Danîa 11 - Yálá laawoo hɛɓɛ (dc)

¹ «Misɛlə tii ɓə ɲą́ą́ gbɛli ŋą́ mąąkpɔn mąąɓo, Medi mun ŋɛ̨i da kɛ mą: Dariusə, nwɔ tɔɔlaai gwɛlan dɔlɔɔ hu.

² «Nwɛlɛɛi ŋɛ̨i gáá pai moi yɛ́, mąąnɛ̨ɛ̨ nu ə la na, ya ɓaa: Tɔɔɓɛlaa haaɓa kaa pai di kee mąąhvalin ɉii, Pɛrsə lɔi nwɔ tɔɔ kpəlin hu, nąąn gɛɛnąą kaa pai kɛi a hɛn gɔw Nąmu kɛnɛ̨, ə tɛɛ dɔlɔɔɠaai tii diɛ. Ɓɛlɔwai nwɔ hɛn gɔw kaa pai huwalawala kɛni tɛɛ la bɔ, gaa pai gɛ pələ pɛli, ə gɛ, ə kɔ́ pɛlɛ Grɛkə tɔɔmun ma.

³ Kɛlaa, kɔ́kuláá tɔ̨nɔ̨ kaa pai kɛi a Grɛkə tɔɔmun, gaa pai kɛi lɔi kɛnɛ̨ nwun na, yii a nɛɛ mą, yɛ ɠɛ.

⁴ Ɓɛlɔwai gaa pai nwɔ tɔɔlaai heei la, nwɔ tɔɔlaai tii kaa pai woloi ə taɠa-taɠa yɛnɛ̨ɛ̨ nwono nąąn gəlee hu. Ɉuwuhu mun da hvo pai heei dɔɔ kpəlin ɉu, dɔɔlaa ŋąą a kwɛlɛ nu takpɛliɠaa diɛ, kɛlaa, yiliɠaa di wɔ tɔɔlaa hva həli nwɛi pɔ.

⁵ «Nui pai tɔɔlaa kɛi nɔi ɉɛɠɛɛ pələ, ɲee kaa pai walawala, kɛlaa, nwɔ kɔ́kuláá nwun nąmu tɔ̨nɔ̨ yee kaa pai walawala ə tɛɛ mą, yili nwɔ tɔɔlaa kaa pai walawalai ə tɛɛ nwɛi ɓa.

⁶ Kwɛlan daɠaa tɛɛ pulu, di kaa pai di yee lɔi gee hu, dɔɔmun ŋɛ̨i ɉɛɠɛɛ pələ, non nɛ̨ɛ̨nu kaa pai həɠəi ə li ɲanwuɔ̨ tɔɔmun ɓo, ə lɛɛ ɲili yəi a nɛ̨ą, ə ɠɛ, tɔɔɓɛlaa hveelɛi tii wɔ nɛɛlaa yee ə pu gee hu. Kɛlaa, nwɔ huwalawala hvo pai lɛɛi ɲəi. Ɉilɛ kaa pai haai, di lon ə haa, nɛ̨ɛ̨nu yaa kpɛli ə haa, ə mą kɛ gwɛlɛ nuą, ə mą kɛ nąn da ɉilɛ.

⁷ Di yəi bɛlɛ́n mun da kaa pai nąn dɔɔi həɠəi, a pa kpɔ ə hvaa tee ɲanwuɔ̨ tɔɔmun bɔ taai. Gaa pai kɔ́ pɛlɛi ɲanwuɔ̨ tɔɔmun tii nwɔ hvólóhahiɠaa diɛ, ɲee ə tɛɛ diɛ.

⁸ Yili pulu, gɔ́ pulu hɛnŋaa gaa pai ɉəɠəi, a li la Eziptə lɔi hu, ɉɛnŋaai tii ɓa: mąąnįnįn ɉaɠaaɠaa, yai kɛ a nɔi tii nwɔ alaɠaa, hɛni hɛnŋaŋa lɛlɛɛɠaa, da wali kwɛliɠaa, yai kɛ a ɲalaɠaai tii di wɔɔ. Yili pulu, kwɛlan damaa a tɛɛ, di hva kɛ kɔ́ kɔ́i.

