Barukə 2 - Yálá laawoo hɛɓɛ (dc)

¹ Mɛ̨nįi Nąmu Yálá ə mo kuɔ, kwa ku ɲɛ̨itɔwɔ nuąi kɛ Israɛlə ɲąąwooɓo da ku wɔ tɔɔɓɛlaai, ə mą kɛ Ɉuda lɔi da Israɛlə lɔi hu nuą, ə nwooi tii pɔ mɛ̨nį kɛ.

² Ɓɛ yɛnɛ̨ɛ̨ nąą kəlee, mɛ̨nį ɲąąnwąnąąi ɲɔ̨nwɔ̨nmąn da hvo ta həli li mɛ̨nįɠaai kɛ Ɉerusalɛmə di pɔ, yɛ bələi bɛ̨ɛ̨ la Moisə nwɔ tɔn ɉɛɓɛ́i hu;

³ ɲąąnwąną pələ, nuą di kɛli di lonnii mįi.

⁴ Nąmu ə di too di kwɛlɛ lɔiɠaa yee ŋą́, yɛ di ɲɛ̨i paa, yɛ di mąąwɛli di kwɛlɛ lɔiɠaa kəlee hu, nɔiɠai tii ə di taɠaa taɠaa ɉui.

⁵ Di kɛ di ɓɛlaa yeemu, diɛi tii mąąnɛ̨ɛ̨ kɛ di heemɛ̨i laa kɛli, mąąhɔlɔɓo ku nɛ̨ŋɛ̨n ɉəɠə ku Nąmu Yálá ɓa, ku hvo ku wəli tɔɔ li nwoo ɓa.

⁶ Ku Nąmu ku wɔ Yálá nwɔɔ ɓaa a tələnmolaa, kɛlaa kwa ku nąnni ku wɛi aa lɛɛ háákələi a ɲɛ̨ipaa da nwumɛ̨.

⁷ Mɛ̨nį ɲąąnwąnąąɠaai kpɔ laa kuɔ, Nąmu ə gəlee ɓo kuɔ.

⁸ Ɛlɛɛ, ku hvo ku Nąmu Yálá hvɛli li, ku hvo tinɛ̨n ni ku hvo həɠə ku wɔ túwɔ́ pələ ɲɔ̨nŋaa pulu.

⁹ Ya ɓə gɛ ku Nąmu Yálá ə tɔɔ a nwąnąi yɛ mɔ̨nɔ̨ɠai tii laa kuɔ, mąąhɔlɔɓo dəlimo kolóɠai kpɔ ə ku tí la yɛ ku gɛ,

¹⁰ kɛlaa ku hvo ku wəli tɔɔ nwoo ɓa, ku hvo gɛ yɛ bələi ə ku tí la.

Nɛ̨ɛ̨mąą hvə woo

¹¹ Yiihu kɛa, yɛ́i a Israɛlə ɲąąwooɓo Yálá, yɛ́ ɓə ə́ wɔ nu kanŋaai kulɔ Eziptə lɔi hu, a ə́ wɔ yee wala wala laa, a kpalo mɛ̨nį ɲɛ̨i kɛnɛ̨ɛ̨ɠaa, a ə́ hvaŋą kɛnɛ̨ɛ̨, a ə́ yee kɔn ɉu wala walaa, ə́ ə́ kpɔwɔ laa tɛ yɛ bələi di kaa gaai la háákəlee.

¹² Kwaa nɛ̨ŋɛ̨n ɉəɠə, kwaa túwɔ a ɲɔ̨nwɔ̨ɔ̨, kuɔ hulú kɛ, kuɔ kulɔ la tii ə́ wɔ tɔn nwooɠai mu, ku Nąmu ku wɔ Yálá.

¹³ Ə́ wɔ liiholii həɠə ku mɛ̨i, hvo gaai kwaa lɛɛ ku kpɔwɔ ɓa, ku kpulu hvo kɛnɛ̨ li nɔiɠaa hu, ɓɛɠai ə́ ku taɠaa taɠaa laa.

¹⁴ Ku Nąmu, ə́ wəli tɔɔ ku wɔ hvɛli wooi ɓa, ɉɛn ku kaa vɛlii yɛ́ dɛɛ kupɔ, ku kulɔ mɛ̨nįi ə́ laa mąąwiaa mąą mɛ̨nį ɓa, nuąi pa ɓɛ a kuɔ, gɛ di di ɲɛ̨i lɛlɛɛ hee kuɔ,

¹⁵ lɔi kəlee ə gili kɔlɔn diɛ yɛ ɓə ə kaa a Huwalawala Kəlee Nąmu ku wɔ Yálá, mąąhɔlɔɓo di ə́ laa təli Israɛlə mɛ̨i da ɉuwu.

¹⁶ Ku Nąmu ku wɔ Yálá, lɛɛ ə́ wɔ pɛlɛ́ mąąhəɠɛɛi mu yələi, ku kili ə too ə́ ɲą, ə́ ə́ ɲɛ̨i pili ku mɛ̨i, ə́ ə́ wəli tɔɔ;

¹⁷ ə́ ɲɛ̨ilaaɓo, ɓɛ kaa li haa nuąi tii ɲąmuątaa, diɛi tii di nɔ̨w aa kulɔ di yəi, diɛ hvo pai Nąmu nwɔ mąąwiɛ laa da nwɔ təlimo laa hukulɔi.

¹⁸ Kɛlaa, nui ɲɛ̨i mąą aa wɛli, gwəi aa pili mą, ya ɓə, yɛ hiɛ, gbįnįnŋąą, vįįkpɛɛ, ɲɛ̨i yɛ kpįnį mą, pulú ə ɓo mą, ya ɓə pai ə́ wɔ mąąwiɛ da ə wɔ tələnmolaa lɛi, ku Nąmu.

