Azaya 66 - Yálá laawoo hɛɓɛ (dc)

Yálá lɔ ɓə a nu kəlee kítí tee

¹ Yai-Laa woo ka, yɛ diɛ: Yələ kɔ́lɔn mə gaa a nwɔ́ tɔɔ kpəlin, lɔi ə ɓo a gɔ́wɔ tɔɔi. Pɛlɛ́ lə kɛɛ kpɔ ɓə kɛa ka pɛli dɔɔi mą́ą́? Kɛɛnąą wolo lə kɛɛ kpɔ ɓə, ŋą́ pɛli vįi tɔɔi laa?

² Ɉɛnŋąąi tii kəlee di kulɔ ɲéé ŋą, gəlee kaa a nwɔ́ɔ́, Yai-Laa woo li, yɛi: Nui ŋą ɲɛ̨́i pili mɛ̨i ya ká: Kpɔwɔ mąąyɛɛmun, a yai tii nii yaliɛ gwəi, yai tii, nwóó a mąą kpɛlin.

³ Da kɛ niŋɛ̨ kulɔi a haláá, ɛlɛɛ nwɔ̨nɔ̨, diɛ nu paa! Da kɛ ɓɛlaa haa kulɔi a haláá, ɛlɛɛ nwɔ̨nɔ̨, diɛ yilɛ lon baa a gbɔn! Diɛ ɓɛlaa laa həli, kɛlaa ɓoi ɲąmą ɓə da bu! Da lansan kələn, kɛlaa hali mąąwiɛ mɛ̨nį ɓə! Nuąi tii, daa di liiɓa pələ həɠə, ɛlɛɛ, gbɛli kpɛli mɛ̨nįɠaai tii, di ɓo a di kwəinɛ̨ɛ̨ mɛ̨nį,

⁴ Ɲą́ą́ gbɛli mąn, gáá pai nííɓa mɛ̨nį kɛi a di mɔ̨nɔ̨ ɓo mɛ̨nį, ɉɛn da ɲɔw mą, gɛ́ ɲɛɛ a di nwun. Mąąhɔlɔɓo ŋį́ təliɓo kɛ, nu ta hvo hvaa, ŋą́ą́ hvaa, nu ta hvo nwəli tɔɔ li. Mɛ̨nįi ɲɔ̨nwɔ̨ɔ̨ ɲɛ̨́i mu, ya ɓə da gɛ. Mɛ̨nįi nwɛli kpɛɛ mą́ą́, ya ɓə di gɛ a di liiɓa mɛ̨nį.

⁵ 'Ka ka wəli tɔɔ Yai-Laa woo ɓa, kaai nwoo a ka mąą kpɛlin. Ka kaayɔwɔɠaa da wɛlikpɛɛmąą laa kulɔ a kaa, diɛ ka kpɛ Náá mąą mɛ̨nį ɓa, mɛ̨nįi da kɛ moi ya ka: «Yai-Laa ə nwɔ mąąwiɛ lɛ tai, ə gɛ, ku mąą kwəinɛ̨ɛ̨ kulɔi kaa ka yəi.» Kɛlaa, diɛ mun mə pai nwumɛ̨i.

⁶ Woo kɛ̨nɛ̨ ta kaa kulɔi daa kwəi pələ, woo ta yɛ həɠə Yálá hee pɛlɛ́ mu! Yai-Laa woo li: gaa ɲoɠoɠaa túwɔ́ pələ mąą kwələ kulɔi diɛ.

⁷ Hvo mą kwəi nwąną kɛli, aa naayɛɛ, hvo mą mɔ̨nɔ̨ mįi li, aa mąn lon ɉulɔnu kaa.

⁸ Gbɛɛ ɓə a ta mɛ̨nį taaleei tii bələ mąn? Gbɛɛ ɓə a ta mɛ̨nį taaleei tii ta kaa? Da pɛli lɔi kəlee kaai a lon, a hvóló tɔ̨nɔ̨ yeemu mɛ̨nį? Daa ta lɔi tɔ̨nɔ̨ hu nuą mąą hɔlɔɓo lɔ a lon, a gee? Ya ɓə Siɔn a lɛɛ kpɔlɔ kwəi nwąną kpálá tɔɔi, aa mąn nonnii kaa?

⁹ Yai-Laa yɛi: Ŋą́ mɔ̨ɔ̨ nɛ̨ɛ̨nu kwəi nwun, gɛ́ kpeąn nwɔ lon gaa mɛ̨nį tɔwɔ? Ə́ wɔ Yálái yɛi: Akɛ tii, ɲą́ą́i ŋą́ lon doo nɛ̨ɛ̨nu kwəi, ŋą́ mɔ̨ɔ̨ gaa mɛ̨nį pili ɉu?

¹⁰ 'Ka kwəinɛ̨ɛ̨ kulɔ, kaai kpɔ Ɉerusalɛmə wɛli kaa kaa, ka diɛni 'ka pili yələi a kwəinɛ̨ɛ̨. 'Ka kɛ kwəinɛ̨ɛ̨ hu, ka diɛni, 'ka ɓələn a kwənɛ̨ɛ̨, kaai kpɔ kɛli wɔlɔ mąą mɛ̨nį ɓa.

¹¹ Ə gɛ ka ɲįnį kpələ, ka pilɛ ɉu, a ɲįnįi tii a ka nį́į́ lɔ! Ka ɲa kəlee kpələ ɉu, ka kwəi yɛ nɛ̨ɛ̨ la, a ɲįnį mąąwiyaai tii.

