Azaya 63 - Yálá laawoo hɛɓɛ (dc)Yai-Laa nwɔ nuąi nwąną kulɔmun 1 Gbɛɛ ɓə tii kulɔi Edɔmə pələ, yɛ həɠə Bɔsra pələ, yɛ pai? Hɛn gbɔlu pɔɔ ə ɓo mąą həɠə hui? Ganąnŋąą nwɔ həɠəi hu, ɉaŋąą dədən, vaŋą kɛnɛ̨ pələ ɓai? Ɲą́ą́ li, ɲą́ą́i ŋą́ hvaa a tələnmolaa, gɛ́ vą́ŋą́ lɛ nu ɓalo mɛ̨nį ɓa. 2 Ləɓə kɛ yai hɛn gbɔluɔ pɔɔ kaa ə́ wɔ həɠəi hu? Lə ɓə kɛ, yai ə́ wɔ həɠəɠaai kpɔluɔi, yɛ nu a həɠə kɔ́wɔla? 3 Ɲą́ą́ dɔ̨nɔ̨ ɓə doo gɔwɔ hu, nu kanŋaa lɔwai, nu ta lɔpee hvo kɛ bɔ́. Níí holi pələ, ŋį́ di hiɠɛ, gɛ́ ɓɔlɔn di mɛ̨i, níí holi pələ ɓa, di ɲąmą ə taɠa mą́ą́ həɠəɠaa ɓa, ŋį́ mą́ą́ həɠə kəlee kpɔlu. 4 Ŋą́ naa tii gwə́i, gɛ́ nwą́ną́ kulɔ hvoló aa həli, nwun mąąɓo kwɛlan aa kɛ pa. 5 Ŋą́ ɲɛ̨i laa, və́ mą́ą́ kpɔn mąąɓomun gaa! Ŋį́ nwóó laa, nu hvo tɔɔ búlú. Yili ɓa, ɲéé lɔ ɓə kɛa mą́ą́ kɔ̨nwɔ̨, ɛlɛɛ, nwɔ́ líiholi lɔ ɓə tɔɔ búlú. 6 Ŋą́ lɔiɠaa kiin nííholi pələ ɓa, nwɔ́ líiholii ə di kɛlɛ, di kɛ tupɛ-tupɛ, gɛ́ di wɔ mąąwiɛ pənə a pɔlɔ. Yálá nwɔ nuą ɓalomun, Israɛlə nąn 7 Gáá pai Yai-Laa nwɔ mɛ̨inɛ̨ɛ̨ɠaa hukulɔi, nwələɠaai da Yai-Laa laa tɛ, mɛ̨nįɠaai Yai-Laa ə gɛ kuɔ, di mąą mɛ̨nį ɓa, a nwɛlikɛmąąlaa kɛnɛ̨i ə gɛ, Israɛlə nwɔ pɛlɛ́i ɓa, bələ ə ɉon na a lii nɛ̨ɛ̨ gwəi, yɛ mɛ̨inɛ̨ɛ̨ tamąą kɛ mą. 8 Ə kɛ diɛ: «A tɛ̨ą nwɔ́ nuą li, nónnii li, di hva nu ɓowo», ɛlɛɛ, ə kɛ a di nwun mąąɓomun. 9 Ɛlɛɛ di kɛɛ di wɔ mɔ̨nɔ̨ɠaa hu, yaa kpɛli ə mɔ̨nɔ̨ mįi. Malakai ŋɛ̨i a nwɔ tímun, ya ɓə di nwunmąąɓo nwɔ wɛlikɛmąąlaa, da nwɔ nu ɲɛ̨imąąwɛli kaa laa haalai, yaa kpinįį ɓə di nwun mąąɓo, ə di mąą mɛ̨nį həɠə nwuɔ̨, yɛ di kpəŋə, yələ kəlee, ɲɛnɛ̨ɛ̨ yii aa tɛɛ ɉu. 10 Kɛlaa di wɛi, di kulɔ nwoo mu, di yɛnɛ̨ɛ̨ kpɔlu nwɔ Nįį-Mąąhəɠɛɛi la. Gɛɛ tii yaan, ə