Barukə 5 - Yálá laawoo hɛɓɛ (dc)

¹ Ɉerusalɛmə, mɔ̨nɔ̨ həɠə da mąąwɛli həɠə kulɔ ə kwaną, ə́ mąąyili a lɛlɛ da mąąwiɛi Yálá mąąɲinɛ̨n gɛnɛ̨ kaa pai dɛɛi ə́ pɔ.

² Tələmo gbaawii too ə́ kwaną, ə həɠə Yálá yee ɲą, mɔlɔi a Yai Gaa Lɔ Laa mąąɲinɛ̨n, nɔ ə́ nwuɔ̨.

³ Mąąhɔlɔɓo, Yálá kaa pai yɛ́ lɛlɛ ɲɛ̨itɔɔ lɛi, lɔiɠaa kpɔ yələkɔlɔn mu, gəlee diɛ,

⁴ gaa pai naa ɲɛ̨i tɛɛi ə́ pɔ a yələ kəlee mɛ̨nį: «Tələnmo liilaa da mąąɲįnɛ̨n mąąwiaa.»

⁵ 'Haŋąn ə́ tɔɔ, Ɉerusalɛmə, ɲee ton na, ə́ ə́ ɲɛ̨i tinɛ̨n volo həɠəi bələ; ə́ ə́ lonnii kaa, daa həɠə volo ɓɛlai bələ, ə həli la volo tooi bələ, a Mąąhəɠəmun nwoo, di kaa kwəinɛ̨ɛ̨ hu, mąąhɔlɔɓo, Yálá aa gili hvilɛn diɛ.

⁶ Ɓɛlɔwai di kɛli kulɔ la di pɔ taai, di kɛ di kɔwɔŋą, di yowoɠaa diɛ di pili pili, kɛlaa Yálá kaa pai pənəi ə pa a diɛ ə́ pɔ, diɛ di kpə́ŋə a ɲɛ̨ipono, yɛ tɔɔkpəlin mąąwiaa.

⁷ Mąąhɔlɔɓo, aa mo yɛ, yee kəlee mąą ə yɛɛ, gbea kpea mąn, bɛlɛɛ pɛlɛɛ mąn, aa mo daa ɓoloon gəlee laahvɛɛ, lɔi mɛ̨i yɛ lala, ə gɛ Israɛlə ə pɛli lii a gɔwɔ latəɠɛɛ Yálá mąąɲįnɛ̨n ɉu.

⁸ Ə mą kɛ welaɠaa ɓə, da wului kpɔ gunnɛ̨ɛ̨, ə di tí, yɛ di di nįnį bɛlɛ Israɛlə mɛ̨i.

⁹ Mąąhɔlɔɓo, Yálá kaa pai lii a Israɛlə, nwɔ kɛɛpono mąąwiaa hu, a kwəinɛ̨ɛ̨. Ɲɛ̨imąąwɛli da tələnmolaa, diɛi a yaa ti nwɔɔ.