Danîa 3 - Yálá laawoo hɛɓɛ (dc)

Di Daniɛlə mɛlaa haaɓai pili nwɔ̨n ɉu

¹ Tɔɔmun Nabukodonosorə ə mąąnįnįn ɉaɠaa ta pɛli a hɛni, dɔɔmɛ̨i yɛ ɓo a mɛtɛlɛ pow haaɓa, mɛlaŋa kɛnɛ̨ pələ yɛ ɓo a mɛtɛlɛ haaɓa. Ə dɔɔ ɓɛi ŋɛ̨i da kɛ mą: Dura, nɛ̨ŋɛ̨ hu, Babilonə nɔi.

² Tɔɔmun Nabukodonosorə ə nɛɛmą ə nwɔ nu kpɛa-kpɛaɠaa, nwɔ hɛn gɔw laaikɛ nuą, nwɔ guvɛnɛɛliɠaa, giti tee nuą, ɉɛn gɔw mɛ̨i kaa nuą, giti pɛlɛ mu nuą, mɛ̨nį hutɔɔ nuą da nwɔ kobitaa nwun nąmįnąɠaa kəlee təli, ə gɛ, di pa, mąąnįnįn ɉaɠaa ŋɛ̨i ə bɛli, di kwɛli hvilɛn ma, di nįnɛ̨ kulɔ.

³ Nu kpɛa-kpɛaɠaai tii ə di təli, gəlee di di ŋąąkpɔn mąąnįnįn ɉaɠaai tii lííla, ə gɛ, di kwɛli hvilɛn ma, di nįnɛ̨ kulɔ.

⁴ Noloɓomun yii di dɔɔ mɛ̨nį tii nwun na, ə tomą kpɔ a nwoo kɛnɛ̨, yɛ diɛ: «Hįi kəlee, hįi woo lɔpee gəlee ɓo nuą, da nu huwu lɔpee gəlee, yii tɔɔmun ə mo, ya ka:

⁵ Yɛ diɛ: Ɓɛlɔwai ka káá pai Nįŋɛ̨ mįnɛ̨ tulu woo mɛ̨n ɉii la, da ɓɔɔ tulu, ə lɛɛ da gologwɛni, ə mą kɛ bɛlɛgwəi gwɛnįn, da kornəmusə tulu woo, da hvɛli kɛ hɛnŋaa lɔpee gəlee woo, ka pɛlɛ nɔi ɓa, ka kwɛli hvilɛn tɔɔmun nwɔ mąąnįnįn ɉaɠaai ŋɛ̨i ɓa.

⁶ Nui a wala gɛ hvo mąa pɛlɛ, hvo kwɛli hvilɛn ma, da bili kpɔlɔɔ yiihu fuulu nwɔ̨n ɉu.»

⁷ Yili ɓə gɛ, ɓɛlɔwai nuą di vɛli kɛ hɛnŋaa tii woo mɛ̨n na, di pɛlɛ nɔi ɓa, di kwɛli hvilɛn tɔɔmun nwɔ mąąnįnįn ɉaɠaa tii kɛ a hɛni, ma.

Daniɛlə mɛlaa haaɓai di lɛɛ Yálá ɓa woo tɔ̨nɔ̨ Nąmu laa hu

⁸ Nąąlɔwai tii hu kpɔlɔɔ, Kalde nuą taɠaa, də li di Ɉuifəɠaa maa ɲaba lɔ.

⁹ Di mo tɔɔmun ma, diɛ mą: «Kuɔ mɛ̨nį Nąmu, ə́ yii ə kwɛa, kɛi a mo tii, Yálá ə kɛ!

¹⁰ Oo tɔɔmun! Yɛ́ kpinįi ɓə mo, yɛ diɛ: ‹Nui lɔpee a vɛli kɛ hɛnŋaa ŋɛ̨i woo mɛ̨n, mąąnɛ̨ɛ̨, mąą nu ə pɛlɛ, ə kwɛli hvilɛn ə́ wɔ mąąnįnįn ŋɛ̨i a hɛni ma.›

¹¹ Ə́ woo ta ɓo, ə́ naa mɛ̨i, yɛ́ diɛ: ‹Nui a wala gɛ, da mąą nu pili fuulu nwɔ̨n ɉu.›

¹² Yaan, Ɉuifə taɠaa kaa ɓɛ ku lɔwai, diɛ ɓaa: Sadrakə, Mesakə da Abɛdə-Nego, yiiɠaai ə́ ɲɛ̨itɔwɔ laa tɛɛ di pɔ, Babilonə lɔi hu. Nuąi tii, di hvo ə́ woo tii kaa li a mɛ̨nįi lɔpee ta, di hvo gɛ li, di hvo kwɛli hvilɛn ə́ wɔ yáláɠaai diɛ, da ə́ wɔ mąąnįnįn ɉaɠaai ŋɛ̨i ə́ bɛli.»

