo ɲɔw, ə́ mąą hvo kpɛlin. 11 Hulɔnu ta kaa ɓɛ ə́ wɔ tɔɔlaai hu, yii Yálá hvulú Nii kaa mɛ̨i. Ə́ nąn nwɔ lɔwai hu, ə gaa, ɉulɔnui tii nwɔ kili da nwɔ nwun gɛ ɉu laa hu pɔ̨nɔ̨ɔi kɛ, yɛ ɓo yɛ alaɠaa di wɔ kili. Ya ɓə ə́ nąn Nabukodonosorə ə ɉee a tɔlikpɛ nuą da nuąi da kɛ kwɛli hvilɛn ɉii pɛmɛ̨nɛ̨n gɔwɠaa diɛ, ə mą kɛ Kilimąą nuą, da hali nąmįnąa di nwun nąmu. Ə nąn ŋɛ̨i kɛ a tɔɔmun ya ɓə gɛ tii. 12 Daniɛlə ŋɛ̨i tɔɔmu ə naa mɛ̨i hee a Bɛltsasarə, gili kɛnɛ̨ mɛ̨nį kɔ́lɔn ŋąą hu, nwun ɲɛ ɓo ɉu, a pɛli hiinɠaa hukulɔi, a pɛli hanwonŋaa hukulɔi, mɛ̨nį yii nwalawalaa, a ɉon bələ kpaɠala lɛ. Ka Daniɛlə tii təli, a pɛli mą ə mɛ̨nį ta ɓo mɛ̨nį ŋɛ̨i hu.» 13 Nąąlɔwai, di Daniɛlə təli ə pa tɔɔmun nííla, tɔɔmun ə mo mą, yɛ mą: «Yɛ́ ɓə da kɛ ə́ laa ɓaa Daniɛlə, nuąi ŋɛ̨i ną́n ə di həɠə Ɉuda lɔi hu, yɛ pa a diɛ, da ɓaa yɛ́? 14 Ŋą́ą́ mɛ̨nį ta mɛ̨n ə́ mąą mɛ̨nį hu, diɛ alaɠaa nii kaa ə́ mɛ̨i, ə lɛɛ, nwun gɛ ɉu mɛ̨nį da kili mɛ̨nį huponoɔ yii hvo yɛ nuą di wɛi, yɛ ɓo ə́ yəi. 15 Kilimąą nuąi di kaa ɓɛ da nuąi da kwɛli hvilɛn pɛmɛ̨nɛ̨n gɔwɠaa diɛ, daa pa ɓɛ, ə gɛ, ɉɛɓɛ́i ŋɛ̨i bɛ̨ɛ̨, di mo, di ɉukulɔ. Kɛlaa, di hvo pɛli nwoo kɔ́w tɔ̨nɔ̨ kpɛli mukulɔi. 16 Ŋą́ą́ mɛ̨n diɛ, ya pɛli mą ə́ ɉukulɔ, ə lɛɛ, yɛ́ mɛ̨nį walawalaɠaa hon bələ kpaɠala lɛ. Yiihu kɛa, akɛ ya pɛli ə́ ɉɛɓɛ́i ŋɛ̨i ɓo, ə́ ɉukulaa lɛ mą́ą́, ŋą́ nini kɔ́lɔ həɠə too ə́ kwąną, ŋą́ hɛni kwɛan doo ə́ kwąną, ŋą́ nwɔ́ tɔɔlaai ɲąąwooɓo ɉaaɓa kɛɛnąą tɛɛ ə́ pɔ.» 17 Daniɛlə ə tɔɔmun nwoo ŋąąpənə yɛ mą: «Ə́ wɔ mɛ̨inɛ̨ɛ̨ hɛnŋaai tii lɛɛ ə́ yə́i, ə́ ə́ wɔ nu kpɔɔ laa hɛn tii tɛɛ nu takpɛli pɔ. Kɛlaa, ə mą kɛ tii, gáá ɉɛɓɛ́i ŋɛ̨i ɓoi, ə lɛɛ, ŋą́ ɉukulaa lɛ yɛ́. 18 Oo tɔɔmun, Yálá yii gaa hɛn gəlee nwun mɛ̨i, ə tɔɔlaa, kɛnɛ̨ laa, ɓɛlɛ kɛ maa da mąąwiɛ tɛɛ ə́ nąn Nabukodonosorə pɔ. 19 Gɛnɛ̨ laai tii Yálá ə dɛɛ bɔ mąą mɛ̨nį ɓa hįi kəlee, nu huwu lɔpee gəlee, hįi woo lɔpee gəlee ɓo nuą, di kɛi ɲɔw ma. Nui kɛ a kɛ bɔ ə baa, a baa, nui a kɛ bɔ ə nɛɛ a vulú, ə nɛɛ a vulú. Nui a kɛ bɔ a tɔɔi tɛɛ bɔ, akɛ nwɔ̨nɔ̨ bɔ ə daɠaa mąąyɛɛ. 