Danîa 4 - Yálá laawoo hɛɓɛ (dc)

¹ Ɲą́ą́ Nabukodonosorə, ŋą́ kɛ kpɔ heeni ɲə́i bɛlɛ́n nɛ́ɛ́ hu, gɛ́ ɓo ɲə́i dɔɔ kwəlii.

² Kpini ta, ŋą́ hįi kaa, ɉįi tii ə mą́ą́ ɲɔw, ə ɉu pu mą́ą́, ə gwə́i pili.

³ Yili ɓə gɛ, ŋą́ nwɛlɛɛ tɔɔ, ə gɛ, kilimąą nuąi di kaa Babilonə lɔi hu, di pa, di ɉįi tii hukulɔ.

⁴ Yili ɓə gɛ, ɉalə nąmįnąai di kaa ɲə́ə́ mu, nuąi da kwɛli hvilɛn pɛmɛ̨nɛ̨n gɔwɠaa diɛ, Kilimąą nuą, da tɔlikpɛ nuą di pa. Ŋą́ nwɔ́ hįi mąą mɛ̨nį hukulɔ diɛ, di hvo pɛli mukulaa lɛi mą́ą́.

⁵ Hvo kɛli kɛa pulu ɓa, Daniɛlə yii ŋą́ nwɔ́ yálái Bɛltsasarə laa hee mą, a naa mɛ̨i hee, yaai tii ɓə Yálá Hulú Nii kaa mɛ̨i, yaai tii ɓə ŋą́ nwɔ́ hįi mąą mɛ̨nį ɓo mą.

⁶ Gɛ́ ma: «Bɛltsasarə, yɛ́i ə́ kaa a dɔlikpɛ nuą nwun nąmu, gíli ka ɉu gɛ́ diɛ, Yálá yii gaa a Vulú, nwɔ́ Nii kaa ə́ mɛ̨i. Yálái tii ɓə mɛ̨nį loɔ ta lɔpee hvo walawala li ɲəi. Ɉiin ŋɛ̨i ŋą́ gaa, gɛ́ ə́ ɉukulɔ mą́ą́.

⁷ Ɓɛlɔwai ŋą́ kɛ la laani ɲə́i gbin ŋą, ɉįi ŋą́ gaa ya ka: «Ŋą́ wulu ta kaa lɔi hąą, gwɛa kpɔ kɛnɛ̨.

⁸ Nwului tii kɛnɛ̨ɛ kɛ, nwalawalaa. Dón yɛ kɛ ə həli yələkɔlɔn ma. Lɔi mɛ̨i nuą kəlee diɛ pɛli gaai.

⁹ Naa lɛlɛɛ kɛ mą, ma tamąą ɉu, nu kəlee kɔ̨nɔ̨n ə kɛ ɉu, mu ɓə lɔwɔi huwɔɠaa kəlee di kɛi pa diɛ pɛlɛ laa. Naa hu ɓə yələi nwɛ̨nįɠaa kəlee di kɛi pa diɛ di taa tɔɔlaa. Nɔ̨ɔ̨-nɔ̨ɔ̨ hɛnŋaa kəlee diɛ di kɔ̨nɔ̨n ɉɔlɔɓo nwului tii hu.

¹⁰ «Ɉįi tɔ̨nɔ̨i tii hu, ŋą́ lɛɛ laani: «Ŋą́ malaka ta kaa, ə həɠə yələkɔlɔn ɉu ə yɛɛ.

¹¹ Ə kɛi tomą kpɔ a nwoo kɛnɛ̨ yɛ kɛ mą: Ka nwului ŋɛ̨i pɔn, ka ɉonwoɠaa hu tee, ka naa kulɔ ma, ka maɠaa hu taɠa-taɠa. Ɉuwɔɠaai da kɛ pɛlɛi mu, di taɠa-taɠa. Nwɛ̨niɠaa diɛ kpɛli, di kulɔ naa hu, di taɠa-taɠa.

¹² Kɛlaa, ka nwun gbə lɛɛ laa da ɉamuɠaa, Ka di kpulɔn a kwɛli yɔwɔn, da ɓala kwɛli yɔwɔn, ka di kpulɔn lɔwɔi, kala hu, ə gɛ, luwuluwu tulɔ ə pu mą, da lɔwɔi huwɔɠaa di kɔ̨nɔ̨n ə kɛ a kala nwunu.

¹³ Nu kiliŋąhiɛi tii gaa mą, maa kaa pai hvalin ɉii a huwɔ kiliŋąhiɛ, gaa pai kwɛlan mɛ̨ihveelɛ kɛi yili hu.

¹⁴ «Mɛ̨nį kpən dəɛi ŋɛ̨i kaa a Yálá woo, yii malakaɠaa di pa mo, ə gɛ, nuą di gɔlɔn diɛ, Yálá ɓə gaa tɔɔlaaɠaa kəlee nwun mɛ̨i. Nui Yálá kaa bɔ, ya ɓə a tɔɔlaa tɛɛ bɔ, Yálái tii a pɛli mą, ə tɔɔi kɛnɛ̨ tɛɛ nui nuą ɲɛ̨i tɛɠɛ ɓoɔ ɉu, bɔ.