⁹ Nąąlɔwai, ɲanwuɔ̨ tɔɔmun a li, ɉɛɠɛɛ tɔɔmun bɔ, ə bulu pənə yɛ li nwɔ lɔi hu.

¹⁰ «Ɲanwuɔ̨ pələ tɔɔmun lon ɉinąą, di kaa pai di kɛ pələ pɛli, di di ɲąąkpɔn da kɔlaɠa tamąą. Di tɔ̨nɔ̨ kaa pai nwɔ kɔlaɠai həɠəi di ɲɛn bələ maa teen yɛ ya hvɛɛ, a kɛi bulu pənə kɛa yɛ li bɔ lɔi, a kɔ́ pɛlɛ ɲowo nwɔ taa walawala ta ɓa.

¹¹ Ɉɛɠɛɛ pələ tɔɔmun lii a kələn gwəi, ə muhəɠə, yɛ li kɔ́ pɛlɛi yanwuɔ̨ tɔɔmun na, yili a kɔlaɠa kɛnɛ̨ həɠə, ə ɲąątɔɔ mą, kɛlaa, di yee hva lɔ.

¹² Ɲeetɛɛmaai tii ɉɛɠɛɛ pələ tɔɔmun a gɛ, a gbɔwɔ ŋąą kɛnɛ̨ yili hu. Kɛlaa, pələ ma a kɔ́kuláá kpulu tamąą paa la, ya hvəi pai yeetɛɛmąą kɛi.

¹³ Yanwuɔ̨ tɔɔmun gaa pai pənəi ə kɔlaɠa nįnɛ̨ takpɛli kɛ pələ pɛli, gbulu hu kɛnɛ̨ɛ dɛɛ dɔlɔɔ ɓa. Kwɛlan da wolaa tɛɛ pulu, da nwɔ kɔlaɠa nįnɛ̨i tii da pa, kɔ́ kɔ́ kwɛli hɛnŋaa walaawala yɛ ɓo di yəi.

¹⁴ Maa kwɛlan tii hu, nu kpulu tamąą da di muhəɠə ɉɛɠɛɛ tɔɔmun tii laa ɓa, ə mą kɛ, yɛ́ Daniɛlə ə́ huwuhu nuą taɠaa da kɛ ɉu. Nuąi da kɛ gɛɛ kalaa tii hu, da di muhəɠə dɔɔmun tii laa ɓa, ə gɛ, mɛ̨nį ŋɛ̨i di mo hįi ta hu, naa ə hon. Kɛlaa, di yee hvo pai lɔi.

¹⁵ Ɲanwuɔ̨ tɔɔmun gaa pai, pɔlɔ kpukpuɠaa tɔɔi ɉįi ɓa, ə gɛ, di tɛ ma, di hvilɛn taai pələ, di daa nuą hon. Ɉəɠə pələ kɔlaɠai, pələi mąn di wəlɛɛ kɛ la, di yee hva lɔ, da di wɔ nu kpuluɠaai, hvaŋą hva hɔlɔɓo di yəi, da diɛni di hvo kɔ́.

¹⁶ Gɔ too mun tii, yii a nɛɛ mą, ya ɓə gaa pai gɛi, mąąhɔlɔɓo, hɛn da hva kpəɲan dɔwɔ. A kpɛɛ kɛa a gɛɛ kɛnɛ̨ɛ tii kalaa, nɔi nɛlɛi kɛɛnąą ɓə a hee laa.

¹⁷ Yili pulu, gaa pa giliŋąhiɛ, ə gɛ, ə mɛ̨nį ta kɛ a nwɔ tɔɔlaai nwɔ huwalawala kəlee, a gbanalaa, yɛ nu a kɛi mɛ̨nį haŋąą kɛ. Gaa pai non nɛ̨ɛ̨nu həɠəi, ə dɛɛ hɛɠɛɛ tɔɔmun bɔ a nɛ̨ą, ə gɛ, ə ɲowo nwɔ lɔi too, kɛlaa, gbanalaai tii hvo pai pɛli.

