Azaya 65 - Yálá laawoo hɛɓɛ (dc)

Yálá nwɔ tínuą di wɔ kwəi: Kulɔ nwoomunuą di wɔ mɔ̨nɔ̨

¹ Ŋą́ą́ gbɔ́wɔ lɛɛ laa, nuąi di hvo kɛi di nwun dɔɔ a ɲą́ą́, diɛ gwɛ́li, ŋą́ą́ gbɔ́wɔ lɛɛ laa, nuąi di hvo kɛi gwɛ́li, diɛ gáá. Nu huwui hvo kɛi tí, hvo nwoo tɛ náá pɔ pələ, ŋį́ kɛ mą: «Ɲą́ą́ ga, ɲą́ą́ ga.»

² Ŋą́ kɛi túwɔ́ ɲéé hąŋąi, kulɔ nwoomu nu kan bɔ pələ, nuąi di hvilɛnŋąą pələ ɲɔ̨nwɔ̨ɔ̨ mɛ̨i di pɔ pələ, a diɛi tii, di hvilɛnŋąą lɔ di kpɔwɔ kiliŋąhiɛɠaa pulu.

³ Nu huwui tii a túwɔ́ níí yalii gwə́i, ɲɛ̨́i kwəleen mą, di kpɔnŋąą lɔ ɉu. Da kɛ haláá kulɔi nɔw yɛaɠaa ɓa, diɛ hɛn gun nɛ̨ɛ̨ɠaa kələn pɔlɔkɔwɠaa ɓa.

⁴ Diɛ tɔɔ kámąɠaa la, diɛ yii kwɛni woloɠaa hu, diɛ ɓoi mįi, ɛlɛɛ di kɔ̨nɔ̨n ə ɓo a túlun bulu hɛnŋąą.

⁵ Diɛ kɛ diɛ: «Ə́ kili kɛ ə́ kpɔwɔ hu, hvo lɛɠɛ mą́ą́, və́ nəi pa ə́ kɛ a mąąhəɠəmun.» Dúwɔ taaleei tii a níí holi, nulu yɛ tɛ ɲɛ̨́i, ə ɓo yɛ nwɔ̨n a túwɔ́ lən ɉii.

⁶ Ka nɛɛ lɔ laa, mɛ̨nįɠaai tii kəlee pɛ̨ɛ̨ kaa ɲə́i ɲą, və́ pa nəi tɔɔ ɉu tin, hvo kɛi ŋį́ di kwələ kulɔ, ŋį́ gwələ kəlee kulɔ kpɔ ə kpɛɛ níí pɔ.

⁷ Ka wɔ túwɔ́ pələ ɲɔ̨n, da ka nąnni di wɛiɠaai, ŋą́ gwələ kulɔ a gee, Yai-Laa woo li. Nuąi kɛi nwulɔ kun nɛ̨ɛ̨ɠaa kələn ɲeeɠaa nwuɔ̨, diɛ mɛ́lɛ too la tii, ɲee kpukpuɠaa mɛ̨i, gáá pai bɔɔ kulɔi diɛ, yɛ bələi wɛi di kɛi túwɔ́ la.

⁸ Yai-Laa yɛi: Bələi lɔ da towələ keą kaa la towələ wulu hu, diɛ kɛ diɛ: «ka hvo bɔn, mąąhɔlɔɓo, luwɔ kaa ɉu», bələ lɔ ɓə gáá pai gɛi la, nuąi da tí mą́ą́ di mąą mɛ̨nį ɓa, ə gɛ və́ pa nəi gəlee hu kala.

⁹ Gáá pai nu huwu kulɔi Ɉakɔbə huwu hu, a neelee, nuąi pai nwɔ́ yeeɠaai hɔlɔɓoi a di gwɛlin, ŋą di kulɔ Ɉuda huwu hu, nííɓa nuą kaa pai di hɔlɔɓoi a di wɔɔ, nuąi da tí mą́ą́, diɛ hee laa.

¹⁰ Sarɔn a kɛ a ɓɛlaaɠaa da ɓoluɠaa di pɛlɛi, Akɔrə yɛakɔwɔ yɛ lɛɛ a niŋɛ̨ɠaa laa mįi, gəlee di ɓo a nwɔ nuąi gwɛlii di wɔɔ.

¹¹ Kɛlaa, kaai kpɔ ɲɛ̨i lənə Yai-Laa ɓa, kaa lɛa nwɔ́ yee mąąhəɠɛɛi ɓa, kaa kɔ̨nɔ̨n bɛli Gadə laa hu, kaa lɔɔ humɔ̨ɔ̨ɠaa hee a Meni nwɔɔ.

¹² Ɲą́ą́ nwɛ́i, gáá ka tɛɛi a kɔ́ kɔ́ ɓɔwa kɔ̨nɔ̨n, ka kəlee, ka káá pai pui ka kpəlin na, diɛ ka nwun dee! Mąąhɔlɔɓo, ŋą́ təliɓo kɛ, ka hvo nwóó mu hon, ŋį́ pələ ɓo, ka hvo ka wəli tɔɔ li. Yii ɲɔ̨nwɔ̨ɔ̨ ɲɛ̨́i mu ya ɓə ka gɛ, ɉɛn nwɛli hvo mą́ą́, ya ɓə ka gɛ a ka liiɓa hɛn.

¹³ Yili mąą mɛ̨nį ɓa, Yai-Laa Nąmu woo ka: Nuąi da tí mą́ą́, di kaa pai ɉɔlɔɓoi, diɛ mįi, ɛlɛɛ ka wɛi, kaa mɔ̨nɔ̨ mįi pulu yəi. Nwɔ́ tínuąi diɛ di kpələ, ka wɛi, kpələ wɛli yɛ ka mɔ̨nɔ̨ ɓo, nuąi da tí mą́ą́, di kaa pai kɛi kwəinɛ̨ɛ̨ hu, ka wɛi, nwumɛ̨ yɛ ka ɲɛ̨i paa.