20 Kɛlaa, ɉu mɛ̨nį ə kɛnɛ̨, yɛ gbɔwɔ ɲąą kɛnɛ̨, gili walawalaa, yili ɓə gɛ, Yálá ə gulɔ dɔɔ kpəlin ɉu, ə mąąyɛɛ. 21 Yálá ə gulɔ nuą lɔwai, ə gili kɛ yɛ huwɔ kili, da lɔwɔ huwɔɠaa diɛ ɓo di kee ɓa, yɛ kala nwunu mįi yɛ Nįŋɛ̨, luwuluwu tulɔ ə lɛɛ pui ma, ə lɛɛ la ɉu Yálá yii gaa hɛn gəlee nwun mɛ̨i, tɔɔmun Nabukodonosorə ə gɔlɔn yɛ diɛ: Yálái tii ɓə nwɔ yeetɛɛmąą kaa tɔɔlaa kəlee mɛ̨i, yaai a nu hee ɓɛi gaa bɔ. 22 Yɛ́i ŋɛ̨i a non Bɛlsasarə, ə́ kili kaa mɛ̨nįɠaai tii kəlee hu, kɛlaa, hvo gɛ li hvo ə́ kpɔɔ mąąyɛɛ Yálá yee mu. 23 Yaa ə́ muhəɠə Yálá ŋɛ̨i gaa hɛn gəlee nwun mɛ̨i naa ɓa, yaa ɲəi bɛlɛ́n ɉɛnŋaa həɠə, yɛ́, ə́ wɔ wɛli nɛ̨ąąi, ə́ nɛ̨ąni da ə́ wɔ nu kpɛa-kpɛaɠaai, kaa lɔɔ kpələ ɉu. Yili pulu, yáláɠaai ŋɛ̨i di kaa a: wali kwɛli, hɛni, ɓala kwɛli, kwɛli, wulu da kwɛni maahaɠaaɠaa, diɛi di hva kɛɛ kaa, di hva mɛ̨nį mɛ̨n, kili hvo diɛ, kaa kwɛli hvilɛn diɛ, ka hvo gɛ li ka hvo mąąwiɛ tɛɛ Yálá pɔ, yaai ə́ nɔw kaa ɲəi, da ə́ kɛ mɛ̨nįɠaa kəlee. 24 Yili ɓə gɛ, yɛ nu yəi kpiɛi ŋɛ̨i tɛɛ, ə gɛ, ə ɉɛɓɛ́i ŋɛ̨i pɛ̨ɛ̨. 25 Ɉɛɓɛ́i ŋɛ̨i bɛ̨ɛ̨, mo pələ kaa ŋɛ̨i, da kɛ mą: ‹MENE, MENE, TEKELƏ da PARSIN.› 26 Ɉɛɓɛ́ kɔ́w tii ɉukulaa ka: ‹Mene› mukulaa ɓaa: Yálá aa ə́ wɔ tɔɔlaai gwɛlan nono, gbəlai kaa mą. 27 ‹Tekɛli› mukulaa ɓaa: Daa ə́ wiɛ yee kɔ́ɔn, gɔwɔn gwɛli ŋą, yaa lɛɛ huwahuwa. 28 ‹Parsin› mukulaa ɓaa: Di kaa pai ə́ wɔ tɔɔlaai ɲąąkwɛlɛi Medi nuą, da Pɛrsə nuą di lɔwai.» 29 Ɲąąɓa, Bɛlsasarə ə mo, yɛ diɛ: «Di nini kɔ́lɔ həɠə too Daniɛlə kwąną, di hɛni kwɛan doo gwąną, ə lɛɛ, di noloɓo kɛɛnąą kəlee, diɛ mą: ‹Dɔɔlaa nwɔ ŋaawooɓo ɉaaɓa kɛɛnąą kaa ɲəi.›» 30 Gbini tɔ̨nɔ̨i tii hu, Kalde nuą di tɔɔmun Bɛlsasarə paa. |