Azaya 59 - Yálá laawoo hɛɓɛ (dc)

Nɛ̨ŋɛ̨nŋaai da nu mąą kwɛa Yálá ɓa

¹ A tɛ̨ą, Yai-Laa yee hu hvo haa li, nuą ɓalo mɛ̨nį ɓa, nwəlii hvo kpɔlɔ li, mɛ̨nį mɛ̨n mɛ̨nį ɓa.

² Ka wɔ nɛ̨ŋɛ̨nŋaai ɓə, daa ka lɔwai laa, ka ka wɔ Yálá li; ka wɔ túwɔ́ pələɲɔ̨nŋaa ɓə, ɲɛ̨́i looii kaa kpɔ kwɛala, hva pɛli kɛa ka woo mɛ̨n ɉii.

³ Mąąhɔlɔɓo, ɲąmą kaa ka yəi ɲą, ka yeekpuoɠaa mąą luwuɔ a nɛ̨ŋɛ̨n, lɛɛ woo ɓə a kulɔ ka la, nu ɓowo woo ɓə ka laaləi a naa tee mą.

⁴ Nu ta hva kalamąɓo kɛ́, nwɔ tɛ̨ą mɛ̨nį hu, nu ta hva tɔɔ bulu laa kɛ kwəi kwələ laa hu, kpɛli kpɛli mɛ̨nį ɓə da di kilitɔɔ mą, lɛɛ mɛ̨nį ɓə da mo, da túwɔ́ pələ ɲɔ̨n mąą koo həɠə, di di laa yɛɛ a kɛɛ kalaa.

⁵ Tumo ɲąnin mə da ɉaɠa, diɛ hį́iwolo nąląąn bala, nui a di ɲąnin da mįi, a haa, da di ɲąnin nwolo, tumo pɛlɛɛ da kulɔ ɉu.

⁶ Nu hva pɛli ə́ kpaan dee a di kɛ koló, mɛ̨nį ɲɔ̨n mə da mąą kili tee di kwəi! Wɛa mɛ̨nį lɔ ɓə di ɲɛ̨́i pɔ.

⁷ Mɛ̨nį ɲɔ̨n mə di kɔ́wɔ a mąą gilɛ həɠə, da kɛ gilɛ həɠəi, diɛ li kwəi kwələmun ɲąmą pu mɛ̨nį ɓa, di kwəi kiliɠaa kaa a mɛ̨nį ɲɔ̨n gɛ kili, ɓɛi da tɛɛ laa, kɛɛ kalaa, hɛn ɉu wolɔɔ ɓə da di lɛɛ laa.

⁸ Di hvo liilaa pələ kɔ́lɔn, təlinmolaa hvo di kpaalə hu, pələ kpəlaanŋąąɠaa ɓə da hiɛ ɉu, nui lɔpee a hvilɛn ɉu, hva liilaa hɔlɔɓo.

Yálá nwɔ nuąi kaa hvaai di hɔn mą:

⁹ Yili mąą mɛ̨nį ɓa, kiti mąą kwɛa ɓə kuɔ, ɛlɛɛ təlinmolaa hva həli kuɔ. Ku ɲɛ̨i ə kɛ kɛɛ pɔ̨nɔ̨ tɔwɔ, kɛlaa kpinį ɓə pa, ku ɲɛ̨i ə kɛ hvóló tɔwɔ, kɛlaa, kpinį ɓə ku kaa hiɛi ɉu.

¹⁰ Kuɔ hiɛ ɓɛ ɓɛ, yɛ ɲɛ̨i punuą, da həli pɛlɛ nwąną ɓa, kuɔ ku kɔ́wɔ kpəŋə, tɛ tɛ, yɛ nuąi di ɲɛ̨i hvo diɛ, Hvóló ɲą ɉə ɉə, kuɔ ku kɔ́wɔ tuwo, yɛ nuą da kɛ kpinįi, ku mą kɛ kɔ́lɔi pɔ̨nɔ̨ hu, gaa yɛ kwa kɛ a haa nuą.

¹¹ Ku kəlee, kuɔ hvaa ku nwun ɉu, yɛ yilɛɠaa, kuɔ ku woo laa, yɛ tonwələnŋaa. Ku kili ə kɛ kiti tɔwɔ, kɛlaa hɛn da hvo pa li! Ku kili ə kɛ ku ɓalo mɛ̨nį tɔwɔ, Kɛlaa, mąą kwɛaai kuɔ.

