Azaya 7 - Yálá laawoo hɛɓɛ (dc)Yai-Laa ə wəlɛɛ tɔɔ Akazə pɔɔli 1 Ɓɛlɔwai Yotamə lon Akazə ə kɛ la a tɔɔmun, Oziasə yɛ ɓo a Ɉuda tɔɔmun, ɛlɛɛ, Resin yɛ ɓo a Aramə tɔɔmun, Remaliahu lon Peka yɛ ɓo a Israɛlə tɔɔmun, di li kɔ́ pɛlɛi Ɉerusalɛmə taa ɓa; kɛlaa di hvo pɛli ɉon ɉii. 2 Di li di nwɛlɛɛ ɓo Davidə yəi bɛlɛ́n nuą diɛ, diɛ mą: «Ɛfraimə nuą daa Aramə nuą heei kulɔ di pɔ lɔi.» Nąąlɔwai, tɔɔmun Akazə da nɔi lonnii di mąą yɛ kpɛlin, yɛ hvaŋą a kɛi wuluɠaa kpɛlin. 3 Yai-Laa yɛ Esai ɓa: «Yɛ́ ka ə́ lon Searə-Yasuvə, ka li ka həli Akazə ɓa bowa ya kɛnɛ̨ kwɛlɛ, ɲánwuɔ̨ pələ, ɉəɠə waa yɛɛ kɔwɔi pələi pɔ pələ, 4 ə́ mo mą, yɛ mą: «‹Ə́ líí laa yɛ́, hvo ɲɔw, ə́ líi hvo kulɔ yɛ́ gwɛi kpuwɔ hveelɛi ŋɛ̨i di mɛ̨i lulu kaa kulɔi mąą mɛ̨nį ɓa; diɛ ɓaa, Aramə tɔɔmun Resin da Remaliahu lon di wɔ liiholi kɛnɛ̨ɛ̨i. 5 Yii Aramə da Ɛfraimə, ɛlɛɛ Remaliahu lon daa ə́ nwun na pili mɛ̨nį tee di kwəi, diɛ kɛ mą: 6 «Ka gwəli gu kɔ́ pɛlɛ Ɉuda ɓa, ka gu mąą ɲɔw, ka gu lɔ nɔi hu, gu doo ka gu pɔ, ɛlɛɛ, ka gu Tavéɛlə lon ɉee laa a tɔɔmun.» 7 «‹Kɛlaa, yii Ną́mu Yai-Laa kaa moi ya ka: «Yili hvo pai kɛi tii, di hvo pai pɛlii mą. 8 Mąąhɔlɔɓo, Aramə lɔi daa lee ɓaa Damasə, ɛlɛɛ, Resin nwɔ tɔɔlaa kɛi lɔ ɓaa Damasə daai; aa lɛɛ a kwɛlan bow mɛ̨ida kɔ́w lɔɔli, Ɛfraimə kaa pai woloi, nu huwu hvo kɛa pai kɛi laa. 9 Ɛfraimə lɔi daa lee ɓaa Samari, ɛlɛɛ, Remaliahu lon nwɔ tɔɔlaa kɛi lɔ ɓaa Samari. Ka wala laa na, ka hvo pai lamui.»›» Ɛmanuɛlə mąą mɛ̨nį 10 Yai-Laa ə pənə nwɔ̨nɔ̨ ə nwɛlɛɛi ŋɛ̨i ɓo Akazə ɓa, yɛ mą: 11 «Mɛ̨nį ta hu hvɛli Yai-Laa ə́ wɔ Yálái ɓa, yɛ ə kɛ lɔi mu pələ, a wala kɛti yələi pələ.» 12 Kɛlaa Akazə yɛ mą: «Və́ hɛn da hvɛlii, vá pɛli Yai-Laa hukɔɔn ɉii.» 13 Nąąlɔwai, Esai yɛ mą: «Davidə yəi bɛlɛ́n nuą, ka ka wəli tɔɔ; bələi ka tɛɠɛɓoɔi la nu kanŋaa hvaa woo hu, yili hva ka líí laa, hvo kɛli nwɔ̨nɔ̨ ka gɛ tii a nwɔ́ Yálái? 