¹⁹ A kɛ ti, ku kili hvo tɔɔ li ku nąnni da ku wɔ tɔɔɓɛlaa di wɔ tələnmolaa túwɔ ɓa, kuɔ ku wɔ hvɛli woo laa həli yɛ́, ku Nąmu ku wɔ Yálá;

²⁰ mąąhɔlɔɓo yaa ə́ wɔ liiholii da ə́ wɔ nwąną kulɔ hee ku hu, yɛ́ bələi ə́ gbɛa mo la, yɛ́ bu ə́ wɔ tínuą da ə́ kwəi mɛ̨nį hukulɔ nuą la, yɛ́ kɛ diɛ:

²¹ «Nwooi Nąmu kaa moi ya ka: Ka ka ɓowon mąą yɛɛ, ka tí Babilonə tɔɔmun ma, ɛlɛɛ nɔi ŋą́ dɛɛ ka nąnni pɔ kaa lɛɛ heeni ɉu.

²² Kɛlaa ka wala ka wəli tɔɔ Nąmu woo ɓa, yai kɛ kaa ka tí Babilonə tɔɔmun ma,

²³ gáá pai kwəinɛ̨ɛ̨ woo, mąną kaa wələ, nąŋąlon nɛ̨ą həɠəi a ninɛ̨ da nɛ̨ɛ̨non lii hilɛtai di wɔ wələ woo kpɛɛi Ɉuda taaɠaa hu da Ɉerusalɛmə daai; nɔi nąą kəlee a lɛɛ a gboloon, nu hva kɛ ɉu.»

²⁴ Kɛlaa, nwooi tii kɛli kɛ ku lɛ́ɛ Babilonə yeemu, ku hvo kɛli ku wəli tɔɔ mą, yili ɓə gɛ mɛ̨nįɠaai ə́ di ɓo ə́ wɔ tínuą diɛ, diɛi a ə́ kwei mɛ̨nį hukulɔ nuą, di pɔ mɛ̨nį ə kɛ: Ku wɔ tɔɔɓɛlaai da ku nąnni kɔwɠaa da di kulɔ di kámą hu.

²⁵ Ɛlɛɛ yaan, di di pili hvoló kələn ŋą́, da kwɛlɛ kɛnɛ̨ hu kpįnįi, di haa pələ ə ɲɔ̨nwɔ̨, monɔ̨ kɛnɛ̨ hu, pulu yei, kɔ kɔ ɓowa da luwɔlaa hu;

²⁶ ɛlɛɛ bɛlɛ́i tii di kɛli ə́ hvɛli mu, ə́ gɛ yɛ bələi gaa la yiihu, Israɛlə lɔi da Ɉuda lɔi di kiliɲɔ̨nwɔ̨ɔ̨ laa pɔɔ hu.

²⁷ Ɛlɛɛ yaan, ə́ ku hon a telemolaa kɛnɛ̨, ɛlɛɛ da nu ɲɛ̨i mąąwɛlikaa pələ kɛnɛ̨, ku Nąmu Yálá,

²⁸ kpɔlɔ yɛ bələi ə́ gbea mo la, ə́ wɔ tímun Moisə ɓa, ɲələi ə li la yɛ dɔn ɉɛɓɛ́ pɛ̨ɛ̨ Israɛlə lonnii ɲɛ̨i ɓa, yɛ́ kɛ mą:

²⁹ «Ka wala ka wəli tɔɔ nwóó ɓa, nu kpulu kɛnɛ̨i ŋɛi mąą a pənə a nu kpulu wolo tiikpə, nɔiɠai ŋą́ di taɠa-taɠaa di hu;

³⁰ mąąhɔlɔɓo, gbaɠala kaa mą́ą́, gɛ́ di hvo pai di wəli tɔɔi mą́ą́, mąąhɔlɔɓo nu kan nwun ɉuwala-walaa li, kɛlaa da di kwei kili mąąhvalin, ɓɛi tii di kaa pai lii laa a diɛ luwɔlaa hu,

³¹ da gili kɔlɔn diɛ ɲą́ą́ ɓə a Nąmu, di wɔ Yálá, ŋą́ kili da wəli tɛɛ di pɔ diɛ pɛli mɛ̨nį mɛ̨n ɉii.

³² Di kaa pai mą́ą́wiɛi nɔi ti di kaa ɉu a luwɔ, diɛ di kili hvilɛn náá ɓa.

³³ Di kaa pai lənəi di wɔ wəlii kpɔlɔ ɓa da di kɛ mɛ̨nįɠaa ɲɔ̨nwɔ̨ɔ̨, mɛ̨nįi laa di nanni diɛ, diɛi tii nɛ̨ŋɛ̨n ɉəɠə Nąmu ɓa, nąą kili a too di ŋą́.

³⁴ Gɛ́ kea pənə gɛ́ pa a diɛ, nɔi tii ŋą́ naakwəlan mo di nąnnii diɛ ɉu, Abrahamə, Isaakə da Ɉakɔbə da kɛ laa a lɔi nąmįną; ŋą́ di ɓuwuɓo, di hva lɛɛ a nu kpulu logolo.

³⁵ Ŋą́ yələ kəlee minɛ̨ laa kwa diɛi ku lɔwai, gɛ́ kɛ́ a di wɔ Yálá, diɛ kɛ a nwɔ nu kan; ɛlɛɛ vá kɛa nwɔ́ nu kan Israɛlə kulɔ nɔi tii ŋą́ dɛɛ di pɔ ɉu.»