Bìoball air-loidhne

Danîa 10 - Yálá laawoo hɛɓɛ (dc)

Daniɛlə nwɔ hįi kaa ɉaaɓanaa

¹ Pɛrsə mun ŋɛ̨i ka kɛ mą Sirusə, yai kɛ a nɔi nwun nąmu, nwɔ tɔɔlaa gwɛlan ɉaaɓa lɔwai, Yálá nwɔ wɛlɛɛ ɓomun da ə wɛlɛɛ ta ɓo Daniɛlə ɓa, yaai naa mɛ̨i hee ɓaa Bɛltsasarə. Nwɛlɛɛi tii ə kɛ a wɛlɛɛ yii mąąnɛ̨ɛ̨ nu ə laa na, mąąhɔlɔɓo, gaa kɔ́ kpɔluɔ mąą mɛ̨nį ɓoi. Daniɛlə ə giliŋąhiɛ, ə ɉįi tii mukulaa kaa.

² Nąąlɔwai tii hu, ɲą́ą́ Daniɛlə, ŋą́ mąąwɛli heeɓo yɛ haa a too nu ɓa, lɔwɔ haaɓa kuu mu.

³ Nąąlɔwai tii hu, və́ kɛi kɔ̨nɔ̨n nɛɛ mįi, və́ kɛi huwɔ mįi, ə ma kpɛli kɛ lɔɔ və́ kɛi gbələ, nɔwɔ haaɓai tii kuu mu, və́ kpɛli nwún ɉu pili, və́ kpɛli gɔ́lɔ mąą liihlɛn ɉee.

⁴ Ɲąnin dɔlɔɔ nwɔ hvóló pow hveelɛ kɔ́w nąąn ɲələ, ɲa lee kɛnɛ̨i ŋɛ̨i da kɛ naa ɓaa: Tigrə, ŋą́ kɛ gwɛlɛ.

⁵ Ŋą́ lɛɛ lɔ ɲɛ̨́i laai, ŋą́ nu ta kaa həɠə kwɛlɛɛ yɛ ɓo mą, ɉąą yiliɛ a hɛni kpɔkpɔɔ həɠə ɓɛla.

⁶ Gɔlɔ ɓa yɛ lən gbɔ yɛ kwɛni kwɛlɛɛ, ɲɛ̨ilaai yɛ lən yɛ malamala a gɛ, ɲɛ̨ikɔw yɛ ɓo yɛ kpalan nən, gɔwɔ da ɲeeɠaa yɛ kpɔlu yɛ da ɓala kwɛli pu. A kɛi hvaa, yɛ ɓo yɛ nu kpulu hvaa woo.

⁷ Ɲą́ą́ Daniɛlə, ɲą́ą́ dɔ̨nɔ̨ gbən ma gɛɛi tii kaa. Nuą ŋɛ̨i kɛ gwɛ́lɛ, di hvo gaa. Kɛlaa ə mą kɛ tii, di ɲɔw di gilɛ həɠə diɛ li di loɔi.

⁸ Ɲą́ą́ dɔ̨nɔ̨ gbən lɔ ɓə kɛa lɛɛ laa, gɛ́ gɛɛ maapɔlɔɔ tii kaa. Nąąlɔwai tii hu, vįi ə kpɛɛ, ɲɛ̨́ilaai maa ə hvalin, ɲɛ̨́i ə həɠə naai. Ŋą́ kɛ lɔ kɛa tii, ɉú aa haa, hvaŋą lɔpee ta hvo kɛ ɲə́i.

⁹ Ŋą́ nui tii woo mɛ̨n, woo mɛ̨n tii ŋą́ moi, ɉú ə pu mą́ą́, ŋą́ pɛlɛ nɔi ɓa.

¹⁰ Nąąlɔwai, nu ta ə ɲee too ɉú, ə múhəɠə, bɛlɛɛ nɔi ɓa yɛ nu a kɛi tala, mą́ą́ yɛ kpɛlin.

¹¹ Nui tii ə mo mą́ą́, yɛ mą́ą́: «Daniɛlə, ə́ wɛli kaa Yálá ɓa, gɛ pələ kwɛli mą, nwooɠaai ŋɛ̨i gáá moi yɛ́, ə́ ŋąą kaa. Həɠə ə́ tɔɔ, mąąhɔlɔɓo, yɛ́ bə ŋą́ pa ə́ pɔ háákələi.» Ə mo lɔ tii, ŋą́ muhəɠə ŋą́ tɔɔ, mą́ą́ yɛ ni kpɛlin.