¹⁸ Yili pulu, gaa pai ɲɛ̨i tinɛ̨n ɉii ə ɉee ɲa kwɛlɛ taaɠaa diɛ, ə damaa həɠə, ə lɛɛ la ɉu, nwea kɔ́kuláá ta ə pa ə nwɔ huɲąŋą kɛnɛ̨ laa di kulɔ ɲəi, ə vɛla hɔlɔɓo.

¹⁹ Nąąlɔwai, gaa pai tinɛ̨n ɉii ə ɲɛ̨i hee bɔ lɔi taaɠaa diɛ, yiiɠaai di mąątínɛ̨n ŋąą a hįi, kɛlaa, hva tɔ̨nɔ̨ hɔlɔɓo yili hu, kɛlaa yaamun, a haa, naa hva kpɛli lɛɛ lɔi mɛ̨i.

²⁰ Nui ŋɛ̨i pai mąąhvalin ɉii, yili a nu ta həɠə ə paa la, ə tɔɔi kɛnɛ̨ tɛɛ bɔ dɔɔlaa hu, ə dɔɔlaa hu hɛnŋaa tamąą həɠə a tɔɔ mɛ̨i. Kɛlaa, hva kpɛli Yələ tamąą kɛ, da dɔɔmun tii nwɔ tɔɔlaai hutaɠa, hva kɛ kɔ́ mɛ̨i, hva kɛ nwɔ̨nɔ̨ liiholi mɛ̨nį hu.

²¹ «Nui pai mąąhvalin ɉii, a kɛ a nui tɔɔlaa mąąwiɛ hvo mą. Ɉulɔnui tii, ɓɛlɔwai nɔi a kɛ la liilaa hu, nąąlɔwai ɓə a dɔɔlaa hɛɠɛ la a gbanalaa túwɔ́.

²² Kɔ kpulu lɔpee ta yee hvo pai pɛlii ma. Gaa pai kɔlaɠa kəlee ɲąąwoloi, ə lɛɛ, nuąi ŋɛ̨i Yálá ə mįnɛ̨ həɠə diɛ, gaa pai di wɔ tɔɔmun dɔ̨nɔ̨ paai.

²³ Ɓɛlɔwai da nuą di kaa pai di yee lɔi la gee hu, gaa pai gbanalaa ta kɛi, ə huwalawala hɔlɔɓo, da nu kpulu logolo.

²⁴ Ɓɛlɔwai nɔi kaa pai kɛi la liilaa hu, nąąlɔwai, gaa pai kɛi lii goɓitaaɠaai ɲąąnɛ̨ɛ̨, ɉu, yii kpɔ galaɓɔlɔni di hvo gɛ li, yɛ gɛ. Gaa pai tooi nuą mɛ̨i, ə di yəi hɛnŋaa həɠə, yɛ ɲąą kwɛlɛ nwɔ nuą diɛ. Taaɠaai mąątínɛ̨n ŋąą a hįi, gaa pai kɛi diɛ: ə kɔ́ pɛlɛ diɛ. Kɛlaa, mɛ̨nįɠaai tii ɉu hvo pai kwɛai.

²⁵ «Gaa pai kɛi a nii kpəlɛɛ naa nwɔ huwalawala la, gaa pai kɔlaɠa kɛnɛ̨ həɠəi, ə li ə pɛlɛ la hɛɠɛɛ tɔɔmun ma. Yili yaan, gaa pai gɛ pələ pɛli, da kɔlaɠa kɛnɛ̨, yii ɲee walawala, ə gɛ, di gɔi tii kɔ́. Kɛlaa, di yee hvo pai lɔi, mąąhɔlɔɓo, gbanalaa ɲɔ̨nwɔ̨ɔ̨ ɓə di kaa pai gɛi la.

²⁶ Yaan, gwɛlɛ nuą leeleeɠaa di kaa pai mowoi, ɲowo yee ə tɛɛ mą, nwɔ kɔ́kulááɠaai gbulu kɛnɛ̨ ə haa.

