Azaya 57 - Yálá laawoo hɛɓɛ (dc)1 Tələnmo lon a haa, nu ta hva yili kaa a mɛ̨nį wala wala, da nu lɛlɛɛɠaa həɠə di yəi bɛlɛ́n, ɛlɛɛ, nu ta hva gaa yɛ kɛ, kili ɲɔ̨nwɔ̨ɔ̨ ka tii a gɛ, diɛ tələnmomun nwuɔ̨. 2 Kɛlaa, liilaa yələ kaa pai, nuąi da hiɛ a ɉąŋąą, di kaa pai kɛi laai di yəi gbin ɲą a di wəli pulu laɠiɛ. 3 Ka wɛi, 'ka lɛɠɛɓɛ, dɔlu kpɛ nɛ̨ɛ̨nu lonnii, wɛli hon ɉilɛnu, da wɛlikɛnɛ̨ɛ̨nu di lon. 4 Gbɛɛ ɓə ka káá yɛ́lɛ́i mą? Gbɛɛ ɓə ka káá hvaai mɛ̨i yaɠa yaɠa? Kaa ka laa pu ɉu? Gulɔ nwoomu lɛapɛlɛɛi hva mɔ̨ɔ̨ a kaa? A nu ɓowo nuąi? 5 Ka ka lii muhəɠə lɔwɔ ɲɔ̨n gəlee mu, ɓɛi lɔpee wulu kpɛa-kpɛa laa mąą kaa laa, kaa lɛapɛlɛɛ paa ɓoloonŋąą hu, da kwɛni woloɠaa hu. 6 Ɓoloon ɉu kwɛniɠaa, mąą lalaa kpɔlɔɔ kpɔlɔɔɠaa ɓə a ə́ liiɓa hɛn, ə́ wɛi li, diɛ kpɔ ɓaa a ə́ wɛi, a ə́ hɔlɔɓo hɛn! Diɛ ɓə ya di kɔ́ a lɔɔ, diɛ ɓə ya di kɔ́ a haláá hɛnŋąą! Ŋį́ pɛli nííɓa mɛ̨nį kaai ləi mɛ̨nįi tii hu? 7 Ya ə́ laa gbin bɛli yee tɔɔɠaa nwuɔ̨, nąą ɓə ya tɛ laa, yɛ́ hɛlaa kulɔ laa. 8 Gbon bulu, ɉoŋon ɉu, nąą ɓə, ə́ wɔ halii laa laa. Ə́ gɛ tii, ə́ ə́ mąą kwɛa mą́ą́, ə́ ə́ kpuwulu ɓo, ə́ tɛ, ə́ ə́ laai pɛli a ɲąą kɛnɛ̨; nuąi tii di laai wɛli kaa yɛ́, ka diɛ nii ka pɛli ɉu kpɔ a ɲąą nɛ̨ɛ̨, yɛ́ ə́ lii pɔ wɔlɔ ka diɛni ka laa mɛ̨nį ɓa, ə́ ɲɛ̨i həɛ mąąnįnįn mą! 9 Ə́ kɛi li a gilɛ tɔɔmun bɔ pələ, wulɔ lɔɔ yɛ́, yɛ́ ə́ wɔ mąąti wulɔ kunnɛ̨ɛ̨ɠaa lɔ yɛ́ pɔlɔɔ pɔlɔɔ, yɛ́ nuą tɔɔ kpɔ kwɛala, bələ ɓə ə́ ə́ kpɔwɔ mąą yɛɛ la, kpɔ yɛ́ həli la ɲąmuą taa pələ. 10 Ə́ ə́ kpɔwɔ hvii kpɛɛ a ɉiɛ tamąąi tii, Kɛlaa, hvó kɛli diɛ: «Nąą aa kala kɛa!» Yaa hvąŋą nįnɛ̨ hɔlɔɓo, yili mąą mɛ̨nį ɓa, ə́ hvii hvo kpɛɛ li. 11 Gbɛɛ ɓə ə́ kɛi ɲɔw mą, yɛ́ mówo kpɔ tii? Yai ə́ lənə la mą́ą́? Yai gíli hvo mą kɛa lɛɛ ə́ ɲąą? Nwɛ́i, ɉu aa kɛa, və́ kwɛi hvaa ə́ pɔ, hvo kɛ tii? Nąąlɔwai, hvó kɛli kɛa mą́ą́wiɛ. 12 Kɛlaa nwɛi, gáá pai ə́ «təlimo mɛ̨nį hukulɔi», ɛlɛɛ, ə́ kɛ kóló ta tɔlɔ hvo pai həlii yɛ́. 