Azaya 56 - Yálá laawoo hɛɓɛ (dc)

Mɛ̨nį vəəlɛną Yálá nwɔ pɛlɛi kaa a nu kəlee nwɔɔ

¹ Yai-Laa woo ka, yɛ diɛ: «'Ka hiɛ a ɉaŋąą, ka tələnmo yii ɓo, mąąhɔlɔɓo, nwɔ́ ɓalo mɛ̨nįi pa hiɛ li, nwɔ́ tələnmolaai yɛ pa kulɔi pɔ̨nɔ̨ ŋą.

² Nu a túwɔ tii a ganąn bələ mą́ą́, mąą nu kaa a lúwɔ lon, yai hva vitɔɔ yələ mąą kala, Kɛlaa yɛ mąąhəɠə, ɛlɛɛ, hva ɲee too mɛ̨nį ɲɔ̨n lɔpee da hu.»

³ Nweąi a hvilɛn Yai-Laa pɔ, mąą hvo nɛ̨ɛ̨li hvo tɔɔ yɛ kɛ diɛ: «Yai-Laa kaa pai gúlɔi nwɔ nuąi lɔwai ɉəɠə mąą hvo mą.» Ɛlɛɛ, gbɛtɛ kpuwulu hvo kɛ diɛ: «Nwɛi gáá a wulu kpala.»

⁴ Mąąhɔlɔɓo, mɛ̨nįi Yai-Laa kaa moi ya ka: Gbɛtɛ kpuluwuluɠaa da kɛi nwɔ́ hvitɔɔ hvólóɠaai mąąhəɠə, di liiɓa ə ɓo a nííɓa mɛ̨nįɠaa kɛɛ, diɛ lɛɛ nwɔ́ mįnɛ̨i pulu,

⁵ gáá pai ɉələŋąn dɔɔi di mąą mɛ̨nį ɓa, gɛ́ laa tɛɛ di pɔ ɲə́i bɛlɛ́n, bɔ́ɔ́li; yili hviɛlaɓoɔi lon ɉinąą da lon nɛ̨ąą diɛ, gáá laa ta pɛ̨ɛ̨i diɛ a yələ kəlee da nwɔɔ, di hva gulɔ laa a yələi lɔpee ta.

⁶ Nweąąi da kanąn Yai-Laa ɓa, di yee ə ɓo nwɔ kólóɠaai diɛ, diɛ naa wɛli la kɛ, diɛ di kpɔwɔ kɛ a nwɔ kóló kɛ nuą, nuąi kpɔ da vįitɔɔ yələ mąąhəɠə, di hva ɲali, ɛlɛɛ, diɛ lɛɛ nwɔ́ mįnɛ̨i pulu,

⁷ gáá pai pai a diɛ nwɔ́ yee mąąhəɠɛɛi nwuɔ̨, gɛ́ di hee nwun na nɛ̨ɛ̨ hu, ɲə́i bɛlɛ́n; ɓɛi da vɛ́li laa, diɛ mą́ą́wiɛ halááɠaa da di wɔ kɔ́ɓo hɛnŋąą tɛɛ laa, ŋį́ ɲéé lɛlɛɛ hee di mu, ɉaláá kulɔi ɓa, mąąhɔlɔɓo, di kaa pai nwɔ́ pɛlɛ́i laa heei a: «Pɛlɛi huwu kəlee a Yálá hvɛli mu.»

⁸ Mɛ̨nį kəlee ŋą Hééɓomun Yálá woo ka, yai a Israɛlə lonnii tii luwɔlaa hu di ɲąąkpɔn, yɛ: Yiiɠaai daa gbɛa di ɲąąkpɔn ɓɛ, ŋį́ pa nwɔ̨nɔ̨ a dakpɛliɠaa, gɛ di pɛlɛ diɛ.

Ɲɛi tɔwɔ nuą ɲɔ̨nwɔ̨ɔ̨ɠaa

⁹ Lɔwɔ huwɔɠaa kəlee, 'ka pa, 'ka pa ka pilɛ, ə mą kɛ kaai kpɔ a kpomói huwɔɠaa.

¹⁰ Ɲɛ̨ipu nuą ɓə di ɲɛ̨i kɛi Israɛlə taa ɓa, nu kəlee di pɛlɛɛ di kee ɓa, di ta hvo mɛ̨nį kɔ́lɔn, munųgbɛ yilɛɠaa ɓaa diɛ, di hva pɛli kpəɠii, di kaa puuni, diɛ di kiliŋąhiɛ lɔ tii, yii mɛ̨nį lɔ ɓə nwɛli kaa diɛ,

¹¹ Ɛlɛɛ, di kaa lɔ nwɔ̨nɔ̨ a yilɛɠaai di kwaną wolo hu kɛnɛ̨ɛ̨, di hva pɛli kɛi diɛ: «Aa pɛli.» Ɛlɛɛ, diɛ ɓə a daatɛlɛɛ pulu nuą, di hva mɛ̨nį kpaɠala kaa, di kəlee di ɲɛ̨i haŋąą lɔ di kpɔwɔ pələɠaa pɔ pələ, diɛ li ɓɛi di wɔ tɔ̨nɔ̨ kaa laa; diɛ hvo kɛi lɔ da ɉɔlɔɓo.

¹² Di woo laa diɛ, 'ka pa, ku kaa lii pai a lɔɔ, lɔɔ kpəɠiɛɠaa ɓə gu kaa pai pilɛi ɉu, gwa tinąą gɛ lɔ yɛ háákəlee; gbəli kaa pai lɛɛi kpɔ kɛnɛ̨.