¹² Mąąhɔlɔɓo, mɛ̨nįi Yai-Laa kaa moi, ya ka: Gáá pai liilaa yɛɛi mɛ̨i yɛ tɛɛ ya. Ɛlɛɛ, gɛ́ hįįɠaa di wɔ mąąwiɛ tɛɛ bɔ, yɛ ya a kɛi kulɔ yee hu a vąŋą kɛnɛ̨. Di kaa pai kɛi ɲįnį tɔɔi ka la, diɛ ka pomo, diɛ ka hee di kɔ́wɔ mɛ̨i.

¹³ Ɲą́ą́ ɓə pai ka liilaai kaa, lɔ yɛ bələi, hilɔnu nee a nii laa la mą. A tɛ̨ą ka lii kaa pai laai ka kwəi, Ɉerusalɛmə daa kwəi.

¹⁴ Ka káá pai nąą kaai, ka lii yɛ nɛ̨ɛ̨ ka kwəinɛ̨ɛ̨, ka kɔ́wɠaa diɛ pu di ninɛ̨ kɔ́lɔi, yɛ kala tiliin. Yai-Laa kaa pai ɲee hvąŋą lɛi nwɔ tínuąi diɛ, Kɛlaa, gaa pai nii hvolii ɲowoɠaa pɔ.

¹⁵ Mąąhɔlɔɓo, Yai-Laa kaa pai, Gaa pai nwɔ̨n ɉɛ̨ąi, nwɔ kɔ́ kɔ́ wotoloɠaai kaa yɛ hvąŋą tulɔ, gwələi di dɔɔ mą a líiholi, yɛ gulɔ a nwąną lɔ pələ, ɛlɛɛ, mąąɲɔwi di mo, yɛ gwələ kulɔ a nwɔ̨n nən.

¹⁶ A tɛ̨ą, nwɔ̨n nən mə Yai-Laa kaa pai kiti teei la, yɛ nu kanŋaa kiti tee a ɓɔwa kwɛaa. Nu kpulu tamąą ɓə Yai-Laa kaa pai ɓɔi di hu.

¹⁷ Nuąi da kɛ «di kpɔwɔ kɛi a mąąhəɠə nuą da mąąwaa nuą», diɛ lɔ nɔw yɛa hu, di ɓo di nwun nąmu pulu, nwɛi, ə ɓo tɔɔni di hąmąi; nuąi da kɛ ɓoi mį́í, da ɉuwɔɠaai tɔ́n gaa diɛ, da ɲinɛ̨ɠaa, gəlee kaa pai haai a gee. Yai-Laa woo li.

¹⁸ Ɲą́ą́ ɓə di kɛ mɛ̨nįɠaa, da di kɛ kólóɠaa kɔ́lɔn. Ŋą́ pa hįį kəlee ɲąą kpɔn ɉii, da hį́i woo kəlee, di kaa pai pai, diɛ nwɔ mąąwiɛ kaa.

¹⁹ Gaa a tɛ̨ą gaa pai pɔɔkɔɔn da kɛi di lɔwai, hvo pai lɛɛi a yili, yiiɠaai pai kulɔi ɉu, gáá pai daɠaa tɛɛi hįį lɔi takpɛliɠaa lɔwai, Tarsisə, Putə da Ludə diɛ di wɔ kilɛnŋąąi ŋąątɛ, Tubalə, Yavan da gboloyá hu lɔiɠaai kwɛaala, diɛi di hvo mą́ą́ mɛ̨nį bələ mąni, diɛi di hvo ta nwɔ́ mąąwiɛi kaa li; di kaa pai nwɔ́ mąąwiɛi mąą loloɓoi hįįɠaa mɛ̨i,

²⁰ Nuą di kaa pai pai a ka kaayɔwɔɠaa diɛ həɠə lɔi takpɛliɠaa hu, diɛ gɛ a Yai-Laa kɔ́ hɛn, di ɓo hoo mɛ̨i, da wotoloɠaa, da luwu hu, di ɓo hoohvaalənŋąą mɛ̨i, da ɲɔɔmɛ̨ɛ̨ɠaa. Diɛ li nwɔ́ yee mąąhəɠɛɛi mɛ̨i, yii gaa a Ɉerusalɛmə; Yai-Laa woo li. Yɛ bələi lɔ Israɛlə lonnii diɛ kpɛli, da kɛ pai a kɔ́ɓo hɛnŋąą, hɛnɲąŋą mąąhəɠɛɛɠaa hu Yai-Laa yəi bɛlɛ́n.

²¹ Gáá lɔ nwɔ̨nɔ̨ pai haláá laa həli nuą həɠəi di lɔwai, Lévi huwu hu nuą, Yai-Laa woo li.

²² Yɛ bələi ɲələkɔlɔn nįnɛ̨ da nɔi nįnɛ̨i ŋą di pɛli, da lɛɛ la tɔɔni kpąąn nííla, Yai-Laa woo li, bələ lɔ ɓə ka huwu kaa pai lɛɛi la tɔɔni kpąąn ə mą kɛ ka laa.

²³ Yai-Laa woo ka, yɛ diɛ: Nu huwu kəlee kaa pai pai ɓɛ, diɛ di woo tɛ bɔ́ pələ, a ɲąnin dɔɔ pələ tɛitɛi, da túwɔ́ hvoló tɛitɛi, ɛlɛɛ, yili kaa pai kɛi, hva ɉəɠə mą.

²⁴ Nuąi daa di kwɛli tee ɲə́i, di powa kaa pai kɛi puuni, nuą da kulɔ, diɛ di kaa. Di mįi kóló hvo pai haai, di kələn nwɔ̨n va luwun di kaa pai kɛi a nu huwu kəlee mąą ɲɔw hɛn.