¹⁵ «Yɛ́ Bɛltsasarə, ɉįi ŋą́ gaa, ɲą́ą́ tɔɔmun Nabukodonosorə, yaa li, gɛ́ ə́ ɉukulaa lɛ mą́ą́. Mąąhɔlɔɓo, gilimaa nuąi di kaa nwɔ́ tɔɔlai hu, di hva pɛli yili ɓa, yɛ ɓə ya pɛli mą, mąąhɔlɔɓo, Yálá Hulú Nii kaa ə́ mɛ̨i.»

Daniɛlə ə tɔɔmun nwɔ hįi woo hukulɔ

¹⁶ Nąąlɔwai, Daniɛlə ŋɛ̨i naa mɛ̨i hee ɓaa: Bɛltsasarə, ə hee kpɔ wolo, ɓo a ɉu kwɛa, gwəi piliɛ ma, ə lɛɛ, ə ɲɔw. Tɔɔmun ə mo mą yɛ mą: «Bɛltsasarə, ɉįi ŋɛ̨i ŋą́ gaa da ɉukulaa, yili hvo kɛ gaa ə́ maa ɲɔwi.» Bɛltsasarə ə nwoo ŋąąpənə yɛ mą: «Nwɔ́ mɛ̨nį Nąmu, mąąnɛ̨ɛ̨ kɛ ɉįi ŋɛ̨i da ɉukulaa di kɛ a ə́ yowoɠaa di wɔɔ.

¹⁷ Nwului tii ə́ gaa, yaai tii kɛ gɛnɛ̨i, nwalawalaa, gweaa yɛ tɛ yələkɔlɔn ma, yaai yɛnɛ̨ɛ̨ naakəlee nuą da pɛli kɛ gaai;

¹⁸ Nwului tii kɛ nąą ɲąąnɛ̨ɛ̨ mąi, ma tamąą ɉu, nu kəlee kɔ̨nɔ̨n yɛ kulɔ ɉu, huwɔɠaa kəlee diɛ pa nįnįn mu, yələi nwɛ̨nįɠaa diɛ di taa tɔɔ ɉonwoɠaa hu;

¹⁹ Oo tɔɔmun, yɛ́ ka tii! Yaa kɛnɛ̨, ə́ yee a walawala, ə́ wɔ kɛnɛ̨ laa aa tɛ yɛ həli yələkɔlɔn ma, ə́ wɔ yeetɛɛmąą laa aa həli lɔi nąą kəlee.

²⁰ Tɔɔmun, ə́ Yálá nwɔ malaka ta kaa ə həɠə yələi, ə yɛɛ, yɛ mą: Ka nwului ŋɛ̨i pɔn, ka ɉu tee-tee; kɛlaa, ka nwungbə lɛɛ laa da ɉamuɠaa, ka di kpulɔn a kwɛli yɔwɔn da ɓala kwɛli yɔwɔn, ka di kpulɔn lɔwɔi kala hu, luwuluwu tulɔ ə pu mą, da lɔwɔ huwɔɠaa di kɔ̨nɔ̨n ə kɛ a kala nwunu, kwɛlan mɛ̨ihveelɛ kuu mu.

²¹ Ɉįi tii ɉukulaa ka; yɛ pələi Yálá yii gaa hɛn gəlee nwun mɛ̨i ə gbən dee la ə́ mąą mɛ̨nį hu, nwɔ́ tɔɔmun:

²² Yálá kaa pai ə́ kulɔ́i nuą lɔwai, ka lɔwɔ huwɔɠaa kaa ɓo ka kee pɔ, ə́ kaa pai kɛi kala nwunu mįi yɛ Nįŋɛ̨, luwuluwu tulɔ kaa pai ə́ kɛlɛi, ə́ kaa pai kwɛlan mɛ̨ihveelɛ kɛi gɔlɔi tii hu; ə lɛɛ la ɉu, ə́ gɔlɔn yɛ́ diɛ: Yálá yii gaa hɛn gəlee nwun mɛ̨i, ya ɓə gaa tɔɔlaa kəlee nwun mɛ̨i, ə lɛɛ, nui Yálá kaa bɔ, ya ɓə a tɔɔlaa tɛɛ bɔ.

²³ Kɛi ŋɛ̨i di mo mą, nwungbə da ɉamu di lɛɛ nɔi ɓa, ə́ wɔ tɔɔlaai kaa pai lɛɛi ə́ yəi, akɛ ya gɔlɔn yɛ́ diɛ, Yálá gaa yələkɔlɔn ɉu, ya ɓə gaa hɛn gəlee nwun mɛ̨i. Ɉu.

²⁴ Yili ɓə gaa mą, Oo tɔɔmun! Niɛwooi ŋɛ̨i gáá gɛi yɛ́, ya ɉon, mąąnɛ̨ɛ̨ ə́ kpəla nɛ̨ŋɛ̨n gɛɛ ɓa, ə́ mąąhvalin a tələnmolaa. Ə́ mɛ̨nį ɲɔ̨n mąąhvalin a nuą mąąwɛli kaa, ya yili kɛ tii, gbəli hu ə́ wɔ liilaa hu a kwɛa.»