14 Yili mąą mɛ̨nį ɓa, Ną́mu yaa kpinįi gaa mɛ̨nį ta lɛi kaa, ya ɓaa: Nɛ̨ɛ̨non yii hvo hulɔnu mɛ̨nį hukɔlɔn, a koo həɠə, ə lon ɉulɔnu hɔlɔɓo, ə naa hee a Ɛmanuɛlə. 15 Nokoloi tii kɔ̨nɔ̨n ma pai kɛi a nįŋɛ̨ ɲįnįya da kwɛ̨i nwulɔ, ə lɛɛ ɉu yɛ pɛli lənəi mɛ̨nį ɲɔ̨n ma, yɛ nɛlɛɛ kɛ. 16 Gɛɛ nokoloi tii hvo pɛli lənəi mɛ̨nį ɲɔ̨n ma, yɛ nɛlɛɛ kɛ, dɔɔɓɛlaa hveelɛi ŋɛ̨i ə́ kaa ɲɔwii diɛ, di wɔ lɔi a kɛ kɛa a gboloon. 17 Kɛlaa, yɛ́ ka ə́ nąn nonnii, da ká ə́ wɔ lɔi hu nuą ka wɛi, Yai-Laa kaa pai hvólóɠaa hɔɔi ka mɛ̨i, yii ɉuwu ta hvo ta muhəɠə li tii, ə həɠə ɲələi Ɛfraimə lɔi da Ɉuda lɔi di di ɓɛlaɓo la. Asiri tɔɔmun.» 18 Mąą yələ, niiliɠaa kpɔ di kaa Eziptə ya pulu pələ, da Asiri lɔi hu kwɛ̨iŋąą, Yai-Laa a di təli a kwəlee woo, 19 diɛ pa diɛ pɛlɛ ɓoloon ɉu kwɛaa kəlee ɓa, da kwɛni wolo kəlee hu, da kpomó kəlee da ɲɛɛ kɔ́wɔ kəlee hu. 20 Mąą yələ, Ną́mu kaa pai Asiri tɔɔmun ɉu hvɛli ɲa pulu pələ da nwɔɔ kpəŋąi, ə nuą nwun bu, ə di kpɛlɛ pu, ə mą kɛ, di ləɠa. 21 Mąą yələi tii, taatɛlɛɛ tɔɔ mun dɔ̨nɔ̨, nįŋɛ̨ haa tɔ̨nɔ̨ ɓə a kɛ ɲəi, da ɓɛlaa hveelɛ. 22 Daatɛlɛɛ ɲįnįya kɛnɛ̨ pələi tii, ɲįnįya ŋą wulɔ ɓə da kɛ mįi; A tɛ̨ą, nuąi pai lɛɛi nɔi, ɲįnįya ŋą wulɔ da kwɛ̨i nwulɔ, ya ɓə pai kɛi a di kɔ̨nɔ̨n. 23 Yii pai kɛi a ɲələi tii, ya ɓaa: ɓɛi lɔpee viɲə kpaɠa nwun dɔɔi kaa pai kɛi laa waa dɔ̨nɔ̨, yɛ pɛli kɛi a wali kwələ waa tɔ̨nɔ̨, nąą a lɛɛ a ɓomodiliin da ɲąąlən gbɔlɔ. 24 Di kaa pai huwɔ kpɛi laa a kilɛn, hvó gaai, nɔi kəlee aa lɛɛ a ɓomodiliin da ɲąąlən gbɔlɔ. 25 Yii ɓaa ɲeeɠaai tíi ə kɛ mą, diɛ muwɔ a kali, nu hva pɛli kɛa lii laa, ɓomodiliin da ɲąąlən gbɔlɔ mąą mɛ̨nį ɓa; nąą a lɛɛ a nįŋɛ̨ɠaa da ɓɛlaaɠaa laa mįi. |