Barukə 1 - Yálá laawoo hɛɓɛ (dc)

Ɉɛɓɛ́ nwunɲą haɠaa ka

¹ Ɉɛɓɛ́i Barukə ə bɛ̨ɛ̨ Babilonə, ɉu woo ka: Neriasə lon, Maaseasə lon, Sedesiasə lon, Hasadiasə lon, Helkiasə lon,

² gwəlan nɔɔli nąą, ɲąnįn nwɔ hvoló mɛ̨ihveelɛ nąą, ɓɛlɔwai Kalde nuą di Ɉerusalɛmə hon na diɛ nwɔn doo ɉu.

³ Barukə ə ɉɛɓɛ́i ŋɛ̨i ɓo Ɉuda tɔɔmun Yoyakin lon ɲɛ̨i ɓa, Ɉoakimə lon, da nuąi kpɔ pa ɉɛɓɛ́ hu woo mɛ̨n ɉii,

⁴ nɔi ɲąąwooɓonuą ɲɛ̨i ɓa da dɔɔɓəlaa lonnii da nɔi nąmįną, nɔi lonnii kəlee ɲɛ̨i ɓa ə həɠə bɛlɛɛ pɛlɛɛ ɓa ə həli la gbɛa kpɛa ɓa, nuąi kpɔ kɛ Babilonə Sudə ya kwɛlɛ.

⁵ Nuą di kɛli wɔlɔ, diɛ hin nɔ diɛ hvɛliɓo kɛ gu Nąmu liila.

⁶ Yili pulu, di di yee ɲąąkpɔn yɛ bələi nu kəlee nwɔ yee pɛli mąą laa kaa la;

⁷ di dɛɛ Ɉerusalɛmə ɉaláá laahəli mun Ɉoakimə ɓa, yai kɛ a Salomə lon, Helkiasə nwɔ lon, da ɉaláá laahəli nuą takpɛliɠaa, ə mą kɛ nuąi kpɔ da diɛni di kɛ Ɉerusalɛmə.

⁸ Nąąlɔwai Barukə aa kɛ Nąmu Yálá nwɔ pɛlɛ́i mu hɛnŋąą həɠə, ɉaláá kulɔ pɛlɛ́ mu, ɛlɛɛ, aa kɛ pənə aa di tɛɛ Ɉuda lɔi hu, sivan ɲąnįn nwɔ hvoló pow yələ, ɉɛnŋąąi tii Ɉuda tɔɔmun Ɉosiasə lon nwɔ lon Sedesiasə ə di pɛli a wali kwɛli, diɛ ɓə kɛ.

⁹ Ɓɛlɔwai Babilonə tɔɔmun Nabukodonosorə ə Yoyakin hon na Ɉerusalɛmə, yɛ li la luwɔlaa hu Babilonə, da nɔi ɲąąwooɓo nuą, ɲɛlɛkɛ nuą ə mą kɛ nu kpɛa kpɛaɠaa da nɔi nuą takpɛliɠai tii.

¹⁰ Diɛ diɛ: Kwaa wali tɛɛ kaa, ka taa tɛlɛɛɠaa ya a nwali tii, kaa Yálá mąąwiɛ halaa da nɛ̨ŋɛ̨n mąąhvaalɛɛ halaa kulɔ la, ə mą kɛ lansan; ka Yálá kɔ hɛnŋąą pɛli la, kaa li la Nąmu Yálá nwɔ pɛlɛ́i mu.

¹¹ 'Ka Yálá hvɛli Babilonə tɔɔmun Nabukodonosorə nwɔ yɛnɛ̨ɛ̨ mąą mɛ̨nį ɓa, da non Baltasarə, di wɔ yələi ə kɛ yɛ hvolói gaa lɔi mɛ̨i.

¹² Gu Nąmu Yálá ə hvaŋą tɛɛ ku pɔ, ə ku ɲɛ̨i hvoloon kuɔ pɛli yíi Babilonə tɔɔmun Nabukodonosorə da non Baltasarə di nįnį mu, kuɔ tí diɛ a ɉu kwɛaa, kuɔ di lii hon.

¹³ 'Ka Yálá hvɛli kuɔ kpɛli mąn kuɔ, mąąhɔlɔɓo kwaa nɛ̨ŋɛ̨n ɉəɠə gu Nąmu Yálá ɓa, ɛlɛɛ ə mą kɛ háákələi hvolói yeemu, nwɔ liiholii hvə ni həɠə li ku mɛ̨i,

¹⁴ Ka naa kulɔ a ɉɛɓɛ́i ŋɛ̨i ku kaa dɛɛi kaa, moi ka mo, kaa pɛli hvaai ka kɛ nɛ̨ŋɛ̨nŋaa diɛ gu Nąmu yəi bɛlɛ́n aa ɉɛli yələ da hvoló yiiɠai ka gaa a nɛlɛɛ.

¹⁵ Kaa kɛ diɛ: Ku Nąmu Yálá nwɔɔ ɓaa təlimo laa, kɛlaa ku wɛi aa lɛɛ háákələi hvolói mu a ɲɛ̨ipaa, a nwumɛ̨, Ɉuda diɛ da Ɉerusalɛmə nuą diɛ.

Di kaa di wɔ nɛ̨ŋɛ̨nŋaai hukulɔi Hvaa gɛ nɛ̨ŋɛ̨n ma

¹⁶ Ku wɔ tɔɔɓɛlaa, ku ɲąąwooɓo nuą, ku wɔ halaa laahəli nuą, Yálá laawoo hukulɔ nuą da ku nąnni.

¹⁷ Mąąhɔlɔɓo kwaa nɛ̨ŋɛ̨n ɉəɠə Nąmu Yálá ɓa.

¹⁸ Ku hvo lɛɛ li bulu, ku hvo ku nąn Yálá woo mɛ̨n ni li; tiɓoɠaa ə dɛɛ ku pɔ, ku hvo di kɛ li.

¹⁹ Ə həɠə ɲələi tii Nąmu ə ku nąnni kulɔ la Eziptə lɔi hu, ə həli la háákələi ɓa, ku hvo ta kpɛla li ku woo kalai ku Nąmu Yálá yəi, kwaa ku nwun gulɔ nwoo mu, ku hvo kɛli ku wəli tɔɔ nwoo ɓa.

²⁰ Ya ka tii háákəlee mɛ̨nį ɲąąnwąnąąɠaa daa yili kuɔ, da nɛ̨ŋɛ̨nnaa wooi Nąmu ə nwɔ tímun Moisə tí la, yɛ mo a ɲələi ə ku nąnni kulɔ la Eziptə lɔi hu, yɛ lɔi tɛɛ di pɔ ɓɛi hihɛn gəlee a lɛlɛ laa.

²¹ Ku hvo ku wəli tɔɔ Ku Nąmu Yálá woo ɓa, yɛ bələi gwəi mɛ̨nį hukulɔ nuąi ə kɛli di tɛɛ kuɔ di kɛli mo la kuɔ;

²² kɛlaa ku hvilɛnŋąąi ku kwəi kili ɲɔ̨nwɔ̨ɔ̨ɠaa pulu, kuɔ tí haliɠaa diɛ, a mɛ̨nįi tii ɲɔ̨nwɔ̨ɔ̨ gu Nąmu gu wɔ Yálái ɲɛ̨i ɓa.