¹³ Tɔɔmun Nabukodonosorə lii ə kələn gwəi kpɔ kɛnɛ̨, ə mo, yɛ di pa a: Sadrakə, Mesakə da Abɛdə-Nego ni, nííla. Di nɛɛmą di pa a diɛ.

¹⁴ Tɔɔmun yɛ diɛ: «Akɛti tɛ̨ą ɓaa mɛ̨nįi ŋɛ̨i nuą ŋɛ̨i kaa moi a ka laai, diɛ kɛ mą: Ka hvo kwɛli hvilɛn ɉii nwɔ́ yáláɠaai diɛ, ka hvo mąąwiɛ tɛɛ nwɔ́ mąąnįnįn ɉaɠaai pɔ, yii ŋą́ bɛli?

¹⁵ Yii hu kɛa, ka ka kɛ pələ pɛli, ɓɛlɔwai ka káá pai vɛli kɛ hɛnŋaa tii woo mɛ̨n ɉii la, mąąnɛ̨ɛ̨, ka ka maa pɛlɛ, ka kwɛli hvilɛn mąąnįnįn ɉaɠaa ŋɛ̨i ŋą́ bɛli ma. Ka wala gɛ, ŋaaɓa, daa ma ka pili fuulu nwɔ̨n ɉu. Ə lɛɛ, ala yii pai ka kulɔi ɲə́i, ŋą́ pa ŋą́ gaa.»

¹⁶ Nąąlɔwai, Sadrakə, Mesakə da Abɛdə-Nego, di tɔɔmun nwoo ŋąąpənə, diɛ mą: «Mɛ̨nįi ŋɛ̨i yaa mo kuɔi, ku hva pɛli ə́ woo ŋąąpənəi yili hu.

¹⁷ Akɛ mąąnɛ̨ɛ̨ ə́ ku pili vuulu nwɔ̨n tii hui, Yálái ŋɛ̨i ku kaa tiɓo kɛi ma, a pɛli ə ku kulɔ laa, ə ku kulɔ nwɔ̨nɔ̨ ə́ yee mu.

¹⁸ Akɛ yili hvəi, Oo tɔmun! Laa na yɛ́ diɛ, ku hvo pai gɛi, ku hvo kwɛli hvilɛn ə́ wɔ yáláɠaai diɛ, ku hvo mąąwiɛ tɛɛi ə́ wɔ mąąnįnįn ɉaɠaai pɔ.»

¹⁹ Nąąlɔwai, tɔɔmun Nabukodonosorə lii ə kələn gbɔ gwəi kɛnɛ̨, Sadrakə, Mesakə da Abɛdə-Nego ni pɔ. Ə mo, yɛ diɛ: «Ka vuulu nwɔ̨n ŋaatɛ kpɔ gee mɛ̨i mɛ̨ihveelɛ, ka dɛɛ bɔlɔ pɔlɔɠaa diɛ.»

²⁰ Yili pulu, ə mo nwɔ kɔ́kuláá ɉuwalawalaaɠaa diɛ, yɛ diɛ: di Sadrakə, Mesakə da Abɛdə-Nego ni hon, di di yili, di di pili vuulu nwɔ̨n ɉu.

²¹ Di nɛɛmą di nuą haaɓai tii hon, di mąą hɛnɠaa kəlee ə lɛɛ diɛ, di di yili, di di pili vuulu nwɔ̨n ɉu.

²² Yɛ pələi tii tɔɔmun ə mo la a nwąnąi, di vuulu nwɔ̨n da kɛ mą, ə tɛɛ la bɔlɔ pɔlɔ ɓa. Nuą ŋɛ̨i Sadrakə, Mesakə da Abɛdə-Nego ni pili nwɔ̨n ɉu, nwɔ̨n nwəleen ə di paa.

²³ Nuą haaɓai tii, Sadrakə, Mesakə da Abɛdə-Nego, di lɛɛ a di yili kɛɛ, di too vuulu nwɔ̨n gɛnɛ̨i tii hu.

Daniɛlə mɛlaa haaɓai di kulɔ nwɔ̨n ɉu

²⁴ Nąąlɔwai, tɔɔmun Nabukodonosorə kwəi ə pili mą, ə muhəɠə kpɔlɔɔ tii ɉa, ə mo gwɛlɛ nuą diɛ, yɛ diɛ: «Éé! Kɛlɛi, nu haaɓa ɓə gu di yili, gu di pili nwɔ̨n ɉu ee?» Yiliɠaai diɛ mą: «Oowəi tɔɔmun, pələ ɓə ə kɛ la, yɛ pələi tii ə́ mo la.»

