Azaya 8 - Yálá laawoo hɛɓɛ (dc)

Esai ə lon gaa di laa mąąpɔlɔɔ hee mą

¹ Yai-Laa yɛ mą́ą́: «Kpəlin mɛla ta həɠə, ə́ hɛɓɛ́ pɛ̨ɛ̨ mą a wulu kpiɛ ta: Mahɛrə-Salalə-Hasə-Bazə nwɔ.»

² Nuąi da pɛli laai di la, ŋį́ di həɠə a kɛla, diɛ ɓaa a: ɉaláá laa həli mun Uriya, da Yeverekiahu lon Ɉekariahu.

³ Kwa Yálá kwəi mɛ̨nį hukulɔ nɛ̨ɛ̨nu ku lɔ pɛlɛ́n; ə koo həɠə, ə lon ɉulɔnu kaa, Yai-Laa yɛ mą́ą́: «'Naa hee a: Mahɛrə-Salalə-Hasə-Bazə;

⁴ mąąhɔlɔɓo, gɛɛ nolokolo hvo pɛli kɛi diɛ ‹ną́n› da ‹néé›, di kaa pai lii Asiri tɔɔmun níi la a Damasə hɛn gɔwɠaa da ɉɛnŋąąi di ɉɔlɔɓo kɔ́ hu Samari lɔi hu.»

Asiri kɔ́i

⁵ Yai-Laa yɛ nwɔ̨nɔ̨ mą́ą́:

⁶ Yii nuąi ɲɛ̨́i kaa lənəi Siloe yai a tɛɛ ɲąą mą, ɛlɛɛ di kwəi nɛ̨́ɛ̨́ mɛ̨nį ə ɓo a Resin mɛ̨nį da Remaliahu lon mąą mɛ̨nį.

⁷ Yili mąą mɛ̨nį ɓa, Yai-Laa kaa pai yalee hvaŋą kɛnɛ̨ hvɛɛi ə dɛ diɛ. Ya ɓaa a: Asiri tɔɔmun da mąą ɲinɛ̨n gɛnɛ̨ɛ̨, gaa pai hvɛɛi, ə həɠə naai yɛ hiɛ kɛɛnąą kəlee ɓa.

⁸ Gaa pai həlii Ɉuda lɔi ɓa, yɛ hiɛ mɛ̨i, yɛ nąą kəlee hvɛɛ, yɛ həli kpɔ nu kwąną, ɛlɛɛ ɲąą kɛnɛ̨ pələ, Oo Ɛmanuɛlə, gaa pai yɛ́ lɔii laa hvɛɛi nąą kəlee.

Yálá kaa ku pɔ

⁹ Nu-kanŋąą, 'ka kpɛlin, 'ka kwəi ə pili kaa a mɔ̨nɔ̨! 'Ka ka wəli tɔɔ, kwɛala lɔiɠaa, kaai kpɔ lɔi mɛ̨i ɓɛ yɛnɛ̨ɛ̨! 'Ka ka hu yili kɔ́ kɔ́ mɛ̨nį ɓa, ɛlɛɛ, di ka hu wolo! 'Ka ka hu yili kɔ́ kɔ́ mɛ̨nį ɓa, ɛlɛɛ, di ka hu wolo!

¹⁰ 'Ka mɛ̨nį kili tee ka kwəi, ɉu kaa pai kalai; 'Ka mɛ̨nįɠaa ɓo, Kɛlaa, gəlee da lɛɛ a kpɛli, mąąhɔlɔɓo, Yálá kaa ku pɔ.

Ka ɲɔw Yai-Laa yaa tɔ̨nɔ̨ mą

¹¹ A tɛ̨ą, Yai-Laa ə mɛ̨nįi ŋɛ̨i ɓo mą́ą́, ɓɛlɔwai ə ɲee pɛlɛ la mɛ̨́i, ə gíli ɲą pɔ̨nɔ̨, ə gɛ və́ hvilɛn nu huwui ɲɛ̨i túwɔ pələ pulu; yɛ mą́ą́:

¹² «Mɛ̨nii lɔpee nu huwui ŋɛ̨i a kɛ mą: ɲaba lɔ mɛ̨nį, ka hvo kɛ mą ɲaba lɔ mɛ̨nį, mɛ̨nįi da ɲɔw mą, ka hvo ɲɔw yili ɓa, hvo ɲinɛ̨n ɲinɛ̨n doo ka hu.»