13 Ya kɛi wɔlɔ, 'mo ə́ wɔ háli kpulu tamąąi tii diɛ, di ə́ ɓalo! Hvaŋą kaa pai lii a gəlee, hvaŋą hvolɛɛ kaa pai di kulɔi laa. Kɛlaa, nui a gilitɔɔ mą́ą́, gaa pai lɔi hɔlɔɓoi a gwɛlin, yɛ ŋį́ Yee mąąhəɠɛɛi hɔlɔɓo a nwɔɔ. Liilaa woo 14 Di kaa pai kɛi diɛi: 'Ka bələ pɛli, 'ka ɲąą kɛnɛ̨, 'ka hɛn gəlee həɠə nwɔ́ nuąi tɛɛ pələ hu. 15 Mąąhɔlɔɓo, nui kpɔ gaa yələi kwɛala, mɛ̨nįi gaa moi ya ka, yai gaa laa a yələ kəlee, ɛlɛɛ naa kaa a mąąhəɠɛɛ. Gáá yələi kwɛaala, mą́ą́həɠɛɛ, ŋą́ ɓo lɔ nwɔ̨nɔ̨ a nui daa hee mɛ̨i, dɔɔ bulu, yai a kɛ giliɲąhiɛi, yɛ kɛ daa mɛlɛ kpɛɛ mą, nuąi yiiɠaai di kaa di nwumɛ̨i, gɛ́ di hvąŋąlɔ, nuąi daa di lii yali di kwəi, gɛ́ di nįįlɔ. 16 Mąąhɔlɔɓo, və́ pai hvaa pɛlɛi kaa a yələ kəlee mɛ̨nį, və́ pai kąną ɉii ŋą́ lii hvolii ɓa, ŋą́ gɛ nəi tii, nuąi ŋį́ di pɛli, di nɔ̨ɔ̨ da di nį́į́ a nəi kulɔ di hu. 17 Israɛlə nwɔ wɛa mɛ̨nį ɲɔ̨nwɔ̨ pələ ɓə níí holi, ŋį́ gɛlɛ, ŋį́ búlu tínɛ̨n mą, níi hvoli kɛ, yaan, ə nwóó pili, yɛ hvilɛn niiɓa pələ mɛ̨i. 18 Ŋą́ dúwɔ́ pələɠaai tii kaa, ə mą kɛ tii, gáá pai maloi, gɛ́ dənən dɔɔ, gɛ́ vąŋą lɔ, yaa mąn da nwɔ nuąi di kaa ɲɛ̨iya hui. 19 Gɛ́ kwəinɛ̨ɛ̨ wələ lɔ di la. Yai-Laa yɛ diɛ: Liilaa, liilaa 'ə kɛ nui kwɛala mą, 'ə kɛ lɔ nwɔ̨nɔ̨ kpuɔlamun mą, a tɛ̨ą, gáá pai di ɓaloi! 20 Kɛlaa, nu ɲɔ̨nwɔ̨ɔ̨ɠaa kaa yɛ gboloyá nwąną a kulɔ, hva pɛli heei tin, ɲaɠaa diɛ palaya da kalaɠaa tɛ yələi. 21 Nwɔ́ Yálái yɛ diɛ: «Liilaa hva hɔlɔɓo mɛ̨nį ɲɔ̨n gɛ nuąi yəi.» |