Azaya 55 - Yálá laawoo hɛɓɛ (dc)

Yálá kaa nwɔ nuąi təlii diɛ naawoo kɛ a di kɔ̨nɔ̨

¹ Kaai kpɔ kpələ wɛli kaa kaa, 'ka pa ya kɛɛnąą; ə mą kɛ nu ta kaa laa wali hvo ɲəi, ka pa lɔ, 'ka kɔ̨nɔ̨n vɛli, ka ka laa mįi, 'ka pa ka ka kpələ, yɛ ə kɛ a lɔɔ a wala kɛti nįŋɛ̨ ɲįnįya; wali mɛ̨nį hvo ɉu, hɛn da ya mɛ̨nį hvo ɉu.

² Lə mɛ̨nį ɓa yai ka ka wɔ walii hukala, ɉɛn hvo a kɔ̨nɔ̨n bulu, kaa kóló kɛ ɉɛn hva nu pilɛ bulu? 'Ka ka wəli tɔɔ, ka nwóó mɛ̨n, ɛlɛɛ, kaa pɛli kɔ̨nɔ̨n mįi, kaa pɛli ka lii hon gɔ̨nɔ̨n nɛɛɠaa mįi.

³ 'Ka ka wəli tɔɔ, 'ka pa bɔ́ pələ; 'ka ka wəli tɔɔ, ka ɓalo, gáá pai mįnɛ̨ laai gwa kaa ni gu lɔwai, a hvóló kəlee da nwɔɔ; mɛ̨inɛ̨ɛ̨ɠaai ŋį́ di laakwɛlanmo Davidə ɓa, gɛ́ di kɛ.

⁴ Hvo gaai ŋą́ą́ gɛ a kɛlahvaa ɓomun nu takpɛliɠaa diɛ, a ɲąąwooɓo kɛ mun, a lɔiɠaa tənən dɔɔ mun.

⁵ Mąąhɔlɔɓo, nu huwui hvo kɛ gɔlɔn, ə́ kaa pai dəlii, ɛlɛɛ, nu huwui hvo ə́ kɔ́lɔn, yɛ ə́ mąą gilɛ hələ. Yili a kɛ tii, mąąhɔlɔɓo, Yai-Laa ɓə a ə́ wɔ Yálá, a kɛ tii Israɛlə nwɔ mąąhəɠə mun laa hu, a yai tii ə́ wɔ mąąwiɛ kɛ yɛ́i.

⁶ 'Ka Yai-Laa kwɛli, ɓɛlɔwai, a gbɔwɔ lɛɛ laa diɛ gaa, 'ka dəli, ɓɛlɔwai, nɛɠɛɛi la kaa.

⁷ Nu ɲɔ̨nwɔ̨ɔ̨ ə həɠə dúwɔ pələi tii pulu, mɛ̨nį ɲɔ̨n gɛ mun, ə həɠə gwəi kili ɲɔ̨nwɔ̨ɔ̨ɠaa pulu. Ə pənə ə pa Yai-Laa pɔ pələ, yili kaa pai nwɔ wɛlikɛmąąlaa lɛi mą, ə pənə ə pa guɔ Yálái pɔ, gwəinɛ̨ɛ̨ ɓə kɛnɛ̨ nu mąąhvaalɛɛi.

⁸ Ka kwəi kiliɠaa di hvo yɛ gwə́i kiliɠaa, ka yii pələɠaa di hvo yɛ wɛ́iɠaai, Yai-Laa woo li.

⁹ Bələi lɔ yələkɔlɔn mąą kwɛaa la lɔi ɓa, bələ lɔ ɓə nwɔ́ pələɠaai mąą kwɛaa la ka yii pələɠaai diɛ, ɛlɛɛ, gwə́i kiliɠaa mąą kwɛaa lɔ tii ka kwəi kiliɠaa diɛ.

¹⁰ Bələi lɔ tulɔ a wala kɛti nąląąn a yɛɛ la, yɛ həɠə yələi, ɛlɛɛ di hva kɛa pənə di hvo tɛ yələi pələ, akɛ di hvo lɔi yɔwɔ li, di gɛ ə ɓa, mɔ̨nun diliin yɛ kulɔ, hvo kɛi da gbɛa mɔ̨nun ɉuwu tɛɛ tíi kɛ mun bɔ, diɛ kɔ̨nɔ̨n dɛɛ nu yɛ mįi,

¹¹ bələ lɔ ɓə nááwoo a túwɔ la, ɓɛlɔwai a kulɔ la ná, hva pənə hvo pa bɔ́ kpɛli kpɛli, yii hvo kóló kɛ li, Kɛlaa, mɛ̨nįɠaai kpɔ gáá bɔ, a gəlee kɛ, ɛlɛɛ, gólóɠaai kpɔ ŋį́ dɛɛ di kɛ mɛ̨nį ɓa, a gəlee ɲɛ̨i kulɔ.

¹² Mąąhɔlɔɓo, ka káá pai kulɔi a ka kwəinɛ̨ɛ̨, kaa pənə kaa li a ka wəli pulu laɠiɛ, yee tɔɔɠaa da yee kpukpuɠaa, di kaa pai tómąi a kwəinɛ̨ɛ̨, ka tɛɛ pələɠaa hu, kpomó hu wuluɠaa kəlee diɛ di yee lɔwai kaa.

¹³ Towələ wuluɠaa kaa pai ɓɔn ɉii, ɓɛi ɲąąlən ə kɛ laa; tow yɛ kulɔ ɓɛi didi-hɔ̨ɔ̨-hɔ̨ɔ̨ ə kɛ laa, yili kaa pai kɛi a Yai-Laa laa tɛ mɛ̨nį, a gɔlɔn ɉɛn, a yələ kəlee da nwɔɔ, gili hva kpɛɛ nuą ŋą.