pənə ə wolo diɛ, ə kɛ a di yowo, yaa kpinįį, ə kɔ́ pɛlɛ diɛ. 11 Nwɔ nuą di di kiliŋąhiɛ kɛa, Moisə nwɔɔ hvolóɠaai diɛ, «Nui nwɔ taatɛlɛɛ pulunuą, kulɔ gboloyá yəi gaa mįnɛ̨? Nu kpɔ ə wɔɔ? A yai nwɔ Nįį-Mąąhəɠɛɛi tɛɛ bɔi? 12 A Nui tii ɲee kɔ̨nwɔ̨n mąąɲɔwuɔi, ə kɛli hiɛ Moisə ɓa-mįi-yee hu pələ? A Nui tii kɛ yaɠaa tee gee la di tɔwɔi? Ə gɛ tii, Naa yɛ pɛli tɛi la a yələ kəlee mɛ̨nį. 13 Nui kɛi di tɛɛ ɓoloon gɛnɛ̨ɛ̨ hu, ə wɔɔ? Di kɛi hiɛ, yɛ hoo a kɛi hiɛ lɔi pun ɉu, di hvo kɛi kalin. 14 Kpɔlɔ yɛ taatɛlɛɛ kpulu a kɛi yɛɛ ɓoloon ɉu, Yai-Laa nwɔ Kilii ɓə kɛi li a diɛ di hviitɔɔ mɛ̨nį ɓa.» Bələ ɓə ə́ ə́ wɔ nuąi tənən dɔɔ la, ə́ gɛ diɛ pɛli ə́ laa lɛlɛ tɛi la. 15 Yɛ́i tii yələ kɔ́lɔn ɉu, lɛɛ ə́ wɔ pɛlɛ mąąhəɠɛɛ lɛlɛɛi mu, ə́ ə́ ɲɛ̨i hee, ə́ kɛɛ kaa: Ə́ wɔ toloi kaa mįnɛ̨, da ə́ wɔ huwala walai? A mɛ̨nįɠaai tii da ə́ lii muhəɠəi? Ɲɛ̨́i mąą wɛli kaai ə́ kɛli mo, yaa mɔ̨ɔ̨ gbɛla bələi? 16 Yii mą: Ku Nąn mąą a yɛ́, Abrahamə nwɛi, yii mą, hvo ku kɔ́lɔn, Israɛlə yaa kpɛlimąn, hvo kpɛli ku kɔ́lɔn, Yɛ́, Yai-Laa, Yɛ́ lɔ ɓaa a ku Nąn, Ə́ laai yɛ́ a yələ kəlee, ya ɓaa, ku Nwun mąąɓomun. 17 Yai-Laa, lə ɓə kɛ yaai, ya ku lɛɛ laa, kuɔ lia li ku nwun mą? Kuɔ ku mąą kwɛa ə́ wɔ pələɠaai diɛ? Ɛlɛɛ yɛ́ ku kili wala wala, hva mą kɛa ɲɔw yɛ́? Ə́ wɔ tínuąi mąą mɛ̨nį ɓa, 'pənə ə́ pa, nu kanŋaai a ə́ pɔɔ, 'pa di mąą mɛ̨nį ɓa. 18 Ə́ wɔ nu huwu mąąhəɠɛɛi lɔ mɛ̨nį nɔi ɲɛ̨i hu, hvo kɛi a mɛ̨nį hu kwɛaa mɛ̨nį. Ya ka ku yowoɠaa daa ə́ wɔ pɛlɛ mąąhəɠɛɛi wolo! 19 Ɛlɛɛ, ɉu aa kwɛa, ku kaa lɔ kɛa yɛ nuąi hvo ə́ wɔ tɔɔlaa kɛi di mɛ̨i, di hva kɛa ə́ laa ɓo kuɔ. E kə! Ya pɛli kɛ mą, 'ə́ yələ kɔ́lɔn ɉu ɓɛla, ə́ yɛɛ, 'ə́ gɛ yeeɠaa diɛ kpɛlin ə́ ɲɛ̨i tɔwɔ. |