¹⁴ Nwɔ́ tínuąi kaa pai kɛi tómąi a kwəinɛ̨ɛ̨, mąąhɔlɔɓo, di kaa di nɛ̨ɛ̨ hu kɛnɛ̨, Ka wɛi, kaa tómą a wɔlɔ woo, ka lii kələn bələ ɓa ka kwəi a mɔ̨nɔ̨, a tɛ̨ą, ka lii kaa pai yalii ka kwəi, kaa gboo təli!

¹⁵ Nííɓa nuą da kɛi pa nɛ̨ŋɛ̨nnaa kɛi, da gɔɔn kaa, diɛ kɛ mą: «Yai-Laa Nąmu ə ə́ haa pələ kɛ kpɔlɔ tii!» Kɛlaa, laa ninɛ̨ kaa pai heei nwɔ́ tínuąi diɛ.

¹⁶ Nui lɔpee pai kɛi bɔ lúwɔ ə kɛ mą, yɛ̨nɛ̨ɛ̨ ɓɛ, da lúwɔ kɛ mą: «Tɛ̨ą-Yálá laa hu.» Nui lɔpee pai kɛi bɔ ə gwɛla ɓɛ yɛnɛ̨ɛ̨, gaa pai gwɛlai a «Tɛ̨ą-Yálá laa.» Mąąhɔlɔɓo, di kaa pai lɛ̨ąi mɔ̨nɔ̨ tɔlɔɔɠaai diɛ, di hva kɛa kɛ ɲɛ̨́i mu.

¹⁷ Yii hu kɛa, gáá pai yələ kɔ́lɔn ninɛ̨ pɛlii, ɛlɛɛ da lɔi ninɛ̨. A kɛ tii, mɛ̨nįɠaai daa tɛɛ, di kili hva kɛa too nu ta ɲą, di hva mu kpɛli kɛa pa nu kili pɔ.

¹⁸ Yaa mun, ka kaa pai kwəinɛ̨ɛ̨ kulɔi, kaa pili yələi a kwəinɛ̨ɛ̨, mąąhɔlɔɓo, gáá pai kwəinɛ̨ɛ̨ pɛlii, kpɛɛ hva kɛ mą, a neelee, gwəinɛ̨ɛ̨i tii gáá pai bɛlii, Ɉerusalɛmə ɓə, ɛlɛɛ, mąną kaa mɛ̨nį nwun mą, ya ɓaa a, nonnii mąą mɛ̨nį.

¹⁹ A tɛ̨ą, gáá pai Ɉerusalɛmə mąą mɛ̨nį kɛi a nwɔ́ kwəinɛ̨ɛ̨, ɛlɛɛ, ŋį́ ɓo lɔ kwəinɛ̨ɛ̨ hu, nwɔ́ nu kan mąą mɛ̨nį ɓa! Di hvo kpɔ kɛa pai wɔlɔ woo, da gboo təli woo mąn ɉi laa, kpɔ kɔ́lɔ-kɔlɔ.

²⁰ Lon dala hvo kɛa pai haai laa, a yii kuu hveelɛ yee mu lon, ə mą kɛ hulɔgolo, yii hvo nwɔ yɛnɛ̨ɛ̨ laa hvɛɛ li, nui a haa a nwɔ kwɛlan nwundɔ̨nɔ̨, a kɛ tii, aa haa ɉilənon gɔlɔi, ɛlɛɛ, nɛ̨ŋɛ̨n mun a kwɛlan nwun dɔ̨nɔ̨ hɔlɔɓo, da gaa a nɛ̨ŋɛ̨n naa mun.

²¹ Di kaa pai kɛi pɛlɛ́ɠaa tɔɔi, diɛ di wɛli kulɔ. Diɛ tííɠaa kɛ, diɛ mą mįi.

²² Di hvo kɛa pai pɛlɛ tɔɔi, nu ta kpɛli yɛ lɔ mu, di hvo kɛa pai tíi kɛi, nu ta kpɛli yɛ mą mįi. Mąąhɔlɔɓo, bələi lɔ wulu a lamu la, bələ lɔ ɓə nwɔ́ nuąi kaa pai lamui la. Nííɓa nuą kaa pai kulɔi, di yee kɛ kóló dɔlɔ ɓa.

²³ Di hvo kɛa pai di kpɔwɔ hvii kpɛɛi, yii dɔlɔ hva kɛ mą, di hvo kɛa pai lon gaai a kámą nwɔɔ. Mąąhɔlɔɓo, di kaa pai kɛi a Yai-Laa nwɔ lúwɔ lonnii, ɛlɛɛ, di mąnin ni kaa pai kɛi di pɔ.

²⁴ Nąąlɔwai, gɛi di hvo pa kɛ də́lii, ŋį́ gbɛa di woo pulu pənə, Di woo a lɛɛ nii di lá, ɉɛn di vɛlii, ŋį́ dɛɛ di pɔ!

²⁵ Kwɛli da ɓɛlaa lon di kaa pai kɛi di laa mįi gee ɓa, yala yɛ kala mįi, yɛ niŋɛ̨, kaalə kɔ̨nɔ̨n ɲɛ lɛɛ a muluun gbala. Mɛ̨nį ɲɔ̨n, da kɛɛ kala hɛn nɔpee, da hvo kɛa pai kɛi nwɔ́ yee mąąhəɠɛɛi nwuɔ̨, Yai-Laa woo li.