²⁷ Dɔɔɓɛlaa hveelɛi tii di kaa pai di kee kaai kɛɛnąą tɔ̨nɔ̨, ə gɛ, di pɛli mɛ̨nį tɔ̨nɔ̨ hu, kɛlaa, yɛ pələi nwąnąlɔ kiliŋąhiɛ lɔ ɓə kɛ la diɛ, di kaa pai kɛi lɔ lɛɛ kɛi di kee ɓa, di wɔ ŋąąkpɔn tii nwun va kɛ mą, mąąhɔlɔɓo, yili hva kɛ a ŋaakpɛɛi lɔwai.

²⁸ Ɲanwuɔ̨ tɔɔmun a hɛn gɔw kɛnɛ̨ həɠə, ə pənə yɛ li la bɔ taai. Ɓɛlɔwai a kɛ lííla, pɛlɛi tii ə giliŋąhiɛ la, yɛ hvilɛn na nuąi ŋɛ̨i Yálá ə mįnɛ̨ həɠə diɛ di mąą mɛ̨nį ɓa, a bɔ mɛ̨nį kɛ, yili pulu, ə li bɔ lɔi.

²⁹ «Lɔwai ta a həli, ɲanwuɔ̨ tɔɔmun gaa pai muhəɠəi ə li ɉɛɠɛɛ tɔɔmun bɔɔli, kɛlaa, hva kɛ yɛ pələ dɔlɔɔ tii ə kɛ la.

³⁰ Nuą da həɠə Kitimə lɔi hu hvóló tooi pələ diɛ pa ɓaton ɉu, di pa di pɛlɛ ma. Vii a kpɛɛ, ə pənə bulu, nuąi ŋɛ̨i Yálá ə mįnɛ̨ həɠə diɛ, diɛ ɓə a nwąną kulɔ diɛ, nuą yiiɠaai di hva lɛɛ mįnɛ̨ həɠəə tii ɓa a woo tɔ̨nɔ̨ namɛnaa, da diɛni di pɛli ɉu.

³¹ Yai tii, gaa pai kɔ́kulááɠaa tɔɔi, ə gɛ, di kɔ́ pɛlɛ Yálá nwɔ taai ŋɛ̨i mąątínɛ̨n ŋąą a hįi ma, di kaa pai mɛlɛkpɛɛ ma. Ɉaláái ŋɛ̨i da gulɔ Yálá ɓa a hvoló kəlee, di kaa pai tɔ́n dɔɔi yili ɓa, di ‹mɛ̨nį kɔ́hɔɓoɔ laa ɉaláá kulɔi.›

³² Tɔɔmun gbinį nwɔ hu ɲąŋą kɛnɛ̨ laa mąą mɛ̨nį ɓa, gaa pai kɛi nuą diɛ, ka lənə Yálá nwɔ mįnɛ̨ həɠɛɛ ɓa. Kɛlaa, yiiɠaai da lɛɛ Yálá ɓa a woo tɔ̨nɔ̨ nąmįnąa, da tɔɔ kpaan di túwɔ́ pələ hu.

³³ Nuąɠaai tii lɔwai, yiiɠaai di nwun gaa di hu, da di ɓɛlaa liɛwoo kɛ, kɛlaa, lɔwai tawolo tɛɛ pulu, di kaa pai daɠaa pai, di daɠaa kələn, di daɠaa yəi hɛnŋaa kulɔ di yəi, di di too gaho ŋą.

³⁴ Mələkpɛɛ mąą lɔwai tii hu, di hvo pai kpɔmąą kɛnɛ̨ hɔlɔɓoi nuą yəi. Mąąhɔlɔɓo, nuąi pai tooi di pɔ, di kaa pai gɛi lɔ a yələ kulɔ ɉu.

³⁵ Nwun gɛ ɉu nuąi tii, damaa da haa, di wɔ haai a nuą mąąhəɠə, ə di mąą waa, di kwələ, ə lɛɛ la ɉu, ŋaakpɛɛi lɔwai. Kɛlaa, yili hvo pai kɛi a ŋaakpɛɛi lɔwai.

