Azaya 61 - Yálá laawoo hɛɓɛ (dc)

Yálá nwɔ Tímun a liilaa tɛɛ nuąi daa hee di mɛ̨i di pɔ, yɛ di nwun mąąɓo

¹ Mɛ̨nį kəlee ŋą Hééɓomun Yálá nwɔ Kilii kaa mɛ̨́i, mąąhɔlɔɓo, Yai-La aa gɛ́ a nwɔ tímun, aa dɔ́ɔ́, nwɛlɛɛ lɛlɛɛ ɓo mɛ̨nį ɓa, nuąi daa di nwumɛ̨, diɛ, nuąi di lii yalia di kwəi, di hali kɛ mɛ̨nį ɓa, gaho nąmįną nwunn mąąɓo mɛ̨nį ɓa, yiiɠaai gaho ŋą di kulɔ mɛ̨nį ɓa.

² Yai-Laa nwɔ mɛ̨inɛ̨ɛ̨ kɛ kwɛlan noloɓo mɛ̨nį ɓa, da gu wɔ Yálái nwąną kulɔ yələ, nuąi mɔ̨nɔ̨ hu, di lii laa mɛ̨nį ɓa.

³ Nuąi haa aa too diɛ Siɔn daai, ə gɛ: ŋį́ di wɔ mąąwɛli mąąhvalin a mąąwiɛ, ŋį́ di wɔ háá wɔlɔ ɓoɔ mąąhvalin a kwəinɛ̨ɛ̨ wulɔ, kwəinɛ̨ɛ̨ kulɔ həɠə tɛɛ mɛ̨nį ɓa di pɔ, a mɔ̨nɔ̨ mįi həɠə mąąhvalin. Di kaa pai di laa heei a, tələnmo wulu, Nwuluɠaai Yai-Laa ə di hin a ɲɛ̨i ponɔ̨ mɛ̨nį.»

⁴ Hɛnŋąąi kpɔ kɛ daa di lɛɛ a gboloon, di kaa pai pənəi di gəlee tɔɔ, bɛlɛ́ɠaai wɔlɔ di di pu, da pənə di gəlee tɔɔ, daaɠaai wɔlɔ di di wolo, di kaa pai pənəi di gəlee tɔɔ, da mąąwɛli mɛ̨nįɠaai kpɔ tii wɔlɔ daa lamun a kwɛlan damąą.

⁵ Nuą kaa pai həɠəi pələ kəlee, diɛ daa mąąkpɛ, diɛ di ɲɛ̨i kɛ ka wɔ taatɛlɛɛɠaai diɛ, nwɛą lonnii ɓə pai kɛi ka wɔ tííɠaai kɛi, da ka wɔ hihɛnŋąąi.

⁶ Ka wɛi, di kaa pai ka laa heei a, «Yai-Laa nwɔ haláá laa həli nuą,» diɛ kɛ kaa. «Ku wɔ Yálái nwɔ kóló kɛ nuą?.» Ka káá pai hįį takpɛliɠaa di wɔ hɛngɔwɠaa mįi, ɛlɛɛ, kaa ka kpɔwɔ mąą tɛnɛ̨, a di mąąwiɛ ka káá pai gulɔi di yəi.

⁷ Gɛɛ ka ɲɛ̨i paa mɛ̨nį ta ə pɛlɛi mą, ka lalan nwoo yɛ too nu kəlee la kɛɛnąą kəlee ɓa, yaamun, ka káá pai hɔlɔɓoi di wɔ lɔi hu geemɛ̨i hveelɛ, ɛlɛɛ gwəinɛ̨ɛ̨ tii wɔlɔ ka kɛi gulɔ, kaa pənə kaa gulɔ.

⁸ Mąąhɔlɔɓo, ɲą́ą́ Yai-Laa, tɛ̨ą ɓə nwɛli kaa mą́ą́, nwuɔ̨, da kɛɛ kala mɛ̨nį wɛli hvo mą́ą́, gáá pai ka hvɛla kulɔi a tələnmolaa, kwa kaani guɔ yələ kəlee mįnɛ̨ həɠə.

⁹ Ka huwu kaa pai kɔ́lɔn ɉii hįį takpɛliɠaa lɔwai, ka lonnii diɛ kɔ́lɔn huwu kəlee lɔwai; Nuąi kpɔ pai di ɲɛ̨i tɔɔi diɛ, da di kɔ́lɔn, a nuąi Yai-Laa ə lúwɔ too diɛ.

¹⁰ Gáá kwəinɛ̨ɛ̨ hu, a tɛ̨ą, gáá kwəinɛ̨ɛ̨ kulɔi Yai-Laa mąą mɛ̨nį ɓa, níí kaa pilii yələi a kwəinɛ̨ɛ̨, nwɔ́ Yálái mąą mɛ̨nį ɓa, mąąhɔlɔɓo, aa nu ɓalo həɠə too gwą́ną́, aa mą́ą́ yili a tələnmo gbaawii, yɛ hulɔnon a mąą yili nwɔ wɛli ɲɛ̨i ɓa, yɛ bələi haláá laa həli mun a gɛ la, yɛ nɛ̨ɛ̨nui daa ɉilɛtai kɛ, a kɛli mąą yili hɛnŋąą kɛ mą.

¹¹ A tɛ̨ą, yɛ bələi lɔ lɔi a ɓa la, yɛ bələi lɔ hihɛnŋaa da ɓɔn na, bələ lɔ ɓə Ną́mu Yai-Laa kaa pai tɛ̨ą mɛ̨nį ɓɔn ɉii la, da naa tɛ mɛ̨nį, lɔi kəlee mɛ̨i.