¹² Ə pənə nwɔ̨nɔ̨, yɛ mą́ą́: «Daniɛlə, hvo ɲɔw, ə həɠə kpɔ voló tɔlɔɔi tii ə́ ə́ wɔ kpɔɔmąąyɛɛ laa lɛ la Yálá ɓa, yɛ́ naa ə́ kwəi yɛ́ kɛ diɛ, mɛ̨nįɠaai pai kɛi ə́ gbaɠala kaa, Yálá aa ə́ wɔ hvɛliɓo woo mɛ̨n. Ŋą́ pa, ə gɛ, ŋą́ nwoo ŋąąpənə tɛɛ ə́ pɔ.

¹³ Kɛlaa, Pɛrsə lɔi mąąkpɛ malaka ə kpəɲan mɛ̨nį tii hu hvóló pow hveelɛ gɔw tɔ̨nɔ̨ kuu mu, hvo kɛli Misɛlə yii gaa a malakaɠaa nwun nąmu tɔ̨nɔ̨, ə pa ə kpɔmąą tɛɛ bɔ́. Ŋą́ lɛɛ heeni Pɛrsə lɔi nwun nąmįnąa kwɛlɛ.

¹⁴ Yii hu kɛa, ŋą́ pa, ə gɛ, mɛ̨nį pai həlii ə́ huwu ɓa, ŋą́ ɉukulɔ yɛ́, mąąhɔlɔɓo, ɉįi ŋɛ̨i yaa gaa, vilɛn ŋąą nɔwai tii mąą mɛ̨nį ɓa.»

¹⁵ Ɓɛlɔwai ə kɛi mɛ̨nįɠaai tii ɓo la mą́ą́, nwún vilɛn ŋąą kɛ nɔi ɓa, və́ kpɛli pɛli woo ta ɓoi.

¹⁶ Kɛlaa, ŋą́ hɛn da kpɛli kaa, gɛ pələ ə ɓo yɛ nu, ə pa, ə ɲee hee náá wulun ma, gɛ́ tɛɠa pɛli hvaai. Nui ŋɛ̨i kɛ tɔɔni ɲɛ̨i tɔwɔ, ŋą́ mo mą, gɛ́ mą: «Nwɔ́ mɛ̨nį Nąmu, gɛɛ ɲɛ̨i ŋą́ą́ gaa, aa gwə́i pili mą́ą́, hvaŋą hvo kpɛli lɛɛ li ɲə́i.

¹⁷ Ɲą́ą́ kpɔ ŋɛ̨i a nu gɛ́ ɓo a luwɔ kpɛli-kpɛli, dɔ́ɔ́i ɓa mį, kwa nwɔ́ mɛ̨nį Nąmu kuɔ pə́lə́ ɓo, ɲą́ą́ ŋəi hvaŋą hvo ɲə́i, nɔw kpɛli hvo kɛa ɉú?»

¹⁸ Ɲąąɓa, yii tii gɛ pələ ə kɛ ɲɛ nu, ə ɲee hee mą́ą́, ə gɛ, ŋą́ pənə ŋą́ hvaŋą hɔlɔɓo.

¹⁹ Nu yii tii yɛ mą́ą́: «Hulɔnu, yɛ́i ŋɛ̨i ə́ wɛli kaa Yálá ɓa, hvo ɲɔw! Liilaa ə kɛ ə́ yəi, ə́ hvaŋąlɔ, ə́ ə́ huwalawala.» Ɓɛlɔwai ə kɛi yiliɠaai ɓo la mą́ą́, huwalawala ə kɛi tɛɛ ɓɔ́. Ŋą́ mo mą nąąlɔwai, gɛ́ mą: «Nwɔ́ mɛ̨nį Nąmu, nwə́li tɔɔi ə́ woo ɓa, mąąhɔlɔɓo, yaa huwalawala tɛɛ ɓɔ́.»

²⁰ Ə mo mą́ą́, yɛ mą́ą́: «Mɛ̨nį gɛ gɛ́ pa ə́ pɔ, ə́ nwun gɔlɔn? Yii hu, gáá pənəi ŋą́ li ŋą́ kɔ́ pɛlɛ Pɛrsə lɔi mɛ̨i kaa malaka ɓa. Ɓɛlɔwai kpɔlɔ gáá paai li la, Grɛkə lɔi mɛ̨i kaa malaka kaa pai pai.

²¹ Kɛlaa, yii bɛ̨ɛ̨ tɛ̨ą hɛɓɛ́ hui, ya ɓə gáá naa həlii yɛ́, nui lɔpee ta hvo pai kpɔmąą tɛɛ bɔ́ kwa malakaɠaai tii ku wɔ kɔ́i hu, hvo kɛli Misɛlə yii gaa a Israɛlə nu huwu mɛ̨i kaa malaka.»

« Roimhe

Air adhart »

Bible Society in Guinea-Conakry

Lean sinn:

Ceanglaichean taic

Sanasan