Ɉįi wooi tii laa ə hvɛɛ Nabukodonosorə ɓa

²⁵ Mɛ̨nįɠaai tii kəlee laa ə hvɛɛ tɔɔmun Nabukodonosorə ɓa.

²⁶ Ɲąnin bow kɔ́w hveelɛ tɛɛ pulu, tɔɔmun ə kɛi hiɛ-hiɛ ɓo nwɔ toɔ kwəli hu Babilonə daai,

²⁷ Nąąlɔwai, ə mo yɛ diɛ: «Babilonə taa kɛnɛ̨i kaa ləi, ɲą́ą́ ɓə dɔɔ, ɲá gɛ a nwɔ́ kɛnɛ̨ laa mąąwiɛ.»

²⁸ Nwooi tii ə lɛɛ lɔ tɔɔmun na, woo ta ə hɛɠɛ yələi yɛ mą: «Tɔɔmun Nabukodonosorə, ə́ wɔ wɛlɛɛ ka: Ə́ wɔ tɔɔlaai aa kulɔ ə́ yəi.

²⁹ Yálá kaa pai ə́ kpɛi nuą lɔwai, ka lɔwɔ huwɔgaa ɓə pai kɛi ka kee ɓa! Ə́ kɔ̨nɔ̨n ma pai kɛi a kala nwunu, yɛ Nįŋɛ̨. Ə́ kaa pai kwɛlan mɛ̨ihveelɛ kɛi yili hu, ə lɛɛ la ɉu, ə́ gɔlɔn yɛ́ diɛ: Yálái gaa yələkɔlɔn ɉu, ya ɓə tɔɔlaa kəlee nwun mɛ̨i. Ə lɛɛ, nui Yálá kaa bɔ, ya ɓə a tɔɔlaa tɛɛ mąą nu pɔ.»

³⁰ Nąąlɔwai tii hu kpɔlɔ, nwoo tii laa ə hvɛɛ Nabukodonosorə ɓa. Yálá ə gulɔ nuą lɔwai, yɛ kala nwunu mįi yɛ Nįŋɛ̨, luwuluwu tulɔ ə lɛɛ pui ma, nwun nəɠa ə kwɛa yɛ kuwɔ ləɠa, gɔwɔ ɲąnįnŋaa di kɛ yɛ nwɛ̨nį nwɛi.

Nabukodonosorə ə kulɔ huwɔ laa hu

³¹ Gwɛlan mɛ̨ihveelɛi tii tɛɛ pulu, ɲą́ą́ Nabukodonosorə, ŋą́ ɲɛ̨i hee yələi, nu kili ə pa mą́ą́, Yálá yii gaa hɛn gəlee nwun mɛ̨i, ŋą́ mąąwiɛ tɛɛ bɔ. Yálá ŋɛ̨i haa hvo mą, yaai nwɔ yeetɛɛmąą kaa hɛn gəlee mɛ̨i, yaai nwɔ tɔɔlaa kpɛɛ hvo mą, ŋą́ kɛnɛ̨ laa da mąąwiɛ tɛɛ bɔ.

³² Lɔi mɛ̨i heeɓo nuą kəlee di kaa lɔ yɛ hɛn yii mɛlɛ hvo mą, yii lɔpee Yálá kaa bɔ, ya ɓə a gɛ yələkɔlɔn ɉu malakaɠaa diɛ, ə mą kɛ lɔi mɛ̨i heeɓo nuą kəlee. Nui lɔpee ta hva pɛli kpəɲan ɉii Yálá kɛ mɛ̨nį tɔwɔ, yɛ kɛ mą: «Lə ɓə ŋɛ̨i ə kaa gɛi?»

³³ Nąąlɔwai, nu kili ə pa mą́ą́, nwɔ́ tɔɔlaa mąąwiɛ, nwɔ́ tɔɔlaa nwɔ kɛnɛ̨ laa di tɛɛ bɔ́. Nuąi kɛ a nwɔ́ tɔɔlaai kwɛlɛ nuą da nu kpɛa-kpɛaɠaa, di pənə di hvaa mą di ɉéé di nwun mɛ̨i a tɔɔmun, ə lɛɛ, nwɔ́ mąąwiɛ ta lɔ ɓə kɛi pɛlɛ ma.

³⁴ Yii hu kɛa, ɲą́ą́ Nabukodonosorə, Yálái ŋɛ̨i gaa a yələkɔlɔn ɉu tɔɔmun, gáá mąąwiɛi, gɛ́ naa mąątɛ̨nɛ̨, gɛ kɛnɛ̨ laa tɛɛ bɔ. Yálái tii kɛ mɛ̨nįɠaa kəlee kaa a tɛ̨ą, nwɔ kpaaləɠaa kəlee haŋąąi. Nuąi da hiɛ a hu ɲąŋą kɛnɛ̨ pələ, a di mąąyɛɛ.