¹³ Mɛ̨nį Kəlee ŋą Hééɓomun Yai-Laa lɔ ɓə mąąnɛ̨ɛ̨ ka gaa a mąąhəɠɛɛ, ya ɓə mąąnɛ̨ɛ̨ ka mąąwiɛ, ya ɓə mąąnɛ̨ɛ̨ ka ɲɔw mą.

¹⁴ Gaa a pɛlɛ mąąhəɠɛɛ Kɛlaa gaa a kwɛnii da kalin mą; gaa a nuą kɔ́wɔ tuwɔ kwɛni kpuɠulu Israsrɛlə nwɔ pɛ́lɛ́i, da Ɉuda nwɔ pɛ́lɛ́i diɛ, ə ɓo a tumɔ̨ da ɓaalə Ɉerusalɛmə nuą diɛ.

¹⁵ Nu tamąą kaa pai kalin ɉi mą diɛ too, di hu yɛ yali, diɛ kɔ́ a ɓaale, diɛ di hon a luwɔ.

Mɛ̨nįi Esai ɲɛ̨i kaa dɔwɔ, gilitɔɔ mą

¹⁶ Ɉɛɓɛ́i ŋɛ̨i laa kpulu, mąąkwɛli wooi ŋɛ̨i loo ɲéépɔ nuą diɛ.

¹⁷ Gáá Yai-Laa mąąkpɔn ɉii, yai aa ɲɛ̨i loo Ɉakɔbə nwɔ pɛlɛ́i ɓa, gílitɔɔi mą.

¹⁸ Ɲą́ą́ kwa nónnii Yai-Laa ə di tɛɛ bɔ́, kuɔ ka; ku kaa a mɛ̨nįi pai kɛi Israɛlə lɔi hu, kɔ́lɔn ɉɛnŋąą, da dɔwɔ wɛlɛɛ, yai həɠə Yai-Laa Mɛ̨nį Kəlee ŋą Hééɓomun pɔ, a yai heeni Siɔn yee nwuɔ̨.

¹⁹ Akɛtii da kɛ kaa: «'Ka ɲɔ̨muątaa tɔlukpɛnuą mąąni kɛ, 'ka tɔlukpɛnuą, ɲɛ̨ąkpɛnuą, da kpɛɛn bili nuą di mąąni kɛ, akɛ tii, mąą hvo nɛ̨ɛ̨li nuą diɛ di wɔ haliɠaa mąąni kɛ, ɛlɛɛ, diɛ ɲɔ̨muą hvɛli nu hulúɠaa mąą mɛ̨nį ɓa?»

²⁰ A kɛ tii, 'ka ɉɛɓɛ́ hu kaa, da mąąkwɛli woo, da wala hvaa yɛ bələi ɉɛɓɛ́i tii hu woo kaa la, a kɛ tii yələ hvo ɓɔli di mɛ̨i.

Nui gaa lɔ kpinį hu

²¹ Di kaa pai nɔi hu ɓɔi, mɔ̨nɔ̨ həɛ di mɛ̨i, pulu ə ɓo diɛ, pulu a di lii yali di kwəi, diɛ di wɔ tɔɔmun da di wɔ Yálái nɛ̨ŋɛ̨n naa; di kaa pai di ɲɛ̨i heei yələi pələ;

²² Ɛlɛɛ, di di ɲɛ̨i hee lɔi ɓa pələ, kwəi pili, mɔ̨nɔ̨ da kpinį lɔ ɓə di kaa pai kɛi gaai, kpinį huwui a nu lii kulɔ mą kpinįi da nu pili ɉu.

Liilaa Tɔɔmun

²³ Kɛlaa nɔi tii kɛ liihɛlɛn ɉu, kpinį hvo kɛa pɛlɛ li mɛ̨i. Tɔlɔɔ tɔlɔɔ yələ, Yai-Laa ə gbɛa gbala tɔɔ ə Zabulɔn lɔi, da Nɛftali lɔi di ɲɛ̨i paa a nwumɛ̨, Kɛlaa yili pulu, bələi tii a li gboloyá pɔ pələ, a Ɉurdɛn pulu pələ lɔi, da hį́i takpɛli lɔi, aa di mąąwiɛ.