²⁵ Tɔɔmun ə pənə yɛ diɛ: «Yaan, nu nąąn mə gáá gaai laa nwɔ̨n ɉu, diɛ hiɛ, di naa ta hvo yili li, nwɔ̨n bɔɔ kpɛli hvo diɛ. Di nąąn gɛɛnąą tii, ɲɛ̨ilaai kaa yɛ alaɠaa lon ɉulɔnu.»

²⁶ Yili pulu, Nabukodonosorə ə mąą lɛɠɛ vuulu laaləi, ə mo a nwoo kɛnɛ̨ yɛ diɛ: «Sadrakə, Mesakə, Abɛdə-Nego, Yálá yii gaa hɛn gəlee nwun mɛ̨i nwɔ kóló kɛ nuą, ka kulɔ nwɔ̨n ɉu ka pa!» Sadrakə, Mesakə, Abɛdə-Nego, di kulɔ nwɔ̨n ɉu.

²⁷ Nu kpɛa-kpɛaɠaa, ɉɛn gɔw laaikɛ nuą, guvɛnɛɛliɠaa da tɔɔmun gwɛlɛ nuą, di lɛɠɛ nu haaɓai tii diɛ, di di kaa, nwɔ̨n və kpɛli pɔɔ lɔpee ta kɛ diɛ, nwɔ̨n və hɛn da kɛ a di nwun nəɠa, hvo hɛn da kɛ a di mąą həɠə, nwɔ̨n gun gbɛli hvo kɛ di kɔ́lɔ ɓa.

²⁸ Nabukodonosorə ə mo, yɛ diɛ: «Mąąwiɛ kaa Sadrakə, Mesakə da Abɛdə-Nego ni di wɔ Yálái ɓa, yaai nwɔ malaka tɔɔ, yɛ pa nwɔ kɛlaɠaai nwun mąąɓoi. Di wɔ Yálái tii ɓə di di kilitɔɔ mą, dɔ́n ŋɛ̨i tɔɔmun ə dɔɔ, di gala, di hvaa mą, di kɔ́lɔ laanɔ̨nwɔ̨ ə ɓo, yili hviɛlaɓoɔi di ɲɛ̨i ɓa, ə tɛɛ, kwɛli hvilɛn ŋąą ala takpɛli ɓa, akɛ di wɔ Yálái hvəi.

²⁹ Ə həɠə yiihu ɓa, tɔ́n yii gáá dɔɔi, ya ka: Gɛ́ nui lɔpee gəlee, hįi lɔpee, hįi woo lɔpee gəlee ɓo nuą, nui a woo ɲɔ̨n mo a Sadrakə, Mesakə da Abɛdə-Nego ni di wɔ Yálái laa, da mąą nu hu tee-tee, di nwɔ pɛlɛ́i pu, naa ə lɛɛ, a tulun ŋą. Mąąhɔlɔɓo, di wɔ Yálái yaa tɔ̨nɔ̨ ɓə a pɛli nu nwun mąąɓoi.»

³⁰ Yili pulu, tɔɔmun ə Sadrakə, Mesakə da Abɛdə-Nego ni di tɔɔi ta kɛ mą Babilonə lɔi hu.

Nabukodonosorə nwɔ hįi veelɛnąą ə kɛ a wulu kɛnɛ̨

³¹ Tɔɔmun Nabukodonosorə, ə mo ɲəi nɔi nuą kəlee diɛ, hįi kəlee, hįi woo lɔpee gəlee ɓo nuą, nuąi kpɔ di kaa lɔi mɛ̨i naa kəlee, yɛ diɛ: Gɛ́, liilaa kɛnɛ̨ ə tɛɛ ka kəlee ka pɔ.

³² Kpalo mɛ̨nį da mɛ̨nįɠaai Yálá yii gaa hɛn gəlee nwun mɛ̨i, ə gɛ mą́ą́, yili ɓə gáá bɔ ŋą́ nɛ.

³³ Mɛ̨nįɠaa tii kpɛa-kpɛaai! Gbalo mɛ̨nįɠaai tii yee wiai! Yálái tii nɛ mą́ą́, nwɔ tɔɔlaa kpɛlai hvo mą Nwɔ kɛnɛ̨ laa kaa hɛn gəlee nwun mɛ̨i, gbəlai hvo mą.