³⁶ «Yii lɔpee a nɛɛ tɔɔmun ma, ya ɓə gaa pai gɛi. Hu ɲąŋą kɛnɛ̨ kaa pai kɛi ɉu, yə gbɔwɔ kaa yɛ kɛ gɛnɛ̨ɛ dɛɛ alaɠaa diɛ, gaa pai kɛi mɛ̨nį ɓoi alaɠaa di wɔ Yálá ɓa, hva kpɛli ɲɔw. Gɛ mɛ̨nįɠaa kəlee hu kaa pai kɛi nɛɛi, ə lɛɛ la ɉu Yálá nwɔ líiɲąnwąnąi pa hvóló yɛ ɉəli. Nąąlɔwai, yii Yálá ə gbən dee, a naahvɛɛ.

³⁷ Tɔɔmun və pai ɓɛlɛ kɛi galaɓɔlɔni di wɔ yáláɠaai diɛ, ə mą kɛ ala yii nwɛli kaa nɛ̨ą diɛ. Gaa pai kɛi gbɔwɔ kaai yɛ ya ɓə a kɛ a dɛɛ alaɠaa kəlee diɛ, hvo pai ɓɛlɛ kɛi dɔ̨nɔ̨ kpɛli ɓa.

³⁸ A ɲalaɠaai tii mąąhvalin a niin la yálá, yii galaɓɔlɔni di hvo kɛ gɔlɔn. Gaa pai kɛi hɛni, wali kwɛli, da kwɛni kwəlɛɛɠaa, ə mą kɛ hɛn dakpɛliɠaa yiiɠaai mɛlɛ kaa mą, gaa pai kɛ gulɔi nwɔ yálái ɓa a haláá.

³⁹ Gaa pai kɛi kɔ́ pɛlɛi taa huwalawala takpɛliɠaa diɛ nwɔ ala takpɛli tii haalai. Nuąi pai di yee heei nwɔ yálái mu, gaa pai ɓɛlɛ kɛi diɛ, mąą nuąi tii ɓə gaa pai di kɛi a nwɔ tɔɔlaai hu nu kpɛa-kpɛa, yɛ lɔi tee mą, yɛ di hvɛla kulɔ la.

⁴⁰ «Ŋaakpɛɛi lɔwai, hɛɠɛɛ tɔɔmun mə pai kɛa nwɛlikpɛɛ maa laa həɠəi, kɛlaa, yanwuɔ̨ tɔɔmun gaa pai kɔ́ pɛlɛi ma, da nwɔ wotoloɠaai, da nwɔ hoo mɛ̨i hee ɓo nuą, da nwɔ ɓaton gbulu kɛnɛ̨; da nwɔ kɔlaɠai di kaa pai lɔi tamąą hu ɓɔi, di tɛɛ ɲɛn bələ tamąą ɓa, yɛ ya hvɛɛ.

⁴¹ Gaa pai nɔi lɛlɛiɠaa kəlee həɠəi, nu tamąą di ɉu haa ɓo. Kələə Edɔmə nuą, Moabə nuą, da Amɔn nu huwu gbɛa-kpɛaɠaa di wɛi da kulɔ ɉu.

⁴² A lɔi tamąą lɛɛ ɲee mu, ə mą kɛ Eziptə lɔi, a lɛɛ ɲee mu.

⁴³ Gaa pai Eziptə lɔi hu hɛn gɔwɠaa həɠəi, yɛ pələi hɛni kaa la, wali da hɛnŋaa yii mɛlɛ kaa maa. Libi lɔi hu nuą da Etiopi lɔi hu nuą di kaa pai di mąąyɛɛi ɲee mu.

⁴⁴ Kɛlaa, wɛlɛɛ kaa pai həɠəi hvóló həɠəi pələ həɠə, ə nu tamąą nwun na pili.

⁴⁵ Gaa pai nwɔ tɔɔ həɠə pəlɛɠaai tɔɔi gboloyá da ɲee mąąhəɠɛɛ yii gaa nɔi lɛlɛɛ hu, di lɔwai, naa ɓə haa kaa pai həlii laa ma, nui lɔpee ta hva kpɔmąą tɛɛ bɔ.»