¹² Mąąhɔlɔɓo kuɔ túwɔ́ pələ ɲɔ̨n damąąi kaa tɔɔnin ə́ lííla, ɛlɛɛ kuɔ hɔn ɲɔ̨nŋąąi diɛ ku kalamąɓo, tɛ̨ą li, kuɔ kulɔ nwoomu laa kanąnŋąąi lɔ kuɔ, ɛlɛɛ ku ku hɔnŋąąi tii kɔ́lɔn.

¹³ Diɛ ɓaa: Ku nwun dɛ mɛ̨nį Yai-Laa pɔ, kuɔ lənə mą, ku pulu tínɛ̨n mɛ̨nį kuɔ Yálái ɓa a ɉukwɛaa, toomɛ̨i da nwuɔ̨-mɛ̨ni mąą kili tee mɛ̨nį ku kwəi, kuɔ lɛɛ mɛ̨nį mąą kiliŋąhiɛ kɛ, ɛlɛɛ kuɔ mo.

¹⁴ Yili mąą mɛ̨nį ɓa, daa giti tee mɛ̨nį pili pulu, ɛlɛɛ, tələnmolaa aa mąą tɛ pulu, aa tɔɔ. Mąąhɔlɔɓo, tɛ̨ą aa kalin gwəli hɛ̨ąi, ɛlɛɛ, nui kpɔ yɛ ə haŋąn hva pɛli dɔɔi hɔlɔɓoi laa.

¹⁵ Tɛ̨ą mɛ̨nį hva kaa laa, ɛlɛɛ nui a bulu tínɛ̨n mɛ̨nį ɲɔ̨n mą, da too mɛ̨i, gɛɛ tii, Yai-Laa ə nąą kaa, yili ə ɲɔ̨nwɔ̨ kpɔ ɲɛ̨i mu ha ha, a kɛi tii kiti hvo mo li laai.

¹⁶ Ə gaa, yɛ nu hvo laa, gwəi ə pili mą, mąąhɔlɔɓo, nu ta hvo kɛli da ɓo, ɲee kɔ́nwɔ̨n mə ɉəli ɓalo ɓo ɓa, ɛlɛɛ, nwɔ tələnmolaa ə kɛ a dɔɔ bulu mun.

¹⁷ Ə tələnmolaa too gwaną, yɛ kɔ́ kɔ́ həɠə, ə nu ɓalo mɛ̨nį lɔ nwuɔ̨ a kɔ́ kɔ́ ɓɔlɔ, ə nwąnąkulɔ mɛ̨nį too gwąną a ŋɛ̨ kilɛn ɉəɠə, ə tolo kɛ a gɔn mą gbaawii.

¹⁸ Bələi lɔ da túwɔ́ la, bələ lɔ ɓə da di hvɛla kulɔ la, ə líiholi hee nuąi da tɔɔ na diɛ, yɛ nwąną kulɔ ɲowoɠaa diɛ. Gaa pai nwąną kulɔi gboloyá hɛ̨ąi lɔiɠaa diɛ.

¹⁹ A kɛ tii, da ɲɔw kɛa Yai-Laa Laa ɓa, hvóló tooi pələ, ə lɛɛ diɛ ɲɔw nwɔ mąąwiɛlaa ɓa hvóló ɓɛlai pələ. Mąąhɔlɔɓo, gaa pai pai yɛ ya hvɛɛi, Yai-Laa nɔ̨ɔ̨ yɛ hee mą.

²⁰ Kɛlaa, gaa pai pai Siɔn taa pɔ, yɛ kɛ a nwun mąąɓomun, da Ɉakɔbə lonnii yiiɠaai da di kɔ́wɔ kulɔ, kulɔ nwoo mu laa hu. Yai-Laa woo li.

²¹ Yai-Laa yɛ diɛi: «Mįnɛ̨i kwa diɛni ku kaa pai ɉəɠəi, ya ka: Nwɔ́ Kilii kaa pai kɛi ká mɛ̨i, da nwooɠaai ŋį́ bu ə́ lá, di mąą hvo pai kwɛai ə́ laa lee ɓa, di mąą hva nwɔ̨nɔ̨ kwɛa ə́ lonnii laaləi ɓa, ə mą kɛ, ə́ lonnii di wɔɔ lonnii laaləi, ə həɠə yiihu ɓa, ɛlɛɛ kpɔ ɉu, wɔlɔ wɔlɔ ɓa. Yai-Laa woo li.